譚生的日遊記

九州之食

作者 : 小譚

無可否認, 講食得精彩, 九州係比不上東京般有千萬種選擇, 又或者如關西般精緻的料理, 又沒有如北海道般海膽牛奶薯仔一股腦兒 “曬冷” 放在杜檯上. 不過, 九州始終都是農產品主要出產地, 食始終都是比較便宜一點.

講壽司刺身, 福岡不是無, 但就無似東京一個令人難以忘懷的魚市場, 試過福岡魚市場旁的鮮魚會館, 不知是否摸錯門或是甚麼, 兩間店子都平平無奇, 上網找過一間叫魚がし, 壽司係就係大, 又夠便宜, 但肉硬, 味道麻麻, 有一件仲有魚骨的. 可能平平地5-600円的丼飯會好少少, 但對我想食壽司的就不夠了.

不過皇天不負有心人, 返而在天神 Solaria Stage 地庫 B2F 找到的一間ひょうたん（葫蘆）回轉壽司就令人喜出望外, 第一次去的時候正當下午茶時份, 無人排隊, 但之後兩次再去就起碼排了半小時才有位子, 而且顧客洛驛不絕, 絕對係鮮味指標. 不過不要因為係壽司就一定要食大拖羅三文魚海膽那一類, 這裡無一般在東京的回轉壽司店般運輸帶只得孤單的一兩碟原轉來轉去, 要食就要叫師傅的弊病, 放在上面的是一定新鮮的, 亦一定有店方推薦的鮮品, 所以你就算唔識日文, 在運輸帶拎落來的都一定新鮮好味 (奇怪在, 為何這是回轉壽司必要的一環, 到現在卻沒有了?).

似あじAji (池魚), カンパチKanpachi (章紅), まだいMa Dai (真鯛) 就比まぐろmaguro/とろtoro 系精彩得多, 尤其是我愛池魚的, 就非常嫩滑, 從無食過如此美味的. 此外, 還有一些我未食過的, 如かにみそKanimiso (蟹肉+蟹膏), 這個在香港我都不會食的, 估不到食到蟹膏的甘香味道, 又一個新發現! 還有一種白身的 “魚”, 食落好似肥豬肉一般, 不知是甚麼, 但都印象難忘. 師傅見我們是遊客, 還特地介紹我開了一隻鮑魚仔, 係生的! 開完放些鹽在面頭, 還是動的! 一放入口, 新鮮爽脆, 同清蒸又是另一個食法. 這間回轉壽司雖然平均來講一碟要 300多円, 係貴了一點, 但我一百巴仙推介, 唔去(花時間排隊)係你的損失.

Solaria 地庫還見有幾間排隊店，如天神ホルモン鉄板焼及因幡鳥冬，大家可以去試試，當然，唔好唔記得 B1F 的超市呢！

在九州有不少鄉土料理, 地雞鍋係其中一種. 去了酒店附近一間食這料理的食店. 店方說地雞是天草出產的天草大王, 肉質鮮美, 因此就叫了一個 course 看看. 一人份的course 有地雞tataki (生的!), 一隻雞翼, 一個由雞淆成的白色清湯的雞鍋, 食完之後加飯煮成的粥, 我再另加了炭火燒膧雞. 基本上同我食河豚一樣, 不過河豚鮮得多(可惜河豚係冬天才當造, 這時不用吃). 不要誤會, 我很愛食雞的, 不過這個講不上很特別的味道, 充其量, 係雞好有雞味而已. 可能其實只是我一箱情願覺得一定無得頂吧.

不過去到長崎, 鄉土料理可能就係名物, 如在長崎很有歷史的卓袱料理, 就是一個非常高級的料理. 所謂卓, 指桌子，而袱, 係指桌布, 一般都意指一張紅色桌子接待客人的料理。由於長崎是日本第一個開放的港口, 所以卓袱料理就集了中國，西方及日本料理之大成而合成的一個獨特的料理，簡單來講，就是本土的 fusion 菜. 在長崎, 如果去一些歷史悠久的食店如料亭花月, 食一餐卓袱料理每人起碼要萬多円, 而且菜式一定多得食不完, 今次就去了在思案橋的浜勝, 這裡的卓袱料理豐儉由人, 由二千多円的數道菜淺嘗一下, 到萬多円的全體一席都有, 我就取其中間, 叫了五千多円一位的一試.

