關西
作者 : 小譚去東京通常都只是會去東京一處地方, 但去大阪卻很少會只去大阪, 而很多時是一次過去附近的地方. 大阪是落腳, 住宿的地方, 而附近的京都, 神戶, 和歌山, 姬路才是要去觀光的主要景點.
有人說第一次去日本必要去東京, 但我卻覺得未必正確. 第一次去日本選擇關西地區有很多好處的,
- 關西國際機場在市區不遠處, 半小時車程即可抵大阪市中心, 時間節省不少.
- 大阪市內地鐵只是打橫及打直, 比東京的地鐵簡單很多, 如果有一個合適的地圖及路線圖都可容易乘車四處去, 而不怕坐錯車.
- 關西的主要景點離大阪市只是最多半小時車程（和歌山除外）, 在大阪作中心點, 每處地方作一日遊均無問題.
- 關西景點都富有日本地道特色, 而大阪購物亦甚方便, 可在購物及觀光取得平衡.
- 關西地區食住行均無東京貴, 節省不少.
住宿
大阪酒店普遍來講一般都較東京便宜, 而且都一定會比新宿或池袋的酒店房間大得多. 在大阪我們通常都會選擇兩個地方, 一個是難波 (Namba なんば) 及心齋橋 (Shimsaibashi) 地區, 一個是圍繞大阪站的梅田地區. 新大阪站附近亦有不少酒店, 但只方便乘坐新幹線的旅客, 因此港人未必需要住在那裡.
住在難波的好處在於在機場乘南海電鐵比坐 JR 去梅田快到達, 節省不少時間, 而心齋橋離難波約十分鐘腳程, 在難波乘地鐵亦只是一個站而已.
難波 / 心齋橋的俾人感覺似銅鑼灣, 有不少名牌商舖, 很夜也很熱鬧; 而梅田的感覺就似中環, 高價酒店及商場林立, 而且是去其他周邊地方的交通交匯點, 反而夜晚就較難波 / 心齋橋靜. 不過其實在大阪乘坐地鐵非常方便, 去哪區十數分鐘就到, 住在哪一區亦無所謂.
在難波建議的酒店有 Hotel Il Cuore, Hotel Nankai, Namba Oriental Hotel, Hotel Boteju 本館及難波東橫 Inn (較遠). 在心齋橋的 日航酒店, Hotel Riva Nankai, Hearton Hotel 心齋橋, 道頓崛 Hotel, 心齋橋 Comfort Hotel (較遠), 心齋橋西東橫 Inn (較遠).
梅田 / 大阪站就比較多中至貴價的酒店, 如 Hilton, Ritz Carlton, Westin 等, 而通常 package 包的酒店有 大阪第一酒店, 新阪急酒店, Hotel Gravia 等. 比較平價的, 有 近畿酒店 (較遠), Hotel Kansai, Landmark Hotel, Hotel Ilmonte 及 Hearton Hotel 西梅田.
平價的旅館可選南州民宿, 來山南館 及 Pension Lee, 不過就無以上的這樣方便了.
如果你去京都的話, 其實無需要住在那裡. 大阪往京都只需約半小時火車 ( JR / 阪急 ), 即日來回已經可以. 除非你很喜歡京都那些樸實的民風. 其中部份有 Tour Club, Budget Inn, 田舍亭, 小宿＆かふぇ「布屋」等.
交通
在關西地區遊覽最好買張交通的通行證. 有兩種, 其一是 JR 西日本 的 Kansai area pass 及 Sanyo area pass, 前者可坐東海道本線的列車, 東至京都, 西至姬路, 但不可坐新幹線, 分一至四日的票, 價錢不太費; 後者範圍大些, 可去到廣島及博多, 而且可以坐 Nozomi 新幹線列車, 但不以去京都奈良等地, 分四日及八日的票, 當然價錢就貴得多. 兩個 pass 都只可以坐 JR 的列車.
跟東京不同, 我們一般都不會在大阪市內坐 JR, 因為除卻環球片場外, 要坐 JR 的機會並不多, 絕大部份大阪市內旅遊熱點都可以坐地鐵 (路線圖) 到達, 因此去關西的話都會堆介另一個叫 Kansai thru pass, 日本叫 Surutto pass, 係除了 JR 之外關西地區絕大部份鐵路及巴士大都可以乘坐, 靈活得多. 大家可因應需要要購買可用的 pass.
