第七日: 熊出沒
作者 : 大力一早起身, 又去沖個靚涼, 浸個靚湯, 出番大廳食早餐, 都係傳統既和式, 有飯, 漬物, 魚, 豆腐, 重有溫泉蛋添, 都幾豐富架。食飽早餐, 上房執好野, 就俾錢走喇。今日既車程會比較長, 因為我地先上知床, 再落亞寒。不過由於有人推介過離呢度唔遠既サロマ湖, 所以都過去睇睇先, 去到原生花園遊客中心, 發覺係要踩單車入去既, 結果都只係係入口附近遊步道行左個圈仔就走。提番如果係鐘意影花蟲鳥既朋友就一定要入去睇睇, 應該係唔會令你失望既。
上番車又繼續旅程, 先去網走車站打番個印仔, 打點一下的補給, 大鼻舊舊都話要影番張到此一遊相播。之後直上國道, 化化聲向知床進發。出左市區, 中途係鄉郊地方, 居然見到捨棄左我地好幾日既藍天同陽光, 加上又有麥田同薯仔田, 即刻就停低影下相。影左一大輪, 又再上車, 行行下有雪榚標誌, 雖然過左都調個頭來去食。
呢個係馬路邊一間屋仔, 應該係牧場附設既小食站, 因為我地去到都無人係屋仔, 係等左一陣事頭婆先踩住單車係隔離農場過黎, 雪榚好好食呢! 另外屋仔出面又有馬仔, 有個牌仔好似係叫你地同佢改名。馬仔好得意好可愛架, 我地重買左包穀餵佢呢。
同馬仔玩左陣要拜拜喇, 又再向目的地方向進發, 但無幾耐之後又抵達另一個景點, 係一個叫 オシンコシンの滝 既瀑布, 都幾靚架, 而且水量都算多而水流亦好急湍, 停低左架車行埋瀑布時, 每個毛孔都可以感受到瀑布沉重既呼吸, 體會到大自然既力量。係呢度又再飲多杯鮮奶, 呢次係第二次飲杯裝, 即係好似好似香港飲涼茶咁, 搵隻杯裝俾你, 呢的似乎真係就近農場交收過黎, 連樽都唔使入呢!
離開瀑布, 架車係一路沿住海邊曲折迂迴既公路段飛馳, 由於天氣清朗, 路面車輛少, 道路寬闊, 路面狀態極佳, 係完完全全可以享受到郊區既駕駛樂趣。有樣野係做得幾好既係, 當佢地要修整路時, 係會有人站崗, 係未到盲位前已經有人搖旗仔話俾你聽, 唔會好似香港咁, 有時係唔埋到去都唔會知。
個多小時後, 路由海邊開始伸延入山區, 車亦由貼近水平漸漸走上山坡, 原來不經不覺已經去到知床邊陲。繞過幾個山頭之後, 就入到知床湖既範圍, 又係人算不如天算, 居然熊出沒, 無得入湖區, 只可以泊車係一/二湖車場, 雖然唔俾入, 但泊車係要錢既, 540日元, 跟住就行上個展望台到影幾幅相, 真係可惜啊, 遠遠望到個湖係幾靚架, 可以行入去就好喇!
回程時由於時間關係, 都唔敢取道羅臼個邊, 可惜啊! 只好行番原路, 再轉落摩周, 再駁亞寒。 落到摩周條路, 沿路一路行車都唔見一架, 差唔多成個鐘先有架係對面線, 上山時又忽然間有一段好大霧既路, 好有遊戲機 feel 呢, 好玩。 之後, 直飛我地今晚既落腳地, 中途既充電站, 亦係期待已久既地方 - 鶴雅。去到鶴雅, 第一時間已經有人迎接, 有代客泊車, 重特登搵個識英文既哥哥幫我地 check-in, 係帶我地上房途中又介紹旅館既設施, 其中有個幾特別既, 係一個小攤位, 有烚薯仔, 係下午 check-in 時間俾客人頂下肚既, 我又口快快話唔食, 攪到大鼻舊舊地都無得試。上到房, 原來有兩條鎖匙, 等大家各自浸浴都唔使等門, 真係想得周到呢。
係食豐富晚餐之前, 先去浸個浴, 食飯時都份外覺得開胃。晚餐既內容就留番大家睇相, 食完飯, 食完甜品, 嬸嬸黎執野, 原來對筷子係送俾住客播, 真係好喇有紀念品, 跟住重羅左兩個豆沙糯米磁, 兩個紅豆飯團, 兩個南瓜雪榚俾我地, 話留黎做夜宵, 真係厲害呢。小休一陣, 就落大堂將數碼相燒落光碟, 係呀, 無聽錯, 真係有架自助機俾你處理數碼相呢, 無論係燒碟, 印相, 做相簿都可以呢。
整好晒就著住浴衣出去行下街, 都成十點, 的舖都未收晒呢, 都行左好耐等的卡路里唔使積住, 就又再去浸浴, 男湯已經換左上天台, 浸住浴, 聽下蟲仔叫, 望下漆黑深沉既天際, 真係都幾輕鬆開懷。到番上樓, 已經好快自動入夢呢。
迴響: (0).
引用:(0).
靜態連結網址.
發表於 2004.07.13, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]