第三日: 深耶馬溪, 九重
作者 : 小譚
今日一早去酒店附迎的 Mazda 取車. 第一次在 Tooco 租車就瀨野, 仲要係非常無厘頭的一回事. 事緣我們租了一部 Premacy, 因為我們同行五人, 因此所有座椅都會用到, 誰知準備開車時才發現尾位兩個位都沒有安全帶扣 (有安全帶的). 服務員連 manual 都取出來左找右找都找不到安全帶扣在哪裡, 又沒有另一部替換的車. 結果, 我們呆等了一小時左右才替我們裝上安全帶扣 (老實講, 都唔知是否合格地裝), 攪到 11時多才出發. 吊詭的是, 為何驗車時無發現? 還是側側膊唔多覺?
等車時在附近 24 小時烏冬店吃了一個烏冬, 估唔到又相當唔錯, 烏冬好滑, 好好味.
用 CarNavi 的風景區功能找到深耶馬溪 (Shin Yabakei), 就入了要它替我們帶路. 深耶馬溪是九州一個很出名的紅葉區,除了溪谷紅葉之外, 經年風侵的石山亦是出名之處, 有所謂一目八景的地方. 一小時多的車程, 經過大分自動車道到達玖珠 IC 走國道 387 轉縣道 28, 再走約半小時就到. 沿途兩旁都是樹木及怪石, 突然又出現流水淙淙, 短短半小時路程令人目不遐給.
將近到達時見到一個很美麗的店鋪, 前後都是紅葉, 後面是一個幽靜的溪谷. 落車拍照, 風景實在美不勝收.
車子再轉一個彎, 就到了一好多人地方, 亦是我們的目的地一目八景. 這裡確是一個出名的旅遊區, 大大小小的旅遊車洛繹不絕. 好不容易找到一個停車位, 就在窄窄的路旁商店街閒逛. 首先先到一目八景展望台, 在這裡望出去, 每一個方向都是一座奇山或怪石, 因而名命. 八景分別為海望嶺、仙人岩、嘯猿山、夫婦岩、群猿山、烏帽子岩、雄鹿長尾嶺及鷲の巣山. 展望台上有齊八景的方向, 但太多人, 跟本無辦法攪得清. 我認得的, 就只是夫婦岩, 唯有拍下來就算了.
路很窄, 多人又多車, 行在路旁商店街其實都幾危險, 不過呢類人車爭路的場面在日本都算少見. 見到好多賣物產的, 賣漬物, 賣饅頭, 都係好多公公婆婆爭住買. 行了一個圈, 都係時候食午餐, 因此走入一間茶屋食 soba. 好多呢D 茶屋都係依溪而建, 一面向馬路, 另一面就向著溪邊紅葉, 好好風景. 我們都唔執輸找個窗口位. 我們叫了炭燒雞同野菜. 炭燒雞係好炭味的, 不過略嫌難咬了.
食到差不多三點, 要趕路去下一個景點了. 臨走時見到一大箱柿子都係1200円, 正是當造的季節, 又大又紅, 返來香港才揼心點解唔買一箱番來.
下一個景點是九重, 九重的重要景點是九醉溪, 震動の滝 (瀑布) 及滿山紅葉的景色, 但因為山勢險要同交通不便, 所以都不算是熱門的旅遊點. 舊年十月開幕的 九重 "夢" 大吊橋 就為了吸引遊客來參觀這兩個景點而建成. 今年九月剛過了二百萬名遊客. 由於有車, 故此特地走來看看.
大吊橋就在深耶馬溪附近的九重町, 雖然話係附近, 駕車都差不多要一小時才到達. CarNavi 找不到大橋, 唯有用九醉溪來locate. 到達在附近道路見到路牌寫著最後受付時間為 4:30pm, 真是差點點就遲到了.
終於上山上到橋附近的泊車處, 四周迷迷濛濛, 真似去了九重天似的, 氣溫也比在下面低了好幾度.
大橋是純行人道, 入場費500円, 以一個如此工程浩大的吊橋來講, 真是算係便宜. 因為一路行真是一步一驚心, 峽谷高, 橋又高, 風又大, 雖然橋不會隨風而動, 但望落去都非常驚人. 可惜係天不造美, 一路上都是濛濛白霧, 而且紅葉已走了大半 (太凍了), 光禿禿的, 其實唔太好睇. 震動の滝在橋的右面, 九醉溪在橋的左面, 瀑布又有分 "雄" 同 "雌", 雄瀑布在近橋入口那邊, 雌瀑布在橋中間位置望出去. 不由得服了日本人.
