譚生的手作仔

This is it!

睇 This is it, 感覺就好似睇緊你平時買套戲送埋o個隻雞肋 making of 的disc 2，但係無左隻主碟那種無奈。更無奈的是，呢隻making of，係比睇香港的現場演唱會仲好睇的；無奈的是，單睇呢隻making of，就可以想像到個concert 應該係幾咁正，幾咁有創意，幾咁有睇頭，但呢個演唱會，係跟本唔會有。

係，我承認我對Michael Jackson 印象，只係he's a freak, he's a total freak. OK, someone who can dance really great but he's so 80s that he's just a freak after the millennium.

Now I know I am completely wrong.

由佢每一個音樂細節的固執，每一個動作的講究，都著實係一個藝術家的風範。係，做藝術家才會這樣執著的去attend 每一個 detail，only for the audience。我成套戲聽到的，不是每一句I love you all，或者God Bless You，而係：that's why we rehearse。Yes, that's why we rehearse, 潛台詞就係，practice makes perfect。一個 King of Pop，後台的苦功，雖然被導演剪成兩小時的精華片段，都已經令人深深體會到他那種一個工作事事要 perfect 的態度。

更令人覺得難能可貴的是，離開舞台多年，只有奇怪新聞出現的舞台王者，他想的concert係這樣現代，有無窮的創意（當然背後有好多人的幫忙吧），無令人覺得食老本，無令人覺得：“咪又係咁”。就係making of 已經咁出色，真正的concert，豈不是更令人目不暇給？

晚上回家，看見一堆歌星賀台慶，那個所謂accapella，聽得人毛管立直。Yes, did they ever rehearse?

天下文章一大抄。。。？

在DC Home 人像區見到有人像貼圖在一星期內被加了70多分，當然要看看甚麼一回事。

影師這樣寫：

“一輯以夏日陽光為主題的照片~ 原片來自日本攝影師藤原克也. 由於極喜愛這個風格, 所以自己都影左一輯.”

好奇下，search下藤原克也是誰。

首先不說藤原先生是誰，照片好明顯是搬紙過字的“抄巧“別人的作品。Model 衣著，那條圍巾，那個藍天碧海的setting，以至model 的動作，都有很大程度的相似。

你會說，影師不是已經給了credit 給原作者嗎？對。但是，給了credit，不是代表你可以將原作抄得一字不漏。正如，我寫的研究文章quote 了醫學期刊的一段文字，不代表我可以將別人的發現據為己有。

藝術創作，模仿係一個學習過程。如果你是一個普通攝影愛好者，拍得有這樣水準，只可以講，你的技巧非常好，都做得很有心，雖然不是你自己的，但都算是累積了一定的能力。但如果模仿者係一個以攝影作為工作的話（起碼影師的網頁給我印象是這樣），就難免令人覺得是呃飯食，偷人創意的意圖。

更有趣的是，有人給的評語係“難得一見的參考作品”，實在真是無言。至於是否Bohemian style，大家可以wiki一下。

當然，新事物不是經常有，從來，只有一個好idea 而由其他人轉來轉去轉來轉去去發展。就正如有網友發現了央視的電視節目其實又是日本動畫抄巧出來的，場景角色設計甚麼都照抄一次，就當是自己的東東。我自己無看過＜秒速5厘米＞，所以無可評論，但如果你看看先達那些山寨版手電，噱頭十足，創意一流，只係硬要抄別人蘋果，SE的外殼，點解唔可以再行多一步，建立自己的版圖？

只可以講，中國人一貫自信心不足，永遠要依靠別人的創意，再在內裡兜圈子，創意用到盡用到老才放手。我只可講句，無奈。

我的拍照心得 - 基本篇

首先，話到明係“我的”心得，可能只係我o岩用，又或者只係我亂講一通，如果你唔o岩用的話，咁先講聲對唔住了。

成日有人同我講（又或我同人講），點解一齊影一樣o既野，點解我（或你）影得靚咁多呢？又或者點解你影個角度咁唔同o既？又或者點解你見到咁o既位我又見唔到？呢個就係影相最有趣的地方，都係做藝術創作必然的過程。

對，影相係一個藝術的創作。你可以講千百樣野有關相機有幾多千萬pixel，鏡頭光圈有幾大焦距有幾遠，iso 最高可以去到幾多，但呢d都只係工具去幫你影相，正如畫畫你需要畫筆顏料，玩音樂需要你懂得彈奏的樂器。你可以去買最靚o既筆畫畫，用最古老的琴去彈，又或者只係求期拎起枝鉛筆塗鴉，又或者拍打水樽出來的聲音，都可以係藝術創作。因此每一張相本身，就係一件藝術創作，因為佢係獨一無異的，係你自己品味的反影，就算別人再做一次，都只係一個mimic。

你可以話，我求期搵部DC 仔影o既自拍相，都可以叫藝術創作？咁講真，Mona Lisa 都係一張人像相，點解人地係藝術品，而你o個張唔係？當然，人地o既創作，係經過不同的訓練，經驗，品味的培養而得出來，而你，只係經由一個無靈魂的機器幫你去記錄一張個人照片。機器，可以好快準確地幫你做到要做o既野，但對於藝術創作，始終係由人腦去主宰，係無可代替的。

咁點樣先影到好相？

首先，要學睇相。

大家成日都睇相咖啦，有乜咁奇？

學睇相，就係要講得出咩叫好，咩叫唔好，點解唔好睇，點解好睇。

我以前學琴，都不停地聽人地o既 piano recital，去聽人地點彈，去欣賞人地用乜野方法去演譯一份跟本寫得清清楚楚的樂譜。有一d人可以o係一d地方做得很誇張去擴大張力，有d人可以同一個地方處理到淡如水一般有板有眼。究竟係對定係錯？呢樣野係無絕對的，有的只是人喜歡，還是不喜歡的分別。

咁點樣先叫好，咩叫唔好呢？

首先，一張好看的照片，係簡單，直接，好明確地想表現主體。

好似呢張相咁，我影o既時候太興奮了，無理會原來我面前有一棵樹，我只見到後面的壯觀的櫻花樹，以及再後面阿蘇山美麗的山脈。所以影出來，究竟係最近我的那棵小樹係主體？遊人？櫻花樹？還是後面的山脈？

如果我行近少少影，如下

當然我唔敢講係一張好照片，最起碼，你好清楚知道幾樣野：一棵很大的櫻花樹，有很多遊人欣賞，後面有山，有藍天，前方有黃色小花做點綴，但你清楚知道，我係想影棵櫻花樹，其他所有的，都是次要。

當然，這張相片還有很多方法去處理，就要用用想像力，拍攝的時候，想一想，想得清楚，再按下快門。否則，最後都只係放入垃圾桶。

此外，一張好看的照片，係耐看的，令人有想像的空間。

甚麼是想像的空間，其實係幾抽象的。

好似這一張，畫面內四個人，看的方向都不同，各自有各自看的角度，你可以想像到，他們眼中所見的是甚麼嗎？

當然，你可以完全唔同意我所舉的例子，因為每個人的審美眼光都不同，但只要抓住這兩點，你就可以知道點樣去欣賞好的照片。

藝術創作雖然無對錯，但當然不是亂作一通。所有藝術創作，都有自己的技巧作為後盾。彈琴，都要學些少樂理，考到幾多級，先至有能力去判斷係好或是不好。同理，攝影，都要有些技巧才可以說好或不好。下次再講。

Luca

無諗過入大尾篤只係為了食個 pizza，都無諗過原來咁好食。

講真，以前諗去大尾篤，只係為左 1. 新娘潭 2. 八仙嶺 3. 水上活動中心 4. 船灣淡水湖，食一餐西餐，係幾匪夷所思的事。今日就做了這回事，坐了一百大元的車（其實用了4張免費車票），食了一個很滿意的午餐，比甚麼也好。

店不難找，在大埔墟站乘 75K 或專線小巴 20C 在龍尾村下車，向前行見到藍色帳篷就係。本來想快坐小巴的，不過，一走去小巴站就見黑壓壓的人群，起碼有近一百人，從來無想過等小巴都會這樣多人，唯有乖乖坐巴士吧。

店子都坐滿了人，雖然已經下午三時多。叫了意粉，湯，Pizza，還看到別人叫的磨菰多士，樣子不錯，又叫了。

意粉不算大，但好靚，料又足，一流！湯普通，但都係好足料，好夠味！

本來無期望的磨菰多士卻是絕頂極品，蒜味濃郁的多士加上芝士汁煮的磨菰，兩者拍得天衣無縫，非常精彩，得三件多士真唔多夠喉呢！

接著主菜 Pizza，我叫了 half and half 海鮮同 Luca 的 deluxe，好耐都無試過 pizza 可以 half and half，好開心。Pizza 本身就比較軟了少少，不過味道唔錯，一路在露天陽光下食 pizza 一路 hea，在香港真是沒有幾多地方。赤柱大街的幾間，只可以用“爛”來形容。這件 pizza，不知好味幾多千倍！

食完，本來想去大壩走走，見到周圍都是人同單車，連扒艇的，都擠滿了整個海邊，同去旺角無甚分別。唉，香港的遊玩設施真是缺乏得緊要，否則為何天氣好少少就將郊區變成萬人空巷的大笪地？

Jennifer @西九

同 Yuki 那一輯相比，呢輯係比較冷少少的。好奇，同一日，同一地點，都係咁熱咁曬，可以影到咁大分別出來。

Yuki @西九

好耐先至出到的一輯相..

多謝 Yuki，o個日好曬好熱，都無任何怨言呢。

特別要多謝 dee dee 攪呢個 event，大家多多支持呢位小妹妹啦～
http://www.fotop.net/hke

更新。。。

確係好耐無寫任何東西了。。。

一來工作忙，二來facebook打兩句就無數人可以看到，三來要準備日本行程，所以都荒廢了這裡。

其實想用另一個系統來將整個website重新做過，但始終找不到一個滿意的，又再等。

如果大家未睇過最新的遊記的話，去看看吧。很快就會加入照片。

十年

最近在不少討論區都見到不少人到這裡取景，問一問朋友，原來係舊機場的消防局。在舊年十月的時候，一個怪火（？）將整個消防局燒得破爛，但破爛得來，又未倒塌，有不少人就咁摸了入來，我當然都不執輸，都入來看看。

那一天我租了架雞記去，諗住可以車出車入，點知司機大哥對此地一無所知；無知不要緊，我打電話給朋友問在哪裡，佢居然九唔搭八的同我在九龍城，九龍灣，觀塘兜圈子，兜了差不多一小時，我已經想打人，就叫他放我們在 Megabox 就算。在 Megabox 旁找一條天條過對面馬路，找到幾間油站，油站旁有個有鐵絲網的地方已被人破壞，可隨意走入去。入到去，直行去到差不多臨水邊的地方，轉右行約十五分鐘左右，左面就會見到一座樓房。去到時，已經有不少團隊在這裡，有自己來的，有影景的，有似雜誌拍時裝照的，真是有趣。

講真，如果在市區一幢大廈燒到如此，就已經成為危樓，晨早圍哂板唔俾人走入去，但係就係這裡是舊機場，似是無人關心似的，燒完就是這樣放在這裡，但又沒有倒塌，都算是一個urban legend了。最有趣是，一個個爛爛的場景確實stimulate 到人的思考，見過不少作品的題材都孕育在這個廢墟中，既夢幻，又是真的場景，真是在哪裡找？

當然，我都可以預言，這裡好快就會 "黃" 左，跟住就差人封場，大家無得玩。希望各位可以把握機會，但記得要非常非常小心呢～（因為好多玻璃碎，破爛的樓梯，燒毀的鐵枝鋼條石塊等，要非常小心呢）

要多謝 Kimmy 幫我影呢輯相，因為佢留了在那裡整整六七小時無得飲水（因為唔可能有廁所吧），好開心影到了我心中想要的照片。

倉木麻衣 @apm

D 相係耐左。。。

但好靚女喔！！！

佢開con 我一定黎！！！

話時話真係多左日本歌聲來香港，同埋行信和地庫發現差不多大半層都係賣日本碟／日本歌星產品，我唔知係咪一向都係咁，但係我真係覺得香港年輕人愛日台歌星多過香港歌星好多好多。講真，我呢d 以前不停買香港 CD 的都已經放棄了，而家差不多清一色買日本 CD，在 iTunes 買歌又方便，我跟本已經想唔到任何理由買香港 CD 了。

是否很悲哀？又唔係o既，物先腐而後虫生，冰封三尺非一日之寒，比如一個都出左黎7 8 年啦，講野都仲係好似個弱智兒童咁－佢個前拍檔又係又傻又天真，咁佢係弱智都不為過－講緊仲係不識大體，真要命。講真，香港歌星，寫得詞作得曲都已經係鳳毛麟角，但在外國，最低要求起碼都要識得寫或作啦。就算唔識寫同作，作為一個歌星，唱 live 五音不全的比比皆是，究竟自己知唔知乜事？真係要好好反醒下啦。

聖誕 feel 的非聖誕歌

如果你覺得年年聖誕都要聽Mariah Carey 那幾隻聖誕歌係好悶旦的話，倒不如聽下我而家講呢隻碟。

槇原敬之的新大碟 Personal Soundtracks 是近來非常喜愛的 album，基本上整隻大碟風格都洋溢著輕快，正面的心情，就係一貫的 Maki 的風格。不過最特別的是歌曲的編曲同配樂都非常講究，每一首都有自我不同的音樂風格而又有令人印象深刻的豐厚的配樂。最先的 Taking the Central Course 的鋼琴配絃樂就是一個非常優美的開始，而結尾加入的一段風笛更引人入勝。

之後的 Chocolats et Sweets 係非常 jazzy 的小品，聽著就似望著滿檯的聖誕糖果。

君の後ろ姿（你的背影）是我最喜歡的作品，雖然歌詞流露著一點點的傷感，但全首歌穿插著鄉謠（country）味非常重的提琴及結他配樂，加上簡單輕快的旋律，令人立刻喜愛。

之後的 Orange Colored Sky及つま先立ちで(笑)都是非常pop rock 的作品。

WE LOVE YOU 亦是我較為喜歡的作品。就似前作寫給 SMAP 的世界に一つだけの花（世界唯一的花）一樣振奮人心，總會感到人間有情。

僕の今いる夜は（我的今夜）加入Christmas Bell 的 Chime，令整首歌都似聖誕歌。至於 Firefly~僕は生きていく亦是非常country 的歌曲。

最後的 The Average Man Keeps Walking，某程度上同第一首 Taking the Central Course 首尾呼應，大抵都是要對紛擾的事退一步看，最重要是自己喜歡的生活就已經是滿足了。

在金融海潚下，無可奈何下各人都憂心忡忡，聽聽Maki 的歌吧！起碼，你仍會覺得這個世界還有希望，聖誕都將來臨，也是新一年的開始，暫時放下不快的事，去迎接新一年的挑戰吧！

細路

早兩日阿蘇節目炳個細路女，有路人見到大喊點解要炳個o靚妹，佢都無做錯咁話。

錯！梗係錯啦！

人地講左點樣做，心神幌忽，無聽書，做得唔o岩又唔認，抵鬧啦。
鬧兩句就喊，少少挫折都受唔到，大d點算？
再細心睇下個o靚妹，起碼都成十歲啦，拎把牛油刀查牛油咁簡單o既動作都唔曉，你話係咪父母縱到壞？

如果我係佢老豆，我就真係一巴星落去，全香港人面前丟我架！

當然，一定唔會有呢一日，因為我極憎鈿路，唔好望我有個女！

Epoch

從前呢個舖位只係做d 好cheap 的茶餐廳，絕少會幫襯。而家因為對面開了一幢超高（檔）的港島東一號，結果係唔知邊過趕了這堆茶餐廳，引入了一兩間高檔的餐廳，這就是其中之一。

一個悠閒的weekend 坐在“露天”的位子，飲著咖啡睇下書，真係幾正的。

Lunch 都唔錯，對我來講o岩o岩好，＄40有找。要留意杯咖啡係唔計的！

個湯係我久違了將蘑菰打到蓉的蘑菰湯，好好味。加個 pita 飽，味道似 pizza，唔錯。

我就食雞肉Caesar, 當然唔好期望雞胸肉好好味啦，不過都過得去了。

要彈的，就是serve 的小女孩好似個個乜都唔識咁，week day lunch time 點頂得住？

廢柴特首，請走！

雖然今次事不關己，但有識得o既人流落曼谷，我真係好似覺得我交咁多稅唔知為左乜。

反應慢半拍，都仲算了，仲要拉雜一堆理由去推塘唔派包機去接人番黎。講真，拎一百幾十萬出黎，同立法會講要錢一定會俾咖啦，呢d 都要慳，仲要人俾錢先搭得，有唔少人都已經彈盡糧絕啦，係咪真係扑佢個街得過份？同四川振災就幾十億一個唔該就爽手拎出黎，自己香港人條命就無咁好福利，有無攪錯？

最好笑係，好啦，攪出人命啦，瀨野啦，咁就又搵個理由話局勢不穩啦，要接人走啦，咁第二日人地就話就快可以開番機場，你話呢班友個腦係咪生o係個屎忽度？

你個屎忽特首你快輪d 走啦，好心唔好阻住個地球轉啦，你好o係屋企養魚好過啦，你有無同情心咖？成班廢柴唔好俾人知你地華仁出黎咖，我無呢d咁o既師兄，神父點教你地咖？仆你個街真係點解金融海潚唔捲你班廢柴仲留o係呢度獻世。

人地話經濟五年一個cycle，而家2003年o既5年啦喎，係咪應該又整件50萬人大遊行整佢走？

三點三

食咖央多, 飲奶茶

胡琳 Wonderful World Concert

我的另一個小 project... 胡琳 concert。（文字遲少少再寫，先睇相）

The Snow Fairy

新嘗試，第一次拍照去做一個 theme，自己當係一個 project，係有點夾硬來，但總比齋出相有趣，請狠批。(點擊可放大，最少800x800 解像）。

吞拿魚祭

一年兩度Apita 吞拿魚解體又開催了。今日同班日本師奶爭呢pat 叫中落的物體，中落係骨同肉中間用刀起不出來的肉，要用湯匙起出來。一大pack 只需 $30，非常抵。

之後再買了 $110 四包的刺身，做刺身飯！

可惜大拖羅太大條筋，好難食，浪費了。。。

幾靚！同街外百幾蚊一碗無分別！

當然，飯，係日本米，連煮飯o既水，都係北海道的水。唔好以為真係好貴，如果你得兩個人，買一包2kg的日本米一百蚊多少少，一枝日本水都係十零蚊，已經煮到好多餐飯，但感覺係同去日本一樣呢。。。

＊＊追加！＊＊第二日再落去排過，星期日特別多人！今日差不多全碗都係吞拿！正！

屋企飯。。。囍點

上次講的雅敍一堂，係好食，但始終比較貴，不可以經常去。但在街坊的介紹下，發現另一間隱身小店，既便宜，又好食，而且食品都好有特色呢。

呢間真係好隱身的，除非你住在呢頭，否則你係唔會識得黎；就算係住呢頭，無人講你聽，你都未必會行入去（好似我咁）。唔好以為係一間 "hole in the wall"，或者係d廠廈的食肆，店子身處的大廈是一幢新住宅來的，只不過入口位置很騎呢，你未必會發現。

講了咁多，都只係想講，d咁騎呢位的食店，居然晚晚都高朋滿座，差不多一定都要等位的。

好大程度上，係一碗湯，一碗便宜得令人發笑但又絕對足料的老火湯。下面的一碗湯，係沙蔘玉竹椰子煲琵琶骨（希望我無寫錯），＄12一碗，＄55一煲，無味精（當然）。飲得出用料豐富，味道充足，不喜歡湯料阻定的朋友就會好喜，因為成煲湯一件湯料都無（對我來講就唔係咁好了）。

不過除了湯之外，其實有好多好特別的食品的。有個小食芥末木耳。用芥辣來提味，加上花生碎，木耳變得非常刺激香口，感覺好特別。

另外一個特色小食係蒜香河蝦。應該係用牛油來爆香的，好好味。

不過我最喜的都是這個煲，係炸菜蠔仔豆腐煲，可能你覺得這個組合好似好怪，但原來非常好味，撈飯一流。

唯一不滿的，是這個炒飯。胡椒加薑米的炒飯，雖然飯炒得好乾，但嫌太辣了，搶了炒飯的味道。（其實係抵死的，應該估到係好辣）反而佢有不少的蒸河粉米粉菜式，係用蒸籠蒸出來的，非常幼滑，如果有機會要試試，因為出面都唔多覺有得食。

最後的一個糖水，又係＄12，一端上來就聞到好香的杏仁味，杏仁磨（如果係磨的話）得很幼滑，就算食飽了都想試一點。

咁多味，埋單不用＄200，唔駛加一，算係咁啦。

店子名字叫囍點，在鰂魚涌的仁孚工業大廈後面的一條小街叫船塢里 16 號，太古地鐵站A2出口過馬路行一陣就係。

屋企飯。。。雅叙一堂

有時屋企太熱唔想煮飯，但又唔想走得太遠去食，o係太古城係比較麻煩，因為通常都係如各大商場咁都係一d 無乜個性的餐廳，又或者係好貴又唔抵食，所以都幾無奈。

好彩，最近發現左一d 在附近比較家庭式的食肆，係好好味又值的，同埋真係用良心去做的食店。先講呢一間在太古城的。

一煲湯對我黎講係好緊要的一回事。佢o既湯係好濃郁，有哂湯料，無味精，一大煲非常足料，絕對唔係普通例湯，係好用心煲的一煲湯。盛惠 $78。

呢個係冬瓜舖面，下面有菜有菰，齋得來味道濃郁，仲可以用來撈飯。不過我仲係最鐘意右面的京都骨，濃厚的肉味，炆得好夠，骨肉一咬就分，真係好正。

佢仲有翅食的。一盅都係 $88，任你去香港邊度呢個價錢都食唔到咁多翅，下晝的話仲加多碟炒粉麵，真係好鬼抵。

丫仲有，留心你如果好彩食到佢o既糖水的話，真係要試試，因為d 糊呀咁，真係磨出來的。唔係日日都有，睇大廚有無心情整咖咋。

雖然整體來講，這店子不算便宜，但係用心做的菜，絕對值得。而且每次食都送一張 coupon 來，就是一碟小菜，再來多次就抵番。

店名叫雅叙一堂，就在太古城衛星閣地下。

嫌貴的話，下次再講另一間平便一些的屋企飯。

玩野。。。

晚上去中環試了些特別相。。。

其實，都無乜咁特別，如果以前玩開菲林機都知按下快門後唔拉菲林，一直咁同一張相曝光，就係咁o既樣。不過而家用數碼幫你做埋，唔想張相太悶的話隨時都可以玩下，幾過癮呢。

又其實，我係唔記得左有樣咁o既野的，都係o係呢度睇番黎咖咋～

Nikon x Momi

我唔覺得自己影相影得好，尤其是影人像，從來只係只係識按制，完全唔知點先叫做好，又同人無溝通的，更唔好講咩睇面形擺咩pose 完全唔知道。因此想真係認真去學下。

買了部D700, 發現裡面有張 flyer 話有個Nikon School, 咁上去睇下乜料啦。原來乜都有的，當然最基本的Nikon 相機基本運用啦，又有旅行攝影的講座，又有講人像燈光咁，不過最特別的是同Momi model 雜誌攪了這個 Cover Girl 攝影工作室，講的都係有關做這本雜誌（影model）的心得同技巧，唔算得上入門但又唔算好advance，有得出outdoor 又有studio，算係乜都有d啦。

第一堂純上理論，都學到d野o既。起碼都識睇邊一邊面好睇d，手腳應該點擺至唔awkward，點樣 set 燈咁。

第二堂去高街鬼屋影相，勁surpise，出現了無線姐仔 Amy Ng 做我地 model。Amy 好friendly，雖然都唔係全自動攦pose，出來的效果都唔錯。不過我發覺我原來腦海內係無任何 idea 要人地擺乜pose 想表達d 乜，呢樣我點都做唔到。。。

第三堂在觀塘的studio，對我呢d 等人地黎set 燈的人來講真係好有用。雖然唔算得多學到好多野，起碼我都知係咩一回事。但最大敗筆係位model，唔知佢鬧甚麼情緒，對我地呢d 無乜經驗的影師來講，真係只有累鬥累。希望有關方面下次小心d吧。

想睇其他相可到這裡。。。

政府包底！

既然阿羊太都可以迫政府對自己投資失誤包底，我地d MPF 更加應該全包啦！佢地毛查查聽銀行sale屎講買d超級債券出左事又要搵人揹，咁咪對我地被迫供MPF o既好唔公平？唔得，不如又組團去圍立法會啦咁。

下川みくに

冏。。。

o岩o岩睇社長個blog 先知下川みくに黎過香港。。。好背。。。

我要聽佢現場唱想い出がいっぱい。。。。冏

無得聽青山テルマ，都仲算了，我究竟點解咁背？

神探伽利略

…又幾好睇喎。攪到我星期日一整晚o係電視面前都起唔到身，呢樣對我黎講係好少可的。

但係點解。。。又係柴咲コウ，又係福山雅治，日本真係無乜明星咖喎。。。

西邪東毒

如果你問我點解唔評論下有關毒奶事件，我只有講，我晨早已經飲日本牛奶，買日本雞蛋，能夠買日本版的食品就買日本版的，再不是就是美國或澳洲製造的。我從來不信大陸做的任何食品，period。

但其實，呢單野攪到咁大都令人有點意外，要怪，就怪大企業要慳成本，要榨取大的利潤，因此不斷使用中國製造的原材料。有如此大的誘因，down stream 的生產者供應商要加大生產力，再榨更大利潤，生產力去唔到，就只有出旁門左道的辦法。講到尾，播毒總要有原因，光叫總理出來講兩句說話，哭多幾句對不起，都做不到幾多野。

再升級

好多朋友同我講個 server load 相好慢好慢，對，因為其實 server 一直在我的舊 Mac Mini G4 跑，只不過把它放在一旁（話又說回來，除了要做 security updates 之外，開咁耐機真係無 boot 過，穩定得緊要）。為了配合現時需要，因此準備了 upgrade 整個 server。

Server 係之前的 Mac Mini Intel Core Solo 自己 upgrade 去 Core 2 Duo T7200, 不過始終底板限制，只能上 2GB 的 RAM, 因此本想等有新 Mac Mini 推出才 upgrade 自家用的機器, 可惜等極都等唔到，唯有用住舊版本的 Mac Mini, 將之前的下放做 Server。

因為已經 upgrade 了 OS X 10.5, 所以就直接使用。但問題來了，原來之前一直用的 Entropy PHP 一直都沒有 update 過，跑 10.5 是有問題的，唯有另想辦法。

再爬爬網之下，發覺 10.5 default 的 web server 已更新為 Apache 2.2.8（最新update)，而跟來的 PHP 5.2.6 module 是未有activate 的，只要跟據這裡的指示就可以在 apache 載入 php。

以為就此大功告成，一開 phpinfo()，就發現最重要處理圖像的 GD package 未有包含在 apple 的 distribution 內。唯有又爬網了。。。幸好，原來很早以前有人已發現了，並寫了非常詳盡的解說，等我可以一步一步的將 GD compile 並安裝好。解說內用 Darwin 的 php 5.2.4, 但其實你可以直接去 darwin source 內 download 最新版本來 match 你機內 php 版本。

要留意，如果你要 compile for Core 2 Duo CPU 的話（我相信現在所有人的 Mac 都是 C2D 了吧？）你一定要 compile for 64-bit，否則不能成功 compile。

之後再在 MySQL 網站下載最新版本的 community server, 因為有上面的經驗，因此選擇下載了 64-bit 的版本。當然，你問我有乜分別，我現在是答你唔到的。

至於 Mail Server, 我則一直使用 Bernard Teo 的 MailServe，簡單直接。但由於 10.5 版本需要另一個 license, 因此我一次過 upgrade 了成為 MailServe Pro for Leopard。不過由於時間關係，我未將 server 轉為 Dovecot。如果你要轉 server 的話，記得在 /var/mail 內 backup 好所有用家的郵件，放回 server 時記得將用家的郵件 chown。

大功告成！

但原來事件仲未完結，Gallery 2 需要 php 內的 gettext 外掛才可轉語言，因此又爬來另一篇文章去 compile gettext module。有了之前經驗，這次 compile 很快完成了。

大家可以試試去網站不同的地方遊覽，看看有無需要改善的地方吧。

投票！

大家記得今日去投票喎！記住要投俾那些堅持民主理念的人！

賣告白

我要放部 Nikon D80，連 Tamron SP AF17-50mm F/2.8 XR Di II (A16) 及 Nikkor AF-S 55-200mm f/4.0-5.6G VR DX，同埋d 濕濕碎碎野咁，$6000. 全部都in good condition, 有原裝盒，不過 D80 已過保用。有興趣就留言留個email 俾我。

順

今日第一日帶部D700 出街，就係去影野食。

呢幾張相，係 raw 黎，用 Lightroom 2 import，只係執左少少光，白平衡完全正確，noise 同ISO100 係一樣。好勁。

順在天后好出名，我一點半入去已是人滿之患，之後都仲陸續有人入內。

選了蔥吞拿魚飯定食， $100 有湯有飯有烏冬，仲想點。

湯非常有料，好多蘿蔔，好大碗，誠意之作。

飯係舖得滿滿的白蔥。以為無乜魚，原來都躲得密密的。

可見是幾咁豐富。就咁食完這碗飯就已經夠飽，但其實，還有一個烏冬。

凍烏冬是可以的，不過嫌淡了一點。

我一次去，是沒有9 折咭，原來食一次就有一張9 折咭，之後一個月都可以用，相信這裡都會成為我的食堂了。

D700

美國對巴西

仆佢個街, 無一個台播, 連自吹自擂乜都會播o既有線都唔播, 攪乜? 係咪因為朗平 "叛國" 所以一齊抵制佢地?

