第五日: 知返
作者 : 大力尋晚既甜品留左黎做今朝既早餐, 鮮奶真係成日都咁好味, 蛋糕同布丁都係唔錯!
食過甜點, 就落樓下食埋東橫提供既三角o麥早餐, 加碗熱刺刺面豉湯, 送的漬物, 真係無以尚之。 之但係三角o麥只係淺嚐輒止, 因為去到新千歲將有更大既工程。
早一日其實已經睇到東橫內有塊牌, 寫住有空港巴士站係附近, 咁就梗係揀呢樣喇, 無理由重大袋細袋咁去先搭地車再轉火車吧! 食完野我地都去問下櫃面會唔會有飛買。丫, 果然有, 重要係個的回數券, 只係九百一張, 比正常單買平左一百日元一張, 又幾好播。
咁我地就上樓收拾行李, 攪妥退房手續, 行李就寄存係東橫, 就出街行下。 去東急手行左輪, 掃的生活雜貨就返酒店。羅番行李, 係東橫行出門口, 右轉行唔夠兩步, 就已經係空港巴士既站頭, 真係非常方便。
巴士既唯一唔好處係耐少少, 同埋車箱中真係好焗幾熱, 千祈記得上車前要著得輕巧的, 咪去唔到機場已經焗暈左或者中左暑, 嘻嘻!
去到機場, 由於時間尚早, 未有得辦登記手續, 咁先去搵入錢行李櫃, 不過無空置既大櫃, 但唔使擔心, 重有行李暫存櫃位, 一大一小都只係七百日元。跟住當然係去醫肚弓喇, 五臟廟唔祭下佢, 好易謝晒架!
係食店層行左一圈, 搵左一間可以實現幾個願望既, 有生蠔, 薯仔, 牛奶, 墨魚麵, 海膽飯, 同埋蝦刺身, 真係好鬼正。 尤其係個生蠔, 圓潤飽滿, 鮮甜味美! 其實成個行程都想搵蠔食下, 但一路都遇唔上, 呢舖都真係羅番個尾彩。當然其他野都一樣係好味, 而且重要係價錢都唔係咁高昂, 係機場好多時都係斬得你就斬, 呢度又真係唔會, 可能真係競爭太大。
係食野既途中, 已經聽到宣佈話航班既登機手續已經開始, 食完嘆埋杯熱茶之後, 就去攪攪佢, 先將所有既隨身行李清入寄倉, 咁跟住就可以開始去採購。其實我地目標都好清晰, 鮮奶及芝士餅, 我地重一早預備好冰袋, 以及雪種。
雖然話目標清晰, 但行下睇下試食下, 都好快就個幾鐘, 連隨整多枝軟雪榚, 再買多兩件炸餅, 因為驚食唔晒, 所以唔敢買多。點知上到機一咬就後悔, 個兩件分別係炸芝士薯仔, 同埋炸魚蛋, 哇, 真係好味道, 腦海係閃出過騎劫架機番去等我買多兩件既瘋狂念頭! 當然無理由真係咁做, 不如留番一個動力, 下次再黎過買咪重好!
想住想住, 嘴角似乎仍殘留個兩件炸餅既香味, 當飛機係香港上空, 我仍係夢中同一眾好味道既北海道美食開緊狂熱派對呢!
迴響: (0).
引用:(0).
靜態連結網址.
發表於 2006.02.25, 08:00
[«]
[上一日]
2006 大鼻舊舊五日北海道走快