譚生的日遊記

第一日: 初踏異國

因為要坐半夜機, 係屋企食飽梳洗好先去坐巴士到香港國際機場, 不過都重係太早。你地睇下大鼻同舊舊係度傾計打發時間, 又玩IQ題, 睇下大鼻一大個問號係頭頂就知大鼻唔識喇。

到左凌晨三點幾, 卒之都上到機, 原來都有幾十人架; 到第二朝一早就抵達大阪關西空港, 落左機出埋海關就去換埋火車証, 由關西空港去大阪, 再去金澤。但係一聽到要坐吸煙卡去金澤, 已經暈左一大半。去到月台, 咦! 原來都幾多人坐早車呢, 呢個大叔可能都係趕完機過黎又再轉車, 居然係月台做起鬆弛運動, 真係有趣! 呢呢呢, 就係呢架喇, 好有型呢, 埋站喇!

經過左三個幾鐘係煙囪裡閉關, 落車時我想如果可以將煙係全身既毛孔噴番出黎的話, 唔係誇張, 大概都應該有兩包煙咁多。一出車站, 即刻上的士去香林坊東急酒店, 上左車拐左拐右, 唔使五分鐘就到, 嘩, 盛惠一千八百日元; 日本既的士收費果然厲害。登記好上房, 第一時間入浴室由頭沖洗到腳趾尾, 希望將之前吸收既尼古丁沖出來。

稍為休息一下, 見到天色唔錯, 即刻走落街逛下順便醫肚, 一走就入左對面既大和百貨, 直上頂樓既美食廣場, 見到一份甜蝦定食, 居然只係六百八十日元, 重望到出面既公園, 即時就入去坐低, 雖然未係紅葉最靚既時候, 但過下心癮都好。食飽左就係側面既JTB訂定溫泉旅館, 我地同伯伯雖然唔係好暢順咁溝通, 但佢都仍然好耐心, 熱心咁幫我地, 真係令人感動。

之後就落街行左去金澤市老舖紀念館, 即係好似一間小型既民化博物館, 有屋企擺設, 舖頭既擺設咁, 地方唔係好大, 而且唔係話好有代表性, 不過我留意到如果紅葉係時候既話, 個庭園應該幾有睇頭。

再跟住行去武家屋敷跡同高田家跡, 即係一個係以前武士同屋企人居住既區域, 個布局好得意架, 一路行路睇, 你地睇下地下既標誌會想起咩野? 我就淨係想到一休既新佑衛門叔叔, 同埋水戶黃門既"跪低! 快的跪低! 你地睇下呢個係咩野兵符? 其實呢位老人家就係 ...... "

之後去左市場行下, 睇睇的蟹, 成隻都係由三千日元起, 都咪話唔低食。當然, 有平亦有貴, 基本上都係任君選擇既。市場裡重遇到書仔入面介紹既老闆, 係度請人試食醃蝦添呢!

第二日: 桃花源

一早就起身坐巴士去火車站, 第一次搭係中途上車都真係有的論盡! 嘻嘻, 原來係要係車尾上車時, 羅定一張調整券, 到落車時對返個計分牌就可以, 等我地重傻傻下無羅添! 攪到落車時要俾的錢巴士哥哥幫我地入, 真係唔好意思喇!! 去到火車站, 附近有大工程呢, 不過仍然都重可以維護得咁整潔, 都真係唔錯。入左火車站, 本來諗住試下係提款機羅錢, 你地睇下, 係金澤火車站既提款機站, 已經有成接近十間唔同銀行既提款機, 間間都係有 plus 標誌, 但係就試勻晒都無辦法成功呢!

試過羅唔到錢, 就放棄跟住走去買野食, 因為要坐幾耐車, 又未食早餐, 所以買定的打下底。其實今日咁早起身, 目的地係去白川鄉, 早上都有少少涼架, 你地睇下大鼻包到實晒得番對眼喇! 買左幾隻香軟麵包同飲品後, 就行番出火車站側既巴士站買巴士飛, 不過問問下發覺原來要預訂既, 好彩個營業員哥哥好人, 肯幫我地即刻訂即刻上; 再加上我地早, 班車重有位, 咁就上左巴士。

去到重好早, 車站都無人咁滯, 睇下個旅遊中心同公共洗手間! 呀! 個洗手間重有自動門添架! 跟住就行入村, 先要行過吊橋; 咪以為條吊橋係水泥面就好穩定呢, 行上去都識左搖右擺架。你地睇下的合掌造, 幾靚! 必去既地方有: 明善寺鄉土館, 展望台。各位團友, 先望下你地既左手邊個水龍頭, 跟住睇下右小便既轉轉樹!

