食物篇 - 參
作者 : 大力
係美瑛猛咁搵書仔, 搵下附近會唔會有牛牛食, 原來美瑛正正就有當地既牛牛 - びえい牛。 而呢個農場就係其中既代表, 有附設餐廳, 有農場體驗, 幾適合帶埋小朋友黎既。
講番的牛, 我地應該唔係食最靚個的, 入口唔會好似神戶牛松阪牛咁即溶, 但個肉味係幾濃, 亦唔會話韌, 最重要係唔會好似個的名牌牛咁貴。
千代田
跟住係窗邊一字排開, 係旭山動物園特別阪既布丁, 不過我地唔係入旭山動物園買既, 只係在回札幌途前, 係旭川車站買到既。
佢有幾款味道提供, 應該係吉士打/朱古力/雲喱拿/芝士/白布丁/南瓜, 我地只係買到吉士打/朱古力/原味, 味道只係不過不失, 但樽上既公仔都幾靚幾有特色, 所以我地都帶左番屋企要黎做裝飾。
旭山動物園布丁
由旭川返去札幌, 見重趕得上食午餐既時間, 就去左大丸樓上既食事處, 食呢種我未食過既湯葉料理, 即係食腐皮。其實呢間我地第一日到達時, 已經上過黎一次, 不過俾人拒絕左, 唔做我地生意。
事緣應該唔係我地衣履不整, 只係我地太夜上去, 其實都只係九時多, 佢地話食湯葉會好長時間, 趕唔切係佢地關門前食完個宴席, 所以我地第一晚係碰了個釘子。
會席開始, 係一小杯極之濃味既豆漿, 唔係誇張, 小小一杯係好似將自己整個頭埋進成盆黃豆一樣既感覺。跟住既豆腐, 真係好佩服廚師, 將佢做成好似的寺院庭園既枯山水, 有美感又好味。
主角既湯葉, 係要有耐性先可以, 因為一片腐皮, 要等幾分鐘先會凝固, 整個程序係好慢 ~ 好~ ~ 慢的。
北の麩庵
係屋仔既書仔度, 睇到一個拉麵既廣告, 用相機影底左, 返到札幌就去搵食。係美瑛地區返番黎, 札幌居然比較涼, 最好就係食碗熱呼呼既麵。
一碗牛油一碗辣都好岩呢個天氣, 成碗麵個湯最出色, 放底已經聞得到個香味, 尤其牛油豬骨湯個碗, 真係好"吸"引!! 麵本身就似乎無咁有特色, 比較平實, 肉就都係夠淋夠味, 中上質數, 成碗黎計, 如果唔要排長龍的話, 其實係可以一試的。
如果只係諗住試一下, 呢間店有半份麵既提供, 都係幾好既設定呢!
山櫻桃
呢間應該唔使多介紹, 照計好多書仔都會講佢, 不過, 我自己覺得佢既餅並唔係非試不可, 假如去到百貨公司地庫, 個肚只係得有限配額, 都唔一定要試呢個。
當然, 我因為都算係甜品狂, 所以見到餅都係會情不自禁同佢溫存一番。
LeTAO
係完成旅程離開北海道時, 最後一站多數會係新千歲空港, 係呢度除左有野買之外, 亦都有好多食物店, 可以試到北海道好多既特產。
當日, 我地去到已經食左天婦羅飯, 不過行左一輪, 臨入閘前, 都係忍唔到口再去飲枝奶同食個薯仔。雖然唔係男爵薯仔, 但無論係加香濃既牛油, 又或者係幼滑既芝士, 都係好好食既。
新千歲空港市場
係上機既時候, 居然出現一個重未想像到既驚喜, 就係我地居然俾安排坐上頭等倉, 係一張咁舒適既椅上, 嘆杯紅酒, 睇住電影:
人生 - 乎復何求呢?
國泰航空新頭等倉(個別客機已經投入服務)
迴響: (0).
引用:(0).
靜態連結網址.
發表於 2007.06.03, 10:00
[«]
[上一日]
2007 大鼻舊舊 北海道 春季尋花行
[下一日]
[»]