我唔知, 只不過睇住兩個隊友o係度差波, 爭地係你係金定我係銀, 有乜咁好睇?

花乜鬼月圓

睇左兩集, 成班人把口涼薄到呢, 真係無眼睇. 悶.

野蠻人

野蠻人扮文明辦奧運, 點扮都始終係野蠻人.

唔好話我唔愛國, 我睇唔到有咩值得我愛.

Batman - The Dark Knight

3 年前在加拿大看了這套 iMAX 版, 3年後再在香港看續集 iMAX 版, 驚覺原來時間過得真快.

比起上一集 Christian Bale 的生澀, 今集明顯地剛勁有型, 絕對係一個青年才俊的 Bruce Wayne. 不過好老實, 我最喜歡的, 卻是 Joker 的 Heath Ledger, 他每句說話, 每個眼神, 都令人不寒而慄, 外表瘋瘋顛顛，不按常理出牌，但其實箇中卻是刺中周遭的人的死穴。可惜，Heath Ledger 死得早，這個出位的Joker 已成絕唱。

數分鐘的香港場口，漂亮得令人目定口呆，除卻同Mr Lau tea 時穿了崩之外, 其餘的取景都非常 breathtaking, 尤其擄走 Mr. Lau 那一幕, 真是非常賞心悅目, 不似那些如 Fantastic 4 一般不輪不類的所謂 "東方" 印象.

故事非常緊湊, 而且峰迴路轉, 令人無一刻可以停下來. 不過我最喜愛的是, Joker 對人性弱點的描繪, 以及蝙蝠俠對自己身份的無奈, 對事情一發不可收拾的無奈, 都將觀眾一步一步帶入戲內. 好老實, 這一集無特別目不睱給的特技, 但故事引人入勝, 發人深省.

同蜘蛛俠一樣, 現代的英雄大都很人性化, 英雄總是有人性的弱點, 而弱點就容易被其他人玩弄於股掌之間. 不知是否就是這樣, 英雄的故事就更令人引起共嗚, 而不是打不死高高在上的神仙?

排隊

真係唔知點解個個咁好興緻去排隊等奧運紙幣....真係為了紀念, 定係樓股 iphone 都無得炒就炒下銀紙?

定係其實我已經過了以前那個排隊情懷?

我只係知尋晚打雷打到飛起, D 人企哂O係街, 俾雷辟的話邊個負責?

新色!

超靚仔! 忍唔住都買左! $288!

(邊度買? 當然唔係日本啦, 記唔記得呢?)

長崎 Day 3

長崎係一個好舒服的地方, 可以好悠閒地四處走, 又唔駛趕來趕去. 今日天氣又好, 好正.

Glover Garden 係個好靚的地方, 雖然對於香港人來講, 外國人通常都有特權住d 咁靚的地方,無得講.

住的酒店好好玩, 一間新酒店玩懷舊, 個餐廳D 野又好食, 值得推介.

晚上吃了長崎有名的桌袱料理, 可以話係古老的fusion 菜, 好食, 好飽, 但原來我發現, 日本人做中國菜都仲係爭咁d.

上山看長崎夜景, 當然正如函館一樣, 別人話係千萬金元的夜景, 一同香港相比, 真係完全無得比. 不過有趣在, 同好多人講上山頂行下, 人地會覺得好奇怪. 香港人自己都唔支持自己的景物, 可以講乜?

福岡 day 2

今日無乜特別, 基本上是 shopping day.

去了鮮魚會館食早餐, 都係無乜特別, 食了一件壽司有骨的. 我諗下次唔駛再來了.

特登坐車去元祖長濱屋食拉麵, 湯好好飲, 但叉燒死咸, 可能係特登的, 不過真係幾好味.

晚上去了酒店附近的食天草大王地雞, OK 啦, 唔講得上好好味,但都可以.

福岡 day 1

機場去西中洲東橫 Inn 坐的士只係 2000 円, 唔駛拎唔駛擡去到門口, 同東京大阪相比, 真係抵到呢....

在 Solaria Stage B2F 的ひょうたんの回転寿司真係好正, 比我之前食過的任何回轉都正,上次無去這裡, 真笨....

在福岡坐巴士係方便到暈的, 去Marinoa City Outlet 坐303 巴士在天神直到, 只係半粒鐘,坐乜鬼地鐵...weekday 行 outlet 真係 hea 到痺...

去番上次去的權八, 發現最平的鐵板course 都己經係正到暈, 而且唔係一般死古古的鐵板, 係處處都有驚喜, 又係必去的地方.

35mm F/2.0

舊鏡, 新盒, 認真估佢唔到!

仲要係 Made In Japan! 雖然我之前兩隻都係 Made In China 都唔錯, 但心理上始終覺得係好D 的.

對焦好似很爽似的. 因為最短 focus 係 25cm, 比之前的一枝 50.8 仲要近得好, 咁家陣就可以好好咁影食物了. 不過未影食物之前, 送上一張 snoopy.

去完番黎送好相俾大家!

領導

雖然, 我不否認總理係一個大好人, 但災區仲未穩定落黎就去到那裡, 有乜事起上黎邊個擔當得起? 講緊係地震喎, 餘震一定仲有咖喎.

從來, leader 做的事就係發號司令, 從大局去計劃做調配, 只要後援調配得宜, 又何需親身披甲上陣?

有幾可英國總理或美國總統會落災區做行動總指揮? 這些事都是交給經驗豐富的軍人或救援隊伍吧? 但我們祖國的領導人都好此道, 實在是奇怪的現像. 當然, 我唔否認, 總理出現, 對災民很有鼓勵振奮的作用 , 但權衡輕重, 是否應該交托給更有經驗的人呢?

當然, 相比起隔離國將振災的物資私有化的人渣行為, 我相信我們的領導人都算係不錯吧.

祝願所有受災人士都得到救援, 死者可以得到安息吧.

ABBA

唔好話我老餅, 見到呢 4 隻大字, 真係好自自然然被吸過去. 其實以前係無乜咁特別去留意的, 只是 Muriel's Wedding 睇一個 what nowadays we called 豬扒的女子發夢都要溝仔的故仔, 係個樣唔掂, 但唱 ABBA D 歌超正. 跟住就要到在澳洲時睇了 Mamma Mia!, 真係愛到不得了. 你講, 除非你係咁煲 soundtrack 咖O者, 否則你點會第一次去聽個 musical D 歌係自自然然識得唱? 最有趣係, D 歌係好似為左套劇而寫的, blend 得完全不著痕跡, 真係正!

ABBA 的歌唔駛再講吧, 旋律簡單直接, 歌詞訊息正面, 又不古作高深, 實在是學英文朋友的良師益友, 真係聽多幾次就絕對可以上口.

所以 ABBA Arrival 來, 我第一時間買飛了. 其實點解呢? 不是只是為了可以一路聽歌一路唱一路跳, 一定好好玩! 6 月 14 號見你啦喎!

仲有 Mamma Mia! the movie 暑假就殺到黎, 有我最愛的 Meryl Streep, 好期待 (可以在戲院一齊唱一齊玩呢)!

如果你仲未識得 ABBA 的音樂的話, 你快D 拎黎聽下啦, 一聽, 你一定會愛上佢!

Belgos East

舊年去完 Quebec 食了個好美味的法蘭西青口 (右圖), 一直好掛住, 都唔知香港哪裡有得食.

聽講 agnes b 有得食, 但係打個電話去 book, 接電話那種態度真不敢恭維, 所以點好食都怕怕.

其實一直都知屋企附近有間叫 Belgos East 的餐廳有呢家野食, 仲要係生招牌, 不過人係好怪的, 永遠都是要出一出街才安樂, 好少會安步當車去食西餐的.

今晚突然興起, 想起這個地方, 因此就去試試.

想不到, 一間咁 "環頭環尾" 的餐廳有咁多人坐, 既不是在太古坊最旺的地方, 仲要在電梯底, 但甚有老蘭 feel, 真估佢不到.

坐低才知是一間比利時 feel 的餐廳 (我唔夠膽講係比利時菜, 始終我唔識), 但既然係講到明自己係食青口的 (因為招牌係個青口!), 當然一定要試試.

在加拿大知道, 白酒忌廉青口的青口係應該細細隻的, 大隻到好似香港食到那種的話, 肉就好易 "鞋". 細細粒, 好食好多. 而且食完一隻之後用個殼來 "夾" 住肉出來食才是王道, 大大隻就無呢種 feel 了. 這裡的青口就剛剛好大小, 而且真係好好味, 嫩滑好肉, 個白酒汁煮得好味美, 當湯飲都得. 一筒有近 30 隻, 兩個人分就已經差不多了. 跟來的還有一大碗 fries, d fries 又係好大啖肉, 愛薯條的一定愛到死.

這裡都有不少比利時啤酒, 比如那一個叫 Kwak 的啤酒, 那隻杯同個座十分好玩, 真係估佢唔到, 而且酒味濃郁, 都值得一試. 不喜啤酒苦澀味的, 可以試試那隻桃味的啤酒, 入口真是很桃的, 不過小心係糖衣毒藥, 飲多兩枝就會番唔到屋企.

不過最叫我驚喜的是那個 pizza. 我叫的是疑似 hawaiian pizza, 整個 pizza 是真正由火爐焗出來的, 當然不會似那間叫自己做 pizza 的餐廳不要臉在死落油. 正的 pizza, 係底皮要薄, 脆之餘, 拎起係挺起的, 而且面頭的料係不會跌出來, 當然, 仲要有好綿好香的 mozzarella 啦. 我在香港可以食到呢個 quality 的 pizza 真不多, 這裡是其中一間. 從來, 越是最基本最簡單的, 就越難整得好, 攪那些甚麼花臣的如芝心批咁, 跟本不值一晒. 兩個人, "習習習" 的, 一個 pizza 話咁快食完. 好味.

走時已經很飽, 否則再食一個 belgian waffle 就 perfect 了.

如果你對一般老蘭 soho 甚至乎太古坊都覺得悶的話, 不妨行過一點到呢度 happy hour 啦, 好好 feel 又清靜, 食物又好食, 真係好難得的一個地方.

老北京

如果我話呢碗叫番茄蛋麵的, 番茄係好有番茄味, 蛋係好有蛋味, 但食到我好感動的, 你會覺得我老點你嗎?

當然我無老點你, 番茄蛋不是用來炒而是用來放湯麵已夠神奇, 更神奇在於一樣你覺得很簡單的菜, 做出來可以是味道豐富得不得了, 就連湯都一滴都飲清的能耐.

我不知道番茄蛋是否北京家常菜呢? 但是, 做得好好味的番茄蛋, 除左我阿媽之外, 就只是這裡了.

這間店子, 躲在渣甸街街尾的渣甸中心八樓. 一入內, 感覺是很細少, 很溫暖 cozy 的樣子, 但何時都是坐滿人, 再細心一些看, 店子兩邊都有塊布簾, 原來有兩個個室的, 一家人坐在裡面有個私人空間, 都不錯.

要食, 就當然食一些未食過的. 涼伴心里美就是這樣子, 如果你不知的話, 心里美是甚麼? 原來是一種在北京附近品種的蘿蔔, 清甜但又有甘澀的味道, 用來涼伴非常可口, 在香港很少可以食到, 值得試試.

北京的地道食品又怎可少得水餃? 當然你可以叫最普通的白菜水餃, 但我叫的是茴香豬肉水餃. 茴香又是在香港比較少食到的, 味道芳香, 比大白菜水餃來得更有性格. 這裡包的水餃皮薄, 咬下去不會似一般外面的店子一舊粉的模樣, 非常精采.

豬耳絲都做得非常不俗, 有大蔥及荽茜調味, 味道豐富, 比那些所謂上海店子齋切幾條豬耳絲就上檯, 實在有誠意得多.

上次都食過爆腰花, 非常精采, 可惜無拍照留念.

但, 你有無發覺我無食羊? 咁多好野食, 可以食得幾多? 唯有又要等下次了...

記得, 店子太小, 上去前一定要訂位, 否則你一定摸門釘....

容記小菜王

好多隱閉/世的食店所處的地方都是旺區但卻很難發現, 好似這間容記就是, 我差不多隔一個星期就去高登朝聖一次, 都無發覺有一間如此在附近街坊出哂名的小店. 有地膽推介, 當然一定要試試.

第一件要叫的就是燒肉. 哈, 通街都有燒肉, 點解要這裡食? 當你知道佢的燒肉晚了就售清, 你就知有幾咁賣得. 一上檯, 已知不平凡. 當一放入口, 嘩, 係熱的! 你記得有幾多次食燒肉係熱的呢? 熱得來, 皮非常爽脆, 顏色金黃, 肉呢, 肥肉同瘦肉層次分明, 正如阿蘇所講, 最靚的燒肉就應該是這樣.

接著上檯的是雞. 唔好理佢乜雞, 總之肉滑到不得了, 就算是雞背都是啖啖肉, 貨靚, 就算點整都好好食.

飯我唔好的, 不過友人說菜乾蠔豉粥很出名, 就叫了一碗. 果然貨真價實, 粥煲得夠溶, 又足料 (當然啦, 不是一大棵菜乾一大舊蠔豉啦, 是已經碎哂但又食得出來的), 大啖大啖咁就食了一大碗.

菜單寫的 "超級滑豆腐蒸帶子", 果真是 "超級滑", 可惜豆豉太多, 蓋了豆腐及帶子的鮮味, 不過都不錯.

之後來的沙律骨及魚肚肉碎菜膽, 都在水準之內, 非常不錯.

不要以為在深水步的食店就很普通, 原來這店晚市客似雲來, 因此就算有最低消費 $88, 都完全做不停. 雖然坐得不太舒服, 但美食當前, 那少少不適絕對是值得的. 6 位, 上面咁多味菜, 都只是 500多元, 比起那些貴氣的所謂海鮮酒家的鮑翅席, 真是差天共地.

10.5

兩個月忙到死, 到而家終於可以少少鬆口氣了.

因此就做了應該早就做的事: upgrade去 Mac OS 10.5.

Upgrade 過程非常順利, 又非常簡單, 差不多完全不經人手. 當然, 作為咁多年的蘋果用家, 這是 expected 的.

最不可思議的, 就是 upgrade 完, 部機係快左好多! 感覺好爽, 好有趣! 仲要係, 之前熄機前的 status, 一開機, 係繼續的, 就好似是完全無任何事發生過一樣, 如果你的 app 係定期有更新的話, 跟本一boot 起就已經可以用, 無需做任何東西.

Finder "coverflow" 化係好好玩, 但其實係咪好實用呢, 我要習慣下先. 不過好 impressive 的是, coverflow 的 preview 真係好快, 不用半秒就已經 render 左個內容出來, 真是不得不佩服技術的精要.

更何況, 一上了網 software update 就立即 download 更新的 software patch 了. 在我的 intel mac mini, spotlight一路 index 緊我都完全唔覺. 我部 iBook 就差D, 不過都預左啦.

對於 Windows 用家來說, upgrade OS係個惡夢, 大大小小compatibility 的issue,upgrade 完可能好多野都唔work, 最慘係, 你部機登時慢了不少, 加 ram upgrade cpu 之類, 當然不可少.

用 Mac 的真是可以驚喜處處的.

夏麵館

一個大而無當的 shopping mall, 當中有幾多店舖真是值得細意品嘗?

三樓的 open area 未有心情食住, 睇落都係玩情調多吧. 星期六旁晚死寂的, 都唔知可以撐幾耐.

好啦, 有一間排哂大隊的店舖, 仲要係我心愛的麵食, 唔食一次點都過意唔去吧.

咁就瀨野了.

都排了二十分鐘隊的, 唔係無付出過. 不過一坐底, 迎接我們的是兩杯唔熱唔凍, 所謂溫吞水的兩杯茶. 對水來講, 溫吞水無乜所謂, 但對茶來講, 係大大不敬. 就算係茶餐廳由茶膽沖出來的, 都是滾熱, 那有可能是溫吞水. 唯有叫待應再倒.

倒就是倒了, 但茶壺內的, 都是無煙的溫吞水.

類似經理的小姐再拎兩杯來, 這兩杯就是熱的. 但都只限這兩杯, 以後再加的, 都是暖的.

心想, 黑店.......

話口未完, 一碗咩魚咩雙喜煨麵. 就係咁, 放幾件燻魚, 一件無切的豬腩肉, 一碗麵, 兩條菜, 一D 誠意都無, 我一定整得比佢好食. 就算是打麵工夫, 都無乜. 個湯, 係湯, 但煨麵係咁水汪汪的嗎? 不是杰的嗎?

你會話, 咁點解你唔叫嫩雞煨麵? 對, 隔離叫了, 都係咁水汪汪的.

無胃口, 所以叫了小食就算. 海哲係死咸, 烤麩無乜特別. 之後的是麻醬豬腰, 怪怪的, 唔好食.

服務係可以的, 前唔該後唔該. 但, 食飯最終要點就係, 要好食, 食物, 才是重點, 如果無好食的食物, 幾好的服務都係多餘. 我相信好多餐廳跟本忘記了.

再問點解....

點解離左婚O既 couple, 雙方已經覆行左要做O既法律責任, 做爸爸的仲已經經常金錢同精神上支持個女, 點解仲有D 八公八婆批評佢話無情無義, 不負責任. 講真, 前妻死唔死, 同個前夫跟本已經毫無關係, 幫個女就算係盡道義上的責任, 其他野, 跟本就係兩不相欠, 點解仲有咁多人指指點點, 係咪要佢覺得內疚死先安樂?

秋官, 我撐你!

點解?

點解綜緩戶可以現兜兜出雙糧, 我交咁多稅, 又無得現兜兜退番錢俾我, 只係玩數字遊戲, 叫我下年俾少D (Econ 都講過, 手上的錢的 value 永遠都高過將來的錢).

點解生果金要加, 一次過俾三千蚊俾你唔係錢黎的嗎? 唔好唔記得, 生果金係政府俾老人家的一份心意, 唔係用來支援你的生活, 要用支援生活, 點解唔伸請綜援?

點解你租間板間房業主包埋水電, 而家有補貼又要同個業主分番一份 "退款"? 你唔係直接交電費O個個黎咖喎, 大佬. 正如我而家租屋, 業主包差餉, 你無得話因為今年成年都唔駛交差餉, 你就同個業主講, 喂, 減番D 租丫.

點解住公屋有得免費上網, 我個個月就要俾幾舊水上網?

所以我覺得, O係香港, 應該係窮O既人有多D著數, 唔好做D中中間間O個D, 俾咁多稅又無乜野可以俾番我的O個種人.

世界唯一僅有的花

每次失落, 不如意的時候, 聽聽呢首歌, 都會覺得打了一枝強心針一樣.

そうさ　僕らは

世界に一つだけの花

一人一人違う種を持つ

その花を咲かせることだけに

一生懸命になればいい

沒錯　我們都是　世界中唯一僅有的花

每個人每個人都擁有不同的品種

只要單純的為了開出那朵屬於自己的花　而努力著就夠了

汗... =.="

番左幾日新工, 晚晚都要過夜裝機, 出出入入成個機場行均, 我呢等咁多年來都只係 office 人來講當然有點不慣, 好彩我自己都成日玩PC砌機那類人, 開箱接線那些東西都難不到我, 唯有頂硬上.

我唔係有乜怨言, 反而我好欣賞新公司的文化, 上至我地 Asia Pacific 個 director, project manager, 甚至無乜關係的 sales director 都落手落腳裝機做野, 同我地捱到第二朝先走; 講真, 俾著香港的老闆, 好少少的, 咪話搵個 contractor 班一班人來攪囉, 唔好的, 話知你晚晚開通頂啦, 邊有D 自己覺得高薪厚職的會走落場做呢D野? 呢間公司的文化真係有佢一套, 雖然, 係同之前那間 tough 好多, 但想想之前那間個個人都懶到出汁, 有D 人仲聲大大咁話唔係我應份做的, 對比之下, 真係有點汗顏.

當然, 你可以話, 咁樣做野咪唔 efficient 囉, 係呀, 但全部都係自己人去裝的話, 大家有個共識裝出來個 quality 係點樣; contractor 的, 真係乜人都有, 返轉頭又要自己跟番哂, 其實係搵黎攪 (舊年呢個時候我就係賴到應一應).

好彩, 捱埋呢幾日就過年, 機管局係唔俾人開工的, 可以休息一下了.

舊的不去, 新的不來

無想過在一間公司居然呆了十二年, 還要是第一份工, 想起來自己也吃一驚.

今日最後一日上班, 沒有甚麼特別感覺, 只係不停地還有很多工作要做, 中間還要將自己的東西收好, 以及取回自己的所有物品, 免得益了別人.

離開了, 我是快樂多過哀傷, 不知點地, 完全無任何不捨得, 只是想快些可以在新公司上任, 繼續之後的事業.

是絕情嗎? 不是. 跟本我老細早就想我走, 只是不想開聲, 任我自己覺得無癮就走. 既然這間公司在市場上失去的contract 越多越多 (我們公司的 contract, 係每年以百萬美金來計的, 還要一簽幾年, 所以失去一張合約係好傷的), 現在連香港及新加坡這兩個 cash cow 都失去了, 而對家則越來越氣勢如虹, 為何還要呆在這裡做一個 "看更" ? (對呵, 如果你有看新聞組的話, 我就是被人叫作機場看更的人)

沒有甚麼所謂 "無功都有勞" 這類鬼話, 我付出勞力腦力去為公司解決問題, 你付出我覺得可以接受的報酬, 就算了; 賴著不走, 倒不如早人一步, 找一個相對上明確一點的將來. 始終, 音樂椅子的遊戲都是先到先得, 反應慢少少的, 結果如何, 不得而知. 我知道的, 就是所謂肥雞餐, 由十一月到現在, 整整三個月都無一紙證明係真係有牙力的人講過, 連怎樣去遺散, 都不得而知, 我怎可能知道這間公司有甚麼將來?

更甚的, 就是之後將一班新人炒掉, 將舊人投閒置散, 又或者一個人做六七個人做的工作, 又或者做一些低技術勞工的工作, 等你們無癮才走人, 連遺散都節省一大筆, 不就更好?

要自保, 就要自己出去找將來吧. 幸運的是, 都有不少人覺得我是可以做到野的, 推舉我出去試試, 以及一些在背後幫過我一把的朋友及家人, 真是不知怎樣感謝他們, 唯有在這裡感謝, 以後就唯有更加倍用功了.

(要感謝無再寫 blog 的 PK_ 君, 是你介紹了 The Ambiguity Advantage 這本書, 我走遍全港大小書店都找不到, 但卻在遠在天邊, 近在眼前太古城的書店找到, 津津有味的看了數個 chapter 就膽粗粗同 interview 我的 AP director 說了愛這本書, 他立即對我另眼相看, 難道真是 taking advantage of the ambiguity?)

殺人寵物店

呢盒野, 估下要幾錢?

1. 銅鑼灣名門純貓店, $45

2. 銅鑼灣經濟xx 寵物店, $55

3. 銅鑼灣 CitySuper..........$25

我唔係話 CitySuper 抵到無人有, 肯定市面上一定有更平的地方, 但1 同 2 食水之深, 吸血之多, 簡直令人瞠目結舌. 唔通買寵物用品的都是唔會格價的數字白痴? 定係呢d 店舖都在背後一齊將個價 markup 到離 x 哂大譜等人覺得無選擇? 有唔少人叫人去日本旅行就要買寵物物品, 因為香港無可能咁平, 但其實在 Apita 見到的寵物用品都唔係太貴, 都唔知咩事香港d 寵物店賣到好似天價一樣.

更甚者, 寵物睇醫生都閒閒地都三五百大元, 病得大d 的無一二千都唔好旨意好得番, 成日叫人俾寵物一個溫暖的家, 要好好照顧牠們, 但而家有小小病睇醫生都仲貴過我自己, 又無得 claim 番, 係咪即係鼓勵 d 寵物主人唔好帶寵物睇獸醫?

即係點?....

即係叫人地去 Terminal 1 定係去 Terminal 2 check in? 凌晨機黎分流? 唔係嘛.

不過呢, 當初死騾爛騾d airline 過去 Terminal 2, 好啦, 終於泰仔同賓妹都過去了, 原來發覺 60 個位係唔夠用的, 所以叫番呢間 airline 番 T1, 喂, 人地做左d 前期功夫先過去, 你一個唔該又話叫人番轉頭, 玩咩.

Cloverfield

Hype! Hype! Hype!

之前的 teaser 同 trailer 攪到全世界人都好想睇O既一套電影 Cloverfield.

OK, 所以我都好神聖地今日走去睇.

但其實, 2008 年 1 月 18 日係同套戲無任何關係的, 只係上影日期而已.

戲本身, 只係拎左呢個人用 viewcam 影的video, 無剪接咁播番出黎, 所以發生咩事又唔知, 個怪獸係點黎又唔知, 睇完之後都仲係一個謎.

當然, 如果你鐘意睇怪物襲地球的話, 呢套真係一套好睇O既電影, 只係開頭交待個 party 比較悶, 之後就全無冷場, 一直到尾.

但套戲真係太短了, 好似乜都未完就收工咁.

記得, 套戲係好暈的, 如果頭十五分鐘頂唔順的話, 你就真係唔好繼續了, 我一嬲有玩開 Doom 呀, Half-Life 2 之類 first person shooter, 開頭那十幾分鐘都覺得好難頂. 不過如果你捱得過個 party 的話, 之後就好好睇了. 有盪氣迥腸的愛情, 有 Alien 式困獸的恐懼, 有 War of the Worlds 的壯觀場面, 所欠缺的, 只係一大串問號, 唔通, 導演又想整個番外篇?

5 粒星的話我俾 4 粒.

下面有D spoiler O既...唔想睇唔好 click...點解個 v cam 可以由夜晚影影到第二日天光? 粒電又無事, 部機又無事? 但主角個電話粒電已經死左一次啦喎?

點解佢地 4 個O係地鐵隧道裡面應該都有受傷, 但何解只有一個人因受傷死了?

點解O係咁高空坐直升機跌番落黎, 佢地 3 個就唔似有事, 但同機的機師同軍人都死哂?

點解最後個怪物只係殺死 Hud, 但 Rob 同 Beth 都無事, Rob 仲可以 pickup 番部 cam, 咁究竟隻怪物做左乜? 佢地又躲在哪?

睇完之後, 隻大怪物係點O既樣, 我完全講唔到你聽, 只係知好大條尾, 好大的腳, 咁.

如果你唔問點解的話, 呢套戲, 又真係幾好睇的.

至於其他答案, 請到 slusho, tagruato, cloverfield clues 的 website 看看, 相信你會發現一些東西吧.

麥書航空

番到公司第一件事就係俾人問: 你會買麥書航空 (Macbook Air) 嗎?

我會買.

網上論譠大都將 MBA 打得一文不值, 乜都無, 又無 Firewire, 又得一個 USB, 又無光碟機, 又大件, 又唔係便攜的 UMPC, hard disk 又慢, SSD option 又超貴, 又無得加 RAM....等等...

我就覺得, 以上的全都唔係缺點, MBA 的優點正正係, 乜都無.

對我來講, 拎重物出街已經係一個好大的重擔, 拎部都唔算好重的 D80, 加兩枝鏡, 已經係叫做係好輕的 A16 同 Nikkor 55-200VR, 出街一整日已經叫哂救命, 唔好叫我拎枝小黑五之類物體, 我會死的. 如果出著一D event 我要過相睇相, 除左 Epson 的 P 系 digital wallet 之外 (我無), 我就只能拎部 iBook 出去.

咁 iBook 同 Macbook 其實重量都有番咁上下, MBP 就更大鑊, 其實兩者都唔係我要 upgrade 的對象, 老實講, 拎住件咁貴o既野出街, 點會開心快樂? 我自己屋企部 Mac Mini 已經好足夠用, 所以跟本部 notebook 對我來講一定要輕同薄. 所以我好佩服D 大學D 師弟師妹, 可以拎住部 MBP 通街走做功課, 我實在無咁O既能力...

當然, 你可以講 Fujitsu 的 U1010, Asus 的 EeePC, 工人舍的迷你機等等都唔弱, 又可便攜, 但個 screen 同 keyboard 就... 算把啦. 而且, install Mac OS X 係比較要緊, Vista 在這些機身上簡直係慢到呢...

咁 MBA 呢? Screen, keyboard 同 Macbook 一樣大, 用起來同睇個 screen 都會舒服得多, 薄到咁, 放在背包或手提包都不是一個包袱, 而且用親 Apple 都預左乜 port 都無咖啦, 你幾時見過 Apple 機有 card reader? 咪一樣咁過. 講真, 乜都無得換, 我仲慳番好多時間去諗買乜去 upgrade 佢.

無光碟機? 講真, 咁輕咁薄你唔 expect 有光碟機下話? USB 手指咁 cheap, 4GB 都係百幾數, 將光碟 image 做個 disc image 放哂入手指度當 backup 都得啦. 如果有人俾光碟我咁點? 哈, 我會話, 環保D啦, e 俾我, 手指俾我咪算囉.

睇個 spec, the weakest link 係個 hard disk o者, 1.8" 即係 iPod 用緊O個D, 相信 Apple 有能力去 optimize 到個 performance o既. 其實最大敗筆, 只係個 SSD option 貴到離哂譜 (當然, 人地個價真係咁貴), 如果有個option 係 32GB又平一大截的話, 我覺得真係唔錯咖.