係展望台睇落黎, 一間間屋仔好似樂高玩具咁呢, 睇下的一幅幅既田, 拼湊成一個非常美麗既構圖呢! 睇完遠景就落番山, 行入村再細意欣賞, 沿途重見到有人寫生添架, 畫得好靚架, 不過我唔敢走太埋影, 以免騷擾佢呢!

跟住一路行番去鄉土館, 想要入去就先要換鞋呢, 不過大鼻就無鞋著喇! 屋內好靚好好睇架, 的擺設, 炊具, 家具都齊備, 樣樣都好有歷史味道呢! 出番黎俾的香味吸引左, 沿住佢去搵, 原來係有間屋之後既天井, 有一小檔買燒年榚物體既店, 佢燒左之後, 再加上一的燒汁, 食落口, 脆皮軟心香濃汁, 真係好好味道呢。

到甘唔多行晒都已經係下午, 先去番車站附近既烏冬店食午飯, 跟住就要等車返金澤, 但因為班次都幾疏落, 我地有大把時間慢慢食, 食完又可慢慢行。係車站附近草叢, 重俾我地搵到呢的咁大隻既葫蘆瓜添! 行極架車都係未夠鐘黎, 四周又回復平靜, 就好似我地早上剛抵達既時候一樣。而且由於太陽亦開始西下, 開始有少少微涼, 我地要搵個花圃處坐下, 稍稍遮擋涼風。如果要選擇呢處遊覽, 應該自己駕車會好的, 因為可免卻等車之苦。

到返到金澤, 其實都已經入黑, 我地上樓放低物件, 先再落番黎吃晚飯, 之後就逛一下便利店就返酒店休息。

第三日: 絕岳之巔

今日都係一早要起身, 因為要坐好多程既車上立山, 首先要坐一程火車去富山, 去到富山, 先買左跟住個程上立山既火車飛, 然後係火車站外行下, 忽然見到有間店居然有松茸漢堡賣! 松茸播, 平時係超級市場最便宜個條都要三數千日元呢, 貴起上來二三萬一枝都有, 依家幾百日元可以吃到, 當然要立刻試下喇。嘩! 一試好味到呢, 差唔多食完之時, 望下架車, 車長先生已經走上駕駛室, 車長等埋我地呀!

追到上火車, 跟住就都要成個鐘頭先可以去到立山, 抵達立山, 出站已經有職員通知大家往上走轉纜車。雖然我唔知佢地係講咩野, 不過大約都係咁上下意思。其實係轉車之前, 都要先到售票處買票, 票既形式係可以成個立山黑部既路線去買, 亦可以一程一程單獨咁買。我地由於只係一日遊驚唔夠時間, 所以只係買到去室堂平既來回票。其實一開始時有考慮過係室堂或弥陀ヶ原留宿一晚, 不過又怕唔知點處置的行李, 始終抬住大件細件上山落山都唔係咁盞, 所以都係即日遊算。

等纜車上美女平時都幾多人, 要比較親密咁排係條樓梯型月台上, 到架纜車黎到, 發覺原來入面都係樓梯型呢, 好得意呀。我地迫左係近車前位置既門口, 想轉身搵相機影下相都唔得呢, 情況應該同朝早上班時間係新宿坐山手線咁。只係幾分鐘就去到美女平, 一出車已經見到有牌仔寫住下班巴士係幾點開出, 重有時間, 先去整番枝香濃鮮奶, 呢個係好多書仔都有介紹既名物之一。之後上屋頂展望台睇下風景, 望下纜車, 都好靚架。

到差唔多夠鐘, 見有人係巴士站前排隊, 於是跟住人排隊。巴士開左咁上下, 車長講野播, 重將架車慢落黎, 咦! 唔通壞車? 哦! 原來係話俾大家聽呢個位見到称名滝, 一條好出名既瀑布, 呢個位就係上山時比較好既觀賞位置。巴士搖下搖下卒之去到弥陀ヶ原, 呢度既景色又好唔同係美女平, 無晒高既樹, 只得番矮矮既灌木。整個景觀變得更開揚, 好廣闊, 加上個間酒店既形狀, 個感覺真係幾似我睇過瑞士既風景明信片。不過我地既目的地係室堂, 所以無落車繼續上路。其實弥陀ヶ原到室堂相距都唔係好遠, 感覺上好似係轉幾個彎已經抵達。