通常一般團票最長可以逗留八日七夜, 再長的話價錢就會貴一點, 因此下面的行程設計成用盡八日的, 你可以增減行程以合自己需要. 行程會考慮乘車的方便, 但請自行決定使用甚麼交通工具及用甚麼 pass.
第一日
航機抵達關西國際空港. （怎樣出市區？） 在酒店 check in 完後可到心齋橋, 難波或梅田的夜市．心齋橋是一條很長的有蓋商店街, 可以行得很舒服, 內裡及附近地區亦有不少名店. 你可以由難波站開始, 見到有蓋的商店街向北走就是. 中間的跟商店街打橫的道頓堀有不少食店, 醫肚最佳. 至於梅田則是交通的樞紐, 在這裡坐車, 火車, 巴士均可向四方八面走. 熱鬧地方集中在車站東面一帶的街道.
其他景點：空中庭園 （梅田）, HEP FIVE 摩天輪 （梅田）, 道頓堀極樂商店街（道頓堀）, 美國村（心齋橋）, 難波 Parks（難波）
第二日
可在大阪市內遊覽, 亦可選擇往 Universal Studios Japan 一日遊. 對主題公園興趣不大的話, 可到 大阪城 參觀. 一家大小亦可去 大阪港 的 天保山 及 海遊館 遊覽. 愛購物的除可在市內商場購物, 亦可到 Blossom Outlet, 此為最近大阪市的 outlet. 想要購買電器的話, 可到 DenDen Town 遊覽, 雖然跟秋葉原相去甚遠, 但亦是關西一個重要的電子產品集散地. 去 DenDen Town 都會順道去黑門市場. 跟築地市場不同, 這裡只是一個街市, 但比較整潔, 內亦有不少食肆.
第三日
如果你 package 的酒店今日 check out 的話, 你大可以去住一住郊外的溫泉鄉. 在大阪附近的溫泉區, 最有名的就是日本三大名泉之一的有馬溫泉. 此外就是在大阪市郊的箕面溫泉, 但名氣就差得遠了. 當然不可以忘記在南面的和歌山縣, 及北面的城崎溫泉. 由於後兩個溫泉鄉距離大阪較遠, 因此應預備兩日的時間, 及沒有 pass 可到 ( Kansai Thru Pass 只到和歌山市, 與有名溫泉區仍有距離) .
你可以在早上 check out 後將行李放好 (放在酒店或 JR 站的 locker, 或下一間你會住的酒店), 中午前出發去這些溫泉區. (如果你去有馬的話, 其實可以參看第四日神戶的行程, 先去布引公園及北野異人館, 下午才在 新神戸 站乘北神急行及神戶電鐵去有馬.) 來到溫泉區都只是為了 relax 一下的, 因此, 盡量放鬆心情, 在溫泉街內漫步遊覽一下及周圍去浸浸溫泉. 不少溫泉酒店都附有房內晚餐的,吃一回差不多兩三小時, 到時再浸一次就可以去睡了.
可以參考下我的浸溫泉需知.
第四日
如果你昨日在和歌山或城崎溫泉的話, 建議你今日的行程只是在附近遊覽, 下午才回大阪. 城崎溫泉一小時多的車程可到有日本三景之一的天橋立, 如果有時間可順道去一去. 如果你在有馬溫泉的話, 你亦可看看今日的行程.
今日可以去有世界文化遺產, 日本的國寶 姬路城. 你可以在大阪站坐 JR 東海道山陽本線 新快速（61分, 1450円）, 或如果你有 Kansai thru pass 的話, 亦可在阪神梅田站 坐 阪神電鐵 的直通特急到姬路（1小時36分, 1250円）. 如果你在有馬的話, 可在 Surrotto 網站內貼上 有馬温泉 及 山陽姫路 搜尋可坐的交通工具.
姬路城可行一整個上午. 下午乘坐 JR 或山陽電鐵返回神戶三宮地區. 在之前可停一停舞子站, 在這裡可走近通往淡路島的 明石大橋, 那裡有個紀念公園及一個 橋之科學館, 可瞭解一下大橋建立的資料. 在舞子的下一站垂水有個 Porto Bazar Outlet, 近著海邊很好行, 值得一去.
