神戶山上

今日要去沾染下o的文化氣息, 要去一間叫 MIHO 既博物館, 但專程長途跋涉去呢間博物館既原因就係一個電視節目, 我睇完呢個節目令我好想去睇下。呢間博物館既特別之處在於建築設計師係貝聿銘, 唔知大家有無聽過呢間博物館? 博物館既設計真係好靚, 樣樣都好和諧, 令人賞心悅目。可惜要趕去神戶, 只逗留兩小時左右就離開。

坐了一個多小時快速火車, 到達神戶已經係一時多, 先去中華街附近吃由朋友推介既神戶牛柳。入到去, 哎, 居然話下午關門, 本來想問幾時再開門, 但無人明白我既問題; 正當懊惱之際, 佢地叫左掌櫃伯伯出黎, 好野, 伯伯識英文! 原來五點半再開,咁我話遲o的再黎。

時間溜溜長, 點過好呢? 我地揀左去一個香草公園, 要搭吊車上去既! 公園入面好靚, 重有好多花花睇。因為好多係食用香草, 可以俾你摸下, 聞下, 幾好玩。週圍行下睇下, 居然俾佢揾到 --- 薰衣草! 上到山頂, 重可以睇到神戶全景添, 如果講夜景, 我相信會比函館黎得精彩。

太陽好快就落山, 晚餐既時間都到, 去番個間餐廳。一入去, 佢地都認得我地, 即時就由伯伯招呼。一人叫左一個套餐, 有齊前菜, 湯, 主菜, 牛柳二百克（但影得唔係好清楚）, 同甜品。原來燒牛柳又係伯伯操刀, 真厲害! 好滿意完成個餐, 之後就去搭新幹線回京都。