上到山頂, 梗係要去立山玉殿の湧水度飲番啖解下渴, 潔淨下心靈先喇, 不過真係千祈唔好貪心多飲, 因為始終係山上既雪水, 比較寒涼呢。跟住行去みくりが池, 呢度好美啊; 池水好平靜, 倒映左山景同天空, 感覺疑幻疑真呢! 我地似乎陶醉左係美景之下, 連大鼻由袋中爬出黎都唔知, 差的漏低左佢呢, 好彩係一影相發覺唔見左佢, 向途經既路回望, 已經有好心人將佢好穩妥咁坐左係路旁呢, 嚇得我地呢死下死下, 之後都係俾條安全帶佢縛緊。跟住就以身犯險行落地獄 ... 谷, 嘻嘻! 呢度個景致都幾特別既, 有時好多硫磺煙, 好大硫磺味, 四周又寸草不生, 同山上其他地方好唔同。一路向下走都好容易, 向番上走就真係要付出的努力先可以, 同埋記住唔好行太快呢, 因為呢度都有二千幾公尺海拔, 雖然唔算好高, 但穩陣計都要俾少少時間個身體適應番。

上番車站就去醫肚, 選擇並唔係太多, 咖啡室, 定食之類, 我地都係求其平平地填飽肚就算呢。之後就行下手信區, 有隻食品係幾好食, 叫星の雫, 係一的糖霜咁之類包住粒花生, 會食到唔停得口, 重要係室堂限定呢。所以我地都買左幾盒做手信, 咁當然都有試食到有的唔好意思喇。本來有想過坐山洞電巴士去大觀峰, 但望到價錢同時間既比例都只有卻步, 只係短短十分鐘既車程, 就要多二千多日元, 而且過左去要立刻回程, 如果唔係就要係被岸過夜呢, 剩下既一段唯有安慰自己留待下次。

坐下影下相又夠鐘回程, 路上係經過美女平時存留意識要飲多枝鮮奶, 重要係熱既, 其他時間都只係迷迷糊糊訓住覺咁上車落車, 好彩地無驚無險返到金澤, 已經係入黑, 酒店附近既紅燈區夜店都已經活躍起來, 我地就只係入百貨公司掃左的減價飯糰, 甜品就返酒店大食會, 同埋早的訓。

第四日: 遊園

訓到夠晒喇, 將尋日上山時虛耗既能量補充得咁上下先至起身, 望下街外, 天色都尚算可以於是我地決定去兼六園。吃過早餐, 就步行往兼六園, 腳程大概二十分鐘左右, 路上唔係太多車, 又有樹木花草, 慢慢行都幾舒服。沿路其實都有好多遊人係向住相同既方向, 不過去到園裡, 又唔會話好擠迫, 可能因為園子都真係好大。

呢個兼六園, 其實都有的來頭, 佢係日本三大名園之一, 出名於佢園內既佈局, 內裡既池, 假山, 橋, 園藝都係細心咁佈置。大家睇下的松樹幾靚, 個的柱呀, 拉繩呀, 係要黎定住的松樹, 等落雪時唔會壓斷的松枝; 同埋定左型, 冬天來臨時雪掛就會更有型態。呢呢呢, 呢個就係石燈籠, 呢個景都好出名架, 好多時旅遊資料都係呢個例景! 有樣野其實好奇怪, 園藝呢個概念應該都係由中國傳入, 但人地係可以將佢係現代社會發展得咁好, 佈置得好窩心, 好體貼, 想你見既野你一定睇到, 唔想你見既就真係要好著意先搵到出黎; 反觀我國現時一般既遊樂地, 有時的園藝真係慘不忍睹。

跟住行左去後面既石川門, 一路條街好多野買架! 又有野食, 又有野買, 的燒餅熱刺刺, 好香又好味架! 沿住路行穿過石川門就會進入金澤城既範圍, 入面又係一個大公園, 雖然金澤城樓本身唔係好大, 但圍繞住既地方要行都可以行好耐, 我地就係咁慢慢行, 睇下野, 影下相就打發埋個下午, 好似好悠閒既退休人士咁呢。