我覺得MBA 最大的得著係, 粒縮左水的C2D (同埋個底板 design), 係以後所有 Mac 都可以朝更薄更細的 form factor 走, MBA 只係第一步, 咁有前膽性的設計, 過多幾年後, 可能又變成 industry 互抄的對象.

再者, MBA 個價係萬幾蚊, 算係合理得來可以負擔的範圍. 如果推出後無乜鑊氣的話 (其實好難保無鑊氣, 以 Apple 的 track record 來看), 我相信我會買.

印書... 續

之前講過我在 hypo.cc order 了 photo book, 終於在聖誕後就到手了. 老實講, 不計郵便時間, 一星期有多才可出書就比 Apple 慢得多. Apple 約三四日就可出書, 再多兩三日就到收件人手中, 整個過程, 就算是聖誕臨近, 亦無大偏差. 當然, Apple 分發俾美國本土不同廠家去編印, 再用 FedEx 安排分發去不同地方, 效率當然超高. 不過 hypo 勝在直接寄件到我手中, 免除要親友再帶過來香港的麻煩, 所以亦有優勝的地方.

收到的原裝盒.

Life is touching!

Apple 個盒靚一點, 不過 hypo 的較硬淨, 要拎出拎入的話會好些. 不過當然, 個 Apple logo 才是重點.

是 iPhoto 08 hard cover 的 theme. 08 改了版, 以前的硬皮面外貼一張小相, Apple 雖然可以選硬皮的顏色, 但都是比較呆板; 08 是內裡硬皮但外面包一張大紙 cover, 是跟 theme 的 layout, 非常漂亮. hypo 都跟足, 效果很好, 只嫌那張紙好容易弄髒弄皺, 要非常小心.

書脊都印埋字

紙張都是很高質素的粉紙, 而且照片非常清晰, 同沖印照片分別不算大(當然係有分別啦). 所有 layout 都跟足 iPhoto 內的 layout, 無任何問題.

我呢幾年都有間唔中用 iPhoto 做相簿, 可以見到由 iPhoto 06 到 08 個改變係好大, 06 的質素都幾差, 照片都鬆郁矇, 但現在個個見到相簿都讚不絕口, 問我整得咁專業的點整的, 我懶洋洋的說, 你買部 Mac 就得啦.

Apple website 有個用 iPhoto 做書的 tutorial, 睇下丫.

舊的新料: iTunes 排序

有日在日本 iTunes Store 買了下川みくに的歌來聽 (想い出がいっぱい, 麟伯 n 年前改左做愛的替身, 同埋愛・おぼえていますか, 超時空要塞的主題歌, 哈, 原來cover 番D老歌聽番係咁正的). Download 後將名字由拼音改為日文, Sync 落 iTunes, 怪事就發生了....

點解佢伶伶丁丁在一群英文名字的歌手中間?? 理論上, 佢應該出現在英文名字下面的一大堆漢字, 唔知應該點樣排先對.

諗來諗去都唔知點解, 之後在歌的 Info 頁內找到這一版...

才知道原來可以咁樣 sort 歌的! 因為一直以來, iTunes sort 歌都是靠英文 sort, 非英文的歌名或歌手都會以 Unicode 排法排出來, 對我們香港大部份人聽中文歌日文歌的, 就是沒有任何排列方法. 我見有些人在歌手名稱前加上性名的英文, 但我這些完美派無法接受. Google 一下, 發覺這是 iTunes 7.1 起才有的功能, 因為之前 iTunes-LAME 無法在 iTunes 內加入正確的 mp3 tag, 所以一直都無 upgrade, 到現在解決了才 upgrade 去7.5, 無怪乎完全無留意了.

要做的話, 其實很簡單, 不過 iTunes implement 的方法有點問題, 你不小心的話, 是很難發現的.

首先, 求其找一首歌, 在這首歌的 info 頁, Sorting 的版面打入歌星的英文名. 我愛用姓,名來排名的, 如果你愛用名字先排的話,當然是打 Jacky Cheung 吧.

OK 後, 這首歌就立即在 Library 內排了序.

但你會發覺, 如果你 highlight 哂所有張學友的歌, 再看 info, 你係找不到任何位置去加入這種排序的. 怎辦? 難道首首歌都要 click 這裡 click 那裡去灌水嗎?

秘密就在, 你要在剛才那一首已轉的歌, right click, Apply Sort Field > Same Artist, 那樣, 你 Library 內所有叫 "張學友" 的歌曲, 都會 Apply 剛才的 Sort Field. 如果你有很多張學友的歌 (of course!), 就要俾少少耐性 iTunes 去更新了. 你問我, 係咪要 apply 哂所有張學友的歌, 部份得唔得, 當然係唔得啦.

Sync 番落 iPod, 當然又是所有張學友的歌都要 update 一次, 所以, 記得你要有好多時間才做呀.

當然, 有朋友會話, 點解要用 iTunes 咁煩! Drag and Drop 入去咪最好! 當然, 如果你聽完D 歌就算, 唔駛 maintain 的話, drag and drop 係最快, 但當你有多幾個歌星, 幾隻碟, 到你想要聽番幾年前某歌星的歌的話, iTunes 就非常有用. 而且, 個 music library 係在電腦中有個 copy, 如果部 iPod 有乜冬瓜豆腐, 你所有歌同 video 都 backup 在你的電腦內 (反之, 都係一樣, 你可以將 iPod 的歌 transfer 番落新 hard disk), 非常方便.

俾多少少時間學用 iTunes, 你的 iPod 會更好用的!

新一年... 炒粉

今年第二單大鑊野是部 Mac Mini 的 hard disk 無端端跪低了，雖然呢單野係有跡可尋，但其實來得太突然，居然有點手足無惜。

事緣係本來已經買了一件7200轉的 hitachi 準備更換，因此用了經常使用的 Carbon Copy Cloner 做 backup，留部機開著做 backup, 但到５點幾突然 hang 左機，之後點 boot 都 boot 不到去 OS X。

換左件舊野出來, 插落去 usb enclosure, 頭一兩次都仲認到，之後就再無反應了...

當然，我其實早有準備有些這樣的事會發生，因此老早已經將 user 的所有東東全都放在另一部 Raid 1 的硬碟內，因此就算 system 炒了，只要 reinstall 一次個 system 同 application, 所有用戶 setting，iTunes, iPhoto library, 全都可以完全無事番來，使回復原本的時間可以減到最少。

點整呢？

其實並不是太難的，只要跟著這裡做，就可將 user 的 path 轉去另一個 hard disk。基本上佢所做的只是兩個 step:

用一個 Terminal 的 command 將原本在 Macintosh HD 內的 User 的 folder 抄去另一個 hard disk (不可就咁用 copy 或用 Finder 做，因為有些 user rights 係只有在那個方法才 preserve 到)
在 Applications > Utilities > Net Info 度將所有 user 的 "home" folder 改成在另一個 hard disk 的 folder

所有外置 hard disk 都會掛在一個 folder 內叫 "Volumes", 有同名的，就會加個 number 落去。不過在 Finder 係睇不到的，一定要在 Terminal 用 ls 的 command 才會見。如果你 format 個 hard disk 時俾個名叫 Data, 而你又將 Users 抄過去的話，咁個 user 掛著點 (mount point) 就係 /Volumes/Data/Users/tam 了。

不過要記得，你一定要 make sure 外置 hard disk 係已經 ready 先好 log in, 通常先 boot 好個外置，再 boot 機，就可以 log in，如果不是的話，log in 後，system 會在你的 Macintosh HD 內再做多一個叫 "Data" 的 folder，而將你外置的改名做 "Data 2" 之纇。

解決方法，係再做多一個在主 hard disk 的 Administrator account，在 Terminal 內，將 system 自己做的 Data folder 改名為 Data-1 (e.g. sudo mv Data Data-1), 將外置的改番成 Data (e.g. sudo mv "Data 2" Data), log out log in 就完成。

新一年... 極品

新一年祝大家新年進步!

新一年最極品就係一個親戚推自己個女出黎, 話佢係全世界年紀細的攝影師, 又上電視又上報紙又話要入健力士, 仲要開埋影展, 紀念冊仲要一本$150, 話係幫乜野非洲的小朋友關愛之家籌款喎. 但其實我聽到個老母個老豆話, 攪咁多野都係為左籌兩個細路學費生活費喎. 嘩, 咁個個快D開番個影展啦, 幫你D細路籌款啦, 駛乜400萬O者, 用人地O既同情心同好奇心就得啦.

當然, 俾部相機俾阿笨影的話, set 好自動 mode, 影一百張都起碼有三幾張可以出到影展O既, 甚至乎, 鬆郁朦都可以話有藝術感, 呢D都係好 subjective O既.

不過, 最極品係佢老母, 唔知羞咁好似D女明星星媽咁周圍拉生意, 連人地結婚都可以三唔識七的親戚朋友都俾張請諫叫人去睇佢個女個巴閉影展, 厚面皮得要命.

當然, 我無資格開影展啦, 都無得恨了.

咁我都唔會阻人發達O既, 如果你都想(用錢)去支持下佢老母同個O靚妹的話, 可參考以下網址.

Dan Fogelberg

原來 Dan Fogelberg 過身了, 死時才56歲, 死於前列腺癌.

雖然好多人都愛 Same Old Lang Syne, 但對我來講, Longer 有更深的意思.

仲有, 男士們, 差不多時候就要做一做個檢查了, 前列腺癌係無甚徵兆的.

印書

又order 了些 Photo book, 因為臨近聖誕, 所以特別緊張幾時送到.

無想到星期五 order 了, 星期一就已經收到通知已經 print 好, 而且已經出左門口. CS send 來 FedEx tracking number, 八八卦卦 load 出來看看.

細心睇睇, 完全都唔知係o係咩地方... 唯有拎個 Google Map 來望望...

嘩, 原來咁奇妙o既. 我在香港做的東東, 整份文件send 了去明尼蘇達州一個地方叫 Bloomington, 印了出來就由 FedEx 收了送去 Minneapolis (我串極都串唔到...) 的中心, 再坐飛機(?) 去 Memphis (貓王老家?), 由 Memphis 分發去加拿大, 去到 Mississauga (都係串唔到...), 再 local 送去 Toronto 朋友家. 咁去到朋友家又要由專人坐飛機返來香港送到我手上, 真係其實幾迂迴.

我想講, 點解攪咁多野, 唔可以好好地在香港印到呢? 真煩.

所以, 我已經在台灣另一間公司再 order 了... 結果係點? 等一下吧...

牛記茶室

星期六的下晝無無聊聊, 落去中環. 在 bon bon 買了一樽蝦子, 想整蝦子麵. 花膠人參鮑翅係買唔起的, 得個睇字. 不過睇都好開心.

想食個撈丁, 走左去蘭芳園. 唔知發乜神經, 無啦啦排哂大隊, 照理阿蘇講左好耐咖啦, 仲有得排? 雞扒撈丁係無得頂的, 點解人地雪雞扒都整得咁滑? D丁麵又整到好鬼爽口, 完全唔似平時食的, 最緊要D 蔥油, 真係錦上添花. 再叫多個咖央西多士, 又係好味到暈.

之後行去歌賦街, 見到把鬼的九記對面個大排檔又係排哂長龍, 心諗, 唔通O個集阿蘇又重播? 佢未講之前我已經知道個茄牛通好正, 但係星期日唔開檔, 無機會去. 咁又無行了.

之後落去陳意齋, 搬了舖, 新舖只係行番前幾步的, 不過細左一半, 又無蝦子麵賣. 頂.

上去堅道望彌撒, 落番去歌賦街食 dinner.

其實想講的是牛記茶室. 街坊野, 我地兩個人, 叫了周圍左右隔離都有叫的清湯腩煲同玫瑰太后雞, 加兩碗例湯.

例湯係西洋菜煲豬骨, 又濃又多料, 正.

太后雞好滑, 好嫩, 又唔似豉油雞咁濃味, 好清香, 最緊要係選的雞又好肉, 又唔太肥, 無食到成口油, 就連我呢D 最怕食雞胸的都覺得個雞胸嫩滑得好好食.

個牛腩煲好大鍋, 牛腩炆得好軟, D 蘿蔔又多又入味, D 清湯用來撈飯仲正, 真係無得頂. 同行過幾間舖O個間不知所謂的牛腩簡直天同地分別. 重要係, 呢個時間, 人地大支野要食晚飯的, 要食呀, 早D或者等下啦. 如果同鏞記比, 鏞記係好食D, 但係鏞記係用一個好淺平的兜仔咁裝住幾件薄薄的牛坑腩上檯, 精緻有之, 不過食得不夠豪快. 仲要係, 兩者一樣價錢 (可能鏞記又加了價, 呢個係幾年前的價錢了).

兩碟咁大把, 夾埋杯凍檸茶都係百五蚊, 大件夾抵食. 星期六日有糖水送埋, 今晚係木瓜雪耳, 同杏花樓有得fight, 不過杏花樓要俾錢, 佢係送的.

又出發了!

難得港龍一開始起飛福岡及仙台, 就立即推出了特賣的飛撲精選機票, 因此雖然今年已去過了日本, 都心思思想再去多次.

既然之前去過仙台, 仙台一星期又只得三班機, 因此就踏足了之前從未去過的九州. 尤其是正是紅葉季節, 福岡更是見頃之時!

今次要帶其他人上路, 因此不便 plan 得太多古怪地方行程, 路程盡是最陽春的福岡天神, Canal City, 大分縣的別府及湯布院, 紅葉區的九醉溪及裡耶馬溪, 以及水鄉柳川及太宰府. 阿蘇山因時間關係, 無緣一見, 唯望下次吧.

好大程度上這次行程是參考早前無線的和味無窮的九州行程, 希望有趣吧!

遊記正在譚生的日遊記連載中, 請大家留意.

食出人情味的茶餐廳

而家差唔多每個禮拜都會特地坐多兩個站地鐵去筲箕灣的茶餐廳去食飯. 從來, 茶餐廳只係快來快去的食店, 為求飽肚就算, 唔會特別要求, 但亦不會特別想要去, 我從無想過有一間茶餐廳係可以令我一去再去的, 就是東大街的金城.

係呀, 又係蘇絲黃講過的地方. 但除左班片炒河同焗豬扒飯之外 (老老實實, 真係好好食, 絕對唔係講笑), 食得開心先至係原因.

基本上坐低, 叫野食, 問要乜野飲, 我話要湯得唔得, 佢話, 得, 送俾你囉, 要兩碗?

食食下因為人多, 想我地調一調位子, 千個萬個不好意思, 食完之後問我要唔要糖水, 我話唔駛啦, 佢話, 唔好意思嘛, 要你地食食下起身, 又係再三推卻.

例湯, 糖水, 呢D都唔係咩值錢野, 但最重要係, 你會覺得老闆係著緊每一個客人, 無論係街坊, 定係 "遠渡而來" 的生客.

好明係, 我由生客好快就成為街坊了.

Tang Tang Chan Yik Shun...

基本上陳Eason去到今時今日出咩歌都會有人買的, 但原來, 佢仍未到頂, 再來呢張 Listen to Eason Chan, 倒又感受新鮮, 整張碟, 有非常濃厚英倫電子色彩, 由編曲, 到歌名, 到唱的, 都同英倫有莫大關係, 再聽落去, 係好似那時的 Pet Shop Boys (噢, 我都係飲那期奶水大的人). 最重要係, 差不多成隻碟都係 dance beat (除左那首 Crying in the Party 同夾夾不入的合唱歌), 甚麼題材都有, 材料豐富得來又各有特色, 非常令人喜愛.

瑪利奧派對係好輕快的跳舞歌, 輕易入口, 但我卻更喜歡熱島小夜曲及很有迷幻 feel 的滑鐵盧車站. 聽閃, 第一個反應就係狗仔隊, 戴安娜, 同 Pet Shop Boys的 I'm not scared 很異曲同工.

黎小田操刀的Crying in the Party,典型 K 歌, 但編曲豐富, 而且易入耳, 不難成為勁 plug 的歌曲.

後半部就比較平淡了少少, 雖然有Eason參與的狂熱革命同乜嘢啫座陣, 但亦是比較係聽得多才有味道的作品. 而時代巨輪則係一貫 Eric Kwok, 林若寧的詞很有電影感, 值得一聽.

至於另一隻 remix, 其實有少少浪費了, 做一隻成隻 remix, 就好應該隻隻歌都串埋一隻歌先好玩咖嘛, 而家唔湯唔水, 唔好玩.

當然, 任何人都會同意, 成隻碟最大敗筆就是那隻同牛華合唱的國語歌, 唔係唔好聽, 但同成隻碟格格不入, 倒不如自己一隻 single 出就算吧.

Panasonic HTX-7

居然在街上兩次有人拍我膊頭問我呢個 headphone 在哪裡買.

我話, 好多地方都有得賣咖喎. 係咪無留意呢?

呢對 headphone, 真係令我跌哂眼鏡, 因為一嬲都覺得 Panasonic 耳機把聲尖, 欠 bass 味, 呢個, 都有少少尖, 但如果在 iPod 改 equalizer 為 Low Treble, 高低音剛好balance, 唔會太尖都唔會太吵耳. 聲音有層次感, 唔會攪埋一堆, 隔聲都好好, 個耳墊幾舒服, 不過聽得耐好多汗... (即係係時候休息下了 )

其實呢對耳機是在舊年 ITU在 Panasonic counter 發現的, 咁大個耳機, 居然連一個細細的藍芽接收器都推得郁, 又好聲, 因此決意買下了.

最重要係, 平! 3舊水多D 就買到一個咁實淨, 個樣又好 retro 的耳機, 而質素又唔錯的耳機, 在哪裡找? 之前買過一隻 E 字頭塞耳仔的白色 earphone, 成一千蚊, 聲係好啦, 不過用了一年就沙聲, 換膜換耳塞都唔掂, 真係算把啦.

出左新版 HTX-9, 但好貴, 仲無咁靚仔, 我都係鐘意佢.

咁其實, 在哪裡買呢? 講個秘密你聽, 去灣仔, 莊士頓道, 大有商場沿電車路行去金鐘方向, 7仔旁有間好黑店樣的影視店, 用 cash 買, 三舊水有找, 平通街, 仲要係行貨.

自己check in... 無咁早

今日呢幾部野終於見人了, 叫登機易, 橙紅色的主題, 又大件, 成部九巴咁, 同個機場的色調格格不入, 要睇睇佢地o既風采, 可以去機場 B 區.

當然, 新鮮事當然都係極為 exciting 的, 而且一如既往, 新鮮事都唔多 work得順. 比如慢,比如有 error, 呢d 都係 teething problem, 其實都可以解決.

但其實, 解決左 technical 的問題, 跟本對呢幾部機的 existence 幫助有幾大? 我睇住個客, 拎住綠咭的, 在第一部機 scan 完 passport, 部機就hang 左度. 咁去第部啦, scan 完啦, 無事, 選完座位了, 但之後仲有十九幾版水蛇春咁長好似查家宅咁o既問題, 又要問住址, 又要問呢個 number, 那個 number, 雖然話係美國政府需要呢堆資料o者,但其實, 你填個完全唔o岩的落去, 都耐你唔何吧? 咁部機又慢啦喎, load 一版都要十九幾秒, 見到個客d 家人個個面都燶哂都未攪完, 都覺得有d 過意唔去.

好啦, 出埋 boarding pass, 但係成件事都仲未完喎, 因為D 行李都仲未寄倉, 所以呢, 又要走番去後面排隊去寄倉. 要知道, 部機只可以出 boarding pass, 係唔可以出 baggage tag 的, 而且都無一個特定的櫃位去做.

呢度攪左起碼十幾分鐘. 如果我直接行去 check-in counter 度, 可能幾分鐘就可以行去食 lunch 了.

我在 Montreal 同 Vancouver 就係試過咁, 攪完一大輪, 之後都仲要排隊放低行李, 反而另一條隊人手check-in 就快得多. 唔關乎部機快定慢, 而係個 workflow 跟本有問題.

睇番幾個 scenario:

如果我無行李, 咁呢部機俾我的方便係我可以快d 取位, 我就可以即刻去登機閘口
如果我有行李, 咁呢部機俾我的方便只不過係我可以快d 取位, 但我仍要寄存行李
如果我識得上網先 check in, 我跟本唔駛用呢部機已經俾到方便俾我
如果我唔識網上 check in, 咁我已經來到機場, 快唔快d 俾個位俾我跟本無分別
如果後面已經開左十幾個 counter 的話, 我點解要花咁多時間舞完部機之後又再排一次隊?

只有 scenario 1, 個客先會覺得呢部機係幫到佢的.

講到尾, 呢部機跟本唔應該放在機場, 而是應該放在一d 好 strategic 的地方, 如火車站, 酒店等, 仲要係, 好似提款機咁方便, 一見就有. 人客在可以在城中酒店 check out 後, 在這部機 check-in, 就可以繼續當日的事務, 到要去機場時才拎行李去機場.

但話又說回頭, 大部份 technical freak 都已經識得做 scenerio 3, 而且絕大多數 airline 都有 provide 呢個 service; 一個非 technical freak, 會唔會貿貿然走埋去呢部機度 checkin 呢? 要知道, 我提唔到錢, 周圍都搵到間銀行, 但如果呢部機有乜頭暈身慶, 你又要煩拎住行李去機場或香港九龍站去 checkin. 係咪麻煩呢? 走左班機, 點算?

除非, 呢間 airline 係好夠恨心, 將本來二十個counter 切剩三幾個 counter, 咁樣, 就對 airline 自己有好大的 cost cutting measure 了. 但當然, 有咩頭暈身慶, 三幾個counter 就番唔到轉頭咖啦, 我相信 airline 好少會冒呢d 險, 除非係跟本佢已經無乜商譽啦.

好啦, 咁究竟呢部機俾到咩人咩方便呢? 我都而家都諗唔到. 如果有高人有獨特見解的話, 不妨相告.

海天一色

風和日麗, 秋高氣爽, 又放假, 當然最好都係去燒野食啦.

好耐都無燒過野食, 都唔知去邊好. 記得以前去過大欖的一個地方, 幾好食, 地方又闊落, 只係唔記得個名. 在 openrice 一找, 就已經找到出來, 原來仲有個好浪漫的名字, 叫海天一色, 哈.

其實而家去燒野食真係可以乜都唔駛帶, 帶錢就得了. 今日 $78 一位, 食物任食, 送一枝水同一罐飲品, 有個蓋遮頭, 企企理理, 又有風, 都算係咁啦. 最緊要D 野食都唔錯, 雞翼大隻又夠味, 豬扒好淋, 其他的都唔錯, 唯一係選擇只係普通, 無乜野特別好標清. 同埋, 最好自己帶卷錫紙用來焗菜類物體, 同埋學菜san 咁, 隨身帶備美極, 咁就 perfect 了.

其實有陣時, 燒野食唔係為左食, 而係個過程好玩O者, 同埋共聚天倫一個下午, 食得好唔好, 都唔係咩大問題啦.

想唔到, 呢度可以好方便咁坐巴士入來 (尤其是香港島, 只要坐一程 962 就直到大欖涌, 一個鐘都唔駛; 在九龍就最好去到大窩口站過對面坐 61M), 又可以 hea 一個下午, 一樂也.

華仁一家百萬行

又特首, 又局長, 又議員, 又賭王, 又財經界猛人, 真係好一次 "官商勾結".

講O既係華仁舊生會攪的百萬行, 由九龍華仁行到香港華仁, 都算得上前無古人吧?

咁特首呀, 孫公呀, 馬田呀, 胡應商呀呢D, 都早知係華仁仔, 但賭王呢? 原來賭王係家長黎咖! 因此又好慷慨咁捐左五百粒出黎. 當然, 對賭王黎講, 九牛一毛O者, 我頂多, 都只係籌旗籌到九百...........蚊 (多謝各位善長! 你地個細路想入華仁的話, 可以考慮搵搵賭王!).

咁行呢, 其實係好小事的, 由九華行去公主道那一邊, 落尖東, 過海去灣仔, 就差唔多行完了, 不過天口太曬, 空氣污染又勁, 其實都幾要命.

原來發現有成三千人行, 都幾厲害, 應該都多過同日O既咁多單遊行!

行到港華, 發覺已經完全唔同哂. 新校舍好靚, 不過沒有了上面的露天停車場, 同埋以前的音樂室被拆了, 始終都若有所失, 因為都有D 回憶O係度O既. 不過既然已成事實, 新校舍加多學校可用的地方, 不似以前般乜都無, 都好丫.

不過最有趣的是, 以前覺得很大的禮堂, 現在發覺是很細的, 真奇怪, 還記得當天做 drama 時, 成場走, 很支力, 但現在, 兩步就由頭走到尾, 感覺有趣.

希望籌到的錢, 可以做福以後的華仁仔, 將母校優良的風氣流傳落去吧.

其他照片...

影相佬

介紹大家睇一套短片, 叫影相佬, 係港台首作影畫系列的最後一集.

老實講, 其實已經在電視上播出, 但在亞視的話, 跟本呢個世界唔會有人會留意.

睇時, 真係會發出會心微笑, 因為我自己都曾經經歷過那段 "痴漢" 的日子. 鏡頭內的event, models,時間地點, 全都是我最愛影菜街會展那段日子的寫照.

當然, 正如當中有不少評論中的, 導演太想將佢自己心目中 "影相佬" 同 "咸濕佬" 打個等號, 因此, 好不自覺地將被訪的言論, 攝入鏡頭的人的表情都將這些影女模的人stereotyped了.

不過呢, 我又咁睇, 男人天生就鍾意睇女人, 而不少女性都喜歡被人影, 甚至乎, 不少女性都愛評論另一些女性的樣貌身材, 所以 "影相佬" 呢個 "職業" 其實滿足了一些 "高科技" 的方便而帶來的 "新興市場" 去補足一些 "市場需要". "影相佬" 只要花費一部相機的金錢 (或以後無數咁多配件的後援), 幾張記憶咭, 一部有好大 harddisk 的電腦, 同埋少少執暗瘡的技巧, 就可以逗得一些青春少艾開心; 而 model 呢, 又樂得有班人如同追星般支持, JOB 都可以接多幾份, 又同時又有靚相收, 何樂而不為? 所以, 其實如果這些 "影相佬" 行得正企得正, 就算正正經經咁去溝 model, 都無需要帶有色眼鏡去睇O者.

當然, 有些為了高抄低抄去影人走光照, 或是如痴漢般死跟爛跟, 就不值得原諒了. (當然, 唔一定要係影相佬先至會做呢D 野咖啦, right?)

何洪記

其實中學時住跑馬地的時候已經有這間店, 但一直只以為係普通的粥麵店, 無特別興趣入內. 直到最近有人同我講個干炒牛河好正, 我先至去望望有甚麼巴閉.

話明係粥麵店, 相信粥麵都不太差吧. 叫了一客生腸魚片粥, 粥很綿, 魚片很薄, 無骨仔, 生湯爽脆又唔腥, 非常正斗, 係除左味精多左少少之外, 完全合格!

再來的干炒牛河, 很新鮮熱辣, 油份不算多, 色香味俱全, 雖然, 感覺上, 都只係一碟干炒牛河, 不過都不錯了. 眼見坐在這裡半小時, 已經有四五碟牛河出籠, 可想而知係幾咁受歡迎.

餐牌上有滑旦蝦仁炒河, 聽落應該幾好味吧? 不過好似貴了一點, 下次再試.

不過, 待應阿姐係有點倒米, 叫了三次要茶 (對呀, 味精粥嘛!), 點了頭又唔理人, 嬲得滯, 自己拎, 都無人開聲. 呢樣要扣分.

其實在銅鑼灣想食間好的粥麵店都不是容易, 如果不是偏貴的話, 我一定經常會來.

何洪記

香港銅鑼灣霎東街2號

味竹

太古城剛開了一間千両, 好似好高檔的, 又之前在 IFC 開, 攪到我去取飛時拎住 158, 叫就叫到 118... 但聽講其實係元氣來的... 又唔係在日本, 我唔會咁等的, 走落去再睇新開的另外一些店舖...

之前去過新開的那霸, 係影左相, 但無心機 post 出來, 因為實在介紹不過... 這間味竹燒肉店價錢就平易近人得多了. 不過一入到去, 就話要等半小時, 有位就 call 喎.

無計, 唯有行一陣, 點知真係行左一陣, 就有位了, 老點人.

燒肉店, 其實, 只不過係韓國燒烤的日本名稱, 咁點解又要咁特登食呢?

因為, 正如我去食六歌仙一樣, 都係要食精品, 而唔係一大堆頭填飽你的物體, 港式的韓燒就有這個毛病, 總之不計好壞, 多就得了. 對大食的人來講, 都係道理, 但我唔算大食, 俾得多我都係浪費, 與其係咁, 不如食得好D吧.

味竹好的地方, 就是除了套餐之外, 散叫的燒肉食品都唔算太貴, 4-60蚊一碟, 無我屋企附近的咁嚇人, 叫多幾碟試下都無所謂. 對於熟知我去日本的性格, 當然都係食牛啦, 因此叫了牛舌, 牛隔膜ハラミharami 同埋當然唔少得的牛肋骨カルビ karubi.

牛舌係叫了咁多碟最好食的一樣 (估唔到吧!) 肉質鮮嫩, 好牛味, 又鬆軟, 食多碟都得!

我之前咪講過在六歌仙食ハラミ講唔出係咩一回事呢, 呢度ハラミ又OK 喎, 都幾好肉味, 而且個樣真係好得! (雖然, 同松阪牛真係差得遠, 不過樣似!)

個牛肋骨, 排起來就好好睇了, 佢唔可以話唔好味, 但反而無牛舌般軟,感覺上係差少少, 不過肉味搭夠!

叫了一個牛尾湯, 感覺好似番到以前住 HUB 的日子, 濃濃的牛尾湯+飯, 大堆頭的黑椒, 凍冰冰的冬天就是這樣過...

