食物篇 - 壹
作者 : 大力
一開始就梗係要講壽司喇, 去食既呢間都係好多版友都有推介, 就係札幌站側既根室花丸, 質素真係唔錯的, 同埋價錢真係唔貴, 由百幾到五百左右一碟, 你計番即係最貴都係三十多港圓先係最高價個的, 都可算係相宜吧!
睇下一開始既白飯魚, 的眼仔重係幾咁精靈, 直頭好似有的光 "呼" 咁射出黎, 吸引住你既手自不然就要去羅佢埋黎, 再跟住既八爪魚, 帶子, 魷魚, 牡丹蝦同青瓜沙律, 都係色澤自然柔麗, 將佢最真最靚既一面咁帶上桌。
根室花丸咕嚕咕嚕壽司
接續既就係西餐, 都係位於札幌站側, 口味就比較意式, 以意粉薄餅呢類輕食為主, 個香草海膽意粉, 海膽唔會太熟攪到鞋口, 個白汁好香好滑, 意粉就硬少少不過係可以接受, 當然如果版友們唔鐘意太硬, 就記住落單時要知會一聲;
個蕃茄煙肉蛋漿薄餅就真係無得挑剔, 薄餅真係薄既, 蕃茄係好濃好鮮, 煙肉唔太肥又唔太乾, 加埋個上桌先打落去既蛋, 幾種香氣混和, 乘住出爐薄餅既熱力直湧入鼻腔以至四肢八骸!
Gran Diva Ristorante
多士早餐就係我既早餐飛佛 - DOUTOR, 三幾百日元, 有咖啡, 有多士, 都係幾好既選擇, 同埋最緊要係佢容易遇上, 通常旺區多數會有佢既蹤影。
DOUTOR 咖啡店
大鼻同舊舊爭食緊既軟雪榚同紅豆雪榚, 應該係一間新店舖黎, 因為零六年二月去過美瑛都唔覺佢係度, 佢的雪榚好香, 紅豆大大粒, 都煮得幾淋下, 唔會實轟轟咬甩牙個種, 另外, 佢隔離係重有餐廳同埋蔬果店, 不過未有機會行同試到, 但都見到幾多人食野, 理應不錯的。
美瑛選果
去到美瑛富良野地區, 就點都要試下佢的農產副食品, 好似蔬菜, 生果, 牛奶, 五穀一應既加工品都應該要試一試, 就好似呢間餅店, 佢重附設咖啡店, 係一個非常好既地方, 我幾次去富良野, 都要走黎探一探佢的餅同布丁, 先覺得對得住自己個肚。
你睇大鼻舊舊淨係望住的餅既時候, 真係條頸都長左兩吋, 到舊舊有得食布丁(嘻嘻, 食番自己!!), 都一樣食到幾開心!
菓子工房 Furano Delice
係北海道, 梗係要試下拉麵添喇, 其實之前我地都已經食過呢間, 雖然我唔係去總店, 單靠裝潢同麵既樣, 大家可唔可以估到佢係邊間呢? 嘻嘻! 佢最容易俾人分辨既野, 應該無係今次碗麵出現。
估唔到的話, 我開估了, 就係香港都曾經有過既山頭火。而佢最容易認既應該係麵上會有一粒梅子, 可惜唔知係唔係店員姐姐忘記左放, 雖則如此, 今次食到既麵反而比上次係總店食到既好。湯味方面其實都係差不多, 分別主要係麵既軟硬, 上次係總店的麵淋左少少, 今次就煮得岩岩好, 彈牙好多。
山頭火
迴響: (0).
引用:(0).
靜態連結網址.
發表於 2007.06.01, 08:00
2007 大鼻舊舊 北海道 春季尋花行
[下一日]
[»]