第二日: 抵壘
作者 : 大力訓到成八點, 已經食唔到酒店免費早餐添, 唯有先 check-out, 再行出車站搵食。行入商場, 見到有DOUTOR, 重岩岩係門口唔近食煙地方有位, 即刻入去買野坐低, 一隻辣狗加一件腿蛋比高, 兩杯咖啡就攪妥。
打左底, 出黎就向北大進發, 主要都係想去個排樹個度影下相, 校園裡真係幾有文化氣息, 個個都好似好有知識學問咁樣, 迎面而來, 時而有個愛因斯坦咁既樣既教授, 時而有個馬斯特博士行過, 跟住又有一班架上厚眼鏡既學生, 都真係幾得意。 行下行下, 都搵到個排樹, 丫! 又真係幾有特色播, 樹影渺渺, 唔錯唔錯。呢度原來真係旅遊點黎, 有人專程開車過黎, 有人又係行黎, 都係影幅相就走, 有趣有趣。
影到咁上下, 都要行番去酒店羅番行李, 預備起程去富良野, 去到車站, 先去買定個蟹肉便當, 另外買左兩個麵包, 跟住等上車。上到車搵好位, 聽到有對香港人, 可能係第一次坐, 周圍望望下, 本來想問下使唔使幫手, 不過佢地都坐低左就作罷。 後來乘務員黎到, 原來佢地係買左自由席, 好彩個車箱係一半一半, 而自由席又有位, 咁佢地先唔使行咁遠, 如果唔係我都覺幾唔好意思之前唔多口幫佢地。
今次我買左係去淹川轉車既, 都有個幾鐘搭, 我地先享用麵包, 跟住就食埋個便當, 但提提大家, 便當上既菠蘿係唔好食既, 另外個粒紅色既係藥水味櫻桃, 唔好好似我咁以為係蕃茄仔, 差的一啖食鬼左!!
坐下坐下, 都去到淹川, 落車等轉車, 噢雪! 先醒起唔記得睇定邊個月台轉車, 我地企係七號月台, 睇下塊告示牌, 話係一號月台轉車, 但係月台上又有個位劃左"富良野 ....", 死火喇, 典算好呢? 一睇鐘, 只係淨番三分鐘, 都係決定跟告示牌, 但再望下呢邊月台, 原來個兩個香港人都好老定咁企左係度等車, 噢, 今次一定要話聲佢地知, 如果唔係就要等多個幾鐘先有第二班車呢。 帶埋佢地兩個, 裙甩褲甩咁跑上橋, 橫斷左兩條路軌, 又跑番落月台, 衝入車, 真係岩岩趕得切咋, 好彩!
上左車定下神, 先發覺原來架車幾得意, 有吊扇架播。車一路行, 幾過的站都係細細個, 唔係咁多人上落, 好地道既樣, 重有山洞添, 大鼻舊舊話怕入山洞會有煤炭整黑, 點都唔敢出黎睇窗播。可惜有件事唔好既, 就係架車一路行, 一路越落越大雨, 真係激死。
抵達富良野, 大概係三點多的, 雨已經好密, 拿拿聲由車站行去租車公司羅車, 好快就攪妥, 係臨上車時, 個姐姐唔知話咩野, 入油時要吸印仔, 頭痕, 只好猛點頭話好好好知知知, 等到時至算。轉出黎, 停埋一邊入pension lavender既資料俾自動領航員, 好快就去到 pension, 去到都未有咩人, 上左房, 放低的野, 又再出去, 先去彩香之里。
嘩! 好大片花呀! 呢度係我第一次睇大片既薰衣草, 的花都開得唔錯, 可惜都係落雨。呢道又要叉開一邊講, 係影相途中, 有幾個自己友黎到, 有個哥仔一野就踩上人地的椅度, 雖則落雨無人會坐, 但都望下自己對泥辨辨既鞋丫, 唔通係要人講先識自律既? 大個喇! 乖喇!
影到咁上下, 都差唔多夠鐘, 返去食飯, 不過唔記得帶 pension 電話號碼, 差的蕩失路, 好彩後來憑記憶都返到去, 重趕得切六點半食晚餐。晚餐都幾豐富, 有紅酒, 湯, 沙律, 頭盤, 主菜, 飯, 甜品, 重有香濃既茶做終結, 真係幾唔錯。食飽飽, 見客廳都無咩人, 出面又落雨, 咁都係早的沖涼訓覺, 只望有好天氣既明天。
迴響: (0).
引用:(0).
靜態連結網址.
發表於 2004.07.08, 07:00
[«]
[上一日]
2004 大鼻舊舊 北海道‧京都夏季花間行
[下一日]
[»]