第三日: 駐紮
作者 : 大力
今朝一早, 就有人肉/天然響鬧, 一班公公婆婆既傾計聲加埋雨聲, 四點幾就已經黎個醒神 morning call, 真係無言感激, 等我睇到早上四點幾既天色。 隔左一陣, 佢地散左, 可以再補補鐘。後來都係要起身梳洗, 跟住落樓, 睇下客廳既裝飾擺設, 都幾得意。到咁上下早餐已經預備好, 早餐都幾豐富架, 而且係營養同健康兩個層面上都會有幾高既指標呢。
食完早餐, 望下個天, 的雨都係化化聲, 不過都照樣出去, 最多冒雨影既者。先上去日之出公園, 落車時的雨又細番的, 老天爺都待我地不薄丫, 雨中散步都幾浪漫既。
而且, 雨景既搖鈴同埋遠景, 其實都有另一番味道既。影影下, 的雨又再大番, 可能即係叫我地搵的室內地方咁解喇。咁我地搵左一度叫 "寫真館" 既地方, 係一間木屋仔, 有相展出, 亦有小賣部, 的景色真係幾令人嚮往。
睇完相都有的肚餓, 咁我地今日就決定去旭川山頭火總壇, 試下佢既拉麵。車程一個小時左右, 去到正當搵停車場之際, 居然見到一大班人有巡遊, 拿拿聲搵間摩天輪車場, 嘻嘻, 因為未試過, 所以特登唔泊平地, 又幾盞鬼啊! 行出停車場, 搵番個班巡行隊伍, 噢! 原來係一班中學生既巡遊, 但唔知係咩野主題呢, 不過都好精彩, 好認真。最值得欣賞係巡行隊伍最後, 係有幾個工作人員負責執番的垃圾, 但居然連相機都執到, 真厲害。
唔經唔覺, 都睇左大半個小時, 個肚直頭發出最後通牒, 得喇得喇! 連跑帶跳咁入左山頭火既本店, 係個附近其實重有分店, 但咁遠黎到, 當然係要去本店喇。正當我地研究緊個餐牌寫咩之際, 廚師哥哥已經好醒咁羅左張有中文既餐牌過我地, 原來本店只賣鹽味, 另分大/中/小三個大細, 等左陣, 期待左好耐既拉麵就出現係面前, 賣相, 湯, 肉, 都係非常好, 唯一麵質就應該重可以有所提昇少少。
跟住係旭川市內行左陣, 去火車站吸個印仔, 跟住就羅車走人。路上經過一間超級市場, 入去了個圈, 買左三隻桃加一隻大蕃茄。繼續前行, 跟住就去左好多太陽花既夢之丘, 花好多好靚, 範圍亦好大, 可惜真係好大雨! 嘻嘻, 不過行過小賣部又有的得著既, 俾的鮮奶同薯仔吸引左, 又要放抵錢。
到返到 pension 附近, 見重有時間, 就開車去山後既 "果子工房", 係同事介紹過,但佢搵唔到。上到去, 一間簡約裝修既屋仔, 可以遠望富良野市既景色, 雖然接近關門, 但幸好招牌芝士餅同布丁都重有, 每樣要一件, 加兩杯香濃咖啡, 搵個近窗既位置坐抵, 芝士餅入口, 唔! 有濃郁芝士香味, 但又唔會漏, 唔錯唔錯! 個布丁, 就 .... 更加好味! 佢唔係一般食到既咁接近固體, 而係好似蛋醬再濃稠一點, 非常之滑, 好重奶香, 亦有淡淡既蛋香, 係非常之出色既一種甜品。個同事食唔到, 真係太浪費呢, 希望佢下次黎可以再食到喇!
嘆完下午茶, 就返 pension 坐陣, 已經夠鐘食飯, 今日既晚餐大致都係差唔多既形式。主菜係好甜美既帶子, 同埋惹味既芝士豬扒。飯後見天色又唔錯, 重無落雨, 就行落山散下步, 順便消耗一下卡路里。先行經一間家具店, 不過無咩睇頭; 再行過對面一家叫 HOMEMAC 既物體, 嘩! 真係包羅萬有, 汽車用品, 電器, 工具, 雜貨, 甚至寵物都有, 真係厲害。行完呢間, 就再過隔離既超級市場, 因為要買支水, 揀左支叫摩周之霧水, 聽個名都勁喇! 臨出門又發現左有富良野鮮奶, 嘻嘻, 一枝兩個人分, 唔! 即刻諗起利嘉兒 "味道真好"!
回程時經過老麥, 嘻嘻, 唔使驚, 唔係食野, 不過見到個價錢, 有感而發者! 原來個巨無霸餐要成四十幾蚊港紙, 係香港食都算係幸福咯。返到 pension, 望下天, 俾到個感覺係明天有望放晴, 望下錶, 前後已經行左兩個多鐘, 洗好白, 就要早抖了。
迴響: (0).
引用:(0).
靜態連結網址.
發表於 2004.07.09, 08:30
[«]
[上一日]
2004 大鼻舊舊 北海道‧京都夏季花間行
[下一日]
[»]