如果對大橋及 outlet 興趣不大的話, 就可直出神戶三ノ宮. 你可有幾個地方去: 轉地下鐵到新神戶站, 坐吊車上神戶山上的布引公園, 公園可眺望整個神戶市, 在適當時候可欣賞不同的花卉, 如薰衣草. 在新神戶站附近有一條長街, 街上的建築主要為西方建築, 是為北野異人館. 異人者, 外國人也, 以前神戶為一個繁忙的對外海港, 因此外國使節都在此建立領事館, 現在這裡都成為拍照的好地方. 留意每個館入場都要付費的, 不是太吸引, 在外面拍照就好了.
晚上可以在神戶一嘗地道的神戶牛 (參考我的介紹).
第五日
今日往京都遊覽. 如果你喜歡日本的寺院的話, 預備兩日遊覽京都絕不過份. 在京都市內遊覽主要靠巴士, 你可在 JR 京都站前的巴士總站買到一日或兩日乘車票. 要留意 500円的一日票 只可到市內主要街道遊覽, 而 觀光一二日乘車卷 則是全京都範圍的巴士地鐵都可坐.
京都寺院之多, 其實很難一次過遊完, 這裡亦很難三言兩語講得完. 市內最常去的計有金閣寺, 銀閣寺（及旁邊的哲學之道）, 清水寺, 祗園, 以及 伏見稻荷大社（有成千上萬的鳥居, 大開眼界）. 如果覺得巴士線混亂的, 善用洛巴士已可以去到大多數主要的景點. 京都在三四月櫻花時節及十一月的紅葉都非常漂亮, 不要錯過.
在櫻花及紅葉盛開的時節, 有些京都的寺院（如清水寺）都有夜觀櫻花及紅葉的活動, 不要錯過. 平日的話, 京都店舖很早就關門, 只有如四条五条烏丸及京都站等地才會多些人.
夏天的時候, 沿著鴨川的旅館餐廳都有在河岸設有納涼床, 露天下席地而坐享膳, 非常富有特色, 不妨試一試.
京都曾是日本的首都, 因此皇宮亦在這裡. 與東京皇居一樣, 京都御所 可以在網頁預約參觀, 每日均有 日文 及 英文 的 tour.
第六日
今日可到京都的西面遊覽. 西面最聞名的是 嵐山嵯峨野. 要由大阪往嵐山一帶, 最好是在大阪/梅田站坐 阪急列車 京都線去到桂站, 在對面月台轉嵐山線, 在嵐山站下車. 下車後沿路向前走五分鐘左右就到桂川, 沿桂川走一會就是渡月橋. 橫過渡月橋後就是很熱鬧的嵐山市街, 左面走不遠是 天龍寺. 乘 JR 不是不可以, 但要由京都站坐非常慢的 JR 山陰本線 列車廿分鐘才到, 不夠阪急的直接. 此外, 昨日的 500円巴士票不可到達嵐山.
在紅葉的時節可坐嵐山-龜岡的 嵯峨野トロッコ列車 (Torokko) 欣賞嵐山, 保津川優美的景色（ Torokko 車票最好是預約購買, 在西日本的大站都可以買到, 即場買不一定有位）. 如果真是買不到去程的 Torokko 車票的話, 其實回程都還可能有機會, 因為不少遊人都會在龜岡乘 保津川遊船 返回嵐山. 你可以先在嵯峨嵐山站或京都站坐山陰本線 到龜岡, 在龜岡乘船或 Torokko 返回嵐山, 同樣可欣賞保津川優美景色.
在此外渡月橋, 天龍寺都有絕佳的美景, 與在京都市內密密麻麻的屋子很大分別. 天龍寺旁往野宮神社就是很出名的竹林, 在竹林內散步別有一番風味.
如果你今日早出發的話, 午飯過後應可完成行程. 你可以選擇乘阪急列車到市中心四条烏丸, 或 JR 山陰本線到 JR 京都站逛街購物, 或看地圖繼續尋訪不同的寺院.
如果時間尚早而你又是漫畫迷的話, 你可以坐阪急線在十三站轉寶塚線到寶塚站（1小時15分,510円）, 手塚治虫紀念館 就在這裡（留意五時關門, 逢星期三休館）.
第七日
今日可以選擇去奈良市.
