第八日: 重生
作者 : 大力好舒服咁訓左一晚, 就好似已將之前旅程既疲累都洗滌一空, 一早起身出去花園度行下, 嘩! 好彩早出黎, 原來個早晨霧景好靚架! 我地影完相無耐, 多左人出黎時的霧散咁的, 已經無咁有特色呢。
之後返去食早餐, 係自助形式, 有中/日/西, 非常之花多眼亂, 不過我地都係集中係日式, 各樣既味道都係不差, 係個別一兩樣因為放耐左無咁好食, 但大型既自助餐都算係中上水準。 食飽就係時候上房收拾, 落番樓俾錢, 個幫我地 check-in 既哥哥認到我地, 又係好熱心咁問我地去邊, 又羅地圖教我地去, 又話俾我地聽有咩地方好去。
踏上車又再飛快上路, 先北上向中標津進發, 其實係想搵個條大直路。原來個頭好多路都係咁既樣, 都幾有趣。之後見 中標津空港 係附近, 又走左入去打個印仔, 影番幾幅相, 大鼻舊舊地話要 good luck 下播, 似唔似呢? 嘻嘻! 玩完再望下書仔, 有個展望台既物體係左近, 個地方叫開陽台, 上到去, 咦! 真係幾開陽播, 其實佢個漢字名, 係咪同我地既開陽係一樣解既呢! 睇下介紹, 原來係唔知咩咩可以用眼睇出地球係圓既, 又可以係冬天睇到四方太陽既地方。 可惜丫, 今日有的煙霞, 望唔得好遠。咁我地都係隨意影幾幅相, 跟住就離開。
由於朝早都食得幾飽, 所以一路都無食野, 係差唔多到釧路時, 途經便利店執左少少野祭五臟。補充左體力, 又要運動下, 開左入釧路濕原既展望台, 入去條路唔知係做緊工程, 定專登唔想的人開快, 係幾爛既滾滾沙塵路! 都要晃盪左成十分鐘, 先到左展望台山腳, 跟住重要行上山呢。嘩嘩嘩!! 原來個濕原係好好好大架! 又係最衰無時間, 如果唔係可以去行下濕原就好喇, 我地後來重見到隻鹿係濕原處食草添!
見時間差唔多, 我地都落番山去番釧路。釧路係一個幾旺既城市, 不過似乎只局限在馬路上, 因為只見車來車往, 但行人就唔係好多。搵到東橫, 泊好車上摩天輪, 就上房洗個面, 入房發覺原來札幌既東橫都未係最大, 呢度既重大, 應該有多成十幾呎地方, 真係一山還有一山高。
洗完面就出街行下, 丫! 呢度既溫度比其他地方係涼少少播, 先去買左聽日返新千歲既車票, 不過身體好快發出要補充熱量既訊號, 即刻睇書仔, 搵到間拉麵店, 走到街上又印證左呢度係車就多, 人就唔多既! 行過丸井今井 "遺址", 原來又執左, 令我諗番起前年去函館既情景, 感覺真係幾淒涼! 噢! 點解兩次既北海道尾站都係咁既呢? 行下行下, 都到左麵店, 係一個四眼哥哥同一個伯伯打理, 湯同肉都好好味, 麵質就有的似一丁, 食完碗麵, 個人都好似精神左!
之後行出海邊, 有個大商場播, 但 ... 都係無咩人行既, 幾恐怖啊, 人都唔多個呢, 生意又係唔知點做呢! 走出商場, 行去同事講過既燒烤, 嘻! 呢度有番的人氣啊, 呢度既運作係先買飛仔, 再換食物既, 都幾盞鬼既。我地梗係又要試下喇, 頭先既一碗麵點能夠滿足到人無窮既慾念呢! 嘻嘻! 卒之揀左幾樣野, 魷魚, 大帶子, 北寄貝, 海膽, 薯仔, 菇菇, 大蔥, 辣椒仔, 重有一大杯烏龍茶添, 大概都係用左一百三十港元左右, 算做可接受價錢喇, 風味都唔差呢。
食完燒烤都差唔多喇, 沿路行番酒店, 遠望頭先食麵既地方附近店舖, 原來夜左係會有多的人既, 但我地都唔行過去咯, 只經過便利店又買番的野食上去, 慢慢嘆電視。
迴響: (0).
引用:(0).
靜態連結網址.
發表於 2004.07.14, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]