第三日: 山間遊
作者 : 大力一大早起身, 天朗氣清, 梗係出發出搵的戶外地方走走喇, 今日既目的地係祖谷溪, 呢度係一的古舊文化既山區, 同埋有的風景, 如果紅葉再多一點色彩, 又係一個會幾怡人既地方呢。
由高松出發, 開始都係跟住自動車道走, 因為會快好多, 預計都係一個多小時左右就可到達, 大鼻一路上都金晴火眼留意窗外景色, 你睇佢睇得幾開心。 雖然話係自動車道, 但其實好多路段都只係單線行車, 一有大車帶頭, 就會變成一串長長既車龍, 所以結果都係比預定時間遲差不多半小時先可抵達。
我地第一站係かずら橋, 吊橋係由的藤蔓編織成, 腳底下係疏窿既, 行上去都係要步步為營, 否則真係會插左隻腳係橋面上, 都幾有趣, 大鼻舊舊都要抱住先敢行呢!
行完吊橋, 我地就繼續行程, 去搵大小步危, 車站我地好易搵到。 不過想要行下的地方, 原來渣車唔係咁易, 因為無地方泊車, 又唔敢放底架車太耐, 卒之大小步危之行都可以話放棄左, 只係可以o係車站附近影下相。
不過, 咁樣無目的輕輕鬆鬆既行程, 都幾得意又舒適既, 周圍望下山色水影, 搵下的僅有既紅葉。 係附近既山頭繞了幾個來回, 我地就去搵小便小僧, 話說小僧企既地方係以前的人試自己膽量, 係絕崖上一塊凸出既小石。 係小僧既附近山頭, 其實已經有點點抹紅, 不過佔既比率真係唔多, 望落都係綠色既山巒, 話雖如此, 呢個山谷既景都算係幾壯麗既!
影夠相之後, 就搵下書仔, 睇下附近有咩野地方可以醫下肚, 見到順住返高松既路上, 有一家推介既烏冬店, 就即管去試試。
去到店子, 由於已接近打烊，店員們都已經係廚房開始清潔, 但佢地見到我地入去, 都仍然係好熱心咁引領我地入座, 跟住重好好咁介紹話食定食係最抵既。結果我地揀左兩份定食, 呢度居然亦有以前係滋賀食過既丫魚, 烏冬上桌, 熱騰騰又煙煙韌韌, 真係幾好食, 至於條丫魚, 可能唔係
季節既關係, 似乎唔及係琵琶湖食到既咁好。但佢跟定食既冷奴豆腐, 真係好香又滑, 雖然佢唔係個種軟既豆腐, 但仍然食到個種滑既感覺真係唔錯呢!
食飽左就繼續歸途, 入黑既路上, 居然比早上更加繁忙, 幸好就無遇上大擠塞, 返到高松泊番車入酒店都仍係晚飯時間。 晚飯地點其實早於昨夜已經決定左一間係酒店附近既燒肉, 因為我地羅左一張高松既地圖同簡介, 同時亦附上優惠券, 依住食得唔好浪費既原則, 我地跟住指示行去; 本來以為佢係商店步行街左近, 點都會有的人氣, 但上到去我地居然係包場, 去食物館遇上咁既情況, 硬係好似唔係好自在, 無咩人氣食野好似食得唔太開心咁。
呢種咁既情況, 唔知係我地好彩定點, 係日本幾個唔同既城市都遇上過, 攪到對呢的城市都有條刺, 其中函館幸好有個朝市拉番高的分數, 釧路同今次既高松就真係...。 但唔緊要, 提起精神我地就叫左兩份中價既套餐, 最初以為先上既幾碟肉已經係全部, 蠢蠢咁以為死火遇上黑店, 但食到中途, 侍應再送上其他, 由本來認定會唔夠飽變成爆肚既份量, 再加上我自己叫既兩大杯生啤, 真係要捧住個肚走呢。
飲飽食醉出黎, 要慢慢散下步, 吹下風, 消減下的熱量, 先可以返酒店梳洗訓覺呢!
迴響: (2).
引用:(0).
靜態連結網址.
發表於 2006.11.08, 08:00
[«]
[上一日]
2006 大鼻舊舊 四國行
[下一日]
[»]
1. 大力 | 2008.09.03 at 11:47
的烏冬入口滑, 咬落韌, 聞落香, 真係非常好呢!
2. Mako | 2008.09.03 at 11:32
我都幾鍾意條蔓橋...景色靚得黎又唔算好驚,我朋友就畏高,所以要抓實個邊好慢咁行完條橋．
我平時唔吃烏冬的，都覺得高松既正宗讚歧烏冬好得哦～