鈴蘭篇
作者 : 大力呢種花叫鈴蘭, 大人最愛既花種, 今次呢個北海道之旅, 其中一個主要題目都係為左鈴蘭。
係北海道, 只要岩時候, 鈴蘭可以話係隨處可見, 只要細心留意街頭巷尾, 一的比較無咁多日照既角落就可以搵到佢地既蹤影, 甚至如果你有一個靈敏的既鼻, 都有機會因為佢個種獨特的淡香而搵到佢地。
成個旅程, 見到最靚既鈴蘭盆栽, 就係去到東橫 JR札幌北口既玄關, 又粗壯, 又多花, 花又大粒, 我同大人踎係個度影左好耐, 先至捨得上樓放低行裝出去食飯。
之後係美瑛, 一間俾人們行婚禮既場地對面, 有一片大概係羽毛球場咁大面積既鈴蘭地, 大人見到當然興奮, 不過呢度就比較多昆蟲仔, 的螞蟻好大隻的說, 怕呢的小昆蟲既朋友就要留意, 可能唔好行入去就唔使忌住忌住。
整個尋花之旅, 最大面積既係平取町, 雖然我地係美瑛住, 不過都特登渣百幾公里車, 重要途經好多都係彎曲小路, 趕及係平取町攪鈴蘭會之前去到, 免得遇上大人潮時擠迫, 影相又阻住其他遊人。
平取町個鈴蘭叢生地, 其實係一個山谷位咁, 一行入去, 係望唔到邊咁既"草地", 但其實如果你細心留意下, 成片都係鈴蘭, 係入口附近既幾片, 應該比較受日照多, 大都已經開花; 沿住花田與花田之間既路行入谷, 就重有好多都未開, 睇個生長期應該可以支持多兩星期。
如果要去平取町睇到最盛開既鈴蘭, 六月中旬左右應該係最佳時間, 有興趣既朋友可作參考。
注意: 鈴蘭既根莖有毒, 接觸到時要留心, 最好之後都清洗乾淨; 假如有小朋友或寵物, 盡量唔好俾佢地接觸到, 以減少中毒的危險。
迴響: (0).
引用:(0).
靜態連結網址.
發表於 2007.06.04, 11:00
[«]
[上一日]
2007 大鼻舊舊 北海道 春季尋花行
[下一日]
[»]