回程時就路經中央公園, 裡面既紅葉似乎比其他地點更急不及待要同大家見面呢。其實呢樣野係第一日抵達金澤時已經發現, 我地係百貨公司既食事處望過黎覺得都呢度好靚, 可能係因為第一個見到紅葉既地點掛。行到夠就上番酒店休息, 因為呢幾日來實在行左太多路。一覺醒來都已經係晚上, 晚餐都只係去酒店附近既咖哩飯店就完成, 不過見大和既超市未收, 即刻衝入去搵返的甜品, 令晚餐變得完整的。

第五日: 大鄉里出城

今日要離開金澤, 不過先去一下係金澤既一個出名觀光點 - 茶屋街。跟住書仔指示, 係酒店出黎既巴士站係有巴士去到既, 出到去巴士站, 發覺日本既巴士系統真係幾完善, 係站內有指示話俾乘客聽幾號巴士去到咩野站, 將會於幾多分鐘抵達, 等你唔使望極都唔知架車幾時黎。噢! 差的掛住睇, 車黎都唔知添, 好彩趕得切。

落左車, 過左對面馬路, 見到呢張東東, 大家估下佢係咩野? 其實係一張係巴士站俾人坐, 等巴士既, 係咪好靚呢? 入到ひがし茶屋街, 哎呀! 咁靜既? 重落幾粒雨添! 不過落雨亦有落雨既特色, 都幾靚架! 後尾睇番原來條街有好幾間舖係平日休息既, 所以各位要留意番喇! 之不過都重有的店舖既, 特色既有面油紙, 唔好以為係普通野, 呢度既面油紙係大有名堂, 係金泊面油紙呢! 拿, 唔知岩唔岩, 不過聽回來既故事就話, 呢度既天氣係潮濕, 最適合做打金工序, 咁打金時要有張紙去墊住以令工序更細膩, 手工更細緻, 墊底既紙後來亦應運而生成為面油紙呢。另外, 呢度既天氣亦係適合做漆器, 所以亦有附近既名物 - 輪島塗。

講完故仔, 睇番條茶屋街, 呢度古色古香, 夾道都係的兩層既樓房, 個樣就好似睇日本古裝戲, 的人夜遊時既酒館街咁, 樓上既窗戶都有的板間, 如果真係係當時, 應該係幾有風情既地方呢。呢度最出名既應該係一間叫志摩既茶屋, 因為佢係一間被定為文化遺產既地方, 除些之外, 我想大概係因為我地識除志摩掛, 嘻嘻! 其實係唔關事既。本來都想入志摩嘆番杯茶, 不過見已經有的人排緊隊, 於是放棄; 淨係走去一間店仔買左的金箔面酒紙做手信就算。出黎時又碰上落雨, 所以都係決定離開。

返到酒店執好野, 落樓辦好手續, 寄存左行李, 就出去搵食。見黎左好幾日都未試過壽司, 又見書仔話近江町市場都有野食, 一於就行去睇下, 腳程都唔使十分鐘。去到市場, 徘徊係壽司屋同迴轉店之外, 因為都幾矛盾, 又想好食但怕貴, 又驚平野唔好食, 但經反覆思量同觀察, 卒之都係入左迴轉店, 因為見到佢都大致坐滿客, 而且係陸陸續續有客人進出, 應該係有保證。入到店內, 亞掌櫃都好好熱情咁招呼。實不相瞞, 我真係第一次入迴轉店食壽司, 係香港我一直都好難理解點會成日排大隊; 咁掌櫃可能見我地木木地, 又走埋黎教我地沖茶, 又教我地羅醬油山葵, 羅第一碟係甜蝦, 咬落去係鮮甜爽脆, 真係好似書仔通常形容既會咔嚓咔嚓咁。係呢度食過之後, 返香港既迴轉店比對下價錢, 再望到佢地既經營模式, 我就更加唔會係香港去食迴轉店。

午餐過後, 係酒店帶齊行李, 就出發去我地跟住既目的地加賀溫泉鄉其中既山中溫泉。北陸本線由金澤出發, 大概半小時已經可以去到加賀温泉, 但之後要再坐巴士大概半小時, 其實路程唔係咁遠, 只不過公共巴士要停站先會咁, 坐的士或酒店迎送都係十五分鐘左右。附近都有其他溫泉, 你可能會問點解要揀個咁遠? 主要原因係我見到山中係係一個大山谷入面, 可以有的山仔行下, 我覺得可以遠離凡囂, 應該會舒服的。講番路程, 係火車上當你見到一個大觀音像時, 即係表示你已經到左加賀, 真係幾易認, 但有無朋友知道點解好多溫泉區都有大觀音像呢? 唔知有無咩野故仔聽既呢?

