第一日: 甜蜜往外走
作者 : 大力懷住興奮又甜蜜既心情, 一大早出發去機場, 係紅磡既酒店出發, 大件細件行李跳上的士, 司機哥哥本來亦係好雀躍既心情, 係咁解釋我地去坐機鐵有幾唔抵, 又有的優惠既提議, 不過佢既熱切意志都係應該俾我一句 "九龍機鐵站丫, 唔該" 而磨滅左。
去到機場, 雖然時間尚早, 但由於係後補機位,所以都先行埋去個櫃檯了解一下情況, 一見個航班側出現左三個交叉, 真係都嚇一跳!
先向櫃檯既職員遞上機票, 指示就係九時半左右先回來再睇, 只好行開去搵個早餐食, 跟住渣住杯咖啡, 就坐係櫃檯側既凳, 等候進一步既指示。 等待既感覺都係特別漫長, 其實都只係半小時左右, 好不容易先等到亞姐姐嗌名, 指示可成功登機, 但我都仍然保持住鎮定, 因為我知道一日未開機, 一日都重有機會唔成行既!
攪妥寄倉行李及腳架, 就連隨入閘, 呢次行程都試左好多第一次, 第一次唔係過"個度", 而係行e道, 好似大鄉里咁感覺好新奇! 除此之外, 今次重咁岩有幸可以試到商務客位, 原來真係幾舒適, 提供既餐酒都幾好味。
航程途中, 飲多半杯白酒, 半睡半醒睇左魔盜王, 好快三個多小時就已經去到關西上空, 落機入境羅埋行李出到車站, 都只係三點十五分左右, 一出機場, 就見到車站外既紅葉都開始抹紅了! 由於今次落腳係新大阪東橫, 於是揀左關空特急HARUKA, 四十五分鐘左右, 2400幾既車費。
迷迷糊糊咁係新大阪落左車, 好似失左方向感, 先發覺原來今次既行程係忘記左列印各酒店既地圖, 哎! 真係甩頭!! 不過, 定一定神, 望一下車站既地圖, 靠記憶同東橫網上既地圖印證一番, 都搵到大約既位置, 加上大人同大鼻舊舊都住過, 佢地都可以帶到我去既(應該)! 嘻嘻!
幸好一出車站, 遠遠都可以望到東橫既大招牌, 拖實行李上去辨好入住手續, 就抓緊時間, 出黎車站既書店買番幾本四國既書仔, 跟住就坐地車出去心齋橋搵食。 其實今晚一早都有心水, 就係諗住去試下河豚, 呢個又係未試過既野, 雖然酒店既地圖無印, 但好奇怪我又識印左呢個食店既地圖, 嘻嘻, 想話唔係為食既人都唔太容易呢!
本來諗住食飯前先黎個夫婦善哉, 但搵極都係唔見左, 以為自己記錯, 但印象中佢又係間廟仔側, 依家返到黎上網搵下, 原來佢係工事中, 等我又再次黎到大阪都食唔到添, 希望好快下次可以再去食到喇, 諗番起, 對上一次已經係五年前既事呢。
食唔到湯丸, 就唯有早的去食河豚, 一入去, 就被帶上三樓, 九曲十三彎先有地方坐底, 原來都幾旺場呢! 坐下先叫了飲品, 再點了兩款套餐, 好快就已經有野食黎。一開始既應該係魚皮, 感覺好似海哲, 爽脆, 清, 加上係凍食既關係, 都幾醒胃既。 呷啖啤酒, 肚餓既感覺更加強烈。 之後係厚, 薄切既刺身, 同時上場, 薄切就主要係肉身部份, 軟身的清淡的; 厚切應該係有的皮同肉之間既組織, 令佢更加有個種煙韌既口感, 同埋食厚切有個份豪氣, 似乎更加好味。
再跟住係炸骨頭魚翅部份, 香口唔油, 不過魚味唔算濃, 當然佐啤酒都算係妙品。隨後既就係重頭戲既鍋, 個鍋好有趣, 只係一個竹簍加一張和紙, 紙上注入水, 水中又放入一塊鐵片, 就已經係一個鍋了。
鍋物既魚肉, 成大碟咁送上, 有的肌肉位重係會跳動既, 好明顯真係新鮮上桌既, 肉都係鮮味既,不過就唔係好特出, 但因為肚中雷公強烈抗議, 羅通掃北咁好快就將鍋物完全解決, 店員亦好快就黎幫我地整粥。
之但係, 可能之前真係太快了, 魚係鍋入面未完全析出佢既鮮, 令粥既味道唔及其他版友形容得咁鮮味! 下次再去, 我要慢慢嘆真先得了!
迴響: (2).
引用:(0).
靜態連結網址.
發表於 2006.11.06, 08:00
2006 大鼻舊舊 四國行
[下一日]
[»]
1. 大力 | 2008.10.28 at 09:23
多謝你讚賞, 我的都只是普通初階業餘級數吧.
由於四國公共交通, 比不上日本其他地方的準繩及方便,
以有限的時間, 自駕是較為方便與及有彈性的方案.
我的行程, 全程用一輛車完成, 通常連續租車, 在第一日後, 價錢是會有點優惠, 這樣就會比較划算; 但假如, 不斷重複日租、還車這動作, 除了錢要多付一點, 時間亦會多花了, 及因租車公司的關門時間而有限制, 削弱了本來自駕可帶來的彈性呢!
希望這答覆對你有幫助, 假如還有問題, 你亦可於以下日遊新聞組發問, 會有更多其他版友可幫忙的:
news://news.3home.net\3interest.travel.japan
祝 日遊愉快!
2. abby | 2008.10.27 at 20:33
hello！你好！你的照片拍得很美。
本人正打算去四國自駕遊，想請問你是否一駕車走勻這些地方？定還是不停還車再租車呢？
多謝指教。