呀, 記得, 點醬汁, 最好都係就咁檸汁 (中間) 就算了, 或者下面的, 最頂的太濃味, 蓋過了肉味, 不好.

食完, 飽飽, 可能千両都仲未有位呢!

(openrice d 人有病的, d comment 千萬不要信!)

味竹

太古城太豐路3號金星閣地下1019舖

Freshness Burger

好fresh, 只嫌好似 MOS 咁, d 汁全部跌哂落黎, 浪費哂...

而且好似唔係好夠飽, 不過真係好好食...

呀仲有, 杯咖啡係好好飲的, 呢杯細的因為我是在皇室堡分店買, 新張期內只賣10蚊.

臭男人

酒樓內聽到一個男人大大聲聲咁鬧個阿嬸

"點解係凍咖?"

"唔關你事? 咁叫個關事o既同我講!"

個男人成個曹查理咁(樣衰).

大吵大鬧完一輪之後, 就到佢個女拎住部電話話係咁玩鈴聲. 基本上係大聲到佢好想你知佢係用緊咩鈴聲囉.

回頭啤左佢地幾次, 佢老豆都唔理的.

原來個故事係, 阿嬸講錯少少野就可以鬧個夠本, 自己個女呢, 就唔鬧得的.

呢d人真係生仔無屎忽.

A380 @維港

好耐都無在維港見到飛機了, 今次重要近距離睇, 真係好正. 不過隻機真係唔嘈的, 以一隻咁巨大的飛機來講, 噪音真是很少.

當然, 拎左部相機番工就梗係唔會罷休啦, 再搵, 原來下午泊在 62 號閘口, 班機仲要叫 AIB707, 目的地是香港, 很有趣呢~

我當然(持住)有特權可以行落 ramp 影相吧, 個個都好似見到禮物咁狂影, 雖然已是第二次來香港了, 依然都係咁受歡迎.

如果你有留心的話, 會發現前面條橋係矮過後面條橋的, 在平時的飛機, 通常都是平排的!

更多照片...

陳sir

中學時的老師, 通常最記得的, 都是花名, 至於佢地教過乜, 講過乜, 除非係特別差或者特別好, 否則都係忘記淨盡 (正如乖學生同壞學生, 做老師的都只會記得呢兩類人).

但陳 sir 從來無聽過有人有改佢花名, 我都唔會改佢花名, 而且佢教過O既野, 我覺得真係一世受用.

其實無乜野, 陳sir 教 Biology, 佢講的, 都是課堂外的知識, 就係呢D 知識, 開了我的眼界, 最難得, 是他肯在課程內撥到時間出來, 花時間講, 而且又非常有趣味性, 所以一直以來, 我都好敬重佢.

不知何時起, 佢去了教育署 (即係教育局啦, in the current sense). 唔教書, 入了"建制", 我覺得係浪費左佢, 同埋係一班師弟的損失. 當然, 人各有志, 其實都唔係咩大問題.

今日早上打開報章頭版, 就已經見到陳sir 的名字了. 不過標題很不客氣, "政府糟蹋9歲神童".

當然, 或許報章內容有偏頗的地方, 但出自陳sir的口, 我就覺得有點痛心.

不是嗎? 我母校, 假假地, 都叫做係 "精英培訓" 的學堂, 出來的學生, 成績最差的, 在出面來看, 都已經很不錯. 教育, 係無可能講 "公平" 的, 一班三幾十人, 有些人一聽就明, 考試前跟本不用點讀書; 有些人點極都唔明, 問幾多次都係枉然; 有些索性唔上堂, 自己去補習仲好; 一個老師, 一個課題, 都可以出差天共地的成績的學生, 更何況, 有不同背景, 不同社群組成的學校? 因材施教, 先至係正路. 每個人總有佢自己的優缺點, 不能在正統學校讀書的, 就無必要強將佢地放在正常學生中, 影響其他人; 反之, 比正常學生優越的, 就更要定點栽培, 否則就白白浪費佢自己時間去跟住大隊走. 這些道理, 不是一字咁淺? 點解教育局諸公, 只會想像公平的教育, 就是好的教育? 詩鈞的成積表, 正正就係佢的天才的執照, 莫非真是要等佢走番去小學去培育番佢同正常小朋友一樣的高矮肥瘦智商, 才是 "恰當"?

好多做老師的朋友同前輩, 都講香港的教育越來越不論不類, 又要有新課程, 又要做的admin work 都已經令老師透不過氣, 仲有咁多無厘頭政策令每間學校都係一模一樣, 倒模咁倒, 咁樣的話, 天份高的, 派了入資質較差的學校, 令天才成為普通人, 不愛讀書的, 就派了去好學校搗旦, 這樣的資源錯配, 我地納稅人真係無眼睇.

壹周刊一直都倡議的學卷制, 點解無人談論? 以錢作誘因, 學生家長, 可以用自己的血汗錢去投放哪間學校是值得為佢地子女投資; 學校, 都因為競爭而作出不斷的改善, 令學校自己適應不同的社群而作出調節. 香港作為一個完全資本主義的社會, 本地商界已經做了這樣的事情數十年, 教育卻是套了社會主義的大鑊飯建制內, 實在令人費解.

p.s. 如果你識得陳sir, 麻煩你 forward 呢篇文章俾佢, 謝謝.

快圖美 ?

行均成個太古城只得一間曬相舖, 就係快圖美, 之前唯一的競爭對手都 (估係) 俾大業主迫走 (因為唔夠高檔), 渣頸就命, 無法.

好的話, 就仲算了, 但是, 這間卻是很典型的開口好好聽, 實在就無 service.

以前試過曬相, 都要問你數百條問題, 有無會員咭呢, 有無做backup, 每一句都譚生前, 譚生後, 最慘係, D 姐姐仔傾閒計就咁叻, 叫佢講正經野就好似食左藥咁, 仲慘過人背書, 聽到就煩.

好啦, 而家換哂D 自助曬相機, 我地自己入相過相選相, 入完拎張單俾錢, 走人, 真係仲想有咩甩漏? 就係有! 明明 order 時點明, 係要 "加白邊" 的, 曬左百幾張相, 4R 5R 8R 都有, 居然出到黎, 一張有白邊的都無, 我相信呢個世界上總有人好似我咁有多少少要求係似一張正常的相O者, 都咁難?
講真, 真係鬧都浪費 gas, 因為, 已經唔係第一次了.

唔滿意再曬過又點O者? 講多幾個對唔住咁又點? 你自己鐘意浪費相紙我唔理你丫, 你唔好浪費我時間至得咖...?!

生日快樂

今日係張學友生日, 祝學友個唱成功~

Montreal

早上坐地鐵去舊城區的聖母院 Basilique Notre-Dame 望彌撒. 成個 Mass 都係法文, 完全唔識聽, 但又好得意, 大家都心裡明白跟住做乜, 應該講D 乜, 所以唔識唔緊要, 因為做天主教徒的 "protocol" 全世界都係一樣的.

從外表看, Notre-Dame 比起巴黎聖母院, 當然差得遠, 不過入去了, 就不由得嘩一聲出來. 裡面真係好靚, 難以以相片來形容, 當你見到這情景, 其實不其然就會跪下祈禱. 唔怪得 Celine Dion 要在此結婚了.

去望彌撒的話, 係不用俾 4 蚊入場的, 完了彌撒之後, 如果沒有下一場的話 (中午12時), 就可以留下影相. 當然, 不是教徒的話望法文彌撒是沒有甚麼意思的, 聽唔明, 倒不如俾底入場費, 參加每半小時就有的 guided tour, 獲益良多. 不過記得不要記著影主堂, 就忘記了後面其實還有一個小 chapel, 很 cozy, 色調好靚, 仲有味道. 原來個小堂的意思係, 如果你結婚得三幾十個賓客 (相信絕大部份人都係), 坐在主堂會覺得很怪, 小堂大細適中, 仲適合結婚. 不過咁, 聽 guide 話, 個 booking 要去到兩年之後, 所以如果現在 book定, 都還有兩年時間去找一個老公 .

之後去 Chinatown 的 Pho Bang New York 食越南河, 不過有點言過其實, 麻麻的.

飯後坐地鐵去 Cote-des-Neige 站, 向上山方向直行, 就會到這間非常大的 St. Joseph Oratory. 很大的一座聖堂, 亦是全世界第二大的聖堂, 你要走遍每個角落的話, 上上落落樓梯, 都起碼都要個多小時, 無怪乎要買 (其實都只係自行奉獻) 一本小冊子對著指示走才可以. 在星期日下午三時半都會有 Organ concert, 這裡的管風琴是全北美最大的管風琴, 內有五千多枝 pipe, 聲音自然哄亮. 不過, 其實這裡最有名的, 是放了近萬枝蠟燭的 Votive Chapel, 用來記念曾令不少病人及殘疾人士痊癒的 Brother André.

不過, 惹大的主堂, 內裡空空洞洞, 連座椅也是鐵做的摺椅, 有點始料不及. 當然, 無論如何, 建成這偉大的上主聖殿的建築師, 以及長埋聖堂下的 Brother André, 都是值得尊敬.

聽完 concert 後, 落 downtown, 不過因為星期日的關係, 店舖晨早已經關門大吉 (跟香港完全兩回事呢). 信步走過去 McGill University, 原來發現我公司在 Montreal 的 support center 就在大學對面, 真巧合.

在 McGill 草地上坐了大半小時看人踢波, 為甚麼我那時去加拿大讀書時不選在這裡? 這裡又靚, 又多人, 又是頂頂大名的大學, 真怪細個無聽夏理巴先生講.

之後坐地鐵去舊城區非常有名的 Gibbys Restaurant 食牛扒. 這裡的牛扒有一手的, 就是雖然生, 仍然 grill 得剛剛好, 外面全熟, 裡面生, 但切出來全無血水, 而且食入口柔軟之中有咬勁, 很正. 不過室內太暗, 完全不能影相, 所以無照片了.

不過由於又飲酒, 又 jet lag, 又疲倦, 又食一餐要兩三小時, 因為食完就立即打道回府了.

大家記得, 在 Montreal 如果留起碼兩日的話, 就最好買一張 $14 的 3 日交通證, 坐巴士坐地鐵都可以. 在 Montreal, 坐地鐵已可去盡大部份旅遊點, 以每程 $2.75 計, 不計取 transfer 的話, 坐 5 次就可回本, 我只是今日一日的行程就已經回本了, 實在非常抵坐.

(未去過北美的朋友, transfer 是一張類似車票的物體, 你可以坐巴士時問司機要一張, transfer 可在個半小時限內轉乘其他線的巴士, 或轉乘一次地鐵. Transfer 在每個城市都不盡一樣, 但用途都是差不多, 記得上車時問司機要一張喔)

Montreal Tourist Information.

Montreal Restaurant Guide.

其餘照片.

Convocation

今日風和日麗, 認真不錯. 早上晨咁早 check out 了酒店, 食了一個不大不小的早餐, 就坐巴士去大學準備.

雖然第二次畢業, 心情都仲係有點興奮, 始終, 這個 degree 比起我之前的 degree, 並非符符碌碌地讀番黎, 血淚都來得多些.

不過都要多謝我另一半呢幾年在背後 support 我, 如果唔係都捱唔到咁多年.

畢業典禮在大學的 gym 舉行, 實在有點離奇, 因為通常這些都會在一個大禮堂舉行, 一間大名頂頂的大學的畢業典禮居然在一個 gym, 仲以為在看籃球賽, 真古怪. 不過, 大學本身都不是太新, 很多地方都好老舊, 相比隔一條街的 Wilfrid Laurier, 就顯得有點不合時宜. 不過, 是否就是這些少少的缺憾, 做就了學生的成就呢?

又另一個離奇是, 為何我們沒有四方帽? 我還記得以前, 有四方帽, 亦有那條代表不同學系的顏色帶, 禮成後大家還互丟四方帽呢!

不過有無都好, 我都買了一個 50 周年版的 frame 好好裝起了這"一紙文憑", 哈.

下午滾水碌腳打的去 Kitchener 坐 Greyhound 去 Toronto, 再轉機場巴士去機場. 去到 Montreal 已經是晚上八時多. 在機場坐 Aerobus 去總站, 酒店就在車站附近. 本想坐一個站地鐵去酒店, 但發現要落一個三四十級的樓梯, 比日本仲要要命, 因此就做了一個無知的決定 ... 打的.

無落錶, 走兩條街的路, 收了我十大元, 後來我行落去, 10分鐘唔駛. 下次記得, 在車站拉客的黑人都不是善類, 點辛苦都不要打的呀.

收拾好後, 就立刻去晚餐.

晚餐是酒店附近的 Restaurant L'Express, 法國餐廳, 晚上10時去到,無位, 要坐 bar 檯, 一路坐一路有人入來食飯, 嘩, 在加拿大來講真係少見. Bar 檯 serve 我們的是位老先生, 很風趣, 亦很用心介紹我們食甚麼, 也教我們飲紅酒 (!) 這裡的法國菜也非常味美, 尤其是那個鵪春, 又嫩又滑, 好正. 價錢又不是很貴, 相比以後見到的開天殺價, 這間是非常物有所值, 下次你去 Montreal, 一定要來這裡.

食完信步行回酒店, 就已經大昏迷了...

Waterloo

休息一晚, 今日早上飛去 Waterloo. 由於時差的關係, 晨早 9 點起飛, 中午在 Calgary 停一停轉機, 再飛 Kitchener Waterloo, 就已經差不多六點了.

當然, 夜夜天還是亮的, 早就慣了. Kitchener機場好有趣, 所有飛機都停在停機坪上, 要自行行落機進入機場大樓, 這些在以前啟德偶然仲會見, 現在已經很少試到了.

去完酒店 check in 就去大學走走. 大學似乎比較舊, 但環境優美, 仲見到好多美加大學名物 - squirrels, 跑得又快, 神出鬼沒, 你一定不可能在香港見到呢.

夜晚在大學附近的餐廳. 天氣熱, 坐在外面飲啤酒, 一樂也.

出發!

去加拿大了!

今次去 Waterloo 行畢業典禮, 順道去一去滿地可及魁北克市.

福佳始終有你

曲, 詞, 唱, MV 皆有深度, 令人拍案叫絕, 實在另一不可多得之佳作. 香港有咁多咁勁O既音樂人, 何會怕老番?

誠意推薦.

(原貼於每日一膠網站)

悼... ZARD

睇到消息ZARD 的主音歌手坂井泉水さん突然離世, 死因據理解係在醫院失足跌死.

很難過, 因為一向低調的泉水小姐原來是與癌魔作戰, 至於是否因病厭世而自殺, 我不敢講. 不過, 你溫婉的歌聲,言之有物的歌詞, 都會永遠留在我們歌迷心中的.

祝... 天國安息.

Limit of Love 海猿

雖然只係兩隻送的戲票, 而且已是舊年的一套戲, 但不代表不好看, 反而兩小時的電影除了開頭半小時之外, 就一直緊張刺激到完場. 當然, 這類災難片一係全部人死哂, 一係個個都無事反黎, 結果一定都估到, 但亦不減戲味. 除了中間的小小笑話有少少突兀, 同結尾離奇地無事避走到之外, 整套戲都一氣苛成. 想兩個鐘乜都唔諗睇場好戲的話, 本片一定令你滿意. 同之前的那套悶旦到爆燈的日本沉沒相比, 簡直完全兩回事.

對我來講, 片尾曲非常正, 係另一大收獲 (可惜我太遲了...)

Disclaimer

本網站可能有令人反胃, 作嘔的情色文章, 照片或問卷調查, 以及可能含有大量超連結往情色文章, 照片或問卷調查, 任何十八歲以下人士, 或自命道德標準清高之盲光社基督教人士, 請勿在本站流連, 閱讀, 欣賞任何可能有令人反胃, 作嘔的情色文章, 照片或問卷調查, 亦請勿自行將本站可能有令人反胃, 作嘔的情色文章, 照片或問卷調查送交影視處投訴, 本站有權對自命清高之人士作出批評.

同意不得不同意

第五日: 行街街

今日安排的節目就係 shopping, 所以無乜特別好講的.

在原宿找 headporter, 話難唔難,話易呢, 你唔去過的話你一定會 miss 左. 其實在竹下通行到尾, 過對面馬路, 直行約兩條小街咁上下距離, 在左面就會見到呢間紅磚舖, 無門牌的, 入去就係. 好多 porter 款, 不過當然, 要特別款就要特別時刻先有, 或者番香港搵水貨佬 .

行過去表參道山, 都係吸引唔到我, 反而問問詢問處係咪附近有間 agnes b (you got it, 又係幫人買袋...), 佢拎左張地圖出黎, 張地圖巨細無遺附近有乜名店全部有齊, 指俾我地睇在哪裡, 就即刻過去了. 如果你去到原宿唔知定的話, 入去問佢地拎張地圖逐間名店找吧, 一定夠你行足三日三夜.

咁在表參道山行去直結的同潤館, 見二樓有間小店舖好多人在裡面, 八八卦入去睇下. 間舖頭賣眼鏡的, 賣的品牌真係完全唔識的, 不過唔睇由自可, 一睇, 嘩, 最平的一副眼鏡框都要十萬八萬, 有些好似飛機木造的, 幾十萬円的說, 但入面個個都試得不亦樂乎, 有人仲將櫃內的每一隻都拎哂出黎試... 東京有錢人何其多, 簡直係天外有天...

在附近見到一個車仔咖啡檔, 新鮮 brew 的咖啡, 好香濃, 值得一試.

行到去 agnes b, 大係大, 不過無袋的, 白行一趟, 立刻坐地鐵過去渋谷 Mark City 地面的一間去買. 咁當然, 又真係比香港平成 1/3 的, 無怪乎個個去親日本都要買啦.

買完, 約了表弟在六本木山的 Office 樓下等, 今晚約了他們, 他們剛剛生了個仔, 幾個月大, 之後公司又派他去日本長駐一段時間, 我姑姐就都過埋去揍仔.

誰知, 表弟公事太繁忙, 完全出不到出來, 唯有同姑姐及表弟婦一行人去六本木吃飯.

之後去了 Tokyo Midtown, 剛剛開幕的yet-another-富貴大商場. 又係富貴到十間舖有八間個名都唔識叫的, 有間賣朱古力的仲有 security 在門口開門, 真誇. 有間賣果醬的, 將果醬淋在雪糕面, 都幾好食, 唔錯. 呢度見到的是櫻花加胡麻, 淋上 Apricot sause, 好大的一兜. 就在無印附近.

而無印呢, 就完全唔似出面街的無印, 高檔了好多, 都有好多貨品係獨有的. 只不過你需要去這間無印嗎? 我又覺得無必要.

不過講特別, 點都唔夠呢間 ABC Cooking Studio Plus International 咁夠有趣. 呢度好闊落, 明亮, 有不少長檯就是教授煮食的地方. 睇番課程, 真係乜都有, 日中意麵包西餅樣樣齊, 課程仲有英語及日語, 真係可以 spend d 時間來 "進修" 一下.'

之後再行, 見到個 food court, 嘩, 呢個 food court 真係靚到絕頂, 點洋燭的, 好情調到不得了, 拍拖的一定要去試試, 香港無一個 food court 係可以去到呢個級數的. 在 food court 附近的 bar 同餐廳都有好多潮人來來往往, D 餐廳晚餐又唔算貴, 都值得一來.

之後上去佢地屋企坐坐, 就走了.

第四日: 不熱的熱海

早上起來, 一望出窗 , 嘩, 靚到丫! 雖然烏雲蓋頂, 都無可能見到日出, 但望出去的海灣都令人神怡呢~ 海灣對出有兩個小島, 形態獨特, 不知是甚麼呢?

食早餐之前, 當然又去浸一次溫泉先啦. 晨早浸一鑊, 唔會凍到頭咢咢 . 有咁靚的大海景, 真係要浸耐D.

早餐都係好多野食, 不過係普通溫泉酒店的又日又西的東東. 那個粥好好味, 食哂了.

食飽飽時, 見到隔離有龍蝦湯做早餐... 嘩, 嗚... 點解我無...

Check out 走人, 天氣不大好, 放棄了向南走的海洋公園同大室山, 改去熱海. 坐伊東線小火車去熱海.

去到熱海, 在站外的足湯浸浸腳, 之後行落去銀座區. 叫得銀座的, 通常都係最熱鬧的地方吧, 如輕井澤的舊輕銀座, 就滿是遊人. 但這裡.... 鬼影都無隻, 行在條街都有點驚心...

在海邊影了張相, 敵不過風吹雨打, 都係打的番車站走人. 頂佢, 行就行斜路行成半個鐘, 坐車就三分鐘就番到去, 真係有無攪錯! (其實都雖然去川奈很累, 又麻煩, 但都有點慶幸無在熱海過一晚, 這地方不日不西不旺不靜, 好老態龍鐘的感覺, 不太特別呢!)

中間車過車, 好麻煩的到了御殿場 outlet. (中間其實經過了沼津, 係東京附近一個很出名的魚港, 有機會的話一定要去試試市場壽司店). 在御殿場站旁買了回程的巴士卷就坐 shuttle 去 outlet 了 (資料).

早幾年前去過御殿場 outlet 一次, 印象只係一間好多野賣的無印同好多歐美名牌, 同埋企O係富士山腳都見唔到富士山. 呢次呢, 都係一模一樣. 不過而家, 連無印都無野好買了.

反而如果你要防水的風褸的話, AIGLE 係一個好的選擇, 比出面便宜得多, 但又不失實用. 我就係買了一件, 又防風又防水, 落大雨行outlet 就O岩哂.

已經肚餓了, 見到目錄內有一間壽司店, 食 food court 無謂, 倒不如食迥轉壽司. 誰知, 這間迥轉並非普通貨色, 而是一間非常出色的壽司店呢. 店子主打沼津港新鮮運到水產, 解了我不能在沼津一試壽司的心結. 而壽司店的名稱, 正正就是沼津魚がし鮨. 你睇下件大toro 幾肥美, 嘩, 真係睇番都有點頭痕.

店後有個大魚缸, 原來養了很多小尾的あじ池魚. 叫了這個活あじ iki aji, 師傅真是撈了一條出來即造 , 還見到魚頭跳下跳下, 心驚膽震, 不過活真不同的, 味道鮮甜得多, 而且師傅開一整尾給我們, 每件壽司都好大件, 好正.

食完, 之後就正式 shopping 了. 行到近七點, 傾盤大雨, 不走不得, 因此上了 shuttle 番車站坐巴士回新宿. 有人會問, 究竟應該在東名御殿場上車, 還是在御殿場站上車才好. 我覺得, 坐 shuttle 的話, 分別不大, 但如果坐巴士番新宿的話, 御殿場站係總站, 巴士又無位放行李的, 所有戰利品係迫住要塞在位中 (我兩個人要分開坐), 如果你在東名上車的話, 唔容易找位子的. 緊記.

坐了兩小時多的巴士番到新宿, 上酒店 check in. 今日住的是西新宿酒店, 由巴士站行過去其實好近. 雖然房間係細一點 (single room 當 semi-double 用), 沒有衣櫃, 但價錢不貴, 位置又好, 算不錯了. 留意地面停車場內有電梯上 lobby, 但開放時間到十點而已, 要用的話, 請盡早.

又累又凍, 都是快快找食的. 在這邊, 咁夜, 又好食的地方, 我只想到六歌仙, 於是就去了.

你可能覺得, 食放題啦, 抵呀抵呀, 不過我想, 既然六歌仙都只不過係港通街都有的韓燒, 為何唔食佢主打的東西呢? 松阪牛, 點都要食食吧? 難道有松阪牛放嚮度唔食, 走去食次一級不知邊度來的 "黑毛和牛"?

這一板, 係兩客最便宜的松阪牛カルビ karubi, 即係牛肋骨, 睇落, 都好不俗吧! 其實, 這裡 4千円都唔駛, 當然唔可以同 *特上* 相比, 但都絕對夠食, 而且質素仲相當高呢!

之後, 再叫了一客叫ハラミ harami , 講唔出係咩一回事, 要燒到好熟先至易入口的

當然, 放題有放題的好, 但食唔哂, 咪又係浪費, 倒不如叫一些自己想吃的, 又不用花得太多錢, 食得精一點, 才是應有的態度.

食完, 信步行番酒店, 沖個好熱的涼 (想不到浴室仲要大一點呢!), 又一天...

第三日: 遊海月

今日一朝早就坐新幹線去富士市. 至於去做乜, 要賣個關子, 識得我的一定知我做乜.

整日都下著雨, 實在都幾掃興. 在網上找到在伊東附近叫川奈的地方有一間溫泉酒店很特別的, 所以晚上就去過一晚.

川奈是在伊東再坐多兩個站的地方. 坐車都幾迂迥的, 我先在富士市坐車去熱海, 熱海轉去伊東, 伊東再轉車, 落車走多 7-8 分鐘, 但下著很大的雨, 唯有打的. 700円, 本來行 8 分鐘的路兩分鐘就到. 酒店的名字叫遊海月, 都幾詩意.

車站旁有個小超市, 買了靜岡縣出的士多啤梨, 300円, 比香港用一百大元才買到一小盒的正得多.

去到已經晚餐時份, 當然是吃飯的時間啦. 這裡主打是亞洲 fusion懷石, 是否很有趣呢? 先來的是前菜, 田螺及韓式春卷 (?).

其後是很新鮮的地魚刺身, 真是很漂亮呢. 兩個杯仔的, 一個是三文魚野菜紫芋, 及小龍蝦凍湯.

這是海鮮燒, asian 味噌 (??) 放底. 之後的煎鵝肝, 煎得好好味呢~

日版 nasi goreng, 加隻溫泉旦, 一定激死你屋企位印傭. 不過這個是不好食的, 打破了本應好完滿的一餐飯...仲有個冬蔭公, 不過原則上只係一碗辣的旦花湯.

不過這餐飯都不錯, 尤其是凍了餓了一整天, 實在飢寒交迫. 因此都吃了整整兩個小時的飯. 不過四周看看酒店, 都很有特色, 將我們見慣見熟的東南亞物產放入日本的溫泉旅館, 又別有一番風味.

房間算是不錯的, 又大, 又向海. 不過房間不設沖涼房, 所以你一定要在兩個露天風呂, 或兩個室內風呂的浴室攪定才好入房. 露天風呂是貸切的, 在 lobby 劃好時間就可以. 不過問題係, 我都唔知個風呂邊個打邊個, 所以有人就用了我本來mark 了的風呂, 又有人同一時段劃了 4 間, 真要命.

浸完溫泉, 都差不多可以入夢鄉了...

第二日: 失而復得的牛牛

早上去築地排隊. 臨走時都是決定買張 Suica, 後來發現, 真係好好用.

初初去築地時, 剩係識得去井上食拉麵, 已經好味到不得了; 之後, 發現原來捉到鹿唔識脫角, 唔知原來場內市場有咁正的壽司. 第一次去了, 排了半小時的大和, 簡直印象難忘. 慢慢地, 一本本的旅遊書, 中文日文的都推介來這裡, 再加上, 再多幾年就要拆, 人們就似朝聖般, 一車一車的來. 排的隊, 由 30 分鐘, 變為 40, 再變為 60, 聽過有人排了個半小時, 由一間, 到兩間, 到現在幾條街都是人, 就為了這三千幾円的十件壽司. 漸漸地, 麻木了, 好似覺得, 真是不值得浪費光蔭去排.

今次, 去了隔離街的鮨文. 老舖, 乾淨, 骨骨子子的, 無大和咁亂七八糟, 同時, 請放下你的相機, 因為不准拍照. 噢, 無所謂啦, 又唔係未見過. 3600幾円的, 當然新鮮, 但都真係幾貴, 而且自從舊年食完美登利之後, 就發現原來築地的, 其實都不相伯仲, 但都仲要平一截, 總有點深深不忿. 結論係, 好食, 但唔太值.

食完, 兜番隔離街, 兩間大店都係人, 真無辦法. 不過呢, 到而家我都仲未走入去真真正正築地市場內買賣的地方, 下次, 要早少少起身真正去探勝一下.

坐地鐵去新宿轉京王線去南大澤, 今日去番無去幾年的南大澤 outlet 掃貨.

整天就是下著大雨, 去到南大澤, 又濕又凍, 朝早幾件壽司已經不翼而飛, 又唔知食乜, 忽然見到右面的商場仔有間好熟口面的橙色店子, 原來是 Hanamaru 烏冬店, 當然走入去食番少少野先啦.

唔好以為 Hamamaru 有乜咁大不了, 佢只是一間有天婦羅賣的連鎖烏冬店咁大把. 其實呢, 天婦羅就真係, 好難食囉, 一碗暖洋洋的烏冬就已經很足夠. 呢間烏冬好有咬口, 食法好似撈汁咁, 無乜湯, 幾特意. 當然, 點都唔夠D 山水烏冬咁可口, 不過都已經滿足了.

入 outlet 掃貨.... 點知, 唔知係我地 being cheap 定係真係貴, 今年已經無舊年般件件都二三千円就可得手,隨手拎起都五六千大圓, 因此跟本買不了幾多東西就走了.

番到新宿, 放下少少戰利品 (都總有些O既), 就去吃. 行去新宿百果園附近的後巷, 係舊年有版友介紹過的 shabu shabu 店伊吹, 一試簡直難忘, 所以今年一定要再去.

點知... 行到去那裡, 點解成個 block 拆了 (我講一個 block, 即係一組幾幢大廈, 即係郵區碼第二組數字) ?! 心都寒埋, 唔係咁邪sammi 口音) 下話.... 唔通行錯路?? 在另一邊再兜一次, 點知俾我見到有間新店子仲開緊門...原來, 老闆娘在舊舖的正對面 *起了一幢新店*, 兩層樓高. 嘩. 如果我由另一邊兜個圈的話, 我未必見到了, 好彩~

一入去, 好安心的同老闆娘講 (英文), 原來都只係搬了兩個月吧, 怪不得一看就似係新張的一樣.新店當然比舊店坐得舒服得多啦, 舊年坐樓上係夾硬迫了兩個位出來, 今年樓上真是名付其實的樓上雅座了.