奈良市半天遊就可以了. 主要行程為東大寺, 以及在奈良公園玩鹿. 鹿是奈良的一大特色, 但更重要是奈良縣的文化歷史深厚, 及有不少文化及自然遺產 (如吉野山, 尤其是櫻花盛開時的勝景), 因此除了市內, 你都可花多些時間去遊覽一下縣內其他地方.
下午其餘時間就可以補去上面幾日未去的景點或在大阪市內觀光購物.
第八日
今日是最後一日, 通常都是留守在酒店附近地區作最後衝刺. 如果你準備坐南海電鐵出機場的話, 心齋橋就是你最好的最後衝刺地方. 不過, 其實最佳的地方, 莫過於在機場前一個站 Rinku Town 站放下行李 (有 4 個大行李 locker 在入閘機後), 再走去附近的 Rinku Premium Outlet 購物直到到時候 check-in 為止. 小心留意時間喔!
迴響: (150).
引用:(0).
靜態連結網址.
發表於 2006.04.02, 21:18
[«]
推選行程
1. 小譚 | 2010.09.03 at 00:12
心齋橋呢個地方很方便，但你個酒店在心齋橋哪一處先？
因為心齋橋係要在難波轉地下鐵的，無機場巴士，難波行過去要成10分鐘，落左機拎住行李其實都有d 難度，如果你酒店在心齋橋地鐵站上的話就無問題。
1. 海遊館坐地下鐵去大阪港站下車。點樣坐車其實你click 右面的“大阪地鐵路線圖”就知道了。印象中係得個摩天輪同海遊館，無乜特別。
http://www.kaiyukan.com/thv/
2. 去USJ 只能坐JR。基本上如果你大部份電影的ride都有興趣的話都可以留一整日。
3. 無乜甚麼特別的地方。
4. 京都睇紅葉要十一月，我舊年十一月尾去係最美的時候。如果你無去過京都的話，花一兩天遊幾間有名的寺廟是值得的。小火車可以一落機就在任何JR 站的綠色窗口（售票處）預售，通常都好滿的。回程可以坐JR,可以坐番小火車，都可以坐保津川遊船。
http://www.hozugawakudari.jp/cn/history-cn
http://www.sagano-kanko.co.jp/
5. 可以在京都出發一個半天遊奈良。奈良的公園有很多自由行走的鹿，而且亦有不少古蹟，值得一去。神戶亦可以去一去神戶港，或者在三宮那邊食神戶牛。
2. 日本新手 | 2010.09.02 at 23:43
我10月會去大阪...見到你個網真係好正好多資訊.
我已經訂了酒店(在心齋橋附近)算方便嗎?
DAY 1 : 打算去CHECK IN 之後預計５點左右去 海遊館，之後在附近行下。 請問係咪坐ＪＲ定係坐地下鐡去呢？如果坐ＪＲ如果由心齋橋出發應該點坐呢？ 附近還有景點嗎？
DAY 2 : 打算全日都去環球。都是坐ＪＲ去嗎？ （應該夠玩一天嗎？）
DAY 3: 夜晚去下梅田空中庭園，坐HEP FIVE 摩天輪，中午應該行下道頓堀，心齋橋等。。。還有更好提意嗎？
DAY 4: 打算去京都睇紅葉，有好介紹嗎？ 坐ＪＲ如果由心齋橋出發應該點坐呢？ 嵯峨野小火車要預早訂嗎？ 其實都想問嵯峨野小火車係邊度？ 回程係咪可以坐激流？
DAY 5 及 DAY 6 有沒有什麼推介呢？
3. 小譚 | 2010.08.12 at 18:27
下? 市區黎咖咋喎... 似係一個樂園+酒店咁.
兩人用同一房間每人都要起碼9千yen, 其實都唔差好遠啦...
網頁話打電話去book
http://spaworld.co.jp/china/hotel.html
在梅田坐御堂筋線地鐵, 幾個站的動物園前站下車就是.
4. 浩媽 | 2010.08.12 at 17:34
唔好意思我想問吓"大阪世界の大温泉"怎樣訂房，我在它的網站找不到？這處近好多，大小都適合又唔使太遠及平好多。如果在梅田怎樣去？
麻煩哂！
5. 小譚 | 2010.08.12 at 16:57
Arima Onsen Station = 有馬溫泉站, 即係 4. 那個終點站.