我地落左火車, 已經係開始落雨, 到上左巴士雨係越來越大, 巴士到左山中, 直頭係哇啦哇啦咁落, 企埋一邊等左一陣見佢細左, 就依照之前巴士叔叔既指示行過去, 但好不幸係重有一百碼左右既路, 個天又唔鐘意我, 又落大左。但呢個時候, 令人感動既一幕出現喇, 旅館既職員遠遠見到我地行緊黎, 佢地唔理自己係著住木屐咁唔方便, 都幾個人快步擔幾把大遮出黎幫我地遮雨, 入左門口, 重遞上毛巾俾我地抹乾, 真係周到呢。唔記得講番我地住既係叫翠明, 雖然只係普通價旅館, 但服務上都係好體貼。

入到房, 我地住既只係普通房, 但向溪仔, 景觀係唔差既, 房亦幾大, 又有齊洗手間及沖涼設施。另外, 每訂一日房, 佢又送一節貸切風呂過我地, 為時一個小時。之後食飯, 我都係第一次住溫泉旅館, 重係部屋食, 嘩! 鋪天蓋地咁成張檯滿晒, 真係眼都定埋。招呼我地既係一個可愛圓圓嬸嬸, 基本上我地係唔可以用語言成功咁溝通到既, 但佢都係好耐心, 好細心咁樣樣嘗試解釋我地聽, 佢真係好用力架, 出晒汗, 又用紙寫, 又用手勢。所以, 以當時係一萬七千左右一人樣一泊兩食, 我覺得係物超所值呢!

浸埋浴, 去遊樂中心打陣機仔, 返房嘆下啤酒睇下電視, 自自然然就去同周家遊樂, 連電視都唔記得熄呢。

第六日: 山中行

一早起身, 天色叫做唔錯, 起碼無落雨, 重有陣陣朝霧, 我立刻背上所有工具去出山澗獵影。溪邊既水/霧/橋/葉, 互相映襯, 剎是好看。但可惜係缺少點點陽光, 如果唔係可以令色彩更濃厚。

返旅館房食過早餐, 又再出去, 先搭觀光循環線巴士去最遠既柏野大杉, 呢度有幾棵老樹, 好有古樸風情呢。跟住坐番落平岩橋落車, 就沿住水邊行, 路上有山有水, 有樹有石, 加上陽光又動人, 真係好舒服。其中有特色既係蟋蟀橋, 橋身係木造既, 外型幾古舊, 加上葉子反映住陽光, 好好睇呢。然後跟指示行去鶴仙溪遊步道, 係靠近溪邊既一氣路徑, 有潺潺流水, 渺渺樹影, 雖然只係點點紅葉, 但仍然俾到我秋天已經來臨既感覺。順溪而下, 又再見到大大小小唔同既橋, 重要係有木造, 石造, 鐵造, 每條又有自己唔同既形態, 睇黎橋係呢度既特色建築之一呢。

係溪既旁邊, 有的地方有椅供遊人休息, 有時又可坐係的平滑既大石上, 望下流水, 成個人似乎輕起來, 水聲好似可以洗刷乾淨你對俗務既牽掛, 將你心靈上既負擔順溪流沖走, 帶遠, 釋放。另外, 鐘意攝影既朋友都要留意下有的旁支既水道, 水流慢慢走入, 偶爾又有一兩片紅葉映襯, 水係葉面沖刷/退下/沖刷, 係可以成為好有味道既小品題材呢。走著走著, 係水道旁走回山腰間, 經過一間幾堂煌既旅館, 之前做過資料搜集, 知道佢係一間幾高級既溫泉旅館 - 蝴蝶, 大家不妨留意留意。

返旅館之前, 先去超級市場打點午餐, 之後就襯旅館大部份旅客都已退房既下午時段, 即係二時左右, 走去大浴場度做豪客。嘻嘻, 因為通常呢的時間都係無人, 可以一個人包晒成個風呂呢。靜靜咁, 舒舒服服咁一個人霸住個池成個鐘, 成身都感覺輕晒, 發現原來浸浴之前運動過, 係重舒服過就咁浸浴既, 各位要去溫泉既朋友可以試試呢個模式呢, 先去行下山, 再去浸下浴。

