第四日: 迴‧盪
作者 : 大力一大早就起身, 先係房浸個浴, 欣賞下晨光美景, 寫意! 連隨收拾好行裝, 就落樓食早餐, 早餐只係自助式, 不過就算多選擇, 味道亦唔錯!
食飽左就上房執好行李羅埋上車, 攪埋退房手續就離開。之前提過話加水入水潑水箱係件錯事, 依家就發覺了, 就係水箱經過一晚之後結晒冰, 攪到沿路都無得清潔大銀幕, 只好隔一段時間就落車淋一淋水, 所以大家記得留意下呢樣野。
之後就去河邊睇天鵝, 都有好多架, 一隻隻肥肥咁, 幾得意。本來河堤有個木箱仔有的野可以用黎餵天鵝既,側邊有個箱仔入錢, 之但係有張紙仔貼住, 我估係預防禽流感之類, 攪到都我係唔敢餵, 只係同佢地影下相就算。
影到咁上下, 都係要開車走, 因為除左要趕還車, 重要趕搭之前買落既旭川札幌火車, 佢因為買來回係有折扣, 所以當日黎既時候已經買定回程票。 三個小時既車程好快就到, 今次可以快少少, 因為時間可能早, 係的小市既地方無咁多車。預定時間前已經還左架車, 陪左我地三日既朋友, 俾我地整到烏糟貓咁, 都係要返去沖個涼呢!
還左車見重有時間, 即刻去附近張羅下車上既午餐, 如果唔係肚空空都幾辛苦! 行左一轉百貨公司, 同埋車站便當亭, 好快就已經攪妥。上到車坐一陣, 停第一個站時, 有幾個自己友上車, 其中一個哥仔, 居然夠膽企圖將佢個頗大既行李放上我後面頭頂行李架, 佢放左上去, 有半個行李係出左黎, 真係俾佢嚇死!! 好彩佢都覺得唔多妥, 最後都係將個行李放番係車頭既大型行李架上。 咪佢件行李跌落黎, 我都應該會頭破血流呢!
坐左無幾耐, 就陸續將的便當羅出黎嘆, 有個魷魚飯喇, 有兩隻魷魚上半身, 一隻係填滿糯米, 一隻就填左隻蛋, 好好食; 另外又有兩盒壽司, 重有甜品添。食過午餐, 好快就隨住火車既搖晃都慢慢咁訓左覺。
兩個小時既左右既夢, 就係被一陣既音樂打斷, 列車好快已經進入札幌站月台, 我地亦好快咁出左站去坐地鐵, 因為東橫既南北口/北大前都已經滿, 最後係要住薄野交差點口既東橫。
入到酒店, 攪好入住手續, 就上電腦查核一下第二日札幌返香港航班既情況, 居然好彩見到唔係太滿, 仍有機會上到機, 咁即刻寧可轉陣, 蝕左張札幌關西機票, 起碼去到新千歲採購都方便的嘛! 攪好晒, 滿心歡喜上房擺好行李, 就輕裝出去展開搵食之行。
第一站當然係去網元積丹, 搵我地既心愛海膽飯喇! 去到一個人都未有, 我地居然又係坐番前兩年既位, 今次我就叫多杯啤酒, 咦! 叫啤酒居然重有下酒小食送, 真係正!
唔使幾耐, 兩碗精美既海膽飯已經送上, 入口既一刻真係好想無界限咁延續落去。
甜美飽滿既海膽, 同香軟晶瑩既飯粒; 海膽個種入口即溶既感覺, 同埋飯個種黏貼感; 一混和放入口, 飯既黏糊糊係會將海膽既香味隨你咀嚼而在整個口腔內遊走, 不只如此, 飯既熱力重會將個種海膽獨有既香帶上顎頂, 好像要攻佔你整個腦袋, 將你既意識迷糊!!
俾個海膽洗完腦後, 出番黎又再係街上蹓躂, 行下行下, 已經行到去札幌站, 不知不覺間又去左睇 JR tower 既水牌, 望到有個豬肉窩似乎幾好味, 就咁就上左去, 今次可能正值食飯時間, 都排左十五分鐘左右既隊! 坐底時照指餐牌叫左兩份豬沙煲沙煲餐, 都幾大份, 不過慢慢食, 加枝啤酒都清晒既。
食完出黎, 都成十點幾咁滯, 慢慢行番去薄野酒店, 最後一晚既行程都已經尾聲,本來預備好既甜品, 都因為訓左覺而留左係雪櫃。
迴響: (0).
引用:(0).
靜態連結網址.
發表於 2006.02.24, 08:00
[«]
[上一日]
2006 大鼻舊舊五日北海道走快
[»]