第十二日: 再見
作者 : 大力不經不覺就到左行程既尾聲, 今晚就要離開, 真係有o的未夠既感覺, 不過銀行戶口出血情況已經差不多係乾涸。
但因坐夜機, 早上仍可作最後衝刺, 去埋我一路都好想去既東福寺。九點左右去到, 已經幾多人, 買票進入通天閣。嘩, 呢四百日圓值回票價咯! 我暗想, 好彩有黎埋呢度, 可以話係今次旅程見到最美麗既紅葉。跟住再俾四百日圓去方丈庭園。我自己就覺得幾好睇, 都算值回票價, 但如果唔喜歡睇庭園既朋友, 我就建議唔使用呢四百日圓。
行完之後, 就返酒店沖涼, 執拾, 退房。跟住將行李放於車站櫃, 然後去高島屋行公司。除了食左盒海膽壽司外, 重被我地找到舊年食過好好味既栗大福。舊年係京都車站地下街食過, 本來諗住今年再食, 點知佢已經唔係度, 但又有一間相似既物體, 等我地之前禽禽青食左一粒唔好食既, 當時呢幾失望呀。依家居然俾我地見番佢, 真係開心到要買夠一人兩隻先得。重有隻係紅豆包糯米, 都好好食架。
到左機場, 辨好手續, 就食埋餐下午飯, 手打烏冬。o的烏冬都幾好, 又彈牙, 不過o的料就 .... 唔, 好懷念北海道既蟹、小樽既壽司、溫泉區既懷石、函館既海膽丼, 你地, 你地, 咪走呀 ........
迴響: (0).
引用:(0).
靜態連結網址.
發表於 2002.11.12, 08:00
[«]
[上一日]
2002 大鼻舊舊北海道‧京都紅葉行