第十三日: 湖之色
作者 : 大力今日都係要早起身, 因為要八點左右去租車公司羅車, 落樓食過東橫既早餐, 就坐地車去京都站, 跟住就行過去。我地一路行一路估, 究竟會係咩野車呢? 會唔會係迴音呢? 去到辦好手續, 原來係一架香港唔覺眼有, 叫Platz 既物體。以市區應用黎講, 我地兩個加埋大鼻舊舊, 呢架細車其實都係足夠有餘。 不過由閂車門時發出既聲響黎睇, 一但不幸遇上意外, 應該會對車中人可能會保障不足。但點都好, 最緊要自己先安全駕駛。
出左車之後, 跟住自動導航指示向東行, 大概一個小時左右就到左第一站, 近江妙蓮公園。呢度個花池其實唔係好大, 好處在於可以好近距離去影蓮花, 但又有樣唔好既係佢地會用一的塑膠枝扶直的花, 影出黎時就會穿崩見到人造塑膠莖。再加上的花都未開, 日頭亦好猛烈, 所以隨便影左的就走, 本來既想法係下午時再回頭。
緊接就去左睇太陽花, 呢度雖然無北海道既夢之丘咁大咁多, 但都不失為一個幾好既參觀點, 的花都開得大朵, 而且可以近距離拍照, 完全唔會有隔膜。重有好多爸爸媽媽帶仔女黎散步, 大部份既小朋友見到花花都開心到好似太陽花一樣咁可愛呢。 大鼻舊舊都話要扮花呢, 你地睇下, 佢地爭住走入花叢呢。
影相影到手軟, 肚都開始餓起黎, 於是就走去附近一度叫鮎家の郷既地方, 呢處出名既係鮎魚同埋鴨, 坐低之後, 就叫左一份鴨餐一份鮎魚餐。另外重叫左枝冰凍烏龍茶連冰凍杯一隻解解渴先。食物好快送上, 的魚同鴨鴨都真係幾好食, 魚既刺身鮮, 天婦羅魚仔脆, 燒魚就香, 各善其長。有樣特別既係呢款魚燒時, 係專登整穿個膽等的青青綠綠既膽汁漏出黎, 令到魚身係有的苦苦甘甘既味道, 大家如果下次去食唔好以為係師傅唔夠功夫整穿呢。 至於鴨肉就肥瘦合度, 用牛油起窩, 加少許蔬菜, 煎出黎既鴨肉又滑又嫩又唔會太油, 真係好味。
慢慢享受完個份量幾足既午餐, 就行去附設既市場睇下望下, 都好多魚既相關野賣呢。 行左一陣, 幫襯左買的盒裝豆腐, 出門口見到有雪榚, 都整番杯要黎同個陽光對衡一下。今日既陽光真係好厲害, 我朝早出既汗應該係多過晒之前十幾日既總和。
稍稍消左暑, 就立刻爭取時間去水生植物公園, 入場票係300日元, 都唔貴, 園裡有各式樣既水生植物, 而我地主力係睇佢個蓮花池, 真係好大好大, 花亦有好多, 係呢度影左之後, 都唔使再去近江妙蓮寺補飛呢。係湖邊重會見到的蝌蚪游游下, 但唔係誇張, 呢的都唔知係咩種既蛙, 因為蝌蚪個頭係接近我地的五毫子咁大, 真係幾驚嚇。
係水生植物公園都花左兩個多小時, 跟住就襯太陽未落山, 趕緊去近江八幡既水鄉 - 八幡堀, 呢度睇介紹應該係以前的商人係用水道去付運, 形成兩岸都有一的商店, 所以都幾有特式。回程時由於係放工時候, 途中有的地方遇上少少擠塞, 我地於是揀左一段要付款既路行, 又幾好玩, 重有張靚靚路票收番, 幾得意呢。未入到京都市中心, 天已經黑齊, 幸好最後入埋油都趕及人地閂門前還車, 真好彩呢。
之後先返酒店洗白, 卸下行裝, 再出去食我地今個旅程未食過既松屋, 嘻嘻, 不過先途經mos burger整番個佢新出既咖哩木瓜熱狗腸印度餅, 丫, 又幾好食播。食到飽一飽, 就係市中心隨意亂逛, 買番的日用品預備帶回港, 到差唔多就返酒店休息, 預備精神明日回程。
迴響: (0).
引用:(0).
靜態連結網址.
發表於 2004.07.19, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]