想不到一間在大街邊陲的店子會座無虛席。店子所用的器具都很講究，就是那一張餐巾亦寫了大字。先來一個清湯，有花菰及魚，之後是一些切花的魚，海鮮凍等，食了都不知是甚麼，不過實在非常美味。之後的刺身是鯛魚，鰹魚，附上生 wasabi 一粒。之後轉轉口味，是我們熟悉的蝦多士，多士炸得很香脆，非常引人入勝，但好在炸得來不是太肥膩，非常可口，很久都未食過這樣好食的蝦多士。其後是類似煎魚的物體上面加甜甜的梅汁，都幾新鮮的嘗試。之後就再轉口味，是中式的熱葷，不過其實對我們中國人來講，一大盤的透明的茨汁就知不對頭，上面的魚類及節瓜物體絕不吸引，是整個餐的敗筆。之後是長崎名物饅頭及東坡肉，原來日本人係將東坡肉夾在饅頭內食的。不過我見那些肉汁，倒不如將那些醬汁拿來撈飯吧！可惜東坡肉比較上難咬，都是我們的炆得淋及入味。有時確是我們自家人做的料理始終是自己勝一籌的。最後來的，是西瓜果凍，係大件西做的果凍，為何不切兩件西瓜呢？有點多餘。

以食來論，這一餐是不俗的，不過對我們中國人來講，就略有不足，可見，我們中國人的料理的精深，不是單是有外型就可過關的。

在長崎其間的中午, 在 Glover Garden 走下來, 肚餓得要命, 又不想去食中華麵 (見到那些粉紅魚旦就反感), 就在h我們住的 Monterey Nagasaki 酒店內的餐廳醫肚. 意想不到的是, 一個只是千多円的西式午餐, 會是非常精緻美味. 先來的頭盤非常精緻, 四粒很有特色的小點, 有鯛魚的 tataki, 有一粒好似燒賣的物體, 有一個類似 pate 但有一塊皮包著的物體, 還有一碗小小的凍番茄, 雖然只是小小, 但好好味.

湯是南瓜凍湯, 南瓜味濃郁, 加入鮮奶打均, 雖然我對南瓜是麻麻地, 但都一口一口的飲完, 凍湯消暑的絕妙, 係只有出面又曬上山落山才知道. 之後主菜係牛扒 fillet, 雖然是小小一塊, 卻做得很出色, 柔嫩適中, 只係稍為覺得大食的男士一定唔夠. 對我來講, lunch 這個份量就夠了. 最後的甜品又是非常出色, 每道小小的, 不太甜, 卻有高級餐廳的水準. 以千多円的午餐來講, 真是非常超值. 在日本食西餐, 很多時都有意外驚喜, 下至西式民宿屋主的晚餐, 到酒店餐廳, 都有在正式西餐廳少見的味道, 或者這就是日本人經常追求的精益求精吧.

不過講到西餐, 我都係覺得鐵板燒才是我最喜愛的西式日本料理. 上次在Apple Store上面的権八食過, 意猶未盡, 今次再上去多一次, 原來晚餐course 更正. 不似一般鐵板燒只係一味海鮮同牛, 除卻主打的牛扒之外, 其餘的菜式都非常新鮮, 頭盤的鯛魚たたき TATAKI, 下舖清嫩的水菜, 上面灑上蟹子及青蔥, 非常清新可口.

接下來廚師先在鐵板上舖上竹蓆, 放上兩舊用竹葉包的物體, 再用白布蓋上, 淋上水, 神神秘秘的, 不知是甚麼.此時廚師再在鐵板的一邊炒菜煎薄牛肉, 煎好後放在熱石上, 賣相精美, 叫作燒しゃぶ YAKISHABU. 食完牛, 之前包裹的終於開估, 原來... 係蒸穴子卷, 用鐵板來蒸食物, 我真是第一次見, 非常有心思, 而且非常好味, 跟日間在壽司店的燒穴子壽司又唔同風味呢.