第三日: 進‧戰
作者 : 大力
香甜既夢好快就醒, 開心既時候都過得特別快, 係屋仔已經兩晚, 又係時候要走了。 起身梳洗好, 落去飯廳好快早餐亦已經整好, 又係一份精美好味有營養既早餐, 尤其係個麵包, 我都係一再添食! 望下窗外, 咦, 雀仔都飛黎食早餐播, 同時個天開始落起鵝毛雪黎呢!
食過早餐, 打點好行李, 就係屋仔側既小山岡行上去, 不過由於積雪都幾厚, 都用左幾多力先可以到個頂, 夏季時應該三分鐘左右已經行到, 依家要成十分鐘咁滯, 因為行一步有時係會成三份一個人落左去雪堆, 要拔起隻腳先可以再行進, 不過又幾好玩!
行完返屋仔, 就同屋仔主人話別, 當然重要俾錢喇! 嘻嘻! 羅的行李出車, 望下車頂, 咦, 原來屋仔主人已經同我地噴左除雪劑, 等我地開車時唔使積住雪係窗, 真係體貼呢! 雖然落緊大雪, 主人亦好似上次咁, 等我地開左車, 仍然係門外同我地拜拜, 攪到我都唔敢慢慢開, 一踏油門絕塵而去, 唔好意思要人地係門外凍咁耐嘛!
渣住架車係美瑛附近山頭遊走, 影下相, 踏下雪, 好難想像夏季係綠油油既地方, 冬季可以係咁既樣! 係有一度, 我係雪面行進時, 行行下, 發現原來係一張長木椅上, 真係厲害! 兜到咁上下, 就話別美瑛, 向住帶廣進發, 因為睇書仔話下一個戰線會係下午休息, 所以要把握時間, 一定要趕及同佢決一雌雄!
沿住三十八線一路行, 其實路就幾好, 不過又係時不時都有的大車係前面領路, 攪到無車時就要渣快的, 希望追得番的時間。 係中途去到一個叫狩勝卡既地方, 你都咪話唔神奇, 真係完全岩岩好, 就岩晒個人體時鐘, 因為真係時候放抵的記號係呢度! 各位唔使擔心, 我唔係無公德, 只不過真係有個洗手間係度, 最奇既係四下無人, 但個洗手間居然有暖氣同輕音樂! 鬆一鬆之後, 發現車既大銀幕水箱又岩岩無水, 當然就手幫佢裝埋喇, 唔好唔留意呢的細節, 因為係路上行進, 的雪加上的泥要成日用洒水去清理大銀幕(後記, 但原來我呢個動作係錯左既, 跟住我會再講俾大家聽)。
大概三個多鐘, 卒之去到帶廣, 先係車站附近泊底架車, 再跟住就去戰場, 我地今次既目標係一間叫辨慶既店舖, 呢度係食呢個帶廣名物, 豬飯既地方! 進門發覺店中無人, 以為今次死火, 做左逃兵!! 幸好老闆娘出迎, 熱情帶我地入座, 係冷冷既天氣下又缺乏熱量既情況, 香巾熱茶已經係好令人感動既待客之道! 我地二話不說, 打開餐牌就已經叫左兩個豬飯, 老闆娘微笑咁應左就去落單。
唔使兩個字, 飯已經上桌, 一望個樣已經知將會有場大戰, 肉汁好香咁攻上黎, 中間重有的飯味隔住隔住咁係樹挑釁, 隻好似溫泉蛋既物體重夠膽坐陣中央, 真係太睇少我喇! 唔同佢黎一番周旋, 真係對唔住列祖, 卒之唔使十分鐘, 我個碗亦已經被我澈底殲滅, 除去佢一兵一卒, 剩底係碗底既只有滿足兩個字!
去到帶廣, 當然亦要深入敵陣喇, 六花亭既總壇就係呢樹, 即時就走去叫陣! 不過我地心急, 係佢地下見到有餅係個櫃, 就已經獸性大發, 即時買左幾件餅同羅左杯免費咖啡, 企係度立食!! 食完稍為平靜落黎, 先發覺原來人地個喫茶室係一樓!! 噢!! 真係太大意! 但都唔係唔好既, 起碼咖啡係免費左羅!! 嘻嘻!
睇睇個鐘, 時間都差唔多, 係時候要去溫泉旅館, 今次要去既係十勝川溫泉既觀月苑, 呢間以只係一萬五千幾日元一泊兩食, 又有埋露天風呂附既客室黎講, 都算係幾抵。襯時間尚早, 即時去佢個大浴場浸番下先, 先洗乾淨, 跟住浸室內, 到咁上下行出去, 睇住個日落景黎浸露天風呂真係正到暈!
浸完大浴場, 返房再浸客室入面, 真係舒服到呢。到六點半, 預約左既晚飯時間, 就行落樓下食, 雖然係飯廳, 但都係間開一格格, 同埋係食宴會席既, 價位同質量比真係可以話係超值!
食完飯坐陣, 就去一個叫彩凜詩既燈會, 當然呢的小地方既項目都唔會大型架, 一睇無妨既心態就唔會失望! 但會場最正係有熱鮮奶供應, 真係幾好味! 行左十零廿分鐘左右, 我都上番車等返酒店。返到去, 當然又係再浸浸過夠先去訓覺喇!
迴響: (0).
引用:(0).
靜態連結網址.
發表於 2006.02.23, 08:00
[«]
[上一日]
2006 大鼻舊舊五日北海道走快
[下一日]
[»]