第十日: 古都夢
作者 : 大力
今日由於唔使再趕路, 又無咩特別既行程編排, 所以可以訓到夠晒先起身, 訓醒又有北海道鮮奶同芝士餅做早餐, 真係人生如此乎服何求呢? 到出得門口, 都成十二點幾。先去打點一下的彈藥, 係北海道都差不多虛耗晒所有既菲林, 所以要入番的黎影祗園祭。入到攝影店, 嘩! 好多唔同既種類, 重要係香港無既, 一於入夠佢, 再係戰場上決鬥。
加強左軍火儲備, 又係時候解決糧餉問題, 先行入去 doutor, 咦! 呢間我認得, 係上次黎時非吸煙區係無冷氣, 差的焗死既地方! 所以先入去探路, 睇下有無空調, 幸好都幾涼快, 咁就整番隻芝士狗, 再黎多杯凍飲。 坐低左, 四周望下, 發覺原來好多女仔都著左浴衣上街, 又幾得意播。
食完又再去行街, 行街似乎都係今日既節目, 係河原町, 四條附近蹓躂, 跟住行左入錦小路, 呢度其實可以話係一條街市街, 有蔬菜/漬物/魚之類, 都幾特別架! 之後係一個轉角位食左一個黑豆豆乳雪榚, 好香好滑既。嘆左個雪榚降溫, 又再行街, 沿途見好多祗園祭既神社門口, 已經放左佢地所屬既巡遊車(山鐸)係度, 又好多人會俾錢上去參觀, 不過我地就無同人迫, 都係經過望下就算。之後行經 Lipton tea shop, 又俾佢門口既蛋糕吸左入去, 同一件藍梅及一件黑豆蛋糕比試比試, 兩件都好好味, 不過件黑豆蛋糕都幾重磅, 食完有的漏!
天氣實在太熱喇, 我地之後返去酒店洗個白白, 先再出過去, 去到四條同烏丸交界,原來係封左條路做左行人專用區, 跟住有一檔檔賣野食呀, 小玩物呀咁既檔仔, 同埋好多好多人, 個感覺係好似香港行年宵市場咁呢。沿住烏丸通一路行, 都重係行人專區, 但又一路都係咁多人, 真係非常熱鬧。我地行下, 食下野, 睇下野, 都行到成十點, 跟住就去番京都站既一間集團式, 以一個廚師人頭做標誌既居食屋食野, 其中一個冬瓜鰻魚係幾深刻印象同幾好味。
填完肚之後就行去便利店, 做一下補給, 順便消化一下, 嘻嘻, 我俾呢個碗麵既招牌吸引左, 都係要番酒店再延續戰事。
迴響: (0).
引用:(0).
靜態連結網址.
發表於 2004.07.16, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]