我再睇番站時刻表, 谷上站有幾班車是直到有馬溫泉的, 可以轉少一次車.
http://www.shintetsu.co.jp/tetsudou/timetbl/station/pdf/tanigami.pdf
6. 浩媽 | 2010.08.12 at 16:43
因為星期五的價錢和星期六的價錢相差近二千元港幣，為有問吓酒店可否有特別安排。
請問吓"Arima Onsen station"是指哪個車站？因為酒店可在這個車站免費接送。
另外想問由地下鐵山手線谷上轉神戶電鐵往有馬口是否轉車站或不同的月臺？
7. 小譚 | 2010.08.11 at 19:38
有，可以坐鐵路，不過轉車轉到你暈。
去法：
1. 坐甚麼都可以，去神戶的三宮站。機巴應該有。
2. 坐地下鐵山手線經新神戶去谷上
3. 谷上轉神戶電鐵往有馬口
http://www.shintetsu.co.jp/tetsudou/timetbl/index.html
4. 有馬口轉神戶電鐵有馬線去到有馬溫泉。
去溫泉區應該係好悠閒的嘛，為什麼要令自己趕來趕去呢？而且，通常那裡的晚餐時間都是7點左右，遲了就要自己攪掂，但通常去到大都為了食那一餐晚飯，食唔到的話，去來（我覺得）都無意思。
8. 浩媽 | 2010.08.11 at 12:11
我check過由版急梅田去有馬的班次，我趕不及最後一班，因為関西空港到版急茨木東口要18:30而最後一班車由版急梅田去有馬是17:20。請問還有無別的途徑可去有馬呢？
9. 小譚 | 2010.08.08 at 01:31
>是否需時40分鐘？
未試過。不過通常都準的。
>行車的時間表
http://www.kate.co.jp/pc/time_table/wakayama_tt.html#from
你要留意呢個只係去到和歌山市，同你去和歌山經常聽的景點如白濱勝蒲等有一大段距離，要另坐JR 紀勢本線才到白濱，時間約75－85分鐘。同時你要留意點樣處置你的行李。
其實你可以坐南海返回難波又得（南海和歌山市站），坐JR 到梅田又得（紀州路快速的列車）
>由梅田或難波去池田(日清杯麵館)，那處去比較容易，不用轉多次車呢？
去池田你應該係坐阪急寶塚線咖啦，無得走雞。咁阪急在梅田開出的，當然是梅田好些。
但其實，你要全面一點去看，梅田站附近食的地方唔夠難波那邊豐富同選擇多，如果你會周圍食的話就不要緊，但要預時間坐地鐵了。
>関西空港有無直接車去有馬？車程要幾耐？因為我年初二(星期五)出發，想第一日入住有馬溫泉酒店(平的)。
其實點解唔睇睇關空的網頁呢？
最多只是去到神戶，不會去有馬的。
http://www.kansai-airport.or.jp/tw/access/bus/index.html
在新阪急酒店的長途巴士站就有巴士直達有馬，即是你都要坐巴士去到新阪急，落車，穿過酒店去另一邊，再坐長途巴士去。
http://bus.hankyu.co.jp/highway/highway10.html
10. 浩媽 | 2010.08.06 at 16:38
唔好意思我想再問多一處：由関西空港有無直接車去有馬？車程要幾耐？因為我年初二(星期五)出發，想第一日入住有馬溫泉酒店(平的)。
11. 浩媽 | 2010.08.06 at 14:51
因為第一次去日本自由行，所以有很多疑問，希望可幫忙！
想請問如果我想第一天到大板就由関西空港去和歌山是否可乘関西空港線巴士(ＪＲ和歌山駅行)到和歌山，是否需時40分鐘？行車的時間表在那個網可check到資料呢？
另以想問如果由和歌山返難波方便些或梅田方便？乘鐵方便或乘巴士方便？車程時間差多少？
由梅田或難波去池田(日清杯麵館)，那處去比較容易，不用轉多次車呢？
12. 小譚 | 2010.08.05 at 01:04
你會去姬路城同京都等，其實買Kansai Thru Pass 或JR West Pass (平o個隻）都值o既，不過你要計番下你坐幾多次先好。不過要注意Kansai Thru Pass 可以坐的車都比JR 慢10－15分鐘，而車費又比JR 平少少，所以要睇下了。
Kansai Thru可參考
http://piggus.net/japan/post/3/222
