第四日: 別府, 湯布院
作者 : 小譚
在東橫食過早餐後, 就驅車往別府. 我們特地不走自動車道, 沿著別府灣的海邊走. 天氣大好, 景色都怡人, 不錯不錯.
不過其實走海邊是有原因的, 就是去別府海濱砂浴場去 "堆砂". 這裡是以地熱溫泉的海砂埋住成身, 焗十至十五分鐘, 有治療痛症, 行氣活血的奇效. 不過, 可怕事前完全無留意, 砂浴場成個月唯一一日休日就是今日, 所以又是摸門釘, 真不幸.
既然不能堆砂, 唯有立即驅車前往別府的名物: 別府地獄組合參觀. 地獄組合有八個不同形態的溫泉, 除了血池地獄及龍卷地獄外, 六個地獄均在可徒步的範圍內. 不過縱使如此, 地獄組合離 JR 別府站是有一大段距離的, 如果你乘 JR 在別府站下車的話, 在站的西口乘亀の井バス2, 5, 41 及43號巴士, 往鉄輪方向, 在 海地獄前 下車, 需時約廿多分鐘.
八個地獄有共通入場卷, 2000円就可以走遍八個地獄, 比逐個入場計平得多 (在網站 download coupon 仲可減10%). 不過老實講, 值得去的地獄只不過是得三兩個, 其他的都似是攝位多於實際, 睇落去就明.
首先入場的是海地獄. 顧名思義, 海地獄是一個海藍色的溫泉, 似一片大海般. 不過一入場睇到的不是大海, 而是(又是)蒸饅頭! 日本人用地下溫泉的天然蒸氣來蒸饅頭, 既環保又有特色, 不過好似四處都係, 實在真是要出些點子才能吸引人.
走過少少是一片蓮花池. 開得很美. 池後的大片樹林, 非常有層次感, 單係這幾個風景, 就已值回票價了.
經過小賣部, 終於見到海地獄的真身. 四處都是茫茫白煙, 好不容易才見到一片藍得有點詭異的池水. 水中放了一籃雞蛋在烚. 其實看頭不是太多. 不過日本人都很聰明的將周圍的環境融合為一個景點, 行過少少, 有幾個鮮紅色的鳥居, 旁邊都是很鮮艷的紅葉及黃葉, 自然又是吸引遊人拍照的好地方.
行完之後, 買一隻溫泉旦食. 烚得太耐, 同普通一隻烚旦無分別. 反而係人地用宣傳紙摺的紙兜仲更有趣.
之後行去隔壁的鬼石坊主地獄. 點解叫鬼石坊主? 原來據講係因為泥漿谷出來的泡泡似一個和尚頭 (坊主 ぼうず Bozu), 因此而命名. 如果想像不到的話, 記唔記得掛在屋簷下求晴天的晴天公仔(てるてるぼうず) 嗎? 似樣嗎?
鬼石坊主地獄還有一個景點, 叫鬼之鼻鼾, 嘩啦嘩啦的, 很吵耳, 就似我的鼻鼾一樣.
由於這個地獄是新近維修完畢重開, 有些比較新的遊人設施, 如有貸切風呂等, 不過對我們來講, 一個足湯就好夠了. 舒服地坐在椅子上浸足湯, 都幾有趣.
浸了十零分鐘, 兩腳十分舒暢, 好像釋放了一大擔壓力似的, 因而繼續行程.
走到對面的山地獄. 山地獄的形成係因為長年累月噴出來的泥石堆積成一座山般, 我倒覺得是噴煙範圍之大, 白煙之浩瀚, 活似一座山一樣.
當然, 就咁一堆石頭是難以吸引人入內, 因此裡面養了一大堆亞熱帶動物, 如大象, 河馬等等, 美其名為這些地熱令這些動物可以有一個天然 (溫暖) 的環境安居. 老實講, 那頭大象比我印象中荔園那隻大象更老, 其他的在我們的動植物公園早已有得看, 實在無甚吸引力.
之後落去かまど地獄 (Ka-ma-do), 爐灶也, 即係煮飯的地方, 所以中文稱為灶地獄. 這裡說是古人在竃門八幡宮大祭時, 人們用這裡的蒸氣做飯供奉神靈, 因而得名. 但其實這裡不止做飯, 又有得飲, 又可以蒸面, 蒸頭髮, 美容, 仲有足湯的地方, 真是娛樂性豐富. 最值得一讚的是園內每一個景點都有各種文字的提示及解釋, 等大部份遊人都可知道每一個地點的特點.
