第十四日: 歸
作者 : 大力卒之都去到旅程既最後一日, 今日下午就要返香港咯, 真係有的唔捨得走。不過都無法架喇, 又要再存過錢, 捱下豬仔飽滾水, 先可以再有銀彈黎玩喇。我地先去百貨公司掃的鮮貨, 不過天氣實在太炎熱, 魚生肉類一概唔敢買, 費事未上機已經變壞。
係百貨公司周圍行, 又走去試食下, 貪下小便宜, 跟住買左生果, 麵包, 同埋一的甜麵豉醬, 當然就要走去高島屋睇睇仙太郎, 有無我地好喜愛既栗子餅喇, 可惜係無既, 應該係因為未到時節。雖然無栗子餅, 但都係佢度要左幾件野, 有紅豆飯糰, 麥粉餅, 芝麻飯糰, 件件都係好味呢, 呢間既和果子真係幾巧手呢。
回程返酒店時途經便利店, 就入去買埋的限定杯麵, 跟住羅晒大袋細袋走去搭地車, 呢個地鐵站係無電梯提供既, 好彩既係向下落樓梯, 都唔使咁辛苦。去到京都站就方便的, 話晒係大站, 好多電梯同升降機。 其實本來想放係車站 locker, 然後去逛逛, 不過大型既都滿晒, 只好將行李搵個角落放低, 其中一人就走去買定到機場既車票, 順便搵好由地下街上車站最方便既路。預備好所有野, 就係 doutor 坐抵食個午餐, 不過正值辦公室午飯時段, 的煙味都幾厲害。
見時間差不多, 就順著路進入車站, 剛好看到列車員工為火車轉過椅子來, 每次見到呢個情形, 都覺得非常有趣。 嘻嘻! 好像椅子就係列車既動力來源, 向著這邊到來, 經列車員指揮, 就來一個大轉身, 動力來源又齊指向那邊, 又再為人服務。
列車好快已走進關西空港, 辦好手續, 找點吃的, 再係人地電器店外, 黐左的電影睇, 唔使好耐已經要入閘登機, 十四日既旅程亦係到此為止, 畫上句號既除左機上既飲品同電影外, 重有大量既回憶同厚厚既帳單! 耳邊只有兩句"鬼叫你窮呀, 頂硬上"。
嘻嘻!! 下次再會喇!
迴響: (0).
引用:(0).
靜態連結網址.
發表於 2004.07.20, 08:30
[«]
[上一日]
2004 大鼻舊舊 北海道‧京都夏季花間行
[»]