Day 3 留耐少少都得。可以夾埋去埋宇治都未嘗不可。
係咪星期六日無所謂的，日本唔會多人得要緊，除左Golden Week 之外。
留意姬路城已經開工做維修，你應該唔會睇到佢外牆了。但照網站講你可以上去睇佢地外牆施工。
http://www.city.himeji.lg.jp/s60/2873652/_18374/_17910.html
day 7: 點解無拿拿金閣寺？唔順路喎～ 同埋你要租和服，應該係咪去清水寺或祇園那邊租會好d 呢？你著完又要坐車走來走去，唔掂喎。（想o者，我無經驗）
last day，你rinku outlet 可以行得幾耐呢？又要放低行李，倒不如神戶那一天去神戶個marina outlet，夠時間的。last day 主力在難波附近吧。
我未有時間將最近的遊記同相放在網站，你可以join 我個facebook group 再討論一下，我上個月先去完大阪。
http://www.facebook.com/group.php?gid=46307057815
13. Iris | 2010.08.04 at 23:01
譚先生
由於小女第一次自由行去日本, 所以想請教以下行程順路嗎? 交通方面要唔要買pass呀? 8日7夜全住宿難波道頓堀酒店, 由於Day3 and 4係星期六日, 係咪會好多人坐車遊覽等, 所以plan主力在大阪範圍內遊覽係咪會好d，還是去京都也無影響? 多謝指教!
11/11(day 1) 坐CX預計2:45pm到關西機場坐南海電鐵去難波道頓堀酒店check in -> 在心齋橋、道頓堀一帶遊覽及晚飯
12/11(day 2) full day環球片場
13/11(day 3) 奈良公園餵鹿仔-> 東大寺-> 道頓堀蟹樂道午餐 ->Den Den Town(係咪有高達模型買的地方?)-> 黑門巿場(在回酒店前還有沒有地方可去?)
14/11 (day 4) 大阪城 -> 即食麵館 -> Blossom Outlet-> 還有沒有甚麼地方值得去?
15/11 (day 5) 姬路城 -> 有馬溫泉(日歸) -> 神戶港自助晚餐
16/11 (day 6) JR馬堀站à嵯峨野小火車(龜岡to嵐山) -> 甘春堂和菓子體驗-> 遊覽天龍寺、渡月橋一帶-> 京都站附近遊覽-> 回難波
17/11(day 7) 京都五条站附近的夢館租和服 -> 金閣寺->南禪寺-> 清水寺-> 二年板、三年板 -> 祠園 -> 回難波
18/11(day 8) 心齋橋、道頓堀買手信及午飯-> Rinku Outlet -> 關西機場
14. COOPI | 2010.06.13 at 01:38
Hi,譚生!
7月打算到關西5天,我有一天會由大阪先到嵐山坐嵯峨野觀光小火車,參觀完天龍寺後便直接坐JR到神戶,晚上再回大阪,計算車資後發覺買JR WEST的1天pass(￥2,000)好像較便宜,但不知道這個pass可否免費坐嵯峨野觀光小火車呢?
謝謝解答!
15. 蕙蕙媽 | 2010.05.12 at 11:42
hihi ,
想請教下...
我知道大阪有KANSAI THUR PASS.. 但唔知我0既行程需唔需要買.. 可唔可以話我知究竟點樣坐車最平靚正 ?
以下係我七大三小朋友預定行程，可唔可以幫我睇下順唔順路 & 我搵0既乘車資料正唔正確呀... 有冇行程需要加多減少呢 ??
CX506 1005 / 1445
CX507 1810 / 2100
Day 1
大阪 > 梅田@GRANVIA HOTEL ~ 空中花園 > 摩天輪 > 榮華亭炭火燒肉 (有冇行程需要加插 ?? )
(機場去梅田 : 南海電鐵 @Yen1160.... 仲洗唔洗轉車?)
Day 2
京都 ~ 清水寺 > 二年坂 > 三年坂 > 衹園 > 晚飯有咩好介紹 ?? (以上幾點夠唔夠行一日京都?)
(來回京都 : 梅田阪神線 | 所需時間: 33 分鐘 | 費用: 540 日元)
Day 3
環球影城 > 難波 > 想食"大阪燒"
(去程 : 梅田JR大阪站> USJ | 所需時間: 20 分鐘 | 費用: 170 日元)
(回程 : USJ > 難波 坐咩車..未搵 ??)