再落去的鬼山地獄及白池地獄就無甚看頭了. 鬼山地獄最巴閉的地方除了是門口的大鬼樣同好大聲的噴熱氣的聲音外, 就是養了不少熱帶的鱷魚 (快樂地生活), 對我們香港人來說, 大鱷已是司空見慣的事, 鱷魚更是我們由細到大在荔園之類地方就看到, 因此無甚吸引力 (當然, 對日本人來說, 在一個寒帶可見到鱷魚都算是有教育意義吧!).
接著的白池地獄其實都相當無謂, 如果你去完鬼山地獄後過對面入去的話, 條路會帶你去睇熱帶魚 (又係熱帶!) 當然啦, 又是溫泉地熱使熱帶魚可在此生活吧. 內有一大缸食人魚, 樣子恐怖, 想看看的話都可以一睇. 不過那個白池當真是非常普通, 無甚看頭. (你會發現對面有一間叫金龍地獄的, 不是在這八個地獄組合內, 要俾錢入場的, 不過網上評語似乎都覺得只是有幾尊佛像, 一個吹氣的大龍, 吸引力不大, 雖然, 入場費只是200円, 比入其他地獄便宜).
最後兩個地獄要另外坐車去, 話近不近, 都要差不多十分鐘的車程 (坐巴士的話, 可在白池地獄旁的行人路落斜, 到大路上坐 16, 16A, 26, 26A 巴士去). 血池地獄同之前幾個地獄茫茫濃煙係完全唔同風景, 可以說是很平靜的地方. 老實講觀光的話就無甚看頭. 旁邊的龍卷地獄則如黃石公園的間歇性噴泉一樣, 每隔一段時間地底內儲存了足夠地下水就會噴發. 不過似乎因為安全的原因, 整個噴泉被一個石造的罩包圍著, 因此噴得不太高. 好彩我們過去的時候剛好噴發, 一路看一路吃雪糕, 如果不是的話就要坐在乾等半小時了.
對我來說, 其實只得幾個地獄是值得去的, 海地獄風景最好, 坊主地獄的足湯比較新淨, Kamado 地獄則比較有趣味性, 以及比較獨特的龍卷地獄, 其他的, 不去也罷.
去了八個地獄, 真是很肚餓了, 在大路旁見到一間大大隻字寫住100円壽司, 二話不說就走入去. 一輪風捲殘雲, 幾個人將幾十碟一掃光. 其實壽司普普通通, 不過有些魚類壽司有塊紫蘇葉在底, 都幾香口.
食完飯在旁的 Best 電器行了一會兒, 這裡真是大得很.
還未天黑, 去了鐵輪溫泉附近的明礬地獄. 這裡的名物是一個個好似合掌屋的溫泉, 可以貸切, 不過最重要係出產溫泉礦物結晶的湯之花的地方. 我對買這裡手信無甚興趣, 不過對這裡的地獄布丁有更大興趣. 地獄布丁當然又是由溫泉的蒸氣做的布丁, 雪凍後食, 非常可口, 原味唔太甜. 當然, 味道不會有硫磺味的, 只有很香的牛奶味.
這裡在山上, 望著大橋的漂亮景色, 食著布丁, 都非常寫意.
食完布丁, 離開別府, 去湯布院, 今晚將在這裡的溫泉酒店渡宿一宵. 今晚住的酒店無漢字名稱的, 叫旅の宿 ぽっぽ庵. 地方不好找, 離 JR 站走十五分鐘, 而且要抄小路, 是幾麻煩, 但麻煩得來是完全值得的. 全酒店得五間客室, 四間客室有附半露天風呂, 但價錢只是萬多一位, 非常抵住, 亦是非常難 book, 想不到非常好彩地找到兩間客室, 可得試風呂附客室的滋味. 酒店望出去是一片田野, 火車軌在不遠處, 不時有火車經過的聲音, 不吵耳之餘還很有鄉土風情, 實在非常難得.
離食晚餐尚有少少時間, 走出去市內走走. 不過老實講, 所有店舖五六時左右就收工, 天又快黑, 其實不值得出外, 最好就是浸浸溫泉享受一下. 其實除了在客室內的溫泉浸, 酒店另外亦有內湯及露天風呂, 係先到先得的貸切. 露天風呂佈置精美, 都值得一去.
