第四日: 雨中花色
作者 : 大力
唔經唔覺, 係 pension lavender 住左兩晚, 都係時候換過第二度, 食完豐富既早餐, 結帳跟住同 asakawa-san 及 asakawa老闆娘-san 拜拜之後, 係門口影番幾幅相, 不過, 唔知點解, 淨係見到狗屋, 見唔到狗狗既呢? 等大鼻舊舊都無機會變成 sooty, 嗚哈哈!! 邊個係 sooty?
講番行程, 我地影完就飛車入富田, 費事晏左多人, 去到時太陽伯伯都好親切咁露過面, 但影唔夠十張相, 雨小姐就搶住彈閘, 真係俾佢激奀啊。好! 無得影相, 只好走去食雪榚, 富田名物, 薰衣草雪榚。丫, 原來一邊賞雨, 一邊嘆雪榚, 都幾盞鬼既。
係富田逗留既全個時段, 都係落雨, 見到咁樣, 唯有離開, 跟書仔走左去搵食。一間係南富良野既食手打 pasta 既店舖, 青山農場, 佢既賣點除左手打 pasta 外, 重有係佢既蔬菜食料都係自己農場種既。間店就叫青山農場, 的野食真係幾得, 個薄餅上既餡料真係幾新鮮, 的露筍幾青綠, 又鮮甜, 的蕃茄就好香同埋咬落清爽, 唔似得香港依家有的唔知點種出黎既蕃茄, 食落就好似食泥膠咁。至於個 pasta, 亦係好好味, 麵粉香滑, 搓揉出黎既麵條都係彈牙, 煮既火候亦係岩岩好, 真係有心得。 個 pasta 其實點好味, 只要我話俾你地聽, 我地連相都唔記得影就已經清除左佢, 你地都可以估到佢係幾咁味美。
食飽飽又再上路, 本來就想去麓鄉既景點, 但四周雨濛濛, 真係去到都影唔到相, 只好走去個展望台度睇下, 沿途既風景都係好靚既, 只不過都係煙雨淒迷得太緊要。中間經過一間音樂盒館, 同小樽個間都好似樣, 唔知真無關係既呢? 上到展望台, 風景唔係太特出播, 影左幾幅就預備散。
落返山, 因為猛落雨, 攪到天氣涼涼地, 人既熱量消耗得特別快, 不其然望下錶, 又夠鐘食下午茶播。抄下書仔, 見到有間咖啡店個樣幾有趣同特色, 好似係唔知邊套戲既場景之一, 所以即管去探下。話左俾車既自動導航員聽, 一路行一路行, 居然見到地圖有間野叫 "北之峰 XXX", 心諗, 咦! 唔通又返番去 pension lavender 附近? 去到再睇清楚, 哦! 原來係新富良野太子酒店, 個外觀都唔錯播。
跟住指示行入山邊樹林, 有一間間木屋仔, 有的係舖頭, 其中一間就係咖啡室, 都幾別緻架! 入去叫左兩件餅, 兩杯野飲, 唔! 原來餅既水準只係一般, 係環境真係幾特別。不過, 酒店即係酒店, 因為睇書仔話會有印仔吸, 走去問店員, 佢地會用英文講 "over there" 呢!
嘆埋杯啡, 行埋的木屋, 跟住都已經要去另一間 pension - 麥。依照自動領航員既指示 "嘛摸肋古, 起他里呵哥爹樹", 去到已經係下午五點幾, 一入門, 事頭婆就走出黎迎接, 跟住帶我地上房, 丫, 原來今晚既房叫 "月", 係和式無洗手間既。房中有個大窗係向住對面山, 都幾靚幾靜幾舒服架, 係房休息左無幾耐, 就已經係晚飯時間。
落左樓下既飯廳, 已經放好左沙律同一包錫紙包住既物體, 坐低左, 佢地就放上一碗金黃色既湯, 原來係南瓜湯, 好濃郁既南瓜香, 帶適中既果甜; 個包錫紙裡, 係焗洋蔥加帶子, 帶子已經係好鮮甜, 但內裡既洋蔥係唔知點解更加甜, 好味! 到個主菜上檯, 係一個焗海鮮大會, 有大蝦, 有帶子, 味道又係一流! 餐桌上有樣野好得意既, 就係對面其中一個日本女子係好 "驚嘆" 的食物既美味, 係全餐都不斷係度 "噢 .. 好味", "嘩 ..美味" , "唔 .. 喜歡', 真係全餐飯咁樣, 我就差的笑到碌地!另有一樣好神秘既, 就係屋主一路都無出現呢!
食飽左, 就上房休息下, 等沖涼, 但都等左成個幾差唔多兩個鐘, 淨係隔離房兩個日本小姐已經係入面嘆左大半個鐘呢, 我估佢地應該係去浸浴呢! 跟住又到頭房一家四口, 輪流入去,每人十分鐘都已經又四十分鐘了。等到有得沖, 沖完已經又好眼訓, 要去搵周公對奕, 呢樣似乎係呢間屋仔比較弱既一環呢!
迴響: (0).
引用:(0).
靜態連結網址.
發表於 2004.07.10, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]