札幌 / 北海道大學 - 大風 , 晴
作者 : 小譚今日最後一日 full day o係日本啦 , 真係好唔捨得呀 !!
朝早掉低女友自己一個去北海道大學影相 , 佢自己就去 shopping. 北海道大學好近札幌站 , o係站北口向西北方向行十分鐘左右就到門口. 一入門口自己就有種返回老家的感覺 , 周圍都係青翠的綠樹, 現化的新校舍中夾雜住紅磚古老校舍 , 唔係就係好似母校 University of Alberta 嗎 ? 回憶起那幾年 *寒* 暑 , 確係有悲有喜 , 百感交集呢 ….
沿路一直行 , 都係婆娑樹影 , o係度讀書真係寫意 . 先行去 Tourist information center 取些資料同 walking map 再在校園周圍行下. 見到一群群的上左年紀的遊客 , 睇到佢地都有一 d 特別purpose 而來 (好似係同植物有關的 outing) , 睇到佢地有 d 人好認真咁聽個 guide 講 , 又有人做筆記 , 心裡真係有點敬佩之心 , 活到老學到老 , 有福呢 .
之後去左著名的楊樹遊步道 (Poplar Avenue), 其實已經被校方因安全問題欄住左條路 . 但係見到個個都跨隻腳入去 , 我又點會執輸呢 ? 呵呵. 入到去 , 感覺真係好似另一個世界咁 , 耳中只聽到樹葉沙沙的吹, 被高大的樹木包圍 , 好似有一種慈母呵護著孩子的感覺 ….
享受左好一陣子慈母懷中的感覺 , 終於都返到札幌市中心 . 午餐去左周圍都無乜人的拉麵街. 求其搵左一間叫萬來軒的 (因為睇圖有我喜的菜).
食飽飽之後 , 就由拉麵街一直向北行. 行去狸小路 , 行左一陣 , 感覺麻麻 , 再行 , 去到大通公園. 星期六公園都係拖男帶女的遊人 , 悠閒咁o係度玩同賞花 , 真係好鬼死外國 feel 咖o者. 咁都仲未止, 留意到隔離開始夏日啤酒園 , 呀 , 可惜星期一先開始 , 如果唔係我呢個酒鬼真係日日坐o係公園度飲酒度日 !
再繼續向北行, 其實我地跟本想去食雪糕 – 雪印 Parlour 是也 ! 16% 的 Royal Special , 真係點會錯過呢 . 咁多日都食雪糕 , 都係呢一舊乜都無的雲呢那雪糕最好味 !
旁晚行左一陣公司 , 又發神經地走番去すすきの (薄野) 食晚飯. 晚上的薄野係熱鬧的不夜天, 凍得牙都打震 , 女孩子都仲係短裙一度咁周圍走 , 真係勇. 食左琪蓮講的 しゃぶ 襌 , 可以叫 牛肉火鍋或是叫 しゃぶやき (shabuyaki) 的物體 , 就係牛肉火鍋在上, sukiyaki 在下 , 都算別緻 .
遇到鄰座坐左一個講得好流利英文的日本人 , 一個香港人同一個台灣女子 , 那位香港男士一把就問我地是否香港人 , 打開話盒子 , 原來兩位都係航空界中人 , 對我來講都算係客仔 . 世事就係咁奇 , 在座咁多人都係同航空業都有關係 ! 佢地就好啦 , 剛去完富良野 , 天氣非常好 , 而且係咁多年以來最美的一次之一. 只怪自己貴人一度 , 一出門就招哂咁多風風雨雨 …
迴響: (0).
引用:(0).
靜態連結網址.
發表於 2003.07.19, 16:31
[«]
[上一日]
2003 小譚東京北海道豪華遊
[»]