不過, 最令我配服的是橋上工作人員, 我們就咁行了十零分鐘都凍得要死, 他們還要不停站在橋中間的地方 "指揮交通", 真是替他們難受. 不過, 敬業樂業永遠都在日本人身上找到, 無論在日本哪裡都是, 我們仲還要多多學習.
行完大橋來回, 走入入口的小賣處, 但原來已經收工了 (又係 5pm!), 無奈唯有在自動售賣機買熱飲. 買了罐咖啡, 這一隻好好飲, 好夠咖啡味. 小賣處有隻貓貓, 乜人都痴, 唔知道有無人養呢, 好可憐的樣子, 晚上孤伶伶一個在這荒山野嶺...
(如果要用公共汽車到此大橋, 可乘 JR 九州久大本線, 在豊後中村駅下車, 轉乘日田巴士, 九重登山口至牧の戸峠線, 筌の口站下車. 不過記得, 這類巴士班次少之又少, 請留意時間)
天黑了, 急忙駕車往大分市, 今晚會留在大分駅前東橫 Inn. 想不到剛由自動車道出去大分市, 就遇著塞車, 還要塞了大半小時, 可能真是因為放工時間? 又浪費了不少時間, 因此本來想去晚餐的浜茶屋也沒有去. 在東橫內找到不少食的廣告, 選了在附近的醉門.
這裡是魚料理店, 豐後水道的魚獲甚豐, 因此海鮮亦非常有名, 尤其是河豚, 其實比起下關市有過之而無不及. 可惜同行者不夠膽食河豚, 因此我只有自己叫了一碟河豚刺身. 餐牌上鄉土料理 course, 有刺身, 有豐後牛, 非常抵食, 於是又叫了. 一番飲飽食醉, 埋單亦只是一萬二千左右, 又有coupon, 真是非常抵食, 值得推介.
食完飯, 都差不多十點, 在酒店泊好車 (多層全自動泊車系統), 行去對面 ampm 賣枝水, 又一day. 提一提這間東橫 Inn 非常富麗堂皇, 同大酒店有得比, 而且房間比在福岡的更加大, 放到兩個o急之餘仲可以放多張 coffee table 加兩張椅子, 但比福岡的更平, 真要命.
(更多照片...)
迴響: (7).
引用:(0).
靜態連結網址.
發表於 2007.11.27, 23:52
[«]
[上一日]
2007 小譚九州紅葉之旅
[下一日]
[»]
1. 小譚 | 2008.10.29 at 21:42
都準o既，仲有成個月。。。
2. henry | 2008.10.29 at 18:52
多謝你的回覆先!
但我看日本有關紅葉的網頁, 好似得10%變紅,
可信嗎?
謝謝您~
3. 小譚 | 2008.10.29 at 14:14
九重大吊橋如果山谷有紅葉的話會好靚, 不過應該時間已經過了. 不過都值得一去.
google map 提供的時否駕車的時間? Navitime 可能會準少少. 不過咁, 佢係預你正常的時速, 通常來講你都會駕得快少少, 但都要留意你又有可能中間行下又停下咁.
4. henry | 2008.10.29 at 13:00
你好, 小弟今年都想去九重吊大橋, 請問是否值得一去呢?
及
我會由阿蘇揸車去, 但我用你提供的navitime去check的時間同用google map去check的時間有1小時的分別, 請問邊個會比較準一點呢?
希望你能回覆啦, 謝謝~
5. 小譚 | 2007.12.11 at 10:48
那條橋如果好好天的話, 紅葉滿開一定係好正的! 下次 mark 低啦!
其實九州好多地方好去的, 不過無北面那些咁有名氣, 要慢慢找囉, 我都找了好久才找到合適地方.
6. 大力 | 2007.12.11 at 10:18
所以話去租車, 有豐田就算貴少少都係穩陣的, 起碼真係樣樣跟足同執到正; 另外, 我上次租 euro-R 既本田, 感覺都唔錯的, 不過暫時淨係見北海道先有.
九重個度, c版亞倫去既時候, 的紅葉好正呢, 有的拍得住日光個頭龍王峽, 之前我真係一路都搵唔到九州有咩重點, 依家開始有了......
噓, 隻貓貓都唔係第一日係度架喇, 唔使擔心呢, 佢個的叫逍遙呢!!
7. Mako | 2007.12.11 at 06:23
紅葉好靚呀, 貓貓又係好得意呀.
日本唔驚卦...應該有人餵~(希望)..
離開東京/大阪呢d大城市, 我覺得地平d商務酒店都係大d架~