譚生的日遊記

第五日: 丘陵地

作者 : 大力

美瑛呢度好好訓呀, 好清靜, 只得蟲仔聲。講開蟲仔, 個的窗既蟲仔隔係攔唔晒的蟲仔架, 所以唔係房時, 最好係唔好開燈; 到入左房, 真係要開燈, 就閂好晒窗, 到訓覺時熄燈先開番, 就唔會引咁多蟲仔入房。

起身諗住再沖涼, 咦! 又係一家四口添, 好彩佢地只係梳洗緊, 同話俾我地聽無人入浴中。因為今朝無人排隊, 可以舒舒服服洗白, 洗到乾淨晒香噴噴時, 就落樓食早餐。神秘既屋主重出黎同大家打招呼添, 我估佢係講多謝大家光臨之類, 屋主個樣好卡通呢。

行出屋外, 對面原來係四季彩之丘, 一早去真係好, 無咩人,行都可以行得輕鬆的, 可惜之前落過大雨, 同圍都濕漉漉, 泥辦辦, 花又好多都俾雨打爛, 我地都係隨便影的就走咯! 行番出大門, 原來有個箱仔係俾人放建設費呢, 咁都係自願性質既, 跟佢提議放低幾百日元就離開。行番 pension 羅車走, 咦! 主人又再露面, 重同我地握手話別添, 真係熱情啊。

開車係附近巡視下, 原來聞名已久既 pension with you 就係路口, 成間屋果然好靚, 亦有一種自成一角既氣勢, 佢既景觀亦係比較開揚, 都唔怪得佢係搶手的, 同埋受人歡迎。睇下書仔, 搵到拓真館又係左近, 連隨就開車去, 大師級既前田真三作品係唔同既, 你係會感受到北海道四時之景, 同大自然既變化萬千, 睇完係會令你好容易愛上北海道, 甚至想係度長住。

踏番上車, 就係美瑛既丘陵地四處遊, 鐘意就停低影下相, 雖然天氣係落下雨停下, 但個感覺都係好輕鬆, 好悠閒, 好舒適。行下行下, 咦! 好似係美馬牛附近播, 諗住去個車站度吸個印仔, 哈哈, 去到原來係無人車站, 又點會有印仔丫, 咁只好下一站 - 美瑛。打完印, 係車站側既資料中心打個轉, 有介紹去附近景點既路線, 咁我地就揀左新榮之丘, 唔使一陣就到, 原來都係一個展望台咁, 望到一大片既丘陵地勢, 不過只係一般景色。

午飯時間, 今次就揀左係深山卡食咖哩既地方, 大家冷靜的, 唔好柴台住, 呢間既咖哩係有特別既, 唔係平時食既紅/黃/青/綠, 而係黑色既! 嘻嘻! 係呀, 係黑色架, 係店主特別泡制, 重係有意思架播, 話係可以表現到美瑛。我就唔知係唔係, 不過就好味道羅, 真係成碟連汁都清晒呢。

食飽就再上路, 今次集中係全景之路附近, 周圍行, 上山丘, 周圍停, 落山丘, 周圍影。原來都幾多人踩(推)單車, 不過可能真係會幾虛耗體力, 未受過專業訓練千祈唔好亂試, 嘻嘻, 講笑者, 之但係真係要量力。

到咁上下, 又係下午茶時間, 目標係返 pension lavender 附近既果子工房, 去到只係大概三點左右, 諗住早到, 可以試到佢其他既餅, 點知真係世事豈能盡如人意, 都係淨番芝士餅同布丁, 重要條人龍起碼超過五十人; 試想下, 一間只係大約二百多呎舖面, 有超過五十人排隊等買野, 未計睇野既人, 真係點算好。唔係誇張, 係不斷咁有人上黎, 有的重係打的上黎, 見多人就走左, 真係唔知就俾佢嚇親呢, 卒之都係無食就走羅。本黎重睇到佢有另一間舖係市中心, 但搵極都搵唔到, 應該係舊舖地址已經無左。噢, 算吧, 到底都叫做試過。

睇到錶, 時間都差不多要去今晚投棧既地方, 呢間係一間新既 pension, 六月份先開張。開車去到, 屋後有一片麥田, 個感覺幾好, 一入屋, 撲面係一陣好溫暖既木味, 感覺更好, 加上照面迎來係女主人親切既笑容, 真係非常出色。呀, 差的唔記得講, 女主人重識英文添既, 而女主人既細佬英文係更了得, 佢係讀英國文學既, 不過佢跟住可能唔會駐守呢度, 因為要去第二度做野呢。

女主人帶我地去飯廳 check-in 完, 就介紹佢既設施, 其實都係一眼睇晒, 不過佢就好細心咁介紹, 連沖涼房個入浴中牌仔都講點用呢!上到房, 咦! 居然係三人房, 大鼻舊舊今晚有自己床訓咯。間房好簡潔., 但就好舒服, 對住個田園, 打開窗, 有少少風吹入黎, 個感覺真係完全無敵呢。

坐一陣, 跟住係間屋度走上走落, 影下屋中大量有趣既小擺設, 佢地分佈係屋既角落。跟住就去飯廳食飯, 今既既菜式係意式, 前菜係一碟三款既小食, 計有迷迭香焗薯, 蕃茄醬焗茄子, 脆餅夾芝士, 味道有驚喜; 湯係一個香濃既紅蘿蔔湯, 非常之出色; 主菜係一個香草麵包碎焗雞, 火候剛好, 皮脆肉嫩, 諗起都流口水; 當然重有飯同沙律, 甜品就係一個牛乳酪雪葩加車里子, 完完全全係一個完滿既組合。