第九日: 行行重行行
作者 : 大力
今日就離開北海道喇, 真係唔捨得。但始終都係要走架喇, 唯有收拾行裝同心情, 打點預備。先落樓下攪掂的房務, 跟住整個早餐, 咦! 呢度既飯糰有三種播, 唔知係咪唔同地方有唔同既呢! 打左底就去羅車, 酒店住客只需 500 日元呢, 雖然係要去櫃檯打個印仔, 但都係出閘時用自動機俾錢既, 唔知部機係咪真係識睇個印仔咁厲害既呢? 由於我地想早的去新千歲機場行, 所以買左早車飛, 出左酒店都要去還車。還車前梗係要同佢影影相紀念下喇, 你睇, 幾有血有肉! 嘻嘻!
黎到釧路, 其實重有一樣野係要做既, 就係和商市場既勝手丼, 我地當然唔會放過佢喇。驅車去到, 的舖都係岩岩開門咁, 因為重有人落緊貨, 望到停車場個牌購物有得免費泊車, 即刻就泊落去。行入市場內瞄一瞄, 好似間間差唔多, 就係最就腳既一間買飯, 跟住揀料, 有海膽/帶子/大蝦/蟹腳, 見到好似都差唔多, 就算帳喇, 不過婆婆又送多兩塊魚過我地播。唔! 要 2850, 算係少貴喇。
之但係唔緊要, 一餐者, 況且的料真係幾新鮮, 裝好左, 婆婆叫我地坐, 又沖茶, 噢! 我地先諗起要趕車, 咁連隨請佢幫我地轉外賣, 嘻嘻, 原來重有麵豉湯送添呢, 咁當然佢重要蝕埋杯茶俾我地喇。
拿拿聲出去就還車, 手續都好簡便, 而且就係車站斜對面, 算係好方便呢。由於買左自由席要搵位, 所以一入車站就行去月台, 車已經停左係度, 重幾滿添呢! 我地就由頭開始行, 都要行左幾卡先見到有連位, 即刻衝入去放低行李係人地個椅背就坐低。開車喇, 成程車除左食個碗勝手"當"既時間, 同埋冷豔靚女車務員經過時係清醒外, 都差唔多訓到成昏迷狀。 嘻嘻! 好彩無流晒口水失禮街坊咋。
去到南千歲要轉車先可以去到新千歲空港, 由於班次好密, 車程亦係好快, 所以就算無位坐都唔怕。去到機場, 重有成倨五個多鐘先起飛, 不過唔怕悶既, 因為機場係一個好多野行, 好多野食既集中地。 我地既首要任務係富良野布丁, 不過行左幾個圈都係搵唔到, 激死。
首要任務失敗, 轉去第二任務, 搵奶飲, 呢個就非常成功, 搵左兩隻唔同既牌子飲, 其中一隻係一間雪榚屋店舖飲, 呢隻特別貴, 但又真係特別好味播, 今次任務算係超額完成掛, 起碼補番少少第一個任務既失分。係等緊消化之前既儲備時, 又走上瞭望台影下飛機, 黎到北海道當然要影番隻北海道航空喇, 幾靚! 瞭望台既位置係非常好, 對住跑道正一正, 突然聽到好厲害既隆隆聲, 原來係幾隻戰機飛過, 咁難得當然要即刻影喇。
影到咁上下, 又係時候要去醫肚, 嘻嘻! 我認, 我真係好為食。落去食店既樓層, 行來行去都下唔到決定添, 咦! 發現有個拉麵道場, 呢個係新開既, 前年黎都未有既呢, 都係搵呢度試下先。行左入去, 有幾間選擇, 又有時計台播, 但我地唔係好喜歡個口味, 所以無揀, 揀左間最入既札幌らー麺ばり屋, 嗌左一個泡菜拉麵, 一個招牌拉麵, 味道只係不過不失。 嘻嘻! 咁你地下次去唔使咁頭痛, 可以揀少一間喇。
食飽就再出動, 今次就真係出手買野, 由於之前已經格晒價, 睇岩晒, 好輕鬆便利就可以買齊晒要既戰利品。我地買左枝大既奶, 有個發泡膠保護住佢, 好得意既呢! 到呢個時候, 發現多左好多自己友, 就知道今日應該係有新同樂直航機, 於是買齊野就上去等接新同樂既機, 不過佢都遲左, 可能係因為打風呢。 之後俾舊舊發現左隻比加超機, 重係要同佢影相, 得喇得喇, 笑喇, 靚晒。
望下錶, 又係下午茶時間, 但食左麵無耐, 所以淨飲杯咖啡就可以喇。跟住都夠鐘入閘, 舊舊又想去同比加超影全身照, 可惜行勻都搵唔到個位係可以睇晒佢全相, 咦! 但居然又咁好彩, 俾我地一轉身, 發現左富良野布丁!! 萬歲, 今晚甜品有著落喇! 想試既朋友記住係內陸登機閘十一號附近既店仔。上左機, 又係搵周氏一家閒話家常。
好快又去到伊丹, 就坐巴士出京都, 由於呢幾日係祗園祭, 所以東橫一早無晒房, 今晚既住宿係京都 new miyako, 酒店就係京都火車站對面, 好方便呢! 而且, 酒店既英文對應係好足夠, 唔使怕溝通唔到。呢晚由於都幾夜, 所以去對面既便利店掃的野做晚餐就算數, 幸好有個精美既甜品, 令到今夜特別美麗。
迴響: (0).
引用:(0).
靜態連結網址.
發表於 2004.07.15, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]