第二日: 進入新地域
作者 : 大力尋日成日既舟車, 攪到今日訓醒梳洗完, 落樓下都已經無晒三角嘜了,只好枰埋的行李去車站先搵食, 去到車站, 本來想去 DOUTOR, 但去到門口都係唔可以入, 因為的煙味實在係太濃郁, 跟住我地發明左用個鼻黎搵食既方法, 嘻嘻! 唔係話聞到邊間的野食好味, 而係企係食店門口, 透啖氣, 如果的煙味係好強勁既, 都唔使入去了。
用呢個方法行左幾間, 卒之有一間係可以入既, 重唔貴添呢! 400 日元, 有蛋, 有沙律, 有多士, 重有咖啡添!! 好悠閒咁嘆完個早餐, 就去買車票, 我地跟住一站就係岡山, 由於班次都好密, 所以唔使一早買定, 而且只係買自由席已經可以了。
去到岡山, 一出車站就係一個商場, 見到有間書店, 就入去買多左本溜溜步既走快(drive), 方便渣車既時候用, 攪掂所有野, 就搵路去租車公司, 羅車手續都好容易, 的職員都好熱心, 問埋我地要去邊, 跟住左抄右抄搵的相關地圖過我地, 佢地的服務普遍真係有心的既。
出左車, 就一路向四國進發, 剛開始的時候路面都幾繁忙, 有少許擠塞, 到離開市區一段路, 已經係疏疏落落, 而且通常都係一的大貨車, 你睇下人地的車幾靚, 架油車個尾可以照鏡呢!
我地一路向南走, 不一會就去到瀨戶大橋, 呢條橋都幾大條, 重有個觀景台, 由於觀景台係貼近海面, 同條橋既落差都幾大, 所以條連接既路係好似我地的大既車場咁, 有轉轉路既! 係觀景台逗留左陣, 就再上車去琴平, 其實我地最終目的地都係金刀比羅宮, 不過, 係自動導航搵用琴平車站, 係比較容易既! 去到車站, 吸左印仔, 就開車過去金刀比羅宮既山腳。
去到一個彎位, 突然間就有的人渣住塊牌標出黎, 真係俾佢地嚇親, 嘻嘻! 以為香港的地產代理黎到日本添, 再留心下, 原來佢地係叫你地泊車, 我就裝作若無其事咁, 再繞多個大圈再入過去條路, 今次我睇清楚路牌, 就開到入去個條商店街既後面。
其實我地唔知可唔可以渣車上山, 但之前搵到既資料都話要行千級樓梯上, 估可能都係要泊低架車, 就求其搵左間有位既店舖後泊下, 不過原來要留匙, 我死問佢 "大丈夫的是架?" 佢都拍晒心口話係! 跟住入左佢店中, 指手畫腳攪一輪先明佢地既運作。 原來: 佢會俾張泊車票你, 面值一千, 如果你係佢地店中買任何野或食野夠三千, 就可以用番個張當現金券, 如果唔係就要俾一千蚊泊車。
雖然泊車感覺好似好貴, 不過都黎到都係無法架喇, 只好照泊, 跟住上山。 話就有千級樓梯, 但其實唔太難行既, 而且行到咁上下, 又有的平地俾你企下, 休息下。上到去大殿, 個景色真係幾開揚, 不過, 滿山既葉都係未點轉色, 缺乏左的點綴呢。
係山上留左陣, 就原路落番山, 途經一個栗子檔, 見的栗子都幾大粒, 就買左包試下, 噢! 但原來佢地賣既唔同香港係俾的熱刺刺既你, 只係俾的凍左既, 唔~, 雖則係幾甜, 但好似無咁好食。之後, 見時間都差不多, 就驅車去高松搵今晚既東橫, 嘻嘻! 又係因為無印地圖, 搵到泊好車俾埋停車費, 入去辦入住手續時亞姐姐好滋油咁羅份地圖出黎, 話俾我聽, "你去錯了,你依家係呢度, 即係東橫中新町店, 你住既係呢度, 東橫兵庫町店,你出去直行六條街就係了", 噢!! 我跟住話俾佢聽我俾左停車錢添, 佢就好好人咁帶我地出去問番伯伯羅番錢, 等我地羅埋車呢!
去到正確地點, 又有一個難題了, 個摩天輪停車場係無人控制既, 要自助, 哎呀!! 後來, 卒之都係走入去問佢羅張入場証, 跟住照指示做, 都幾好玩架! 攪好一大輪上左房, 稍作休息, 就出去搵食, 想當然車站附近應該係旺區, 就走去望望, 點知都唔係太多人, 但都好, 叫做有個商場, 又有食物店, 搵到一間叫做夢之豚既, 叫左兩份套餐, 有鐵板同埋吉列, 丫, 又幾好食播!
食完行返出車站, 欣賞下早黎既聖誕燈飾, 都幾浪漫既, 不過就大風左的, 呢日應該就係番大風, 北海道又有龍捲風既日子! 食左陣風, 都散咁的熱能, 就當然要帶番的啤酒薯片返去酒店, 補充補充喇! 唔少得既重有較早時候買到既生果呢!
迴響: (2).
引用:(0).
靜態連結網址.
發表於 2006.11.07, 08:00
[«]
2006 大鼻舊舊 四國行
[下一日]
[»]
1. 大力 | 2008.09.03 at 11:44
但記得好似係妳提過, 大殿後重應該有得上, 再上高的既山景應該更好睇, 可惜我地無上到呢!!
2. Mako | 2008.09.03 at 11:28
我係四月去既.金刀比羅宮有櫻花,所以都好靚.不過個人認為上到大殿有"下,就係咁?!"既感覺. 似乎果千幾級樓梯似賣點多d :P:P