第六日: 別了花之國
作者 : 大力今朝一早起身, 睇到天色唔錯, 即刻就梳洗出發, 去富田補補飛。去到富田外圍, 都只不過係六點左右, 但已經發現腳架黨佔據山頭陣地, 幸好就唔係好多, 拿拿聲趕緊泊好車, 都加入腳架黨既行列, 上山頭報到。
今日天色比早兩日真係好左好多, 雖然太陽唔係好直接, 但起碼唔會落雨, 亦無陰陰天, 可以補番之前失去既, 真係好! 影左都唔少之後, 就落番山預備返去食早餐, 居然見到同屋既一家三口, 佢地都係一早騰出黎影相呢。
返到 pension, 屋主已經預備好早餐, 好精美播! 有乳酪, 煎腸, 蕃茄, 沙律, 重有個芝士凍湯, 好香, 好好味, 受得芝士既一定愛死佢。 另外, 幾隻麵包都係人機之作, 香、脆、軟、暖、好味, 飲品就有橙汁, 鮮奶, 咖啡, 重係任飲, 鮮奶都任飲真係好大方呢, 攪到我連盡兩大杯呢。
食飽左上樓稍作休息, 就收拾預備出發去下一站, 都有的唔捨得添, 不過無辦法, 一早預訂時佢已經無房, 唔可以再留多日,但佢真係幾吸引我會再黎住。到走喇, 屋主人又問我地下一站會去邊, 聽到我地去網走, 重即刻羅埋地圖出黎教我地點行添, 之後又同我地影相, 送埋我地出門口, 重好似卡通片咁係倒後鏡遠遠見到男主人係條路上大字型咁跳跳下拜拜添, 真係熱情呢。
沿大路一直行, 首先經過旭川空港, 即刻片個靚灣入去吸印仔, 其實呢個空港應該對富良野/美瑛既行程編排係幾就腳。跟住一路行都係無咩特別景色, 最特別既應該係旭川附近都應該係工業生產, 因為好多好多大貨車出入, 真係每隔幾個路口, 你就會俾的貨車帶領住。
悶左一大段路後, 地勢開始向上, 而且有一條一條既隧道, 原來已經進入層雲峽地區, 周圍好多樹, 好多山峰, 風景真係靚, 難怪秋天既層雲峽係紅葉勝地呢。去到溫泉街, 係旅客中心既入口有個水龍頭, 同埋一的刷子, 原來係俾遊客清洗鞋底既泥濘用, 真係想得周到呢。本來見到有吊車都想坐下, 但一望上山頂, 淨係見到雲霧, 重間唔中飄來陣陣雨粉, 為免上到去都只係見到五里雲霧, 都係留係溫泉街行下算數 。
行下踱下影下相, 都行左成個幾鐘, 都係時候再出發, 因為重要趕去網走。沿山路再走, 一路風景都係值得細賞, 可惜時間唔許可, 半路中途, 只係停留過一度飲左杯好好味既鮮奶, 個老闆同老闆娘又係好好人, 問我地去邊, 又即刻羅一大疊地圖/簡介俾我地, 話俾我地聽有咩景點, 真係好人事! 跟住停係北見, 食左 mister donut 既午餐, 另外入左間攝影用品店, 用盡一切平生所有既身體語言, 先令到佢明白我地要將快閃記憶燒錄光碟, 又用左一切既理解力先明白燒隻光碟要成個鐘, 卒之都係攪攪震咁走左, 真係要同店員哥哥講聲唔好意思。
離開北見, 都唔使好耐就去到網走, 一去到就梗係要去搵食喇。睇睇書仔, 咦! 名物係帶子, 重有間係出名帶子壽司添, 即刻去搵, 搵來搵去都搵唔到, 再睇清楚書仔, 噢, 原來搵到都無用, 今日係休日!!! 唯有轉太去另一家轉轉壽司, 書仔話係網走站步行三分鐘, 但架車行左一段路都唔見, 本來想行返轉頭睇下會唔會過左龍, 正當駛入一個路口調頭, 嘻嘻, 間店就出現係背後, 泊好車就即時走入去呢間叫 がに(蟹)源 既 舖頭! 嘩, 居然有班曉講日文, 貌似俄羅B人既外國朋友係度食緊野, 除左佢地, 就剩得我地。見條運輸帶上都無咩野食, 就唯有叫的自己識個的黎食。
正當食緊之際, 又發覺師傅不斷好忙咁將的唔同既款式放係行李帶上, 後來又用日語解釋, 不過我地真係只有睜眼份兒, 但大概意思應該係店長推介, 其中食左左特別既係蟹之外子同蟹之內子, 都係好好食, 而壓軸既就係店長有醬油漬八爪魚卵, 透明一粒粒好得意, 味道就鹹鹹地, 香香地, 幾好食架! 埋單食左十幾碟四千幾日元, 還算不錯啊! 廿蚊港銀左右一碟, 係香港一定食唔到咁好既料呢。
食飽飽謝過店長又再上路, 宿一宵既係能取湖莊, 驅車前往其實都好近, 一入大門, 嬸嬸就出來招呼我地, 佢都幾得意, 有的論盡, 可能因為俾我地係外國人既身份嚇一嚇, 嘻嘻, 佢要羅住一份流程同我地做登記同埋介紹呢。帶左我地上房, 佢又叫我地坐陣等等, 以為佢做咩喇, 原來係走落去搵另一個識少少英文美少女上黎, 問我地想幾點食飯, 噓! 問完佢地已經功成身退, 我地亦爭取時間出左去流冰館。
流冰館入場費 520日元, 其實野就唔多, 只係有的流冰資料, 記錄片, 流冰天使同埋一的魚仔, 最特別既都只係個大冷房, 可以入去體驗一下零下十八度既氣溫, 所以如果有朋友去, 可以考慮唔需要入都唔會有太大損失呢。
返到旅館, 放低野已經可以落樓食飯, 係一間獨立房私人天地。食物水準以價錢去衡量, 算係唔錯呢。七千幾日元一位, 有洗手間既向湖房, 食就係刺身, 煲仔, 天婦羅, 蠔 ... 而且重唔係差播, 尤其個帶子, 真係鮮甜到不得了架。食完, 返到房, 已經開好被舖, 連大鼻都有人照顧佢入左被竇, 真係好呢!
迴響: (0).
引用:(0).
靜態連結網址.
發表於 2004.07.12, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]