一路訓到差不多晚餐時份, 圓圓嬸嬸又再忙碌過。的蝦係佈滿蝦子, 隻隻抱住大量蝦子, 食落係好甜美, 但感覺又好似有的殘忍, 將人地家爺仔乸全部食清。今日既晚餐豐富過、質素高過尋晚既, 後來發覺原來大部份既旅館, 如果客人係連續住宿, 通常係往後既日子晚餐係會好的既, 同埋旅館大多數會幫客人預備唔同既食物, 咁唔使客人食到厭左。

第七日: 古都初遇

係旅館食埋早餐, 就搭旅館預備既接駁車去番火車站, 咁就結束左咁舒服咁輕鬆既兩日溫泉之宿。呢兩日, 真係只有食, 訓, 行山, 浸浴, 都再無其他野滋擾, 咁既生活真係好鬼寫意, 每年都可以有幾日咁樣, 人都會長命的呀。

去到火車站, 離發車都重有一段時間, 就係車站外四處走走, 車站側係一間大型超級市場, 都幾多野賣啊! 行完出黎, 買左的輕食, 就係車站外既椅子坐底, 和風輕拂, 陽光柔美, 細意睇下街上既來來往往既行人, 有可愛既小妹妹, 得意既貓咪, 四周都係好似好和諧寧靜咁, 唔知係唔係大家都將溫泉區既寧靜帶出黎呢?

上左火車, 第一個感覺係熱, 比戶外既溫度應該都高左幾度, 真係有的唔習慣, 但其他本土人又似乎係忍耐力幾好, 重可以著住毛衣外套之類, 我地係呢種悶熱既溫度下, 只好用自我催眠大法令自己快的入夢。又熱又焗咁過左兩個小時左右, 車就係京都站到達, 大站即係大站播, 好多人呢! 我地沿中央口指示出閘, 跟住行過對面京都塔酒店, 真係好方便呢。辦好左手續放低野, 我地就先出去南禪寺, 搵我地想食既豆腐宴。去到南禪寺, 個寺門好有氣勢, 門檻好高, 好似一座城樓咁, 一種莊嚴既氣氛悠然而生。先去探下奧丹, 同埋聽松院, 睇下有咩野食。可惜聽松院咁岩係休日, 只好走進奧丹, 雖然係下午近兩點, 但都要等一下先有檯子, 係個庭園出面既露天位子, 都幾有特色, 有把紅紙傘係度襯托, 連埋的紅, 黃, 綠既葉一起, 都係好好睇。

呢度供應既係一份一份既餐, 有兩種, 一款係限量, 我地黎到已經係無晒。食完兩份普通既定食出黎, 我估我已從此愛上呢度既豆腐, 佢既胡麻豆腐, 麵豉豆腐燒, 同埋湯豆腐都係非常咁好食, 我諗我要黎多的等慢慢參透呢個豆腐禪先得喇。不過提下大家, 如果你本身唔係豆腐狂熱份子既話, 就唔好冒險去試呢, 咪結果返來鬧我就唔好喇! 嘻嘻!

跟住順道行落哲學之道, 由於已經係黃昏, 都開始有泛黃既陽光, 路上行人疏疏落落, 只有一隻黃貓兒時而在陽光取暖, 時而又在夕陽西照既樹影下驅趕小鳥。順著水道而行, 有小橋, 流水, 鳥語, 魚兒, 雖然葉子只有點點泛紅, 但已經構成幾豐富既畫面, 好貼合京都呢個古都既特色。

第八日: 嵯峨‧野

大清早就往外走, 因為要去嵐山一帶, 希望搭一下森林小火車。由京都搭上山陰本線, 好快就到左嵯峨嵐山站, 第一時間走過隔離既森林火車站, 都已經有的人排緊隊, 買左十點半左右既森林火車票, 就係車站附近走走。出車站向前行, 兩旁係一的商店及民居, 感覺都好街坊下, 發現有家係賣豆腐既, 重寫住有胡麻豆腐添, 先將佢記錄在案。由於唔想行遠, 所以只係望下的店舖, 就走回頭車站口。跟住往另一旁既小路走, 有的租單車既檔口, 好似一的貨櫃箱咁, 單車就一架架放晒入去。行遠少少就又係有的民居, 望到有間米舖呢, 入面一大包一大包米, 如果有自家車, 真係可以托包返來, 我想呢的就大概夠地道了。再行前就有指示去竹林, 但見時間都差不多上車, 只好暫且停住。