先來美味的前菜, 是沙律. 你不得不否認, 日人的和風沙律真是很美味, 咸咸地, 加上酸味, 同外國的跟本完全兩回事, 卻又理所當然得很.之後, 老闆娘親自捧上來... 嘩, Fissler ! 大手筆到丫! 但老闆娘話, 有客人話以前隻好...人老愛說舊的好, 當然啦, 舊的不去, 新的又怎會來呢? 之後, 主角出場, 紅白均稱, 真係靚到暈.

最重要的是, 這裡的價錢很公道, 我之後再叫追加多一碟 (又凍又濕, 當然餓啦), 再加白飯 (飯計錢的, 唔好話我唔提你), 都是一萬円左右, 以這級數的近江牛來講, 算抵食了.

食飽飽, 番到酒店, 就訓了, 明早要出發呢~

第一日: 啟蒙老師

因為公私事都非常繁忙, 所以無時間貼文, 連寫了一半的文章都寫唔完, 中間仲去了日本一趟. 而家趁清閒少少講講吧.

早一晚網上 check-in 了, 第二朝諗住可以滋滋油油, 點知都係趕餐死的. 去到機場 online check-in 的櫃位, 雖然已經清哂大部份客人, 清清閒閒的, 小姐還是口黑面黑的替我們印登機證拎行李, 唔知邊度得罪了她.

上到機, 居然送一份問卷給我們, 我們自然都樂得數落那位坐 counter 的小姐. 那枝筆幾靚, 好過之前那枝.

如常到達成田機場, 但發現原來已經在 Terminal 2 降落了. 雖然曾經有次來過, 但有少少陌生, 怕唔識路. 當然, 我去過不少機場, 日本機場只是小事吧. 不知是否我們班機是早上比較晚的一班, 移民局外的人龍大都是本班機的乘客, 不消 40 分鐘就排完隊取行李了.

落到地庫買了 skyliner 車票, 見到 JR Green counter 黑壓壓的一大堆人, 相信是買 NEX + Suica 吧? 離下班往池袋的 NEX 實在太耐, 當然不會坐啦, 5 分鐘後已經坐上 skyliner 列車了.

Check-in 了酒店後, 自然又走番落新宿食壽司.

其實有些東西是去開做開有感情, 唔係因為佢真係絕頂好, 而係咁多年來都無變過, 番老朋友地方的感覺. 在新宿的しおん Shion 壽司就係咁, 差不多係我踏入日本第一間的壽司店 (可能係第一餐...), 教識我日本人點樣去食迥轉壽司 (你有無在香港試過將豉油倒落魚生上面? 定係都仲係死命落 wasabi 撈均佢辣到飛起先高興?)... 不要看它豆豆痞痞樣子, 百多二百円一碟, 一落機即去拍十零廿碟, 成個黃昏已經可以一直行街行到 9 點先食晚餐. 雖然裡面現在已人面全非, 雖然之後去過更好更正的壽司店, 但依然覺得真係無佢咁新鮮大件夾抵食.

食完 "下午茶", 女友去行街, 我自己就走去新宿御園站附近一間影會 studio 影 model 去了.

哈, 在日本都去影會?! 其實無乜野的, 當係觀摩一下啦. 睇影會個 website 好似好 pro 咁, 但其實, 香港的影會真係已經水平很高很高. 最起碼, 在香港我們一定獲發一件 trigger 引閃, 咁就唔駛用咁大光圈的鏡頭了, 就是影友大都 show off 器材幾咁貴, 只係睇機睇鏡都樂得要死. 誰知在日本的影會真係影會, 真係一班電車男一般的男人咁似見偶像咁影個小妹妹, 下至 Kodak DC 仔, 上至 5D+小白都有, 最要命仲要係, 打幾枝大白光燈就算了, 好在我拎左枝大光圈, 唔係都無得影. 影完, 仲要簽名時間, 成班大男人排哂隊跪見偶像, 真攪笑.

(點解要跪? 其實日人同西人都有個好習慣, 就是別人坐低時, 你同人傾計的話都最好跪下, 咁人地就唔駛岳高頭睇你. 咁兩個 model 要簽名嘛, 當然坐低啦)

影完, 行番新宿, OI 搬後一條街, 分拆了兩幢, 舊幢就拆了, 都不過一年時間, 真快手.

晚餐就在一定去的つな八本店. 天婦羅依然好味如惜, 又便宜, 實在是新宿必去之店.

次次都食到飽哂肚, 完全食唔到甜品, 今次食少D, 叫了傳說中的天婦羅雪糕! 你真係想像不到, 外面係熱辣香脆的天婦羅, 裡面卻包著凍冰冰的雪糕, 真係好 paradox.

花展

雖然天氣唔好, 都影到幾多靚花花.

雖然人山人海, 但影出黎差不多一個人都無.

又發覺原來 Canon 多人用係假象來的, 10個用 DSLR, 有近一半以上用 Nikon, 仲要好多人有 D200. 勁!

有好多妹妹拎自己的公仔去影相, 當然都唔執輸去影下啦.

更多照片...

MOS Burger

在日本完全無食過 MOS, 個個都話好食但我總覺得, 去到日本食 burger, 唔係嘛?

早陣子在 apm 才第一次食到 MOS, 嘩, 乖乖不得了, 原來真係好好味的. 燒汁加落牛扒burger 度, 好有趣, 但原來又真係好好味, 又juicy 又濃郁. 當然, 個包講大梗係唔夠 Burger King 咁大, 但個包夠鬆軟, 而且定位比 Burger King 平, 無所謂啦.

又原來個炸雞都幾好味的, 真係有雞味囉.

不過原來更加乖乖不得了的, 是康怡分店好快就開了! 咁就早早晚晚都可以食 MOS, happy!

Cooking mamaの愛心料理

唔係 NDS, 係一間都幾隱閉的 "私房日本x法國愛心料理", 叫味+味.

點解咁講?

位置呢, 係天勺樓上, 即係登龍街永光中心 7樓. 去永光中心只係為3樓的天勺, 同地下的越南河, 點都想唔到呢度其他食肆. 上到去, 都係有種幾神秘的氣氛, 好收收埋埋的感覺.

不過呢, 入到去, 立時有種好溫暖的感覺. 門口有棵好靚的花, 周圍好多小擺設, 睇落主人都真幾有心思.

睇餐牌, 原來店子有串燒, 又有法國料理, 又有意粉, 又有雞肉釜飯, 咁究竟這是一間甚麼的店子?!

與其話係任何一種料理店, 倒不如話係廚子喜愛的料理的店子吧.

原來店子係一位外表溫文的女將主理的 (就如你去日本溫泉旅館吧!) , 女將在法國學藝, 所以你會在餐單內見到不少法意料理, 但又將西餐溶合和風, 卻又不失日本傳統風味, 總之十分好味呢.

其實, 一坐低就送上的小天使麵實在令人喜愛, 一小片茄瓜, 似係意粉卻是日式味道; 其後的沙律, 最得的就是那個沙律醬, 是自家制的, 非常好味.

串燒不是女將的作品, 但亦非常味美, 不過最令我難以忘懷的, 是那個串燒紹菜, 外面燒得乾, 但裡面卻水份濃郁, 似飲湯一樣.

釜飯又是一絕, 在香港很難吃到的釜飯在這裡即叫即整, 仲要放在counter 上你睇住佢慢慢地煲, 好好味.

可惜係叫得呢D 來已經太飽, 無食到意粉. 但看旁邊的人的意粉, 感覺上係好得的.

甜品都非常不俗, 不過太細兜, 比較貴, 件旦糕就普通了少少, 但個 custard 同 mango pudding 都加番分.

不過, 最令人開心的是食完之後, 女將媽媽都會親自走出來跟你傾計, 問你好不好味之類. 在香港, 甚至在日本, 都比較少見了吧. 就是這樣, 都足夠有突啦.

除了吃之後, 這裡平日會開烹飪班, 雖然, 平日下午比較難參與, 但在網站見到都不乏參加者, 應該是在港居住的日本媽媽都要學學手藝吧?

唔好打 NDS 了, 大家去試試cooking mama親自主理的料理吧.

味+味
銅鑼灣登龍街28號永光中心 7 樓
28360671

Pho Hoa

點解我拎番呢篇野上黎? 原來發覺佢越做越出色, 而家忍唔住一個星期都起碼去食一次.

湯是熱的, 不似以前那般溫吞水, 而且很濃郁, 好夠味.
不見了一箱箱的紙箱, 有條布簾把它們收起.
都無蒼蠅了.

今日餐牌都轉了, 有 4 大版, 很多東西吃, 有檬, 有飯, 有河, 但你問我其他D 好唔好味, 我只可以話你聽, 我次次去都係食 T01, 其他的, 一概不知道.

如果你最近無去的話, 去多次吧, 令你改觀的~

在加拿大讀書番黎最唔捨得的唔係咩牛扒沙律之類東西, 而是一碗熱呼呼大大碗的越南生牛河.

我唔知大家, 但我在香港找了很久, 都找不到一碗似樣的牛河: 不是湯不好味, 就是沒有香葉, 最慘係, 別人一坐底就放下一大碟的生芽菜, 香港通街都是芽菜, 但從來無一間會俾我. 曾經覺得佐敦的和平館非常不錯, 但可惜摺了. 銅鑼灣的清庭叫做可以, 但總是不以樣. 所以你都會見, 我去澳洲公幹都要坐個幾鐘火車去食一碗牛河.

見到壹周刊介紹新店, 謂是在美加排哂大隊的連鎖店 PhoHoa, 我自己倒未試過, 奇. 因此走去試一試.

很久無去登龍街, 這裡已經完完全全變了樣, 好快, 這兒就沒有車行, 接著有錢的大人就會買起幾幢樓, 拆哂所有舊樓, 再起好新的新樓, 再加好多好多的租. 過兩條街的耀華街就是這樣了, 現在變成甚麼一個樣子? 有眼睇啦.

門口站了不少人, 我們等了半小時有多才可入座. 其實餐牌選擇不多, 都係生牛河, 有D 越南小食, 咖喱牛腩咁. 當然啦, 好味的話, 一個選擇就已經夠, 好討厭有幾百樣野食的港式茶餐廳, 多野食但無一樣好食. 這裡價位好大眾化, 一點也不貴, 30 多元一碗河粉, 但夠吃嗎?

答案係: 好夠好夠. 我吃了一碗特別火車頭 ( 即係有牛肉, 牛柏葉, 牛筋一大碗, 佢唔係叫火車頭的, 我地先至咁叫) , 好飽好飽! 牛肉好可惜已經熟了, 不過都好嫩滑, 牛柏葉值得一讚, 一點也不 UN, 吃起來很有牛味. 湯方面, 雖然話是牛肉煲的湯, 但其實, spice 味比較重, 湯味較濃, 同香港食到的淡開水完全兩回事. 當然, 最重要的, 是生芽菜 ! 嘩! 都唔知幾耐無試過生牛河落生芽菜, 雖然芽菜是下欄之物, 但無理由完全唔俾人嘛?! 好開心!

仲有一件物事, 就是是拉差香甜辣椒醬 ! 在加拿大, 又是死落爛落的美味, 為何香港又是找不到?! 我就好似傻了的, 食到一味在笑笑笑.

比較失望的是雪啡奶 (越式凍咖啡, 是滴滴完再倒入冰度的), 啡不濃, 又少.

第二日再去食下午茶, 就發現有不妥.

原來咖啡粉沒有了, 難怪昨晚的咖啡很淡
有蒼蠅飛來飛去
廁所無人清理
這個最不好, 四處都是疊起的河粉紙箱. 好應該找個地方安放它們吧.
今日的湯不熱, 要了生牛肉另上, 浸極都唔熟

如果店子能夠改善的話, 這裡我一定會一去再去的.

UNY > APITA

低能了, 尋日原來UNY 超市 last day, 又特價, D 人掃哂貨, 今日已經圍了板裝修了.

唔係, 超市仲O係度, 不度細左一半O者.

不知所謂

網上廣泛傳閱張慧慈的專欄文章.

張小姐更對回應的男士覺得膚淺.

當然, 佢老公俾哂錢佢駛係佢老公的自由, 我不容置喙. 但如果我的女友講一句如此的說話, 我一定第一時間分手, 無得好講.

作為一個成年人, 我有我用錢的自由, 點解我結婚就要俾哂錢俾另一半? 買乜做乜都要佢批准? 這是甚麼年代? 難道你女人就會精打細算花每分每毫嗎? 那麼, 我有權過問你女人所用的金錢是去了那個用途? 買多個 LV? 買多D 化裝品?

很霸的大貓

女生一定好想成隻拎番屋企 ... 去香港站同中環站中間的走廊影張相吧~

石山

如果你唔細心留意的話, 你一定唔會找到這間餐廳. 但如果我講出來的話, 你就會 "哦" 一聲出來~ 原來呢度.

佢就在 Sogo 後面條街, 7 仔旁邊的商業大廈內, 只會在晚上在地下門口放一個招牌. 日頭唔開的, 所以你地唔駛去試 lunch 了.

一入到去, 你一定覺得走錯地方, 因為不單止裡面裝修直頭係日本的平民居酒屋, 而且四處都貼了日文的食物條子, 顧客又大部份都係日本人, 甚至乎, 裡面係只係得日文餐牌 (有中文O既, 不過好似在日本咁, 係好過無O個隻)... 不過唔怕, 好食就得啦, 日本都係咁去, 有咩咁難呢? 最緊係, 開口問. 問人地有乜好介紹, 有乜出名的, 最緊要係, 唔食又食埋哂D 一日到黑都食到的 "日本野"...

第一樣要食的, 就是高野豆腐. 食一件好了, 一件就會覺得簡直係無理由一件咁O既豆腐可以係好食到 "dum" 一聲. 真係好食到不得了, 唔識講, 你自己試下啦.

第二樣要食的, 就係放在 counter上的送酒的小食. 唔好睇有D 好似好肉酸咁, 你越係講唔出係乜野的, 就越好食. 好似我呢個豬腸煮同埋海草蓮藕, 你真係完住估唔到咁好味的. 用來送啤酒簡直一流.

日本料理無理由唔食刺身O既, 咁刺身當然都不過不失啦. 不過如果你想知有咩魚的話, 開口問吧, 如果唔係你望上counter 上的紙仔, 你識睇就好, 唔識, 就無計了. 今日有我最喜的池魚, 所以又係 tataki, hamachi 好靚, 再加個左口魚薄切, 其實真係都飽了.

唔好唔記得呢度係 "居酒屋" 來的, 所以一定有串燒. 我推介呢個雞肉丸子, 好雞味, 好好味.

如果仲唔飽的話, 大可以叫個廣島燒餅, 或來個茶漬飯, 一定飽到頂.

呢餐埋單五百大洋, 話貴唔貴, 當然平都唔算平, 最貴的, 只不過係D 刺身 (預左啦), 分分鐘, 淨係個高野豆腐都已經值回票價.

下次去日本舖食野, 記得找些你少見的試試, 就好似, 去韓國舖唔係要食韓燒的...

(全部相在此)

T2

唔係 Terminator 2, 而係 Terminal 2. 如果你有留意的話, 我們的機場將會有個新的客運大樓好快投入使用. 新翼在舊翼面對的地方, 即是坐機鐵的話, 在車門的另一邊下車就是. 身為機場一份子當然要先睹為快啦, 入去影了少少相.

對 T2 的第一印象就是個天花, 係個波浪型的天花, 巧妙地利用了由天窗射下來的光線形造了好奇特的效果, 十分討好.

此外室內的色調亦由舊翼的藍藍黑黑, 變為好溫暖的黃黃橙橙啡啡, 頓時感覺無咁冰冷. 看看這些座椅就知一二.

一個我好期待的項目就是 4D 影院, 如果以資料所知, 應該是香港第一間 IMAX theatre. 在加拿大看過真正的 IMAX 電影, 才知道幾咁震撼, 在香港真是要認真看看了.

此外, T2 滿佈了大大小小的商店, 不過最深印象都是不少香港出名的食肆都有出現, 如銅鑼灣的清亭, 非常不俗的潮樓, Soho 的埃及/中東店 Habibi Cafe, 有名的迥轉壽司板前, 仲有杏花樓, 選擇實在比舊翼多, 而且睇落質素亦不俗. 食厭了舊翼那幾間乏善足陳的店子, 這裡真是非常有新鮮感! 其中潮樓仲似半價招客, 空前地多人!

不過呢新的客運大樓, 完完全全是個 shopping mall / food court, 對於本業, 好似比例上有點不對稱. 只有 4 條 check-in counter, 每邊 14 個櫃位, 比起舊翼一行 18 個櫃位共 17 行, 真是差天共地. 可想而知, 機管局知道甚麼東西賺得更多吧~

更多照片在此.

陀地創意

不得不服海洋公園, 咁多年屹立不倒, 反而仲可以漂亮地擊敗外來虎. 睇睇呢幅廣告, 真係一個切切實實本土的出色的作品.

大澳昂平一日遊

(理應在 2006 年出的, 不過而家先至 upload d 相, 所以...)

聖誕時冒著被困的危險, 去了坐吊車.

me me 麼麼, 下午才去到東涌, 見那條人龍, 話要排兩小時, 神經的, 上去完咪要即刻番落黎? 唔得. 所以先坐巴士去大澳.

不過呢... 真係慢到.. 前面又有架大貨車頂住, 條路又掘到爛哂, 坐到嘔. 點解唔早幾年再發東涌時就開始整呢? 而家先來擴路, 無乜意思.

無去大澳幾年, 都仲係幾靚, 最有趣係發現了少林武術學校 (定係中國廚藝學校? XD), 入去八下, 好多細路學緊, 個個都好辛苦咁樣. 哈哈哈.

因為要 6 點半前坐番吊車落去, 所以未日落就坐巴士去昂平了. 原來這班是加開的巴士, 如果唔係的話就無得坐吊車...

上到去, 又係一餅餅的人. 市集無無謂謂咁, 比起日本D 旅遊區同樣係呃遊客錢, 人地就做得精緻好行得多了. 最頂癮是有間 star bucks, 都唔O岩 feel O既...

不過見到周圍貼住告示, 話所有飛都賣哂, 不過可以五點半前去排買 *企位*.

心諗, 企位都得? 橫掂行完, 走去售票處看看. 條隊又係水蛇春咁長, 不過係已經買左飛等坐車的人, 而我地呢, 行去售票處, 話買企位, OK, 買完, 即刻入去, 即刻上車, 過程只是兩分鐘.

最頂癮係, 架車雖然話坐八個人, 但其實迫迫地都可以坐多兩個, 即係我地兩個企位的, 都有得坐! 哈!

吊車沿途都好靚, 在香港好少見有呢種咁大自然的山景, 感覺有點似箱根吊車, 經過大涌谷咁. 如果佢山頂個站可以開, 俾人在山上行個圈, 都應該幾正呀. 又係捉到鹿...

落東涌時好斜, 好得人驚, 如果真係呢度俾人吊兩粒鐘, 你都咪話唔腳軟...

落到東涌, 行一行那個outlet (雖然我在機場番工, 但我從來都無去個 outlet 的), 無乜好買, 食又無乜好食, 終於都係番屋企...

(所有照片在此)

Rain 機

知道隻機今日到, 特登拎部相機去影影.

點知原來落機時泊在 Gate 15 對出的 ramp 外, 所以只能好遠咁影, 無, 我無小黑五, 唔駛諗.

出番黎想影下 close up, 已經唔見左隻機了.

(唔好意思, 我對影阿 Rain 係無乜興趣的)

小巴佬

睇到小巴車死女孩子那單新聞, 雖然覺得個媽媽都有失誤的地方, 但終歸, 小巴佬完全無顧及乘客的安全先至係罪魁禍首. 從來坐紅色小巴只同 "亡命飛車" 拉上關係, 甚至乎謝安琪的一首歌都以呢個為題 , 唔知道究竟小巴佬的心態係咪只係為左自己個荷包之外就咩都唔會理? 細心數數紅巴有幾多罪狀?

超速, 當車速顯示如無物
衝燈
未停定就開車
價錢不定, 要車的時候就獅子開大口
無人上車的話就係咁停停停O係條路度等客上, 阻住條路又阻住車上的乘客
一架車只坐十六人, 但可以頂住一整條街泊滿哂, 完全不環保

在呢個講服務的年代, 同埋我地政府鍾意事事都管, 唯獨是紅色小巴就似一個毒瘤一樣, 阻礙整個城市的發展. 唔該香港政府立即取締所有紅色小巴, 免得再有呢d敗類在市面上繼續行走.

劉華, 商台, 吒叱, 林海峰, 軟硬...

對頒獎禮已經好麻木了, 麻木在睇完 boxing day 那個所謂頒獎除左係叫d 歌星行上行落好唔得閒之外, 就係叫劉福榮先生面懵懵咁企o係台上領受比大紫荊仲要 "受之有愧" 的獎. 所以商台無劉華, 無克勤, 對我來講, 完全無任何損失, 最好佢地唔好阻頭阻勢, 阻住俾d 更有份量, 更有能力的歌手.

講真, 頒咩獎俾劉華, 無所謂, 自己病就戴乳口罩唔唱歌, fine (雖然好多歌星帶病時都會話 "我會堅持唱落去的, 因為有各位的支持" 之類廢話, 劉生反其道而行, 都算幾有性格), 但你俾一個叫做咩勁爆咩唱作人的獎, 那就有點那個. 我先唔講呢個世界上有幾多歌星係自己一手包辦曲詞, 你就可以唔理會周董, 方大同, 張敬軒, Eric Kwok, 甚至乎側田... 嗎? 唔知劉生咩大恩大德, 寫兩隻歌詞唔係情情塔塔就已經叫做突破, 有新意, 真係令人諦笑皆非, 仲要唔知羞的望番轉頭睇其他人反應, 真令人嘔白泡.

有人話比起新城, 商台都唔好得去邊, 咪又係做播放率做到出面. well, 唔奇, 在商言商 (講到明叫 商業電台, 谷播放有咩唔妥?) 要計算準確做台 show, fine. 值得的, 是商台只得十隻歌就係十隻歌, 金銀銅就係金銀銅, 雖然, 都已經多左幾個無謂獎, 但起碼, 我係聽到得者的人的心聲, 聽到得獎的歌曲的全部, 呢d, 叫做尊重. 你覺得頒多十九幾個獎係尊重嗎? 不只一年, 不只一個歌星話叱吒的獎難取, 就係因為難, 所以就更尊重這個頒獎, 所以你唔會見有歌星穿牛記笠記去叱吒. 領獎的, 除左穿屎之外, 講的說話, 都是言之有物.

仲有, 從來商台都唔會待薄唱作人 (除上面所講的假唱作人), 喜見連張繼總跟本都無機會領獎都可以上台表演一番, 而且呢 4人的環節是整個頒獎禮的中心, 好睇不突止, 都突顯了商台其實在商言商, 都好提攜有料到的新人的.

都所以, 在商言商, 無左阿 Jan 的單棍笑料, 其實都情有可原, 唔通真係拎番個棟篤笑d 料出來獻世嗎? 講真, 足否底噴飯真係幾令人失望的一個 show, 無中心思想, 無 theme, 只係將一大堆笑話夾埋兩粒鐘就算了. d 笑話, 係好笑, 但始終無上次咁, 有講家庭, 有講樂壇, 有講政治, 有講性, 咁黎得一氣呵成. 是做完軟硬太疲累?

無可否認, 軟硬係一個 "教會" 多過一個組合, 教主講乜都要信, 信者可得 cap 帽或限量 Tee, 所以, 叱吒一定要俾獎軟硬, 唔係只有教派衝突. 你可以話, 自己人,捧乜都得咖啦, 咁你又唔見哎lupUboyz 好紅 (可能係, 但我唔係中學生,我唔知), 又或者咁講, 你又唔見啤梨好紅? 要谷, 都要有人受, 先至得, 唔係好似舊年容小姐咁, 講左一句說話就成年人氣狂跌 (係到年尾先至叫做收服失地, 可惜我已經遠離佢了), 都咪話呢個圈幾現實.

新年快樂!

祝各位新一年賺多D! 身體健康, 心想事成!

地震...

明明望住盞燈係咁搖來搖去都聯想唔到係地震, 仲以為點解會有風吹得咁勁...

唔通真係要調節一下去日本要警覺少少?

真係邪, 兩年前今日又係大地震...

聖誕快樂!

都要影番D 聖誕燈飾先至夠氣氛O既.

在尖沙咀中心對海邊的那一邊開了幾間食肆, 可以坐路邊, 感覺好正. Seafood 那一間還自己建了個 patio, 好鬼舒服, 不妨去去. 不經意地睇到幻彩詠香江有煙花, 都幾有節日氣氛呢.

內地孕婦

唔知我交稅來為左乜? 為左佢地? 面不紅耳不赤用我地自己的資源, 好意思嗎?

超低能!

南蓮園池

同志蓮那一邊相比, 這裡只是將一堆老樹疊埋一齊, 放幾舊爛石頭, 起個水池放一大堆錦鯉入去, 中間起一幢想好似金閤寺但差得遠的實塔, 雜亂無章, 仲要加個飛轉得誇張的水輪. 靈氣無乜, 搵錢都好覺. 講緊係一位 $75 的齋菜, 普通得任何一個入過廚房都識整.

我寧可在另一邊望蓮花望一整個下午.

其他照片在此.

Why?

點解我明明好清楚咁寫哂答案, 有埋 website, 仲要預計埋會有咩問題, 都仲有人問? 係咪我d 表達能力有問題? 定係個個都想我 tailor made 一個答案俾佢地?

又明明呢個係 "迥響", 即係 Comments, 但 so far 有9 成留言的人都只係問問題, 而唔係對篇文章有咩問題指正呀, 覺得合唔合用呀, 有咩感想呀...甚至乎, 完全問d 唔拿更的問題都有的...

唔係唔想幫人, 但去到一個地步個個走埋黎係要你俾個答案的話, 就已經失去 "互" 聯網的意思了.

更加唔好講 Wiki 啦, up till now, 都無人留過言係過料俾我的 (我自己問就有).

所以我唔做個 forum 就係咁解, 既然不少地方都已經有d 有聲有色的討論區, 我都無謂再整多個, 多一個似乎都係自說自話多...

唔好意思, 呢篇都只係一篇自說自話的文章吧...

飛驒牛... kind of...

估下係乜?

開黎睇睇....

睇到了嗎?

再 close up...

係用飛驒高山的麵豉整的牛肉,照在高山見到的食法~ 好好好好味~ 令我回憶起高山食的一餐, 好正~

就係用呢個啦, 在康怡吉之島買的, 而家做緊岐阜縣食品節, 有D 白川鄉, 下呂, 高山的旅遊冊子取.

巧開針!!

終於開左啦!!!!

踢走巨型三sprit, 換左無印, 巧開針牙~~

5 D 開 5 D 開~~~

恭喜哂!

雖然我唔多理八卦新聞的, 但我聽到呢單野都呆一呆.

我好欣賞的歌手謝安琪有左, 張繼聰就係老豆.

呢頭先轉唱片公司, 而家轉頭就有左, 唱片公司真係要多謝佢了.

當然, 已為人父母不可以做歌星嗎? 不過有一段日子都聽不到安琪的聲音了, 好似若有所失, 而且剛剛在樂壇站得穩, 都好難講以後會怎樣. 作為一個剛起步的歌手, 安琪確是敢愛敢做的一個人.

好些基督徒都在安琪的blog 度發炮, 但人地都已經一個成年人, 有自己的想法, 又會知道有甚麼後果, 作為 fans, 是要給支持而不是落井下石吧.

接著周圍的人都好似要趕著要結婚似的, 尤其是這個月, 聽到結婚的不下 4 5 對, O係呢度都不記名地一齊恭喜哂佢地白頭到老吧!

日本食品日

今日唔知痴乜線, 一整日就係食日本野.

中午去了天勺, 雖然日本師傅自己再開了另一間店, 但坐陣的師傅仍然正. 下次一定要食 $200 的特上壽司 set (我都好想隨心所慾咁叫... 但... ). 天勺應該係香港最好食的壽司店之一咖啦, 你無去過就一定要去試試, 起碼都要食個 lunch.

夜晚唔夠喉, 落樓下 UNY 的日本食品節買魚生.

今日同條吞拿魚開刀, 所以有勁正的拖羅! 左面的 8 舊中拖羅 $100, 右面的一共係四盒 $100, 我買了兩盒大拖羅, 一盒中拖羅, 同埋一盒油甘魚! 哈哈. 本來想買哂四盒大拖羅咖.

煮埋飯仔tim... 整飯團! 正!

整番枝啤tim! 正! (相片在此...)

蘆薈

我一向好少講自己, 今日講少少.

我一向個胃都係比較弱, 一食得滯或者油膩的食物 (如上酒樓, 食翅之類) 個胃一定有少少唔妥. 其實自己知自已事, 所以都會 avoid 呢類食物, 或者食得清淡D, 通常都無乜問題.

不過不知是否做功課太緊張的關係, 個胃又開始痛, 仲要枕住枕住痛那種. 睇醫生, 食左一個禮拜藥, 都無好過.

正諗住不如轉醫生, 諗起以前的妙方, 不妨都試一試.

其實就係蘆薈了.

