第一日: 出發
作者 : 大力
晚上先開始收拾行裝, 沖埋涼, 零晨十二點半左右抵達香港國際機場, 都有幾多人, 不過都係好靜咁訓覺既佔多數, 先走去辦登機手續, 跟住就行下睇下, 買的野飲, 然後就入閘等喇, 順利過關入到去, 入面重有的食店營業播, 大部份都係機場裡既各種工作人員呢。
行左個圈, 見到好多顏色鮮艷既椅子, 排好黎同大鼻舊舊影下相, 跟住就落最底層度等, 養左一陣神, 聽到廣播話可以入閘, 起身打點一下, 噢! 隻腳(架)呢? 死火, 即刻跑番上去彩色椅子度, 原來之前掛住同大鼻舊舊影相, 隻腳放左椅後就唔記得羅番, 好彩係半夜無咩人者, 不過已經跑到一條氣。上到機, 飲杯果汁, 訓陣覺, 早上七時多就到達關西空港。由於要去另一個機場 - 伊丹空港轉機, 而我地又知個邊無咁多野食揀, 咁所以唔使急, 羅左行李, 走去梳洗下, 跟住先去食個早餐, 整杯黑啡提提神。
填左肚, 行一陣等落左隔, 就落地下巴士站搭機場巴士去伊丹[1700日元一位], 上車當然又係養神既時間喇, 一個鐘左右喇。去到伊丹, 先去辦手續, 咦! 見到十點幾個班機未走播, 即管問問可唔可以上呢班先。 點知都未行埋去, 個頭電子牌就打出停止辦手續字樣, 不過我地都照樣問櫃檯, 當然都係唔得喇, 真係嬲奀! 如果我地唔係關西食早餐, 就真係趕得上呢班機, 可以早好多去到札幌呢, 依家要等多三個幾鐘。
行下盪下, 又走上去瞭望台到影下飛機, 心諗香港機場都有呢個設施就好喇。 個瞭望台重有花園, 又有大鼻的朋友, 都幾靚架, 加上今日既天色真係非常好, 不過熱到會溶咁滯, 影左一輪之後, 都要行番去有冷氣既地方休息下, 嘆番杯凍飲。 嘩! 舒服晒, 暑氣全消, 原來呢度都可以"展望"飛機升降呢, 早知唔使咁辛苦呢。行番落大樓, 牆上重印左的機場發展史, 就算睇番當年今日, 的服務員既制服一的都唔覺過時呢!
卒之捱到午後, 上機咯! 好野! 北海道, 我地黎緊喇! 好快飛機平穩咁降落係新千歲, 落左機, 羅番行李, 見到火車會快的開出, 雖然貴的, 都跳上火車, 拿拿聲出札幌。 坐一陣間就已經到左札幌, 不過天色就麻麻, 重落住毛毛雨, 拖住行李出左北口就向住札幌站前北口東橫Inn 進發, 基本係出站, 轉右, 過左馬路加兩步就到。辦好手續上到房, 發覺間房幾大下, 同埋好新淨, 可以話係物超所值, 唔知札幌其他兩間係咪都係咁正既呢?
坐左成日, 上到房洗個面, 俾對腳鬆一鬆, 就聽到響聲, 嘻嘻, 係肚中雷公作法, 通知係時辰祭五臟。即刻要縛番好鞋帶, 將背包中器材羅晒出黎, 只剩番數碼相機同書仔, 輕裝上場去戰鬥。
戰場一係網元積丹港屋札幌店, 目標係咩野? 嘻嘻, 你唔係唔知丫嘛? 你地睇下小譚舉晒手咁嗌:"嘩嘩嘩, 好紅呀, 海膽呀!!" 無錯, 就係海膽飯, 真係非常之大碗兼好味, 我地叫左碗鴛鴦既, 較深色個的係好味好多, 鮮甜不特止, 重要係會溶既感覺, 好似食半熟蛋黃咁, 真係一流呢! 我地六點左右去到, 好彩我地早到咋, 地方好細架咋, 只得一張四個位既吧檯, 另外係三/四張矮既四人檯, 重要張張有牌仔寫左留座, 幸好老闆同老闆娘問我地七點半前俾番檯佢就無問題, 梗係無喇, 食個飯半個鐘都得喇!
食完飯多謝完老闆老闆娘, 行番出黎, 雖然涼涼地, 但碗海膽飯既熱量係足夠應付既。之但係, 無窮既慾念催促我地繼續前行去搵野食, 咁我地就沿狸小路行, 周圍望下裝下, 其實心目中係想搵一間食薯仔既店舖, 因為上次搵唔到, 今次誓要同佢黎個決戰。行下行下, 見有間係路旁, 但個樣似快餐同飲野, 多過係一間餐廳, 雖然似似地, 但唯有再搵, 再下落下一條街, 咦! 呢間門口好多薯仔裝飾既又好似係播, 唔, 點算呢? 好, 即管撞下喇, 入到去一睇餐牌, 哎呀, 中招! 原來唔係呢間, 呢間主力賣 pasta, 只得幾款著仔, 但既來之,都叫左兩款, 一個煙肉軟芝士焗薯, 一個和式焗薯。個和式係用醬油焗, 味道特別之餘亦好好味, 的男爵薯仔本身真係好香好吸引。食完之後埋單, 兩個薯連一杯凍茶盛惠1300。
行出門口, 慾火卒之都已經俾撲滅, 已經唔可以再去搵本來想去搵既拉麵, 咁唯有去行下街仔, 去搵 tokyu hands 行下, 行到佢都收舖就出黎行返東橫, 諗住早的返去訓, 第二朝早的趕車去富良野。繞道大通公園, 都重幾熱鬧, 又有人跳舞, 又有少少檔口仔, 嘻嘻, 慾望又再驅使我地去搵食, 今次幫襯檔口仔伯伯買左支粟米, 買左之後, 伯伯都熄燈收檔咯, 支粟米好甜好好味呢。
返到東橫附近, 去便利店買支水, 買包薯片, 買罐啤酒, 返上房睇陣電視時嘆, 跟住沖埋涼, 唔知係酒精既影響定真係太眼訓, 不知不覺都訓左, 咁就完成左足足二十四小時既旅途。
迴響: (2).
引用:(0).
靜態連結網址.
發表於 2004.07.07, 00:30
[«]
2004 大鼻舊舊 北海道‧京都夏季花間行
[下一日]
[»]
1. 大力 | 2005.04.07 at 16:46
居然有朋友可以搵到黎呢度, 其實呢度我自己好少番睇架, 你再有其他問題, 可以去呢度再問: news://news1.3home.net/3special.travel.japan
我坐既係國泰既大阪半夜機, 不過已經停辦架喇, 但唔使擔心, 近來有一班去名古屋既半夜航班, 不妨留意
2. 白日夢 | 2005.04.03 at 03:08
想請問O下你係坐什麼airline ge呢? 點解可以咁早上機ge呢 ?
同埋咁樣安排來回機票要幾錢呢 ?
十萬個唔該