上車喇!! 嘩! 好緊張啊, 心情好似小學生等去旅行咁啊! 啊! 重可以坐到半露天既車箱添呀, 真係開心喇! 列車不住咁往山谷中走, 時而會經過保津川既水道, 可以同坐船仔既遊客們打招呼添呢。由於季節既紅葉勝景未成氣候, 沿途風景少了點綴, 變得未係太吸引, 但其實河道、山谷、植物構成既景觀都係唔差既, 只不過呢個時間坐火車可能就唔係最好既欣賞方式。

係亀岡落左車, 有間咖啡店及紀念品店, 我地先坐低嘆杯啡, 然後就係站後既一大片花花田度影相。今日既天色好藍好好睇, 加上塊花田都又係好靚, 重有個靚靚稻草人添,我地係呢度都謀殺左唔少菲林。影到夠晒就行去亀岡坐車返嵐山, 行出渡月橋, 嵐山既河邊景象又唔同坐小火車時見到既, 呢度比較開揚, 景觀闊少少。順住河堤上下遊覽, 影下船仔, 影下橋, 影下樹, 發覺有的角度似似地蘇杭添呢。之後沿大街遊蕩搵食, 不過真係花多眼亂, 攪到係條街前前後後咁行左好幾次, 卒之都係去左一間食放題既, 味道還可以, 不過係條街黎講價位係最實惠既。

食飽左又再周圍行, 呢度有間店有個古裝女士頭商標既, 似乎係好受歡迎既店舖呢, 排晒大隊, 女士們好似都係雙眼通紅咁去搶奪呢! 隔壁就有幾間食雪榚既, 的雪榚好好味呢, 大家黎開的話, 真係記住要試試啊。嘆完雪榚, 就依指示行入竹林, 個竹林其實唔係好大, 不過感覺好似好多竹咁, 聽住的風吹到竹葉沙沙聲, 跟住竹竿搖擺既咯咯聲, 個種感覺係好舒服, 好閒適既; 其間又可以行去有的位係可以見到火車軌, 用鏡頭就一下, 火車係好似係好長既竹林裡駛出來咁呢, 都幾有趣。可惜係時間已經下午, 唔係咁多光入到黎, 影相比較困難, 如果一早先行竹林, 個狀況應該會好好多呢, 我話過下次一定要再黎。

由於見時間都差唔多, 所以行番出大路, 跟住走去搵番之前記錄在案既豆腐店, 買番件胡麻豆腐, 雖然店員將叉, 豉油附上, 不過都係唔放心, 唔知係咪即食既, 於是用有限既日文問 "依馬, 太啤馬薯突是架"......... 我估的店員們頭痕左一陣, 好彩佢地都明白我問咩, 就答話OK, 咁就放心行去車站口, 搵個地方坐低食。唔, 雖然無之前奧丹個隻咁好, 但都好有芝麻味, 而且係幾滑, 很不錯呢。

第一日: 人‧物‧事

人物:

巴士 – 機場 – 飛機 – 機場 – 飛機 – 巴士, 就總結了一日行程。你地睇下舊舊面無血色就知滋味如何。

住宿: 札幌東急 (不過已經閉館了)

第二日: 雪國之初會

一早六點幾, 天都未光晒就醒左, 起身望下出面; 嘩, 有雪, 影張相先, 不過跟首又再訓過。

到起身行出街已經係十一點左右, 咁o既時間, 唯有札幌市內觀光。先盪盪下去狸小路, 行過二条市場 , 可能時間關係, 都幾靜。

跟住竄左落地下街, 行到腳仔軟, 望下錶, 三點三, 係時候醫肚, 沿路行去拉麵橫丁, 嘩, 真係好多間, 卒之揀左滿龍, 好味!

再行下街, 到咁上下, 個肚又響起警號; 咁黎到北海道, 梗係要食下蟹宴啦, 咁橋背脊就係蟹將軍, 所以唔使煩, 一於就蟹將軍。一入門口, 就要除低鞋, 跟住個和服小姐就帶我地上二樓。野食黎啦, 唔, 都唔知食咩 … 先好添。嘻嘻, 連飯後果都食埋喇。

充完電又再行下街, 到入夜, 薄野區真係好旺。

住宿: 札幌東急