你會話, 周圍都有蘆薈啦, 入埋樽啦, 有乜咁神奇? 你就錯了. 個問題的要點是, 你要的是一塊在一大棵蘆薈新鮮摘下來的, 最好有汁液滴下來, 就最好. 買番來後, 將面頭的污漬, 泥土洗擦好, 並且抹乾. 很重要的, 一定要抹乾. 由尖的那一邊開始, 切走最尖尖的一截, 切開一舊約 2-3cm闊的 "果肉". 將果肉切粒粒, 再加蜜糖沖水. 因為蘆薈淡而無味, 因此你一定要用些甜的來開水來飲才能落肚. 如果你不嫌核突的話, 用切出來的皮擦面有美容的效果. 剩下來的蘆薈不用放在雪櫃, 只要用紙包好放在乾爽的地方就可以. 切口會慢慢乾燥變硬封住個切口的. 下次用時只要切去變了色的一截就可以.

食左一兩次後, 你會覺得個肚有少少攪下攪下咁, 大便都會有些不同, 這是正常的, 總之不是屙嘔大作就 OK. 慢慢食了多幾天, 你就會覺得個胃舒服了不少. 慢慢食到完全無事就可以停止. 期間當然最好不要食飲刺激的食物, 如辣椒, 奶茶, 咖啡等.

我食了一個星期, 個胃神奇地好轉了~

不過, 你要知道, 不是所有蘆薈都可以吃的, 而且食得多可能引起腹痛, 因此要非常小心. 我買的地方在太子道有好多花店那邊, 新世紀同埋油站對面, 有間舖頭賣好多古靈精怪的植物咁, 另一邊是花店. 一舊大約二十元, 你都可以在那裡買埋百花蜜, 雖然貴少少但非常清甜.

以上係我自己的經驗, 可能對你無用, 而且, 有病一定要先睇醫生, 以上的只可作為一種輔助性的療法, 不要說我沒有先告誡你吧! 不過如果你真是覺得胃有問題而又久醫不好, 不妨試試吧.

暖暖三角嘜

去日本, 就算在囉神買件三角嘜上火車食都已經係無比美味, 香港跟本無得食, 更唔好講好好食的日本米啦.

UNY 有日本食品節, 駅弁固然有, 但亦有師傅即制三角嘜, 買左即刻食, 連去飲茶都慳番.

好似去埋星期日咋, 要食好快D!

天星碼頭

又少一個老朋友. 不是要保存古物的嗎? 這些舊物舊建築不值保留嗎? 為甚麼老要將它們拆去, 再整一個不倫不類的新古典的醜物嗎?

算了吧, 香港人唯利是圖, 都無辦法. 要看古蹟, 日本第一, 澳門都比香港好多幾百倍. 雖然你說, 一個不甚美觀又不準時的鐘樓有甚麼保護的價值, 但這個地方, 畢竟是我們這幾代香港人日見夜見的東西, 少一件, 就是少一件 .

未去留低一個記念的朋友, 快快去影張相吧, 十一月十二日後就收工了.

(照片在這裡)

澳門遊

趁有新賭場開張, 又去了一次澳門. 睇左三個賭場, 最喜歡的是永利, 其次係金沙, 跟住先至係星際. 永利個格局真係好 Las Vegas, 感覺好 grand, 門口的噴水池又真係似 Bellagio, 最重要係賭場好大, 好一望無際咁o既感覺, 同其他兩間分開幾層又焗焗促促的完全兩回事. 雖然荷官好生手(其實澳門有幾多荷官丫, 點會突然多左咁多出黎 ?), 但都幾靚仔靚女, 件制服又型d, 真係就咁去行個圈都好好睇. 金沙就勝在夠熱鬧. 但星際就真係幾娘囉, 門口的毛筆大字已經好礙眼, d 制服又橙色, 好大家樂 feel, 又唔夠冷氣, 所以煙味都幾大, 唔係太喜歡.

其實我唔係去賭, 不過睇人賭都幾有趣. 尤其是見d人唔係先去櫃檯暢了籌碼先至行埋檯, 而係行埋黎, 放低一疊金牛o係檯面, 再o係咁多人面前慢慢數, 我諗佢都係鍾意那種咁多人望住的飄飄然的感覺o者. 仲有, 見到好多成個 model 咁o既小妹妹攬住個成個豬肉佬咁o既麻甩佬, 唔駛講, 都知乜事啦. 當然, 旺到條佬的話, 行過隔離 LV 買番一兩個袋, 咁都已經夠啦.

我無賭癮, 只愛吃, 因此特登上網找找有乜地方無去過的. 找到一間茶餐廳叫 "南屏雅叙", 話係全澳門最老的茶餐廳. 地方其實都好易找, 在新馬路一直向內港行, 行到差不多轉彎的地方的右面係十月初五街, 沿這條街一直行, 見到中國銀行就差不多到了. 其實茶餐廳, 就係茶餐廳, 基本上同香港的一樣, 但那件出爐酥皮旦撻, 真係好食過香港的多多聲, 仲有, 如果你肚餓的話, 叫個 "咸餐", 或一個通粉, 都係廿蚊, 但已經係香港茶餐廳的一倍份量, 仲要加多幾條菜, 真係大件夾抵食. 雖然這裡地下都係有d污糟, 但應該內籠全都翻新過, 都算光猛乾淨, 無好似香港d 咁你真係覺得好那渣咁. 呢度值得一去.

(未完... 待續)

反煙 ?!

其實我唔太介意娛樂場所有吸煙房, 他們要吸的, 就在吸煙房間吸, 我自己不吸的, 我不用去坐煙房, 我有朋友要吸的, 他們也不用走出走入去吸. 我唔明白尊貴的議員點解要趕盡殺絕成年人的合法活動呢? 如果他們覺得吸煙是不合道德的, 殺人的, 倒不如立法要求政府將香煙介定成毒品. 那不就一天都光哂嗎? 難道因為香煙的所收的稅太和味, 不能取締之?

再講, 吸煙危害健康, 無錯; 飲酒就不是更危險了嗎? 飲了酒, 醉酒, 會亂性, 會打人, 會發狂, 會嘔到一地都係不衛生, 會傻乎乎的坐在廁所內無人臺得起你, 飲完酒駕駛, 更是害人害己; 吸了多少打煙, 最多只係一直坐在你身邊的人成身煙味, 你要經常性吸二手煙才會對身體有影響; 吸了煙駕車, 無事, 亦唔覺有甚麼生命危險, 難道煙比酒危險嗎? 不要同我講笑吧. 你見到有幾多法例針對酒嗎? 咪頂多是醉駕. 難道因為高官議員們自己好杯中物? 還是議員仲要因為教會乃有餅酒之禮, 所以不敢去碰?

我承認, 對娛樂場所從業員, 吸得多二手煙是不好的, 但可做的措施沒有嗎? 我倒不覺.

不要誤會, 我不是說煙民的好話, 其實我都討厭吸煙的, 只是不齒不少人連多少分柝力都沒有就反呀反呀,究竟因由如何, 卻又不知所以. 我們需要尊貴的議員官員們來理會我們自身的健康? 不是吧.

大細超?

一本大便偷拍阿嬌就引來全城聲討聲, 連我呢個壹周蘋果 fans 都要暫時避避風頭唔出聲.

呢回東周搵印傭偷入肥姐病房, 又唔見矮仔曾咸龍之流聲大夾惡要拉人封艇. 講到尾, 把口係自己友的話, 就好易話為啦, 同你一嬲有心病的, 當然就要踩多兩腳.

講嚴重性, 我倒覺得偷入去病房嚴重得多, 大佬, 人地病到死下死下你私自走入去, 影埋人地病歷出黎都得啦, 仲有病人私隱O既? 人地穿屎把口就話自己係小朋友偶像, 一個屈尾十就走去塞班大曬完全不能發育的胴體賣俾麻甩仔 (如我), 偷影幾張相, 又算得乜?

滄海遺珠

第一次在上星期六 Eason 的對唱 Live concert 聽到, 驚為天人, 絕對唔係一首滄海遺珠, 係一棵發光發亮的珍珠~ 師兄一貫感性的聲音, 加上安琪天籟的歌聲, 加上歌詞簡單得來令人感動, 第一次聽就已經可以跟著唱了.

(安琪之後再唱了 The One and Only, 而唔係大碟內的中文版本, 更加不得了, 安琪唱現場的演譯係一般香港歌手少見玩即興 ad lib, 更不是唱自己的母語, 但出來頭頭是道, 完全就似剛出道的 Mariah Carey一樣, 香港有如此美麗的聲音真是天賜呢, 我也不禁奇怪, 為何我一次都無在海港城聽到安琪的歌聲呢?)

之後再找 CD 來聽, 原來原版是在師兄的 All the Best 大碟內, 不過原版似乎太平淡了, 重新 arrange 為合唱的仁兄應記一功! 安琪加入自己的演譯更加令首歌生色不少.

昨晚再一次在勁歌聽到師兄同安琪唱, 安琪把聲真係靚到不得了, 雖然偶有不入beat, 但依然感動人心. 兩位真係要努力啊, 香港樂壇以後要你們了 (仲有藍奕邦, 多謝你帶給我們另一種好歌選擇!).

氣頂迥轉

今日行左入去 Sogo 旁邊落地庫的 "迥轉" 壽司店. 把鬼, 話迥轉壽司檯無位, 叫我地在外面等左個幾字; 落到去, 壽司檯仲有鬼死咁多吉位, 好懷疑家陣仲係七月佢地見到好多人食野我見唔到.

不過更加把鬼的是條運輸帶只係得三兩碟壽司放O係度, 孤零零的, 真是可憐. 你夠膽俾佢地落黎嗎? 當然唔可能啦, 點知係咪下晝已經坐O係呢度咖啦?

無奈只有又係劃紙仔. 咁唔願擺壽司O係條帶度咁整咁多野做乜? 索性做壽司店咪算囉.

壽司只可以用一粒粒來形容, 真係粒粒皆辛苦呢, 可能怕師傅玉手太繁忙, 每粒壽司飯加上一小片魚, 可能只係比我隻拇指大少許O者. 連我呢類唔係食好多野的人都大可以爬三四碟都只係攝攝牙而已.

當然佢就想得美了, 我當然無爬三四碟吧, 食完一碟, 兩碟, 三碟.. 已經無乜興趣再叫了. 迥轉壽司最精妙之處, 就係你可以望住一碟, 食緊一碟, 旁邊再拎一碟, 再納埋你身邊人的另一件, 不知不覺間就已經一棟咁放O係度... 但呢個... 唔好意思, 無咁好興緻.

我真唔明, 新宿租金唔會比銅鑼灣平得幾多, 日本米又係超級地貴, 魚又是在漁市場批發買番來的, 點解我食那間 cheap 到無譜的しおん壽司可以一碟接一碟都唔停, 食到飽飽滯滯都係千五円; 我在香港食好食的壽司, 一係去貴到無譜的日本料理, 一係就落去 UNY 買, 完全無中間路線的, 為甚麼? 老實講, 都已經唔係第一次啦, 去第間都係賴野, 點解呢?

唯一可以解釋的, 就是, 香港人, 係搵錢的, 而日本人, 就係真係做生意的.

新 iPod 新 iTunes

新 iPod 同新 iTunes 有自己一個 media event, 而實在新產品新服務都全面地更新, 有些更有令人驚喜的地方.

平心而論, 新 iPod Video 同舊版無任何大分別, 只是在於 screen 光左D, 電池行得耐D, 同埋平左好多, 所以我今年年頭買了部 60G 黑色的確是明智, 因為起碼新機沒有甚麼令我心動的地方, resolution 不變, iPod Game 又玩到, gapless play 又有, 真不錯的投資啊. 最有趣, update 了新 firmware 後發現放片好似節省了些電, 以前看 40分鐘的電視劇就用去了 1/3 的電量, 現在發現只是以前的一半, 似乎 firmware 更新了播片的程序更省電, 一讚!

iPod Game 真係好正, 你以前真係無法想到 iPod 的 game 可以咁靚, 畫面鮮艷, 又有強勁的音響, 實在媲美 PSP game (哦, 當然囉, 用個 clickwheel 玩始終怪怪地). 我最愛的 game, 是 Zuma, 簡單得來非常 addictive, 又好合 clickwheel 控制. 反而 Bejeweled 唔似可以用 clickwheel 玩, Tetris 就比較 clumsy 一點, 但都 OK.

Nano 就完全回歸番 iPod Mini 那些經典顏色及金屬味道, 有人覺得唔靚仔, 但我相信拎起部真機D 人又發哂顛咖啦. 今日發現已經有貨了, 個盒真係好靚仔, 又可以收藏, 不過D sales 對D 顏色完全亂哂籠, 有排跟.

其實我覺得個 lineup 最特別係部 shuffle, 我覺得真係好得喎, 細到成個胸針一樣咁大小, 比一D 藍芽 remote 都仲要細, 真係令人驚嘆~

不過其實最大改動都是 iTunes. 首先, 由沿用了很久的綠色 icon 變成藍色, 不過其實 2.0 是藍色的. 新版 iTunes 個 look and feel 都改變了, 左面 panel organize 得很好, Library, Store, Playlist 都分得清清楚楚, 唔駛盲摸摸的在一個好長的 list 去找.

插入 iPod 後, 就會出現一個全新的 iPod 資料的版面, 就連 iPod 的 software update 都放在這裡, 以後就真是可以 one-stop-shop manage 部 iPod, 這個改動值得一讚 (雖然理應一開始就係咁).

另一個我很喜歡的就是兩種 album view, 使用 CoverFlow 的技術令找 album 聽歌很有樂趣, 一路轉個 mouse button 一路 flip, 好有型. 我而家只恨快D scan 哂所有 album art 落部電腦度... 呀... (有個 feature 叫 Get Album Artwork, 但我 click 過後完全找不到, 有些在 iTunes Store 內有的都無加入去, 奇; 有人卻說 corrupt 哂所有現有的 artwork, 可能還是有 bug 吧?)

iTunes Store 就又係完全 update 了個 look and feel, 當然最重要都係電影 download 吧. 不過老實講, 美金 9.99 一套電影其實已經差不多可以買 DVD, 電影又唔似得歌曲般可以 "斬件" 出售, 效果有待驗證. 在 iTunes Store 見到 Pirates of the Carribean 算係最有睇頭了.

最離奇係, 而家所有 TV show 都係 640x480 的 resolution, 但據 iLounge 的 tutorial 見到 iPod support 的 resolution 係無 640x480 的, 但在 iPod 內播放到的是非常完整的 (而且比之前更靚), 究竟是甚麼一回事呢? 雖則如此, 一向都有的 "淨色畫面 color banding" 都仲有, 不過影片質素就細緻了很多呢.

這一回的 iPod + iTunes update 雖然唔算得上驚天動地, 但都有令人驚喜的地方, 實在令人讚賞.

回收電池

上月尾在 CASE 登記了更換 iBook 電池, 話要等四至六星期, 仲要收到通知後三日內取電. Well, OK, 但咁大間公司, 都應該起碼知道有幾多部機在市面卦? 點解唔 ship 一部份來先呢? 如果呢段時間出左事咁邊個負責? 你又要我等幾個星期, 但你又唔等多我幾日, 有無攪錯?

咁一直等啦, 其間先後聽到不少人已經收到電池, 都不以為意.

到有人話在 CASE 遲過我登記, 但已經收到電池, 我就火了. 打電話上 CASE, check 電腦, 話仲未收到 (當然我已經在網站 check過了). 咁鬧左一輪, 無法啦, 又等.

點知五分鐘之後, 就收到 email 叫我取電池了.

九成係漏左我個 order 啦, 我自己做 support 都知咩一回事, 如果唔係, 又點會咁神奇地突然會有得拎丫?

有時真係俾香港的 Apple Care 激死. 點解乜野都要由新加坡 ship 過來? 唔通真係信唔過香港D support? 郵費好便宜嗎? 又點解唔好似 Palm 咁, 將已修好的機放在 support center, 有客要整機的話可以換上已修好的, 客立即有機用, 又只需要一lot 過 ship 機, 何樂而不為?

PS. 個新電池好正喎, 又唔熱, 用左個幾鐘而家都仲 report 有 3 個鐘. 不過其實之前個電池已經死死地, 成日無啦啦自己熄機.

勝利小廚

其實好耐以來都想寫呢度, 不過永遠唔記得帶相機, 無食物相的食評, 不如唔寫.

即係咁, 呢間野應該係一個 hybrid, 本來係一間茶餐廳, 不過搵左幾個泰國人整雞飯, 但又出奇地好味喎, 所以先至出哂名.

咁當然, 理得佢黑貓白貓, 好食的就得啦.

有理無理, 當然叫個海南雞先. 泰式的海南雞, 遠睇, 係白哂哂的, 唔似得我地D 黃油雞咁靚仔 (我在泰國人先會去的飯堂食, 都係一樣的), 但其實點埋個辣汁, 食落好有味, 好鬼正的說. 就似拉麵的湯底, 或者韓國的金漬, 每一家個汁都唔同味道, 輸嬴都是靠它. 這裡的不太濃烈, 適可而止, 不過我還是愛以前隆姐的多一點.

當然不可少的是豬脾飯吧! 不是畢華流那些, 是真正的滷水豬脾, 很香, 很肉地, 又唔係好肥, 撈埋汁可以扒兩大碗飯呢...

其餘叫了幾個小菜, 都係茶餐廳貨色, 不過味道都唔錯, 尤其是那個炸的物體, 好好味 (唔記得係乜了...), 蒸勝瓜就淡了少少.

其實勝利道仲有其他選擇都唔錯的, 財叔的粥舖好似話好正, 不過要夜晚財叔坐陣才可以; 另外隔離的莉莎, 我食的那一天撞到兩個大明星, 真威水, 不過佢D 煲仔飯都唔錯的說.

相片在此.

至於你話點解 openrice 個個都踩佢呢? 我唔知, 可能佢地唔好彩, 又或者, 可能有人俾左錢我賣廣告都未定. 呢D 茶餐廳, 唔通你叫佢地學劉華咁滿口 bullshit? 唔好煩啦.

垃圾房開房

呢個世界上缺德的人何其多, 有時真係不吐不快. 就似我幢大廈的垃圾房, 本意係好好的叫人將垃圾分類, 但我發現晚晚去倒垃圾時, 見到本來應該放的地方不放, 唔放的就放哂, 因此加入了這個分類, 看看晚晚倒垃圾有幾多次係真係正確.

今晚圖中可見在鋁罐膠樽箱內見到兩隻鑊, 一個飯盒, 一個大家樂杯同三個汽水罐, 兩個汽水罐係我丟的. 兩隻鑊是否可以 recycle 俾其他人用嗎? 又不是, 因為柄已生了秀. 至於飯盒嘛, 仲有送頭送尾在, 好難再用的.

曼谷遊記

八月時去了一趟曼谷, 都是飲飲食食那種, 遊記在我的 gallery 內, 請指教.

Ichiban 爐端燒

香港的食肆開完又關, 關完又開, 對於我呢D 懶人來講, 找到一間好食的店子已經難, 找到一間好食的店子過了一排又收了檔又要再找, 更難. 本來想在銅鑼灣找間居酒屋飲飲酒減壓, 想來想去, 一係不見了, 一係太港化, 一係不開張, 之後才猛然記得, 其實在利園後面有一間隱店從來無去過, 就去了.

店子好家庭式, 都坐了很多日本人, 直覺覺得沒有來錯.

不過入來 serve 我們的女士黑口黑面, 而且我同佢講 Aji 佢係唔知我講乜 (唔好玩啦... ), 要我講池魚先知. 覺得有少少不快.

我對 Aji 的鍾愛簡直係到痴情的地步, 所以問我好唔好食都係假. 不過這裡都不錯, 起碼不是有些店子般有鱗或者切到有筋的, 白白浪費了一條好魚.

主打的串燒真是不錯, 不少店舖都拼命地在燒的時候大灑鹽花, 味道濃就是濃了, 不過吃後口乾得過份, 都要買酒水佐之 (當然都是陰謀之一). 這裡卻味道比較淡口, 咸得不太過份, 還食到肉的鮮味. 叫了的雞皮燒得不太脆, 易入口; 雞腎就一般, 反而雞肉及丸子都非常味美, 尤其是雞肉很滑, 推介呢.

之後叫那位女士拎件食淨骨的 Aji 入去炸, 佢黑口黑面地說要看廚房忙不忙. 真麻煩. 早知找好好笑臉的老闆來啦.

之後再加個茶漬就剛剛好. 驚喜的是三文魚茶漬不是用乾的魚, 而是一大片煎好的三文魚弄碎, 不錯不錯.

總的來說, 除了服務的嬸嬸 (我真係唔知係咪老闆娘?) 黑口黑面之外, 食品都對板, 氣氛都好日本, 算是一間不錯的老店子. (更多照片)

Ichiban 爐端燒

地址: 銅鑼灣蘭芳道21號地下
電話: 2890-7580

2006 香港電腦通訊節

不知打從何時開始電腦展變成 model 展? 當然, 花二十元有靚女 model 影何樂而不為? 去影會分分鐘都要一小時收費百多元一位 model 啦. 不少人在新聞組forum 大罵拍照者一大堆淫賊狗公, 但人人都是邊罵邊看, 又好難怪便利都會加印啦. 在現場的話, 你會驚嘆如果每個人的相機及鏡頭的價錢加埋, 分分都可以建成一座會展, 真驚人.

老實講, 場內貨品價錢只是部份很平, 更多是散貨的雜價攤, 難道你會不試不開現兜兜就買隻 LCD mon? 不會吧. 2G SD card 確是很平, 當然囉, 散哂貨讓路等 SDHC 嘛, 你見 CF 有減嗎? 無乜.

都是看看靚女吧.

機場重災區

雖然都預到 "應掛八號唔掛八號後首個工作日" 在機場會幾咁大場面, 番到來才知道完全不是那回事, 滯留在機場的人之多, 你只可以用 "插針不下" 來形容. 最要命的, 是昨天的還未散, 今天的又已經湧來, 任航空公司有怎樣的 contingency plan 都好, 都似打仗咁混亂.

納悶的是, 究竟點解會攪到咁樣? 平時 cancel 班機的都未見過這樣的場面, 還是跟本暑期期間平日機場已經接近飽和, 跟本無空間去緩衝有呢D 咁O既事發生?

有關人士好應該諗諗啦.

軟硬天師 Long Time No See!

入場時都幾大雨, 又要每個人派個面罩, 所以一入場就已經立即開場了. 想唔到個面罩質地好靚, 真係可以扮軟硬超人大打出手.

我好相信基本上所有門票都是內部認購的, 但又發現並不如其他人般個個成樽佛咁坐O係度, 一開場又係企哂起身係咁跳, 仲要係一開始就係握手, 認真始料不及.

究竟個 "concert" 做D 乜呢? 歌當然有唱啦, 但其實大家都愛聽林葛兩人吹水, 當然都無令人失望啦, 拎住兩人 "不和" 的抄作來開玩笑, 笑唔笑得出, 其實係佢兩位先知, 但顯然, 就算係不和都咁合拍, 都算得上了不起了.

CD 中的一首 "妳的生活" 是一首好立體好感性的歌 (林若寧填詞的, 不知為何阿葛話係林海峰送俾佢), 不過加上阿葛的 "感性" 演譯下, 對這首歌又有新的瞭解. 再睇埋另一面的 DVD, 我們都知阿葛是個愛開會的工作狂, 就更明白作他的嬌妻的心聲了. 那個大煙灰缸更是畫龍點精的抵死之作.

另一個場口我最喜歡的就是叫大家亮著自己個電話, 舉高來打拍子, 有創意得來效果離奇地美麗, 真不知為何之前無人想到?

正如盧覓雪在晴朗講過, 整個演唱會任何一處地方, 台上的人的衣裝, 天台的舞台, 都好連成一體, 我覺得, 甚至乎在聽完 CD, 睇完隻 CD 內頁的照片, 加上 DVD, 才會感受到那種好強烈的感覺, 就是 "香港的軟硬天師". 不要 download mp3 吧, 你睇睇隻碟裡面的照片, 你一定會會心微笑.

平心而論, 睇軟硬都只係因為一份懷念, 正如草蜢同關淑怡一樣, 都是懷念 90 年代大家長大的日子, 太平盛世, 百花齊放的日子. 老實講, 十年後你會唔會懷念而家的 Twins?

氣頂 @ 冰燈

有網友話我在 newsgroup 度講在日本見到邊個邊個出了香港人醜, 又唔當面話人地唔o岩.

OK, 咁我尋日行冰燈節時, 見到個老豆將件細路托上去件冰雕度想影相 (有好大個 sign 話不可攀爬). 咁我好心同佢講唔可以放個細路上去咖喎, 點知, 佢屋企人話, 唔緊要啦, 無所謂啦, 達成心願.

我諗佢地只係諗, 都係一舊冰o者, 都會溶咖啦, 駛乜咁緊張?

一來, 如果一個唔覺意, 你個細路坐底時件野爛左, 跌親佢, 你咁又嘈生哂啦喎?

就算唔爛, 溶左崩左又要人地整過, 又係費時失事.

你有無諗過之後的人都要睇咖呢? 你會唔會覺得你為左影一幅相而將你的快樂建築在別人身上呢?

仲有, 你個細路睇住你的所作所為, 你就係佢o既人辦, 將來你的小朋友難教, 無公德心, 就係你自己一手一腳做成.

反對商品及服務稅!

商品及服務稅是魔鬼! 大家一定要大力反對!

點解?

這個稅表面上人人要交稅, 所以公平; 但不公平在, 你就算是沒有收入, 如退休人士, 都要交稅.
在外國, 交了重稅後, 福利都比香港為高, 但唐司長並無承諾對中產的福利有任何承擔.
在加入了這類稅項以後, 政府由於有穩定收入, 因此只會提高這個稅率, 而不會去減少.
香港政府的大花筒性格不改, 如添馬政府總部, 不單止花巨額興建, 拍賣這地皮的收入也損失了. 既然用這幾百億的開支都不面紅, 有穩定收入的話更會變本加厲, 用錢就會更手鬆, 而更加不會量入為出.
香港已經百物騰貴, 再加入這個稅項, 購物支出與日本, 新加坡等地有何分別? 怎樣吸引外地遊客來這個所謂 "購物天堂" ? 在機場退稅的惜施, 一定會非常麻煩, 而且通常退稅都要購物滿某一金額, 吸引力成疑.
這個稅項是否因為不少外國都有, 就要徵收呢? 加拿大亞伯達省 Alberta 是全國唯一沒有省銷售稅 (PST) 的省份, 亞省並沒有因為沒有多幾個 percent 的穩定收入而破產, 反而因為沒有這開支, 加拿大及美國的商人都樂意在此冬天嚴寒的地方投資或工作. 亞省人亦對沒有省稅感到自豪.

其實不少評論都對這稅項絕無好感 (除會計界會因此多了不少生意), 因此我在此請大家都寫一封信給政府,

我不要商品及服務稅!

遊記已經上網

東京笑中有累之旅遊記及相片已放在譚生的日遊記內, 請大家移玉步前往.

Keelia @ Snaphoto

識得 Keelia 其實因為佢曾經問過我日本野, 之後先至發現佢係 part-time model, 又同過佢在 AGS 影過相的, 當然佢唔識我我又唔識佢.

知道佢就快畢業, 之後都未必會做 part-time model, 才發覺原來未跟她影過一次相 (之不過, 其實我跟本無去過影會影相 ... :-P ), 就趁機影一次.

snaphoto 的 stefan 很好人, 都很有耐性的教我呢個無知少年, 原來發覺, 我部機係好難在這些場合影相的 ! @_@

又原來發覺, 其實影 studio 人地乜野都 set 好哂俾你, 你只要 set 番快門光圈, 懂得找對個 pose, 按個快門, 基本上都唔會錯得去邊, 只爭在, 你有無想像力去唔影得太悶呢~

好彩出來的效果仲算唔錯, 只係做了少少後期工作, 現在只是爭在我肯唔肯換 Sony 的 alpha-100 了... $7990... 好心動...

Superman Returns!

Watched Superman in Sydney back then. It is a nice movie, you get exciting thrilling scenes, you get how Lois and Clark's interwinding love relationships, you get not-so-ugly-kind-of-amusing bad guy by Kevin Spacey, and you even get the retro introduction of the 70s. Lovely. The first half hour of the movie is kind of slow and boring just to tell people, now I come back, but other than that, it's quite jam packed with thrillers and love hate relationships dedicatedly mixed together. There are not much spectacular CG scenes, though.

The new Superman Brandon Routh does a good job, he's handsome, look really like Christopher Reeves, and he's 木獨 as well. Kevin Spacey is good as anything else, but I would think of his role is more of comedic than evil.

Yes, and Superman is also very humanish, just like Spiderman the movie, it's a really nice touch, but I don't know if super fans will like.

It's a very nice movie, although not as GOOD as Spiderman II (which I think is the best of the recent remakes of superhero movies), it is an enjoyable 2 hours ride with great actions, and of course, we waited for SO LONG....

(read more for spoilers...)

But I have to complain about the ending. As one of the newsgroup-mates pointed out, the best time where the movie ends, should be Superman's death. The movie should stop there, and give hints to the next episode. But no, he woke up mysteriously, wander into Lois' house and see his son. Yes, this is a happy ending, but this is not a perfect ending in my point of view.

Home sweet home!

In case you didn't know, I just came back from Sydney for my training.

Got a few photos to sharing, the weather was so great that I didn't want to come back.

(Just uploaded some more photos on 2 JUL)

大功告成!

順利將舊的 system 轉戰至新的 Mac Mini !

當中應該仲有少少問題的, 不過睇住先吧 !

