第十一日: 祭
作者 : 大力
今日要早起身, 趕去霸頭位影祭典。 不過出到去起步點, 噢! 原來已經開始左, 走左幾隻, 咁我地已經好醒咁係後街橫斷, 希望趕及係河原町搵番佢個頭, 可惜都係慢左步, 去到都只係趕上第二隻, 激氣!! 跟住只好出絕招, 立刻坐地車去四條烏丸, 行程最尾既地方, 好在卒之都趕上, 不過要係烈日下等成大半個鐘, 第一架巡遊隊伍先黎到。
係個度磨左兩個幾鐘, 先見到我覺得最特別既船鐸, 真係幾好睇呢。到影埋船鐸, 我地都撤退, 先去搵左間咖啡店, 食件三文治, 灌杯凍飲。 跟住番酒店洗白, 充電, 避開正午惡死既太陽。
同周公下完黑白子, 都幾個鐘喇, 係時候又出去, 先去搵車租, 因為星期一睇花個樹有車會比較方便。呀, 但原來係當地即場租車, 佢係唔租俾外國人, 我地係酒店側問左 如幾間大既如 orix, nippon 都唔得, 都係話外國人租唔到, 甚至話俾佢聽有國際牌都唔得, 真係激死, 唔通係樣既問題? 卒之都係要搵返 toyota, 個哥仔重解釋得好周詳添。
之後坐車去八阪神社, 原來朝早行完巡遊既健兒, 係會陸陸續續咁行黎神社, 我估係謝神之類儀式。 我地睇左一陣, 就沿祗園行番入市中心。見都差唔多晚飯時刻, 就走去搵野食, 見咁多日都未食過牛, 搵間貴牛食下先, 去到呢間叫三嶋亭既店舖, 叫左兩個套餐, 的野都真係好食, 你淨係睇下塊俾你煎牛既牛油已經感受得到呢, 其實幾件牛, 有的菜, 整個大白飯, 一的潰物, 加多枝大啤, 重想點呢! 唯一弱的既係通風, 食完會好似食韓燒咁成身味。
飲飽食醉又出去行街街, 一路行到返京都站, 又搵左 lipton, 食件餅, 飲杯凍茶, 真係無比享受呢。
迴響: (0).
引用:(0).
靜態連結網址.
發表於 2004.07.17, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]