第一日: 出發
作者 : 大力上了客機, 發現全機都唔夠二十位客人, 見住扣好安全帶既燈號亮起, 我就已經徐徐帶著豬扒包, 去探周氏一家。
到醒過黎, 航班已差唔多行進了大半, 稍稍回神, 整杯醒神果汁, 亦推卻不了熱情服務員的推介, 解決左一個熱騰騰麵包。 不多久, 飛機已經抵達左名古屋中部空港, 望下錶發現原來比預定時間早了少許。
攪好入境手續, 羅埋行李, 連隨行去內陸機既櫃檯, 一望顯示板, 早一班往札幌既航機重未走, 真幸運, 問准原來可以轉早一班走, 即時又再寄好行李, 羅埋登機証, 離起飛時間都只係剩廿多分鐘, 快步去到登機閘, 就已經上機。
一個多小時既航程, 好快已經抵達新千歲, 發現機場四周都重有積雪, 雖則都唔太白, 但都已經感到個種抵達北之國既味道! 落機到收埋行李, 十五分鐘已經可以, 行出車站, 發現有一架往札幌快速列車將要開出, 急急買好車票, 就登車走!今日天氣十分之好, 藍天白雲, 不一會我地已經身處札幌站大樓, 先找好儲物櫃, 將大行李安放好, 再去買入往旭川車票, 為時都只不過係十一點多, 還可趕及午餐時間前去醫一下肚, 點講頭尾已經兩日未食正餐嘛, 嘻嘻。
由於好多版友都提過札幌塔上既根室花丸, 需要排長龍但又好味, 我地都一心想去會一會佢, 上到六樓完全唔見人龍, 以為去錯地方, 入去坐底, 發現原來都已經差不多滿座。
沖好茶, 倒好醬油, 先黎一碟魷魚, 新鮮!! 緊接一碟海膽, 一碟帶子, 一碟甜蝦, 一碟唔記得咩魚; 再望又有魷魚岩岩整好, 咦! 今次有蘿蔔蓉既, 一於再黎; 正當我地係度嘆緊茶, 忽然, 師傅們係咁大叫, 重羅左成條魚出黎, 啊, 原來係預備新鮮解構, 問客人要唔要; 休息左一陣, 發現餐牌上有蟹, 於是請師傅整左碟蟹, 雖然係熟既, 但好甜美, 又唔會鬆散, 真係好食; 接著有八爪魚出籠, 即時又黎個, 八爪魚有咬口卻又唔韌, 好正! 再坐一會, 之前見到但走左寶既牛肉卒之黎番, 即時將佢充公, 收歸私有!!!
見都差唔多半飽, 一望門外, 原來已經有人龍, 又已差唔多上火車, 就趕緊到門口付錢, 滿足咁離開!
登上指定席, 兩小時左右已經抵達旭川, 下車後, 腳底下已經有雪既蹤影, 行過車站對面既豐田, 辦好手續羅好車, 就驅車往美瑛屋仔。 今次架車既自動導航係原裝既, 同埋係輕觸式, 個軟件亦改過, 用起上黎亦方便好多, 可惜到最後都係唔記得影俾大家作個參考。
往美瑛其實都只係半小時左右車程, 見時間尚早, 先走轉富良野, 去間超級市場入下貨, 之後先返美瑛屋仔。去到屋仔, 稍坐一陣, 晚餐已經可以送上, 成間屋仔都係只得我地, 所以好靜。 係飯廳一邊享受住動人既音樂, 一邊望住窗外既雪地, 天空既星光, 真係一樂也! 食過晚餐, 稍坐一下, 洗好澡就仰望天籟入夢。
迴響: (0).
引用:(0).
靜態連結網址.
發表於 2006.02.21, 08:00
[«]
2006 大鼻舊舊五日北海道走快
[下一日]
[»]