Day 4
奈良 ~ 鹿公園 > 海遊館 > 心齋橋﹑道頓崛晚飯
(去奈良 : 梅田阪神線 | 所需時間: 49 分鐘 | 費用: 780 日元)
(奈良去海遊館 - 未搵資料??)
Day 5
黑門市場 > 池田日清發明紀念館 > OUTLET (有冇好介紹)
(車程未搵資料)
梅田去池田 (梅田阪急阪急宝塚本线 > 所需时间: 18 分钟 | 费用: 260 日元)
Day 6 神戶 ~ 三丿宮和牛LUNCH > 天王寺動物園 > SPA WORLD溫泉世界 > 神戶晚餐有咩好介紹 ??
(去神戶 : 梅田阪神線 | 所需時間合計: 29 分鐘 | 費用合計: 390 日元)
Day 7 RINKU OUTLET > 機場 (搭六點機.. 有冇行程可以加插 ??)
16. vim | 2010.04.23 at 22:22
多謝你咁快就覆我呀!我諗都係聽你講下次先搭小火車啦!唔該晒你呀!
17. 小譚 | 2010.04.23 at 00:50
1. 地鐵當然唔可能收8點啦～ 起碼12點。夜d 可能班次少d，但你住梅田無乜問題的。你可試用呢個website查車的班次。
http://www.ekikara.jp/
2. 巨蟹大王？你係話蟹道樂？我無食過，但應該唔會差太遠http://douraku.co.jp/kansai/
3. 你plan 唔到，因為你應該要預起碼兩日行。嵐山那邊你要預起碼整個朝早；而且嵐山在西面，清水寺、祇園又在東面，坐車都花好多時候。7月的話其實我寧願你focus 在寺方面，因為嵐山火車最好都是在秋天紅葉期最好看。同埋，買本專講京都的書參詳下（最好日文書）會好d。巴士網站可試用呢個
http://www.city.kyoto.jp/kotsu/rakunavi/index.html
4.關西空港無得早check in，你最多可以將行李放在Rinku Town車站locker或機場locker 再坐番一個站JR/南海去Rinku Town，行3個字左右就到，唔駛坐穿梭巴士，可以放到o急的locker 都要500円，數量唔會太多，小心預算。
18. vim | 2010.04.23 at 00:25
我無意中見到你個網,真係好正,尤其係對於我呢D自由行新手(我未去過日本架!)真係超幫到手!
我煩緊七月同媽咪去大板呀!編排左個行程,你俾D意見我呀!唔該!
2/7搭1005機去關西機場,約1445到,之後去難波道頓堀酒店,會在附近行下
3/7環球---梅田弁天晚飯
問題--地鐵係咪收八點?咁我咪無車返酒店!?
4/7梅田---心齋橋
問題--道頓堀巨蟹大王係咪有兩間?同有分別嗎?
5/7京都呢日真係唔知點安排先順路,因我想去坐小火車,嵐山(D店平均收500PM),嵯峨山,祇園,清水寺同河原町,錦市場,想食魚心同NINJA KYOTO(一間在河原町以忍者做主題既餐廳,開500PM)
問題--京都會有巴士指南供應嗎?請指教詳盡的搭車路線及先後次序.
6/7手塚治虫紀念館---日清紀念館---神戶三宮---北野---元町---神戶港食放題
問題--都係尾班車幾點啦!驚無車返酒店...
7/7難波--美國村--堀江--心齋橋--松屋
8/7機場附近個OUTLET---搭1810機走
問題--我想去機場CHECK IN放低D行李先再去OUTLET,但架穿梭巴士一個鐘先一班,如我預行兩個鐘,我應該幾點開始去呢?同埋機場可以咁早CHECK IN嗎?除左巴士仲有無其他班次密D既交通工具?
難波間高島屋同心齋橋間大丸夜晚有無特價壽司賣架?
我呢個行程有無地方可以放煙花呢?係咪7仔有得賣架?
最後有無車票介紹我呢?咁多種好難揀呀'''
唔好意思咁多問題...請指教!!
19. 小譚 | 2010.03.10 at 19:50
d 寺會有好多樓梯。講真，推baby 車去日本旅行都幾麻煩。
20. Donna | 2010.03.10 at 14:48
想問一下嵐山嵯峨野(你的day6行程)會唔會好多樓梯, 好難推bb車?