而家 server config 係:

Mac Mini CoreSolo 1.5GHz
2 GB DDR2-667 RAM
60 GB 內置 + 400 GB 外置 Raid 1 (差不多所有 data 都保護了)
Apache 1.3.33 (OS X 內置) + PHP 5.1.4 (Entropy 版本) + MySQL 5.0.22

雖然只係 CoreSolo, 但感覺很快. 之前要用 lame encode 電台節目 mp3 要用 20 分鐘, 現在只要 5 分鐘就完成了. 當然, lame 是要自行 compile 過成為 Intel binary. Webserver 都好爽, 無用到 eAccelerator 都覺得很快.

而家就係要 update 所有 web page 的 template 了.

第八日：東京, 回歸

本來早上諗住放行李在京成上野或上野的 locker, 但早上發現個o急實在重得厲害, 都是再寄一箱穩陣. 臨急上網找池袋的郵局, 星期六開的就只見有西武的及 Sunshine City 附近的總局, 取其近, 當然去西武那間. 不過去到, 原來發現那裡是不可以寄去外國的！=.= 唯有走去 Sunshine 旁邊那間集配局才可以, 唯有坐一個站的地鐵去東池袋站再走過去吧.

寄完, 由 Sunshine City 行番去池袋站, 當然, 沿途又買野...

在西武樓上食街去了一間鰻魚飯的店子, 味道都不錯.

東橫取回行李就坐山手線去上野, 本來諗住坐 Skyliner 往機場, 但發現 40 分鐘之後才有一班, 唯有又坐三時四十分的特急, 比 Skyliner 早兩個字去到.

在 checkin counter 放下行李, 終於放下心頭大石了！

臨走時都在壽司岩買了一盒壽司上飛機吃, 總比食爛鬼飛機餐好得多.

終於完成了八日東京做咕哩之旅, 有點怕...

第七日：東京

今日係最後一炮 shopping.

在東橫食左個早餐後就出去寄野. 寄了 EMS, 9kg 要 10200円, 兩三個工作天就送到 (tracking record 在六月三日下午五時已到香港, 比我仲要早, 不過只有星期一才派發吧).

之後行落渋谷, 我去蘋果店, 她去西武, 之後再去了 Mark City 去找 agnes b 買東西給人. 雖然我們都對 agnes b 興趣不大, 但原來日本的價錢不太貴. 買了一個袋 5800円, 之後再在香港看一樣的袋, 要成 $680, 簡直係搶錢！

午餐無任何準備, 突然記得在 Mark City 四樓有間梅丘美登利寿司, 立即上去, 十二點半已經排了長長的隊. 幸好日本人食飯都不會像香港人般磨到席爛都不捨得走, 未到半小時已入座了. 午飯非常便宜, 有兩個 set, 一個係超特選握, 一個係 ladies' special （限賣 30份）, 居然 ladies' special 都仲有, 因此兩個都叫了. 無話可說, 真是很抵食, 而且質素亦不錯, 不想特地坐車去梅丘的話, 去 Mark City 食都不錯喔.

下午再去了原宿一趟去 Snoopy Town. 但居然, 本來諗住去 headporter 都無左件事.

在新宿聽過一個路邊 band 叫 sea express, 久久難以忘記女主音美麗的聲線, 六月三日有個 live, 可惜不能去聽, 在 website 見到 CD 在横浜的新星堂有寄賣, 唯有走一轉去横浜（＊順道＊去一去 outlet). 誰知, 去到新星堂, 沒有得賣. 店員很有心地替我打電話問, 問到最快都要明天三點才可送來, 但我六點半就要起飛了, 哪有時間？唉... 宇多田又買唔到, 今日川嶋あい有個 live 又無去, 要找的 CD 又找不到, 明玩我吧...

晚上差不多十點才回到池袋（坐很快的湘南新宿 line）, 本想在池袋求其找間店就吃, 誰知行行下又俾我見到玄品下關河豚店, 想起舊年飲恨都無吃過河豚, 自然又走了入去.

想起早幾年在新宿店, 服務其實麻麻, 不過今日來到這裡, 侍應住都是後生仔女, 做事勤快, 又好笑容, 印象份增加不少. 最深刻的, 是替我們挾菜落火鍋時見到一條頭髮, 立即將整盤鍋所有東西都收回再另外送一客來. 我們心想, 在香港的酒樓頭髮都食不少吧, 在日本食野真是一萬個放心; 又想到, 日本人好的東西中國人就永不去學, 就只是永遠指著那個傷口罵罵罵, 有無想過, 別人的進步有其道理? 連這小小的細節都如此執著, 中國人有無覺得有點汗顏?

替我們整粥 / 雜炊的姐姐仔好好笑容, 又好 cute, 不其然幫她拍了幾張相. 哈.

第六日：東京

早上去築地食早餐, 由於今日諗住去坐叮叮, 因此在 JR green counter 買東京フリーきっぷ一日 pass. 去到築地, 見到壽司大黑壓壓一大堆人排隊, 大和就無乜人, 行過去８號幢的鮨文又無在內, 因此第一時間在大和門口排隊, 不用十分鐘就坐低了.

今次去大和感覺好似每件壽司都細左少少, 不過都係咁好食. 入去前, 已經見到門口有三位香港的小姐度來度去（似乎是打量點樣食先至抵）, 度左好耐先至決定入去. 入到去, 三個人叫一個餐, 另外仲自點另外一些的. 當然, 我無權理會別人叫甚麼, 不過其中一位塊面劃到馬騮 pat pat 的女子特別大聲, 用一些 ICQ / MSN 英文來叫, 都幾令人側目. 最好少的是, 人地問佢飲乜, 佢就在一間壽司店叫咖啡, 師傅好似跟她沒好氣似的在笑笑笑. 不過最要命的, 是三位小姐每人一口玉子燒, 真是親密, 我跟女友真是哭笑不得...

食完行左一陣場內市場, 裡面買魚的地很濕, 唔掂, 所以無入去. 由於女友之前一晚在 Hot Pepper 內見到新宿一間髮形屋, 想在整整個頭, 因此就坐番大江戶線去新宿了. 找到那間店子, 成間店得一位女孩子叫做去過下讀書懂得少少英文, 就一隻字一隻字 dun 出來同我地講想點整. 我地只係識 pa-ma, katto, hai-raitto, 自然都係雞同鴨講. 我無好氣, 佢地決定左點整後我就自己去了坐叮叮.

因為有張無限 pass, 因此去坐叮叮前都仲有d 野要做, 就是去了北千住的 OI 買六花亭俾我個妹 (有個北海道食品節), 之後去上野影 locker 相, 在 Pronto 食完個 lunch 才坐日比谷線去三ノ輪橋開始坐叮叮.

如果你未知咩係叮叮, 其實即係都電荒川線, 是日本少數路面電車. 就如香港電車一樣都是歷悠久, 但荒川線最特別的地方, 就是大部份路段都是隱沒在民居的後面, 或與車輛完全分離, 而荒川線所在的地區, 都是所謂下町的低下階層的人的住所. 不少人喜愛這種古老的感覺, 跟東京一貫文明先進的印象完全兩回事.

由於其實無乜特別準備, 只係拎住壹周刊其中一期講的跟住去, 見到有野就落車影, 遊園地, 車庫前, 王子站前等等. 由於要趕及五點番新宿, 都無去鬼子母神前及早稻田就走了.

之後在新宿繼續行街. 唔知點解, 住就住在池袋, 但從來都無在池袋行過公司, 我諗我都係鍾意新宿多 d.

晚上在 barcelona 版友講的伊吹牛店吃牛, 今晚很多人, 老闆娘安排了我們坐在樓上一個角落, 前後左右都坐著好多日本人飲到顛又玩到顛. 老闆娘一口流利英文真叫我吃驚, 而店子主打的近江牛都很味美, 入口即溶, 以新宿來講這間隱店真是不可多得, 價錢亦非常公道, 值得一去.

晚餐後好累, 立即坐埼京線番池袋. 不過十點幾的埼京線是神經地多人, 企o係車箱度係可以腳離地而不跌底的.

不過番到池袋都仲有野要做, 就係要 pack 東西寄番香港. 早一年買得太任性, 完全唔知過重為何物, 因此去到機場俾人 charge 左成二千蚊港紙, 肉痛到極, 今次在郵局買定個箱, pack 哂 d 野入去. 個箱要 360 円, 但係俾埋兩條膠紙同一條 strap 俾你, 你可以乜都唔駛買, 只要一把較剪就可以 pack 箱. 條 strap 好離奇的, 佢俾三個扣你, 你依住指示, 將個條 strap 扣住個扣, 拉緊, 圍住個箱繞一個圈, 再扣番落個扣度拉緊, 重覆咁綁三條 strap 就可以, 完全不用任何接著物料或繩結, 單靠 physics 就可綁緊個箱, 仲可以只靠呢三條 strap 就可以成個箱拎起, 真是很神奇.

第五日：伊香保, 番東京

早上食 buffet 早餐 (人地叫 Viking), 雖然我對 buffet 興趣不大, 但原來是全日式的, 都幾豐富, 不錯.

Check out 後再上一次五連髮夾彎走一轉影 video. 大滿足 (雖然我唔識飄).

坐高崎線特別快速去池袋 (1220 發 / 1350 著). 行去 Toyoko Inn check in.

之後落了原宿, 表參道山好多人, 但D 舖都貴得來完全唔識的, 無興趣. 一路行去渋谷.

晚上去新宿的沼津港迥轉壽司. 地方好騎呢, 話係西新宿長途巴士個 terminal 那幢大廈的 B2F, 原來其實係在京王對面的地下街, 你記得 Haegandaaz 的話, 對面行入條巷就係.

沼津港D 壽司比 shion 高級, 比較貴但當然好味得多. 有好大件的大 Toro, 而是日的魚類天天變, 今日有叫サンパチ, 個個都叫, 非常新鮮, 值得去一去食.

第四日：草津一日遊

早上吃過早餐後 check out, 駕車往草津.

中途經過榛名山及榛名湖, 途經五連髮夾彎, 水塔, 同賽車起步的 carpool. 在榛名湖畔食尋日買的湯乃花溫泉扮拓海.

之後經過吾妻溪谷, 遊覽一會, 其實只是路經的, 無乜特別. 在附近的鄉土料理午餐, 價錢比較貴, 又唔想食咁多野, 因此只叫了野菜天婦羅及野菜三拼.

終於抵達草津. CarNavi 居然臨門脫腳, 應該指我們去西の河原公園露天風呂轉左, 但佢就叫我轉右, 差D 出事. 為免浪費時間, 立即在停車場泊下車遊覽湯畑. 湯畑是草津的人用來將天然溫泉水減熱而不改變其成份的獨特方法. 湯畑有很大的硫磺味, 旁邊有個足湯, 立即脫鞋浸, 說時遲那時快, 天又下大雨了, 唯有坐在足湯內繼續浸. 浸完, 乖乖不得了, 對腳突然變得很滑! 是硫磺的功效嗎?

現在有湯畑, 而古時的人就是用拍拍涼溫泉水, 熱の湯就是這樣的一個傳統表演（1500 / 1530 / 1600 / 1630）, 與觀眾有互動, 都幾有趣.

等買票時念念不忘對腳好滑, 因此去了旁邊的白旗之湯去浸浸. 我無去過公眾浴場, 才發覺我不記得帶條小毛巾, 人人都是帶著小毛巾, 洗身又係佢, 抹汗又係佢, 抹身又係佢. 失敗, 唯有硬著頭皮啦. 嘩, 一下水, 乖乖不得了, 熱到極! 熱到呢... 我兩分鐘已經扯白旗, 確如其名.

浸浴完畢, 睇完表演, 返回伊香保溫泉入住松本楼洋風旅館　ぴのん. 去到, 同我講哂唔好意思, 話今晚唔接待客人, 請我們到同一集團的松本樓過夜. 雖然我有點驚訝, 但當然我偷笑啦, 住兩晚溫泉酒店, 今晚仲唔浸餐飽?

松本樓外觀較舊, 少D 人住, 大酒店格局, 個屋頂露天風呂可夜觀星象, 幾正(男士們才可以夜晚去). 晚餐個室食, 比昨晚的酒店更豐富更靚, 唔通真係忙D 就踢哂腳?

浸完貸切, 食了個幾鐘的飯, 又再上屋頂浸一次, 好支力, 睡了.

第三日：伊香保溫泉

尋日做左成日咕喱, 好支力, 又要執行李, 完全無能力晨早起身. 附近食過早餐, 番酒店 check out. 酒店唔俾放行李過夜, 因此去了池袋站找 locker, 原來在中央口有個樓下的 locker room, 有人當值暢錢, 大量 500円 locker, 不過要搬行李行落一層.

本來諗住在池袋坐湘南新宿 - 高崎線特別快速 (10:17 發 / 11:56 著) 去高崎, 但諗住唔夠時間所以轉坐新幹線, 但結果係都夠時間... (新宿亦有直巴往伊香保) 其實 1890円坐到高崎真係好抵, 唔怕個多小時坐硬板座就可以了. 呢條線加 950円可坐 Green car, 不過我覺得無乜意思.

Ekiren 高崎站西口店高島屋前取車.

駕車去赤城附近的陽一郎園農場摘士多啤梨, 節省時間, 用450円上 highway 在渋川伊香保 IC出. 士多啤梨已是水尾, 講不上甜, 但4百幾円食到飽, 都抵番啦. 跟外國不同, 士多啤梨都升起離地一米高, 不用跪在地下摘.

水沢在伊香保附近, 最出名係山水打做的烏冬. 這裡是一條烏冬街道, 在深山內一條街全是烏冬店. 選了最出名的大澤屋 , 烏冬非常香滑彈口, 但我們最欣賞的是那個舞茸天婦羅. 那件舞茸大不突止, 炸得非常香口, 值得一去 (在伊香保有巴士去水沢). 不過留意, 下午四點就收工了, 要去就要睇時間.

水沢駕車往伊香保千明仁泉亭 Check in. 伊香保街道窄, 找了一會才找到酒店.

在專用停車場停了車, 發現有幾架車一齊停. 酒店有專車接上去酒店, 只是幾十秒的路程. 那架小巴居然坐滿人. 原來酒店接待了很多來開晚餐 party 的客人, 我未試過住一間溫泉酒店會嘈的, 今日就試過了.

去了溫泉街走了一會, 居然一個如此出名的溫泉鄉, 條溫泉街是無人行的, 靜到死. 又居然無端端下大雨, 唯有返回酒店. 雨停後, 在附近走了一會就回酒店.

酒店非常古老, 但外觀依然完好. 貸切風呂其實同時也是用來沖涼的地方, 有風景睇, 真不錯. 露天風呂就比較細, 不過都幾優雅.

晚餐就比較普通, 印象不是太深, 而且樓下的卡啦 OK 很大聲, 對住過不少溫泉酒店的我真是奇遇.

第二日：東京

晨早 7:30 時到著 - 青井兵和通り商店街朝市

在JetTV 睇到這朝市, 在東京一個平民區內, 每月第四個星期日7點至9點在商店街內有朝市, 有好平的食品, 很熱鬧的. 剛好踏中這天, 便去了. 青井是一個住宅區, 平常人是不會去的, 要去的話只要找到 つくばエクスプレス Tsukuba Express 去青井就是.

其實朝市是附近商店街的店舖及居民擺檔賣東西. 300円一盒菜飯, 50円一件牛肉球, 難怪四處都排哂隊. 不過最有趣的是看人們帶著狗出街, 自家的狗都扮得靚靚, 好正.

不過 8 點開始就下大雨, 落呀落呀, 結果不少人收拾走了, 雨停了, 朝市已是冷冷清清. 排隊買了個菜飯吃就走了. 如果好天的話, 一定好好玩.

朝市完畢, 去了松戶

其實去松戶只係為了近近地攝時間, 當然, 松戶的目的只是 Bandai Museum. 我不是動漫迷, 所以只是入了影影相, 看看模型就走了. 當然我有想過換件聯軍制服自拍一番, 但... 算吧.

本來想著去 Family Mart 買宇多田ヒカル今日發賣的 concert 票, 但search 極都找不到 record, 唉, 失望.

女友去了附近一個庶民 shopping centre, 掃了不少理應在香港好貴的平貨.

之後去 Garden Walk Outlet / 幕張 Messe

經過南船橋見到同加拿大的一樣大的 IKEA, 好多人去, 真熱鬧.

去到海浜幕張第一件事就係醫肚. 在站的另一邊找到一間壽司店, 食了很平又很正的壽司, 再加ウニ同蟹腳壽司, 埋單都係四千円, 好抵.

我就去了 Messe 睇 Comike, 女友就在 Garden Walk 繼續掃貨. Messe 的 After GW Comike, 8 號館, 700円, 其實主要是一個畫漫畫的友好(同人誌?) 及 cosplayers 的聚會. 我講過我不是漫畫迷, 漫畫唔識睇, 但相就識影, 因此謀殺了不少 card memory (留意會場內只有同 cosplayers 就可以影相, 會場內其他任何地方都不可以). 如果一樣場合在香港一定是相機大炮比人仲多, 但這裡可以好舒服的影影影, 你識講的話, 更可以同 d cosplayers 傾傾計 :P

在 Messe 附近有好多團體在跳舞, 有小朋友,有 o靚仔o靚妹, 更加有不少師奶參加. 我找不到是甚麼一個節目, 但見到有幾十人一齊跳舞, 好壯觀.

去 Messe 當然要去 Garden Walk Outlet. Shopping 唔駛寫嘛?

可能我真係好耐無 shopping, 見到D 男人衫真係好鬼死靚, 因此不停的去買衫, 恤衫, 鞋等等. 各位男士要留意 NextDoor 的 Takeo Kikuchi, 附近的 Gobster, Fair 7 的 Michel Klein Homme, 真係好鬼正. 各位去 Garden Walk 不要只是留意 agnes b, 其實內裡有很多寶藏的, 留心一下, 一定執到筍野.

Shop 到忘哂形, 只好拎住一大堆戰利品去食鐵板燒.

晚餐係赤坂 New Otani 酒店內的石心亭

New Otani 真係好大, 大得有點驚人, 在高貴的赤坂地區, 還有一個很大的日本庭園, 很難得 (庭園影結婚相都好正). 石心亭就躲在庭園內, 雖然得 24 個座位, 但內裡有不少外國人; 跟師傅講英文是沒有問題的, 問題是, 你記得要早些少訂位.

鐵板燒是兩個 course, 一個貴D, 一個平D, 我們點了便宜的那一個 course, 其實都只是 13000円左右, 在香港的千登世都是差不多價錢, 但這裡是正正經經的高級和牛, 有很嚴肅但愛說笑的師傅, 有很華麗的手勢, 當然跟只求量不求質的香港店子不一樣了.

鐵板燒的內容, 無需要提了, 只要是一句: 你去試試吧, 一定會永誌難忘, 絕不會後悔的. (美中不足的, 是居然又聽到一把香港廣東話大大聲講電話!)

身第

第一日：東京

京成線＋山手線

京成本線太慢了, 拎住件大行李擺來擺去, 都幾辛苦. 都係俾多 920円好過.

池袋 Hotel Theatre check-in

乜地圖都記得整, 係唔記得搵 Theatre O係邊. 一路落住大雨, 本來諗住打的, 的士話唔得, 原來係入唔到. 因此落住大雨行去酒店, 雖然五分鐘的路都行得好辛苦.

新宿行街

雨大到顛. 落去 Shion 食壽司, 唔駛排隊, 雖然唔係咩大美味, 但100-200円一碟新鮮大大碟壽司, 總比食峰好好多. 發覺家陣 OI 係開到九點, 行公司行到八點半先. 好耐無行公司, 發覺好多正野, 又平過 D 水貨店好多. 買!

晚餐つな八

依然咁正.

吉隆坡小遊記

在吉隆坡公幹一星期. 我係大鄉里, 未去過 KL, 好似入左大觀園咁.

因為我在機場工作, 所以首先發現早我地一年開幕的機場同香港的很相似, 有大玻離幕牆透明電梯曲線的屋頂寬闊的空間, 其實配套不錯, 起碼乾乾淨淨, 有條有理, 保安都算嚴.

再發現原來個樣似華人的, 就 99％一定識講廣東話, 不過呢, 佢地同樣地又識華語/國語/普通話, 等我同我台灣同事汗顏. 再加埋英文, 馬來話, 甚至福建話, 真係乜言語都掂, 真勁.

由於幾日都要住在機場酒店, 所以都幾悶. 機場酒店是在附近的, 不是香港那個在旁邊, 而是有條很長的天橋連接（比中環站至香港站還要遠）. 酒店有架車仔可以送你一程, 不過坐唔坐到都係講心情的. 坐到的話, 行六七分鐘的路程就只要一分鐘左右. 酒店都係一樣那種東南亞的大房間, 有個大泳池, 有說是東南亞最好的機場酒店, 咁我又信o既.

我鐘意去機場二樓個 food garden 食野, 平好多, 有兩間食唐人野, 有間有個大件嬸嬸的, 食的好廣東 feel 的炒粉麵飯咁, 幾好食的. 旁邊有個食雞飯的, 當然唔係 SG 那種, 不過都仲可以. 但我又留意到佢地好興飲美綠, 唔知點解呢？

之後搵左一兩日出去省城, 來回機場及 sentral 站的 express 車票 70 大圓, 貴就是貴d, 無辦法, 鬼叫自己鍾意四圍去. 在 sentral 一下車就是各大交通的交匯處, 要坐乜車有乜車, 繁忙非常. 要去雙子塔的話, 在這裡坐 Purat 的 LRT （同曼谷的 LRT 差不多一樣）去到 KLCC 站就可以. 我又留意到閘機有類似八達通物體的東東, 但是售票卻是很不先進, 那個售票機是沒有找續的, 沒零錢嗎？只有去售票處排隊. 排隊換來的是張票紙, 究竟坐車的有否出貓, 無人知.

而我, 對坐 KL Monorail 更大興趣. Monorail 雖然慢, 但可以睇到市內風景, 又可以坐在車頭看人駕車, 實在一大樂事. Monorail 站在東面出口的對面路, 經過一排似女人街的攤檔就是. 我先去 Bukit Nanas, 下車就是 Hard Rock Cafe, 先買件 T-shirt（個人喜好而已）, 再沿車路行回頭去 Bukit Bintang. 沿途都有很多高級酒店, 露天的 bar 同餐廳, 真係一個好西的蒲地方.

終於行到 Bukit Bintang, 站的一邊有很多 shopping center, 有間叫 Lot10 的, 有 Isetan, 那邊還有不少名店, 仲見有間 LV 不過裝修緊. 呢度新開的地方叫 Bintang Walk, 有閒（同 $）不妨在此磨一個下午. 因為睇唔到有乜好食, 我就選擇在此路邊一間意大利餐廳食 dinner.

不過唔知係行得太熱, 還是我跟本在病中, 無乜心機食野, 求其食左就算了, 留了一大片牛, 真係罪過.

再拎起地圖, 赫見站的另一邊行過少少就有個地方寫著 hawker stalls, 於是急急行過去看看. 原來是我很喜歡的掃街檔口. 一塊塊招牌全中文, 寫著甚麼魚丸粉, 蕹菜炒乜乜, 真係口水都流埋... 可惜無福消受了（當然, 呢度食我都開唔到單 claim 公數, 哈哈哈哈）. 原來這裡就是很出名的 Jalan Alor 食街, 不怪得如此熱鬧. 最後終於找了一間吃了碗肉骨茶, 好香, 那件肥豬肉好正.

可惜食完之後番到酒店成晚喉嚨痛得厲害... 太熱氣了...

番去時見到一檔車仔檔, 烚下烚下, d 食物有冰鎮的, 幾專業 :P 行過少少見到一位坐輪椅的女士在穿一些很有趣的飾物.

English version...

I went to Kuala Lumpur for a while week for business. Haven't been to KL for my whole life, I looked really stupid as if everything were completely new to me.

Because I work at the airport, the first thing I noticed was the airport really looks like its 1-year younger cousin, the Hong Kong International Airport: big shiny windows, transparent elevators, spacious check-in areas, clean for the most of the spots. Really not bad at all, and the security seems fine too.

And then I found that 99% of the person who looks like Chinese, can speak Cantonese well. While in the same time, these people can also speak Mandrain as well as English, Malay, or even FuJian, so impressive. My taiwanese colleague was also stunned.

I have to stay at the airport hotel so it's pretty bored. The hotel is close to the airport but not like the one in ours that is just a footbridge away. There is buggy service that takes u from the terminal to the hotel for only about a minute, but only when YOU CAN CATCH THE buggy (no schedules, of course). The hotel room is usually found in SE Asian hotels, big and spacious. The hotel is also equipped with a nice swimming pool. I was heard it was the best airport hotel, i think so too.

I really like to go to the Food Garden at the 2nd floor of the terminal. very cheap, ample selections. Two of them serve chinese food (or like so), one is Cantonese style like noodles and fried rice, another one is chicken rice, but not like those in S'pore. I reckon the people here like drink Milo as well, interesting.

Went to the city one day by taking the express train from airport to sentral, but it costs you a hefty 70 bucks. Yes its expensive, but well what can I say, I like to go everywhere.

Sentral station is the place for traffic, it's hustle and bustle with people everywhere and they change trains there. If you want to go to the twin towers, just take the Purat LRT to KLCC station.

I reckon there is a thing like "Octopus" on the toll gates, but the stupid thing is that the ticket machines only accept exact change, if you have no change, you are out of luck and have to line up at the ticket counter. You get a cheesy paper ticket in return, who knows if u can cheat it for anything.

But I like the KL monorail more. Yes it is slow, but you can see the city sights from above, and watch the captain drive the thing, nothing more fun compared with this. The monorail station is just opposite the big sentral station, you will see it after crossing a bunch of stalls like "Woman street".

I went straight to Bukit Nanas, where the Hard Rock Cafe is just below the station, to buy T-shirt (which is my own personal favorite). And then I followed the railroad and walked back to Bukit Bintang where all the goodies are there. During the walk I saw a lot of roadside bars, restaurants and discos and such, a lot of foreigners are gathering around, so much fun.

Finally after a half hour or so walk I arrived at Bukit Bintang. On one side of the station I saw big shopping malls like Lot10, there is an Isetan too. I also saw LV as well, but it is under renovation. the place is called Bintang walk and if you have the time (and $) it's a nice place to spend an afternoon. Since I couldn't find any place to eat I settled down at a roadside Italian restaurant for dinner. But then, I don't know if I was too hot walking or sick, I didn't have the mood to eat and wasted half slab of the steak. so pitty.

After dinner I picked up my map, where I suddenly noticed that at the other side of the station there are hawker stalls on the road. So i hurried there and found that it is really my heaven, outdoor roadside food stalls with noodles, veggies, stuff like that, all in Chinese written on the shining florencent plates that drew all my attention. oh well, too bad I was in a bad shape I would try every one of them, but i finally settled down in a shop to have Yoke Kuat Cha. It's not at all spendid, but good enough for me. The pork is fatty yet tasty. haha. I noticed later this place is called Jalan Alor and is famous for roadside food.

Oh well, the bad thing is that I had a very bad sore throat that night, maybe it was too "heaty". Yes, that's all about it, didn't have time to travel around.

PS. I was adviced to buy Harrod's bags in the airport, which it has a store there. I immediately spotted a shop beside the train stop in the departure area, but I haven't noticed there is one even bigger in the satellite terminal. But then, the bag selection is quite slim, only can satisfy but not all requests. It is a bit cheaper then they were in "watergoods" places in Hong Kong.

唔多好盞

晚上食飯臨急臨忙改地方, 苦思不下要一些清少少的食物, 結果想到了美麗華的客家好棧. 當然是立即打電話訂位, 但對於稻香系的酒樓, 訂位的結果只是這句：「唔好意思, 訂位滿了, 一係八點半, 一係早少少來等位吧.」實在真是很懷疑其真實性, 因為都聽過有故事係去到酒樓居然是無人的.

唯有六點半去到吧！去到, 果真是很多檯都坐滿了, 想不到這樣早就這麼多人食緊晚飯.

坐在門口的位置的卡位, 但唔知是否西人坐的呢？還是設計的是西人呢？檯是高了起碼兩吋, 要坐得很高, 手托得酸痛才夾到食物.

見附近的人叫了梅菜扣肉, 於是叫了一客. 梅菜很爽脆, 很有咬勁, 扣肉就肥瘦適中, 不算得上是太油, 於是立即叫了飯, 用汁撈飯, 都唔錯.

之後就等.. 等... 等.... 飯都食了一大半, 近廿分鐘都未上第二道菜. 之後的蒸饅頭就先來了.

之後才來了鹽焗 / 水雞. 普通過不普通, 不說也罷.

有提過碗飯已食完大半嗎？有位阿姐見我對手只是停一停, 立即走來搶去我的飯碗.

「喂！未食完咖！」

「哦, 你可以用過第隻碗嘛...」

搶番自己碗飯時, 其餘的菜又來了, 有個東江釀豆腐湯, 幾舊釀上去的肉, 受小小震盪就跌了下來, 結果, 無一粒是完好的（我連相都無影）. 再來了瑤柱鮮菰釀小甜瓜, ok 啦. 之後再來一個蛋黃炒桂花粉絲, 一條條的大豆芽, 很新鮮, 新鮮到係未炒熟的, 還有一浸浸腥味...

難得的是, 我家人只是食, 咕嚕了兩句, 又無叫人換又無叫人炒過. 更難得的就是, 月頭我提議去 Fusion, 只是開了樽要錢的 Perrier 而無水喉水供應, 就哦我哦到今日, 又上上次我生日我提議去鏞記, 只是碟燒鵝差了少少, 就彈了幾年彈到我都唔夠膽再講我生日去邊度食飯. 同人唔同命, 奈何.

說時遲那時快, 那位阿姐又要收我地仲食緊o個碟野.

