第四日: 橋下怒潮
作者 : 大力尋晚行街既時候見到有DOUTOR, 今朝放棄三角o麥早餐, 去探一下DOUTOR 既咖啡。行出東橫沿住步行街走, 唔使一陣就去到, 先用鼻探一下係唔係煙囪店, 幸好唔係, 同埋門口既高腳檯位置就已經係禁煙席, 今個旅程卒之都可以入到 DOUTOR 了! 要了兩份狗狗餐, 唔~~~, 好味道呢!
食完就返酒店執野, 退房, 羅車, 先去附近既栗林公園。 呢個公園都幾靚, 雖然唔算好大, 但有小橋, 有流水, 有魚仔, 的樹又有的佈局咁, 影相都唔錯既, 最重要係早上真係唔太多遊人。
呢次旅程我地有帶埋禮服黎, 諗住見到靚景可以自己影番輯相, 呢個公園應該係幾岩既, 可惜我地今日就要離開高松, 就唔岩時間聽日再影呢! 行左大半個小時, 到臨走時, 卒之有一團旅行團黎到, 你地睇下, 真係連條橋都企滿晒呢! 行完公園, 放一放抵紀念品, 就驅車離開高松, 往德島既路上進發!
行左大半個小時路, 突然發覺大鼻唔見左本護照, 佢本護照好有紀念價值, 去好多地方都會吸個印仔呢。 大人話應該係早上離開高松東橫個停車場時跌左, 因為佢聽到一小聲 "劈啪"。 於是只好回頭, 返去東橫找一下, 去到個職員羅晒電筒, 好熱心咁幫我地搵, 原來真係跌左落個摩天輪車場個底, 跟住要召喚電梯公司既職員, 唔! 攪到好似好嚴重咁, 真係唔好意思呢! 但真係要讚東橫那熱心既職員同埋電梯工程司既幫助!
去德島既路我揀左收費道, 個多小時就已經到, 中途係其中一個 SA 食過豐富既午餐, 有天婦羅, 關東煮, 烏冬, 味道就不過不失。 補充左體力, 就繼續行進, 去到德島, 見時間尚早, 就先去嗚門橋睇旋渦。
呢個睇旋渦既地方, 係橋既底部整左一的通道, 等遊人可以行出去, 凌空係海既中心處, 睇到兩邊海峽交匯處, 係潮汐漲退時既旋渦現象。 係行進既通道上, 有的玻璃窗整左係度, 可以清晰咁望到海面, 雖然明知個窗係可足以支持人既重量, 但踏上去既一刻都係會使人不其然咁倒抽一口氣!!
行完嗚門大橋, 之後就入城搵的野食定下驚, 搵到書仔話德島既拉麵都算係名物, 就一於去會一會佢, 跟住書既指引, 去到呢間拉麵店, 雖然係下午時份, 但都有的客人, 理應唔會太差。
呢款拉麵, 個湯都係濃湯, 但就唔係好膩個種, 只係味濃, 肉就好似肉片, 唔會係一大塊既厚切, 最特別係加上去既蛋係一只生蛋, 將蛋與湯拌勻, 就有的蛋香加一種滑滑既口感, 容易入口, 相信係要與當地氣候配搭, 唔會好似北國既有濃濃既油香。
食飽左出黎, 發現對面有間大既超級市場, 又走入去逛下, 睇下有無生果之類, 但發覺原來離開大城市, 真係連的超級市場都無咁多野賣, 無論種類質量同新鮮度, 都無之前係高松岡山個的咁多選擇, 開始感受到點點偏離大城市既生活。
之後我地就搵到上東橫既路, 先去打點好房間, 跟住出市中心德島站附近搵食, 不過行勻車站附近, 都無發現令人提起興趣既食店, 幸好後來找到家咖哩連鎖店, 享受一餐今次旅程未食過既咖哩飯。呢間咖哩飯, 有好多組合形式, 可以減飯, 加辣, 加菜, 唔識日文既我地, 都要一的時間先可以消化到個餐牌。 不過, 慢慢睇清楚都可以知道係點運作既。
由於車站附近都無咩特別既街行, 我地食完都係返酒店早作休息, 同周公早的開局對奕了!
迴響: (0).
引用:(0).
靜態連結網址.
發表於 2006.11.09, 08:00
[«]
[上一日]
2006 大鼻舊舊 四國行
[下一日]
[»]