晚餐, 當然又是大排延席, 講不出來的精美小點, 一定食得飽飽的, 那個豐後和牛steak, 入口鬆軟, 回味無窮.
食完飯, 浸完溫泉, 又完成一日美滿的旅程了.
其餘照片...
迴響: (18).
引用:(0).
靜態連結網址.
發表於 2007.11.28, 23:11
[«]
[上一日]
2007 小譚九州紅葉之旅
[下一日]
[»]
1. 小譚 | 2008.10.01 at 00:58
（希望）佢會講少少英文吧。
如果你有日本朋友，托人幫個忙就更好。
2. 小機師 | 2008.10.01 at 00:51
真感謝你的回答
小弟不懂日文, 他打電話來我應該如何回答好呢? 還是我應該找日本的朋友給店打一個電話作 confirm 呢??
3. 小譚 | 2008.09.30 at 12:37
小機師: 係。
ky: 其實我都只係在jalan 網頁睇comment，如果那間酒店comment 一般有4以上都可以考慮。
4. 小機師 | 2008.09.30 at 12:25
好開心 book 左 "ぽっぽ庵", 但有一行係 "後日ご確認のお電話を差し上げます。" 想問佢係唔係會打電話給我呢?
5. ky | 2008.09.28 at 17:45
請問係湯布院仲有沒有其他住宿介紹，因為我上網看我想住的日子已經滿了，另外我一行五人可否同住一房呢。
6. 小譚 | 2008.09.18 at 19:42
無機會去了。。。
7. gass | 2008.09.18 at 17:27
Hi 小譚,
我又係上年8月去九州的,我只係去了福岡,別府,門司港,湯布院,阿蘇火山.我有去熱沙浴同埋食你講果間壽司鋪,兩樣我都覺得好正呀,你有冇再去多次熱沙浴?
8. 小譚 | 2008.09.02 at 20:23
未咁快有啦。
9. 2288 | 2008.09.02 at 15:55
我預計12/21/2008去,現在有得Book嗎?我上個網頁睇好似未出那天嘅價錢.
10. pinco | 2008.05.19 at 16:42
15000, 係咪一個人? 定 2 人共 15000日元 ?
包晚餐 ? 私人風呂 ?
11. pinco | 2008.05.19 at 16:34
間溫泉好似幾好, 係咪上網 book 就得 ?
不用訂金 ?
如果 book 左. 是否打印出來去日本就 ok ?
12. 小譚 | 2008.03.21 at 22:40
你無問題, 係佢貴左O者, 我那時係和室八疊有個室風呂食豐後牛係 15000円 (睇番個 reservation confirmation).
貸切唔駛錢, 先到先得.
13. catcat | 2008.03.20 at 17:36
另外d溫泉"係先到先得的貸切", 咁要比幾多錢呀?
thank you!
14. catcat | 2008.03.20 at 17:34
我理解係
11850yen = 冇豐後牛,冇私人風呂
13650yen = 冇豐後牛,有私人風呂
15000yen = 有豐後牛,冇私人風呂
16800yen = 有豐後牛,有私人風呂
但我見你又有牛食又有私人風呂
但你只係15000yen果個??
太多問題,唔好意思!!
15. 小譚 | 2008.03.09 at 23:03
我地住了 15000円一位那個. 係有豐後牛的, 13650円那個無講明有. 房間有洗手間, 洗澡在溫泉室那裡, 有花洒有凳仔有浴露的地方 (不要在溫泉內洗澡啊!)
16. catcat | 2008.03.09 at 14:19
想問下你book o既房係￥13,650 定係￥16,800?
因為13650呢種冇講明係食豐後牛,但我見張圖又有
http://www.jalan.net/uw/uwp3100/uww3101.do?yadNo=316662&stayYea=&stayMonth=&stayDay=&dateUndecided=1&stayCount=1&adultNum=2&roomCount=1&maxPrice=999999&minPrice=0&mealType=&rootCd=45&afCd=19
同埋請問房間裡面有洗手間同浴室嗎?
thank a lot!!
17. 小譚 | 2008.03.07 at 23:15
"係先到先得的貸切". 你入去, 將個牌放在出面, lock 好門, 就無人會入來.
18. catcat | 2008.03.07 at 09:17
酒店另外有內湯及露天風呂,係咪比一家人一齊浸架
情侶又可唔可以呢?
即係果段時間就唔會有其他唔識o既人一齊浸?
thank you!