三鷹之森美術館 / 吉祥寺
作者 : 小譚是日天陰.... 間中有雨.
今朝早胡亂食左個早餐 ( JR 站內的 Anderson , 雖然如此 , 都好鬼好食 ), 就即刻坐車去新宿轉中央線快速到三鷹站 , 參觀我一直好恨去的 三鷹之森美術館.
去到三鷹站南口, 遠處有個蓬的就係等車處, 來回的票在站內售票機買飛, 單程可以在車上入錢. 我今日選擇坐一程車到美術館 , 去完再行去吉祥寺.
一般人去到三鷹之森美術館都有好多野好睇 , 我呢 D 睇宮崎駿電影大的人更加好似去寶藏咁 , 最慘唔影得相 , 如果唔係我一定殺哂兩排電芯為止 ~ 我睇套電影係コロ (koro) 的大冒險 , 10 分鐘的小電影都非常感動; 不過我最深刻印象係飛行機的狂想的短片 , 好鬼好笑 .
上三樓見到個貓巴士 , 真係想自己都跳埋入去玩~ HAHA. D 細路真係好乖, 自己除鞋自己放好, 想起香港 d 細路著緊鞋都踩落地鐵張椅... 公民教育真係有排行....
行完之後沿路行去 吉祥寺 , 20 分鐘左右 , 好舒服的一段路. 在站附近食左個迥轉 , 都幾好味.
女友女友見到對面有間 01CITY 同無印 , 仆左入去磨左個幾鐘... 點知後來先知北口的商店街先更精彩... 失策....唉.. 下次啦.
之後突然想去行一行代官山, 故此特地坐 京王井之頭線 去澀谷, 快速只要16 分鐘 , 比坐 JR 快好多 , 再行去 東急東橫線 坐一個站....
去到代官山, 落雨喎 ... 頂 .... 都無乜心機行 d 街仔 , 因此又走番去新宿磨. 夜晚就去左 六歌仙 食 dinner. 六歌仙其實係韓燒, 你可以叫 Bibimba, 牛尾湯, 但其實最精彩的是燒牛肉~
9 點去到 , 居然話俾我聽要等半粒鐘 wor... 頂... 走落去 , 本來想去牛角 , 或新宿牧場 , 咁行左一輪 , 唔記得 牛角 o係邊 , 咪走番去六歌仙... 好彩我走哂轉頭 , 如果唔係錯過左非常精彩的一餐 !
本來我 print 左個 coupon, 食一個 course 就可以用來減 2000 yen (其實 d course 係兩個人都要 order, 所以都要 10000 yen), 女友話食唔哂 , 因此我散叫左一個叫 特上肉の盛り合わせ 的: 有特選松阪ロース, 特選骨付カルビ及特選黑タン鹽; (松板牛 Karubi + roast + 牛舌 的 "sampler") - 5500 yen, 再叫多個 沙律. 嘩 ... d 牛好食到呢 ... 尤其是 Karubi, 有少少 fat, 牛味勁正 , 我直頭食到有 d 感動流涕 tim..
加多碗飯 , o岩o岩夠飽 , 我大叫... 點解咁快就食完o既 ... 點算呀? 食左 d 咁好食o既牛...以後仲點食牛呢 ??? 不過我一定唔會o係香港食韓燒啦~ hahaha
迴響: (0).
引用:(0).
靜態連結網址.
發表於 2003.07.09, 17:28
[«]
[上一日]
2003 小譚東京北海道豪華遊
[下一日]
[»]