積丹 Euro-R 篇
作者 : 大力呢日一早精神奕奕, 好興奮, 因為今次係第一次租車, 大家唔使柴台住, 因為只係第一次租手波車, 重係幾好玩又跑得下添既 Accord euro-R。羅車既店舖位置, 我係早一日已經行過一次, 摸清方向, 但其實佢都係距離東橫三個街口左右, 絕對唔難搵。
至於當日既行程, 我就揀左去積丹, 因為除左想試下架車行公路, 亦想試下跑山既味道, 加上行程都有段距離, 唔會攪到到喉唔到肺。 特別提提, 租呢架車係有里數限制既, 即係個租金係限於行車距離若干公里, 還車時行多左係會每公里咁計番錢既。
慢慢遊車河式咁, 渣成百公里路, 卒之去到積丹, 唔太難就搵到呢間要去既中村屋, 我地一人叫左個飯, 大人就梗係佢最愛既海膽飯(居然唔係我, 嗚嗚!), 而我就叫左個甜蝦飯, 另外再叫多份墨魚麵。
落單後, 飲杯熱茶, 飯就好快跟住送上。 哇! 個樣都已經得到不得了, 放入口, 真係新鮮! 食左兩啖, 亞老闆娘埋黎同我地傾計, 又問我地邊度黎, 又問我地食唔食蝦, 我都奇怪, 我咪食緊甜蝦飯羅; 咁佢又行開左, 以為佢都係埋黎寒暄下, 點知無幾耐, 佢羅住兩隻大既蝦入黎, 親手拆埋殼放入我地碗中, 真係過意唔去!
點知跟住佢又行左去, 我地繼續食喇, 佢再返轉頭就羅左兩碗野入黎, 跟住將我地套餐盤上既面豉湯移開, 掀動佢羅入黎個兩碗, 原來係新鮮既海帶面豉湯, 佢話的海帶重係佢自己親自遊出去羅既呢! 其實佢羅入黎既湯, 一開蓋聞到, 就同原本跟飯既高下立判, 新入黎個碗, 除左熱刺刺, 重有個陣海水既氣味隨住的熱氣升上撲面。 忽然覺得係味皇卡通, 個的聞到野食既香味而幻想自己係海邊漫步既情景, 可真係唔誇張既!
慢慢嘆完一餐滿足既午餐, 謝過店主及店員招待, 就再驅車係積丹附近參觀, 如積丹岬, 島武意海岸, 遠望個觀音岩。 後來天色變得灰暗, 天氣又驟然悶熱起黎, 攪到都無咩心機去行。
於是就順便離開積丹, 向住小樽方向返去, 回程既路途上, 亦細意咁試下部車。 覺得操控上容易, 反應又夠敏銳, 車廂內又靜, 設備都不錯, 尤其係恆溫冷氣最令我印象深刻, 因為真係好夠涼。
迴響: (0).
引用:(0).
靜態連結網址.
發表於 2007.06.05, 12:00
[«]
[上一日]
2007 大鼻舊舊 北海道 春季尋花行
[»]