第十二日: 禪道
作者 : 大力今日就要搬酒店, 所以一早就起身收拾, 跟住落樓辦埋 check-out, 寄存左就上路。一出酒店, 一股悶熱既熱風係撲面而襲, 都真係幾辛苦。我地今日係去哲學之道及南禪寺一帶。 我地先穿過車站, 跟住去搵巴士坐, 其實都有好幾架車岩既, 不過見到有架先行既銀閣寺方面, 就即刻上車, 車程大概只係二十分鐘左右, 落車時既地點係銀閣寺入口對出既大馬路旁, 一過馬路就已經去到銀閣寺入口同埋哲學之道既一端起點。
見天氣咁翳熱, 搵左一間以兔仔做主題既咖啡店, 嘆杯冰凍咖啡先。店入面無論係牆上, 檯面, 掛畫, 杯墊, 以至店外花園既擺設, 都係有兔仔既形象, 幾得意呢。本來想坐耐的, 係個度偷得浮生, 可惜有一個美人係小小的店內點起香煙, 好閒適咁吞雲吐霧, 令到我地都唔敢久留係度用佢既美色去調和咖啡既微苦。
出黎門口, 天氣只有更加翳熱, 似乎雷雨係一觸即發, 我地先係附近既店舖買的手工藝, 都幾靚架。跟住我地就係哲學之道漫步喇, 一路有花仔, 有蝴蝶, 又有流水, 有綠葉, 重有大鼻的朋友添。 今次行時係無咩人, 同紅葉時期比, 真係靜好多, 不過都係一樣好舒服, 好開心, 而且幸好有的林蔭, 行既時候都唔係太辛苦。
一路行到去南禪寺, 去到奧丹就入去, 被帶到樓上坐, 嘩! 強勁既冷氣, 真係犀利! 由於限量既特別餐又係賣晒, 所以都係叫左兩份普通, 一份凍豆腐, 一份熱豆腐。黎到既時候, 胡麻豆腐依然精彩, 麵豉豆腐燒都係咁惹味, 至於凍豆腐都係好味, 不過似乎熱食就更覺豆香。食食下飯, 外面終於落出雨, 重係非常之咁大, 隔住木框窗子, 欣賞住雨景, 都幾有風味, 有種時間在房中凝住既寧靜。
坐完豆腐禪, 都入定左好耐出先出去, 但雨重有愈落愈大既趨勢。行出去, 有雨遮都無用呢, 只好趕緊腳步, 走去南禪寺既大門樓下避雨。咦! 隔左一陣, 雨就停左, 重居然有多少陽光, 即刻抓起相機拍攝, 唔知大家覺唔覺得, 雨後既樹木林蔭都好似特別翠綠呢?
影埋相見到時間接近可以去東橫check-in, 就行番出去美術館附近坐巴士, 咦! 唔見左大鳥居既? 原來係維修, 用帆布包實晒。坐巴士都塞左陣車, 京都市中心既路其實都真係有少少不敷應用。去番 new miyako, 羅番晒行李, 見天色都還可以, 又唔想羅住行李搭車要上上落落, 就步行往五條烏丸既東橫, 其實夏天行都係有少少遠, 除左大鼻舊舊舒舒服服坐行李外。
上左房, 發覺有樣野係唔妥既就係冷氣, 再加上可能係頂樓, 真係好熱好熱! 本來以為佢係無冷氣添, 但後來發覺都只係天氣實在太熱, 太陽實在太歹毒之禍。
沖好冷水涼, 冷氣開始有反應, 房中既暑氣都慢慢消退。我地就出去搵食, 去到河原町附近搵到一家食牛肉既, 不過今日係普通平平既火鍋放題, 只要 2300 日元一位, 上到去, 原來好細間同埋冷氣都唔大, 點好之後, 上桌發覺係有一盤牛加豬, 一盤蔬菜, 肉係任食既, 菜就第一盤免費, 添加就要另付。雖然係平價野, 但新鮮程度同味道都係唔差, 正所謂一分錢一分貨, 當然就唔可以同昨日既貴價貨相比! 但侍應姐姐都係好有熱誠, 無論係幫你加添食物, 加添湯水, 收拾, 甚至只係撈起湯中既肉渣, 都一樣係感受到佢地係有心做既, 真係值得一讚。
飯後又係街中蹓躂下, 先循例入便利店買番的杯麵薯片同啤酒, 上房嘆下電視, 呷啖啤酒, 食下薯片, 等下洗衫, 直至深夜, 先至入夢。
迴響: (0).
引用:(0).
靜態連結網址.
發表於 2004.07.18, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]