「喂！未食完咖喎！」

「仲以為你地食完啦嘛！」

哈, 你問一問我地唔駛死咖o者？永遠都係d 有大陸口音的女待應最愛自把自為, 卻又是成間稻香都係這類師奶做伙計. 我都仲未同你講我去潮樓的激氣野....

算.. 食完... 埋單四百蚊有找, 唔怪得排哂大隊啦.

之後的一整晚, 口乾得要命, 連吞四五杯水都唔掂. 可能呢, 唔係開 Perrier 的餐廳, 就係咁上下了.

南亞餐廳

在利舞台對面的老舖關門了一段時間, 以為不會重開, 卻原來發現在原店附近的禮頓道開了一間新店. 裝修, 餐具都很現代化, 一片純白的, 十分討好. 以前很串的老伙計都不見了, 取而代之是有活力的年輕侍應. 雖則老伙計的老不是大問題, 不休做的那種性格卻是萬萬不能, 喜見老細都有點兒自知知明.

店裡都已經坐滿人, 還有不少訂了位的檯, 真是熱鬧. 叫的, 都是由細到大都食的海南雞飯及牛肉會意粉. 雖然, 現在食的, 很多時都是叫作正宗的雞飯, 正宗的意粉, 但偶然食一些很香港風的外來食品, 其實都唔錯. 最難能可貴的是, 那些油飯, 那碗其實都幾味精的菜乾雞腎湯, 那些很濃很豉油味的番茄汁, 都是伴著我們長大的食品, 依然都是一樣的味道.

唔會似皇后餐廳般高不可攀, 南亞其實是在銅鑼灣諗唔到食乜下總會想起的老朋友. 為著香港僅有少少本土文化, 都要值得去支持一下吧.

養不教, 誰之過？

今朝出街食早餐, 突然聽到好大聲的 "我的驕傲", 好似d mp3 鈴聲咁, 播左好耐都唔停. 自然反應就係周圍望下究竟邊個唔聽電話啦, 原來係隔離檯的小朋友拎住老豆部 PPC 電話用 speaker 來播歌....

咁一直望住佢, 佢一直o係度播, 唱呀唱呀, 副歌都差不多已經唱左兩次, 都差唔多完了, 唔通真係開心到要請全餐廳的人聽佢播歌？難得佢老豆老母又唔理佢喎, 由得佢嘈住成個餐廳的人, 兩個自顧自在食野. 之後個老母先至講左句, "細聲d 啦, 你知唔知好嘈咖？"... 之但係咁, 到我地走, 個o靚妹都仲係o係度做緊佢個 DJ.

即係有無人發現你身邊好多人都係咁？坐地鐵時係都要玩電話鈴聲, 試完一首又一首, 仲要係完全唔好聽o個隻, 好似覺得無乜問題咁; 又比如, 玩 PSP 係唔戴耳筒的, 由得周圍左右隔離的人聽你打機. 掉番轉去日本, o係車箱度係無人講電話的, 即使係有個 law 話唔可以, 都無人去 challenge.

點解香港人會咁自私呢？係咪即係咁先至係有型呢？一個小朋友就如白紙一樣, 你父母不去教導他們甚麼是正確的價值觀, 他們就會覺得是理所當然, 就任憑老師朋輩都未必可以影響到. 難道真係因為子女是金笸籮, 就不用去教嗎？

又由此想到曾在網上睇過的一段新聞, 小女孩收到一個公司的 canned reply 就大發雷霆. 佢父母有無想過, 是否小朋友都是在溫室長大了, 完全無能力去接受一丁點兒的刺激？比這封 canned reply 更險惡的事十常八九吧. 為甚麼不去引導小朋友去解讀這封信的含意只為保護自己公司免受有可能發生版權問題, 反而訴諸傳謀, 將整件事斷章取義？

復活節

今日是 Good Friday, 去了聖瑪加利大堂的救主受難紀念禮儀.

有時聽人祝人 Happy Easter, 真係覺得有點異相. 講到尾, 復活節係為了紀念耶穌受難, 三日後由死者中復活, 其實唔算得上係一個 "喜樂" 的節日. 當然, 一個 guarantee 一定有個 long weekend 的節日, 對大部份人來講, 都算是可以了.

有好多人都問過我為何復活節年年不同時間呢？復活節計算的方法係每年的春分後月圓的第一個星期日, 可看看大家的百科全書就一目了然.

Boot Camp

noun

a military training camp for new recruits, with strict discipline.

and now...

a training camp for Windows switchers!

實在唔敢相信, 早兩日各大 forum 先至被人炳無乜~~愚人節~~ 30 周年慶祝活動, 今日就已經收到蘋果 30 周年的大禮, 就是蘋果電腦昨日 officially 容許用戶在 Intel 的 Mac 安裝 Windows XP . 使用正在 public beta 的 Boot Camp, 用戶可以非常容易就間開一個 partition 去安裝 Windows, 並裝上之前在 Boot Camp 中整好的 driver CD, 就是完完全全是一部 PC notebook! （當中還有些裝置是沒有 driver 的, 不過都不算太重要了）

我覺得, 這點最重要就是, 到現在 PC notebook 除了 SONY 之外, 外觀設計都還是沒有任何 taste 可言, 一直以來都有人問我, Mac 可不可以行 Windows, 始終他們覺得, Mac 係好, 但係要我放棄 Windows, 又似乎是不可能的事. 這回就好了, 一雞幾味, 有部形仔的 notebook, 可以玩好 powerful 的 Mac, 又可以用 d Mac 未有的 Windows 軟件, 簡直係 godsend.

今年蘋果絕對會對 PC 的 market 有重大的改變, 還看看 Mac OSX 10.5 的到臨吧（呀, Windows Vista 要下年先出現呢...）

Crystal

而家d 小朋友真係好鬼威咖o者, 細細個上台唱歌又唔怯場又多動作, 仲要係真係唱到歌（雖然離真係識唱歌仲有一段距離）, 呢個小妹妹係又一發現, 雖然 Karen 勁好多, 但係佢造手有齊, 又唱衛蘭 d 高九度的歌（點解咁多小妹妹鍾意 Janice d 歌？）, 又有棚大板牙, 真係只係假以時日o者.

點解我細個乜o個陣都唔知咖呢？

Happy Birthday Apple!

今日是蘋果電腦三十歲生日, 一間公司三十年, 說長不長, 說短亦一點也不短, 更重要是, 一間公司的三十周年居然大小雜誌網站 fan site 都恭喜一番, 才是難能可貴. 一間公司能有一種不言而喻的凝聚力, 除了產品的吸引力外, 就是公司的文化, 對社會的承擔, 正是所謂有 heart, 才會取得群眾的信任.

有 heart 者, 亦是對周圍事物存有關心, 比如這件事可知一二; 一間公司能賺錢之餘, 亦對社會有所承擔, 才能令人令眼相看. 這些這些, 都不是一般公司所能在金錢上所賺到的.

在此, 希望蘋果能日益壯大, 蒸蒸日上, 不要令各路 fans 失望呢.

加拿大照片

可能你沒有留意, 我其實已經在 gallery 內 post 了在加拿大旅行的照片. 有閒的話去望望.

自作自樂

相信無乜人留意過這張 CD, 但我可以講, 你不買這張 CD 就是你的損失.

單看 CD 本身, 頂多只有王菀之及藍奕邦名字叫熟悉一點的, 再之後就有個叫金培達的最近拎了一個獎, 哪有甚麼正?

正就正在所有歌就是新近的作曲人作詞人原裝自己唱番的 demo, 其實很多都是十分熟悉的流行歌, 只不過歌詞是原作的. CD 亦有解釋一首歌的創作程序, 原來很多時歌星選歌時, 這些 demo 歌曲都只會要曲不要詞, 而另外會找人填上適合那位歌星的詞.

所以聽這些原曲就有種很截然不同的清新感覺, 很 raw. 最難得的是, 原作者的歌聲其實一點也不賴, 金培達的歌聲跟學友有得揮, 謝杰就唱得比鄭融更有感情 (雖然鄭小姐的小腰都很吸引), 其他如張佳添, 張繼聰, 如果你有買 CD 的話, 你都見到他們經常在歌星的背後支持著.

如果你都好似我咁支持原作歌曲, 不如就直接支持這些在歌星背後勞苦功高的新進作曲作詞人吧.

Life continues...

本來上個月想寫這 Eason 的 CD, 但結果要到現在才寫到....

雖然是一張 EP, 但內容豐富, 比夾硬塞十首歌出來的 CD 更耐聽. 從來 Eason 都不甘於做一些 K 歌 CD, Life continues 就將這個精神發揮得淋漓盡致. 看看有甚麼: 有陳生自己本人不甘受傳謀擺佈但無奈接受的低調; 有好有二奶偷情 feel 係男人先會明o個種感受的 人車誌, 有死黨各自分飛的無奈的 最佳損友, 有不滿世事樣樣錯配的 暴殄天物, 有偶然相遇一發而過的淡淡激情的 落花流水, 最後更有四句歌詞就道盡初為人父心情的 大得太快. 差不多就是一個男人的一生的寫照就在這六首歌內, 不由得拍案叫絕. Life, 不是就是這樣嗎?

全碟我最喜愛的不是 Eric Jerald 的 Snowman / Swing reborn, 也不是 Wyman 包辦差不多成隻碟的歌詞, 而是等了很多很多年陳生的曲 + 詞 (大得太快). 四句歌詞, 幾個 chord, repeat 三次, 言簡意賅, 不得不佩服得五體投地. 你作多 d 歌寫多 d 詞啦, 好嗎 ? 我唔需要你拍廣告去日本做主持啊, 夠啦, 我只要你的歌, 係咁多, 好嗎 ?

iPod HiFi

今日第一次去了 Macitizen 的聚會, 看了全港第二次公開展示的 iPod Hifi.（第一次係今日的新聞發報會喎...)

部機甚新, 好似都只是剛開箱的. 入面非常簡單, 一條電線, 一排的 port adaptor, 係咁多.

件野幾墜手, 其實真係絕難拎出街, 比起 im7 巨得多.

可能真係剛開聲的關係, 部野 d 聲非常萌, 低音很勁, 但很濁, 高音不算悅耳, 而且好似左右聲道的分野都比較含糊了少少 (當然, 場地比較空曠, 又多人, 不易試得真). 要試真章的話, 真是要 run-in 多一陣子. 不過, $2800 確是比較昂貴了一點, 我就真是不會買了.

同時試玩了 MacBook Pro, 1G Ram 用 Photoshop CS, 雖講不上爽, 但其實跟我部 iBook 1.33GHz 差不遠, 可以一用. 跑 iMovie 就真是令我驚嘆了, apply d effect 同 drag and drop 都差不多是立刻就完成, 快得很.

不過我發現到的新事物, 就是智德中心的 forum 很適合開會. 可能以後日遊谷都會在這裡開都唔定了.

人為出錯

平時好少會睇記招的, 今日食飯時睇住衛生署記招, 真係有點噴飯.

那位仁兄已經腳震震似的, 還要不停地打官話遊花園, 話乜野領錯遺體好可能係 "人為出錯". 吾, 唔係人為出錯, 咁會係乜野出錯呢？唔通屍體會自己走來走去吧？講了幾十次做乜都有 "既定程序". 當然, 大家都知道, 當工做到麻木的時候,你會發覺你會慢慢地偏離了所謂既定程序, 尤其是這類厭惡性衙門. 做管理的, 最跟本的就是如何免除了這些繁文褥節, 因為越少呢 d 一大堆 "既定程序", 出錯的機會就越少. 有事故苦主都講要電腦化了, 真不明白到今時今日, 都仲可以有這般不文明的事發生.

相機好, PS 好, 又如何?

最近有幸見到幾位完全無關係的朋友的結婚照, 都是外影的, 相機是夠照了, 個個拎住 1D MKII, 千九幾萬 pixel, 數萬元的身價, 鏡頭更係無可比擬 (呢個睇唔到, 唔知). 但係照片呢, 一係暗淡無光, 一係背光到暈; 構圖呢, 唔係人頭生樹, 就是背景凌亂, 旁邊多了幾個人影; 最叻的就是長焦距大光圈, 之所謂淺景深, 以掩蓋自身連幾時要加幾多 exposure 都仲未知的無知. 最抵死的是, 無人會用反光板之類來令人面更光亮, 新娘子有上妝仲好少少, 男的全都灰頭土臉, 一個生意失敗的樣子.

你講, 以上那些, 有幾多是可以用 PS 執的?

如果係熟朋友幫手影的, 還可原諒, 但原來發覺是真金白銀一萬幾千元咁俾人的. 我心諗, 你俾一半我丫, 我自家部 A2 都影得正過佢. 難得的是, 他們覺得那些相, 沒有甚麼大問題啵.

雖然我自家都不算大屍, 都有靠 PS 同影 RAW 去修補一下拍照時的缺陷, 但實在, 你執得幾多? 你有幾多時間去執? 所以慢慢地我都是諗清諗楚才按下快門, 結果是現在執相都只是稍稍調一調光度, 就已經完成了 (Gallery 內的相 resize 了 640x480 之後都 USM 過的, 會更 sharp 一點). 那種成就感, 好像很陌生但又親切.

兩日澳門食食食

Weekend 去了澳門一趟, 兩年無去過, 完全兩回事.

遊記懶得寫了, 照片在 gallery 裡.

給關淑怡的信

Hello Shirley,

昨晚是我等待好多好多年的大日子, 你終於再走上紅館舞台上. 我雖然三十歲人, 仍似一個小 fans 般大叫大嚷, 為妳拍照, 口哼著每首每首很熟悉但又多年來無聽你現場唱過的歌 (那次拉闊, 可惜你只唱你喜愛的英文歌, 唔夠喉呢！）, 你可知, 多年來你只出得一張國語專輯, 其餘時間就完全失蹤了一樣, 這個演唱會得來幾珍貴呢！

妳的演唱會, 貫徹了一妳一向的形象, 簡樸但美麗, 沒有多餘的修飾, 但卻令人回味無窮. 妳愛完美的性格, 更是表露無遺, 由演唱會的 rundown, 起承轉合, 到選擇的曲目, 歌衫, 舞台設計, 無不是細心挑選, 簡單, 精煉, 放在妳身上卻是理所當然的恰當. 無開金口多年, 妳唱現場的歌依然是那樣令人心醉, 跟現在極紅的那一班小妹妹完全是兩回事.

別人喜歡的難得有情人, 一首獨唱的歌, 繾綣星光下, 雖然我也很喜愛, 但我更喜愛妳的另類快板改篇英文歌, 到現在聽來, 依然有形得很, 但又見個人風格, 可見妳選歌的品味比很多人走前了很多, 也歷久不衰.

在演唱會中妳抱怨傳謀屈妳這般那般, 令妳很不快. 算了吧, 你都不是唱歌給它們, 為何要跟它們賭氣？我們歌迷早知道妳只喜歡唱歌, 妳就倒不如只花心機去造更多好歌曲給我們, 一年一張也好啦, 那需跟無關係的人去傷自己？反過來說, 妳不合群, 不圓滑, 我行我素的性格才是令我們欣賞的地方; 妳敢承認妳有一個兒子, 妳敢不施姿粉現身電視或 video, 才是我們所喜愛的原因.

你知道嗎？我中學時你來我校表演時已見過妳, 那時我音樂室躲在琴後看著初初出道的妳, 印象深刻得現在也記得, 到現在, 已是差不多十多年的事了. 人生不會有幾多個十年, 唱多些歌給我們這些歌迷吧, 不要讓我們再等待吧, 好嗎？

又美麗又可愛

幾有意思的歌詞, 出自 Wyman 手筆, at17 的歌.

再當我聯想起林二汶, 很絕.

願有天連大門鎖起都有人為我開
容易到隨便單一單眼就嬴盡喝采
沒那些標準的美貌若祈求被愛
路途或苦一點車也未必肯載
然而後天假使不信命
總有某件事情能令我
將吸引力叫醒
沒有空回去
對鏡自憐等不足變可愛
相貌原是與生俱來性格尚能改

就算長得不美麗
亦有一點可愛吧
就算天生不是可愛
亦能平凡得優雅
我們毋需將光圈也除下
寧垂下一雙翅膀也不怕一下

沒似畫眉目才不等於我們沒氣質
成就了自己一種風格亦能被記得
沒那些漂準的美貌仍然能被愛
路途或苦一點不過值得參賽
明眸皓齒找不到替代
不過美麗事情無絕對標準有待我改
沒有空回去對鏡自憐表演一臉感慨
怨恨神待我不公平如何能令人愛

就算長得不美麗
亦有一點可愛吧
就算天生不是可愛
亦能平凡得優雅
我們毋需將光圈也除下
然後自己都信無法改變一下

美人如花苦差等我來吧!
從頭學識可愛原來是由人造化

假道德

聽緊她他她打到黎, 阿鄒生話佢而家無買碟了, 因為都係借朋友的 CD 過落 iPod 就算了. 咁同偷野有乜分別？佢做乜大聲疾呼叫人不要買老番？

假道德.

情人節

在街上見到男人人手一札札的鮮花, 都是替女伴拎住的.

好像是很千依百順似, 但你想深一層, 一千幾百買一札花送俾人, 原來拎成晚的又是自己, 是否有點搵笨?

在電視見到辦公室 OL 大大聲話收到花好威咁, 真係令人失笑, 花, 一年四季都有, 如果愛你的話, 幾時都係情人節吧.

同事話, 買埋花, 送禮物, 去晚餐, 女友都仲唔 happy, 原來呢, 自己決定好的, 呢樣又唔想食o個樣又話無興趣; 千依百順呢, 要女友決定呢, 就話你無主見. 究竟女人想要甚麼?

其實老實講, 男的要細心睇睇女人平日愛甚麼, 才能知道女人想要甚麼; 但女人呢, 唔該你地都唔好咁醃尖吧. 有甚麼不可以開開心心一起分享的呢？難道要發哂小姐脾氣之後又要男人 tum 番先安樂的嗎？不是個個男人都愛耍呢套的, 再要鬧交就無謂啦.

iPod 在機場

機場有這樣的一個 iPod 櫃位, 好有型的說.

睇真d , 仲有部 iMac o係度o忝.

如果想睇睇的話, 去 1 號閘口吧.

iPod Video

用左成年 iPod Shuffle, 終於忍唔住買了 iPod with Video, 黑色的, 60GB, 非常型仔. 部機都幾墜手, 不過無之前的 iPod 咁 bulky, 30GB 版會比較薄, 但觀乎我的行徑, 30GB 遲早唔夠用, 因此都是俾多幾舊水要部大 d d. 聽聞腦場話完全無貨, 在百老匯買.

有個 screen 真係完全唔同, 個 screen 本身非常明亮, 比我的 Treo650 明亮很多, 因此雖然說解像度是 320x240, 質素亦非常不錯. 睇相尤其漂亮.

放片都非常不錯. 在 iTunes Music Store 內買的自然無問題, 我自己都用了 Handbrake, PSP Video Express 等軟件過了不少電視及 DVD, 效果都很滿意.

不過聽歌都仲係我的最大興趣. 雖然 Shuffle 的音質都不俗, 但相比起 iPod 真是差得遠, 有 d 高音的位shuffle 會非常肉酸, iPod 就做得很細膩, 真無怪是最佳的音樂播放器. 而家就係拼命地 scan CD 的封面, 以及周圍找歌詞放入歌內. 咁樣, 一部機拎出街, 又可睇片, 睇相, 聽歌, 就算一時要拎起枝咪唱歌都可以記得歌詞, 係咪好正呢~ 哈!

不過我不喜歡它顯示歌詞的那一版, 除了英文是好看之外, 日文同中文都非常核突, 跟在 menu 內的字體相差很遠. 蘋果, 唔該 update 一下吧!

(你可以見到 d 字是不平的, 上上落落, 十分肉酸!)

此外, 我最不喜歡的就是如 iPod nano 一樣, 個 screen 一除了保護膜就花了, 不是一條花痕那種, 是磨花了膠面那種花. 很要命! 一張保護貼是不可避免的... 唉...

旅遊雜感

意外年年有, 今年春節就開個大的, 都幾慘. 有時意外o既野好難講, 仲要發生o係好美麗的埃及渡假區, 令人沮喪. 唯有寄望死者可以安息, 生者盡快復元吧.
有團友高呼香港旅行團見死不救. 很同情, 但我相信那時那刻可能別人亦有難做之處. 老實講, 香港人各家自掃門前雪不是新鮮事, 最可怕的是看慣了在大陸幫到人卻害得焦頭爛額, 因而成就了麻木不仁, 有事就避的功夫, 那才令人嘆息.
小時候姑父去旅行時車禍而死, 全車人唯獨他一人身亡, 就是因為他在途中睡著了. 所以影響到我無論坐任何長途車都是碌大對眼不敢睡覺. 對, 是悶一些, 但仔細看看車外風景, 看看當地人是怎樣生活的, 發一下白日夢, 其實都不太難過. 生與死, 其實都是一眨眼的事.
是否我們香港人寵壞了大陸來的旅客? Disney full house 了, 都無法子啦, 這還是年初四, 小朋友還未上學, 當然會多人吧, 難道整個樂園是你們包起的嗎? 既然可改日再到, 是否可以將就一下? 就算給你進場入到去都是死命排隊啦. 不過老實講, 換過角度, 我都看到香港人的影子... 其實都是早人五十步而已.
又要馬兒好, 又要馬兒不吃草... 哪是咁便宜的事? 俾幾舊水坐飛機去泰國, 好抵係好抵, 有無諗過點解抵? 別人 airline 要千幾二千元做到的這間 airline 幾舊水就有交易, 自然就唔好 expect 咁多吧. 可幸你沒有飛飛下o係天上跌左落黎咋. 見到呢 d airline 如 9I, OX, 5J, AI, 同埋中國民航的, 你都係兜遠些路走吧..

大年初一

恭喜發財！

祝大家新一年身體健康, 搵多d 錢！

Konica Minolta... and more

如果我係女人的話, 我係一個不折不扣尅夫的人.

不是嗎? 我所支持的大部份產品, 不是落得慘淡收場就是死得不明不白...

IBM 的 OS/2 ... Palm 半死不活 (仲有 SONY CLIE)... 一些喜歡的餐廳都不明不白地因業主加租而收檔 (想好似別人般幾多十周年再番去懷念一下? 妄想了!)...

新近的主角是 (Konica) Minolta, 我而家用緊的相機, 亦是我很喜愛的相機. 看到了這消息, 好想喊.

我不是長久的 Minolta 支持者, 但一用後, 發現原來我來遲了. 我真的來遲了.

真是沒有發現原來相機是很好用的, 教識我如果拍照的, 就是 Minolta 的相機. 很多獨當一面的技術, 如 Anti-shake, 相機按鈕 layout 的就手, 就是當你塊面貼近 viewfinder 時個 LCD 就關掉, 離開就開番, 那種易用, 那種方便, 那種體貼, Canon 十世都做唔到. 我只知道, Canon 做的相機, 樣就好睇, 其實跟本就很爛的說.

俱往已.

我要寄望 SONY 嗎? 不好意思, 我全屋只得 SONY CLIE 一部 SONY 的產品, 況且最近 SONY 產品垃圾充斥 (如不知所謂的 R1 相機, 成個包咁o既 network walkman...) 真很難去支持.

為何我要受一次又一次轉 system 的痛苦? 轉一次 system 又要重新學習多一次, 又要重新適應一次, 又要跟完全不同的人交朋友....

很累...

愛你周圍的小動物

雖然我無去反虐待動物遊行, 但睇了最近幾件新聞都非常痛心, 點可以有人咁恨心去虐待d 貓咖, 變態！

我自己養左兩隻貓, 但其實我十多年前在加拿大時已經開始養貓, 到而家跟過我的貓都已經有七隻了. 不過老實講, 我自己都有時候做左好多好錯的決定都幾內疚.

第一次係o係加拿大時要趕著番香港, 又找不到地方收留貓貓, 因此好快就決定了送去 SPCA... 番到家才後悔到不得了...

第二次係帶之前的貓貓去 SPCA 睇急症, 原來佢地忙過頭唔 care 你隻貓係咪有事的, 睇完醫生就打發你走, 結果兩小時後又要帶番去, 之後一小時之後就去了...

第三次係收養了一隻表面好乖, 但教左兩個月連掂都唔俾掂又要四處尿尿的小混混, 結果完全頂唔順都要俾番 SPCA...

第四次係帶貓貓去做絕育手術, 點知o個日唔係相熟的醫生番工, 結果一個簡單的手術都死在手術床上...

第五次係無理會過我的豆豆（張相下面那隻）棚牙的問題, 結果要脫了大半棚牙, 幸好家陣無事, 食得訓得, 多謝天...

經過不少的內疚的經驗, 我對養貓都起碼有了更多的承擔, 更覺得虐待動物是懦夫的行為. 不過我覺得, 就算不是虐待, 養寵物是一件要承擔, 不是隨便的一回事, 一開始要養, 就是要負責它的一生一世的幸福. 有人見我的貓可愛, 就問都想養, 我說, 你有時間嗎？你不會三分鐘熱度嗎？你肯花心機嗎？沒有的話, 不如不養.

更可惜的是今日見到同一份報紙, 一邊幾大版的愛動物遊行, 另一邊卻又大字標題 "吻貓失明". 無知市民不會細閱當中病況有幾咁少見, 只會想到養貓是危險萬分的事, 我會相信不久之後 SPCA 又多了一班無辜的貓貓了...

我一向都不主張在寵物店花幾千元買動物, 在 SPCA 或獸醫診所很容易就可以領養寵物, 只花少少金錢就可給一個無家可歸的小動物一個安頓的地方, 如果你能力許可的話, 何不試試？

Twins. 容祖兒. 歌.

上個禮拜講完叱吒, 都仲有d 意尤未盡.

即係咁, 樂壇總要有些偶像派的, 又要有些唱得的, 又要有些全能的, 才是好玩. 好明顯, Twins 就是第一類型人物. 出道都四五年吧？好好歹歹我都叫睇下o靚妹仔買過幾隻超巨型豪華乜 coupon 都有仲有大把贈品的 CD. 絕對無問題的說, 而且佢地都自有自己生存的空間. 問題在, 一年, 兩年, 三年, 俾盡你了, 連一個最起碼歌手要求唱得不走音, 不震騰騰的唱, 都欠奉. 好了, 你地話我地好努力咁去做, 好辛苦, ok 我完全明白, 但你地對得住買碟的歌迷嗎？家陣唔係話要買正版支持樂壇嗎？你地連最起碼的, 咁多年都俾唔到歌迷, 連伍樂城那些千篇一律的 k 情歌曲式已厭到不得了（聽下最新一輯 CD, 除了主打歌在電視日播夜播之外, 你有無印象？）, 你兩個o靚妹仲有咩 "賣點"? 就連, "露點" 都無野可看的時候, 就是觀眾放棄你的時候了. 睇下人地 Krusty 兩個o靚妹, 都只不過出道一年都無, 講野有紋有路, 大方得體, 更唔好講 at17 又講得又作得又唱得 (只係有一半唔睇得, 不過非戰之罪吧), Twins 兩個o靚妹踏台板咁多年都仲係白白痴痴, 都唔知佢地係真係傻定係裝出來了.

我其實一向都好欣賞容祖兒的歌, 有唱功, 有正歌, 就算不是自己的作品都算是唱得之人, 不計那些地下傳聞其實我都幾喜歡她的. 可惜多年來架起來的形象, 就是一句話就蕩然無全. 我坐在 A 區, 好清楚是有人噓你. 你唱咁多年歌, 你以前個樣幾咁李笑好, 都無問題. 是否你真係覺得自己是天后, 所以就無人會噓你？唔好傻啦, 在場內絕大部份人都係碌成個月人工的咭數來換一張飛, 都絕對可代表一個階層的聽眾, 唔似得你讀書唔成剩係識得唱歌的死o靚妹. 我還見證到記者都未必會講的, 就是你唱歌的時候, 成場人無人有反應, 有反應的, 就是起身去廁所. 不正式統計過, 你唱歌的時候係整晚有歌星表演的唯一廁所位, 算榮幸吧？不要問我點解會咁樣, 正如你恩客老闆楊生話, 觀眾先至係最跟紅頂白 (忘記了, 我要聽番先）, 昨日支持你, 今日就會離棄你, 唔會有原因的. 亦正因為咁, 我都要跟紅頂白一下, 不會再聽你的歌, 不會再買你的碟, 以示對你大言不慚的抗議. 你個好老友何韻詩得一個獎, 歌都無一句唱, 講的大方得體幾多, 感人得令人流淚, 真係抵我由第一隻碟 first 買到而家梁祝都一直咁支持.

又正如英皇唱片公司的要人話網上賣歌係唔係有咁大市場, 又話賣唔哂點算, 我諗, 不能與時並進的, 死守著以前成功的 formula, 就由得他吧. 之前都講話, 在澳洲的 iTunes Music Store 找到不少 Gold Label 的歌手的新歌, 我絕對相信是一個更大的事的起步; 克勤唱咁多年歌, 我都已經生厭了, 忽然又整了一隻富有話題的 CD, 就算是誠意, 功夫都一拚搭夠了吧; 再看重生的 Eason, 這樣才是他的風采, 哪有像在英皇時般半死不活, 拍這個電視拍那個爛鬼電影, 與音樂完全風牛馬不相及. 你賴別人不買 CD 用 BT, 歌手收入減所以做更多 "秘撈", 還是其實跟本是你們的吸血鬼榨乾了音樂, 使人唾棄了本來前途光明的歌者 ? 再講, 你收人地 Karaoke 店幾多錢版權費 ? 我真是不信你們沒有錢了.

(老實講, 我都唔知打咁多字去教精人係為乜? 當係我立此存照, 幾年後如果有唱片公司收檔就唔好賴人了)

2006 叱吒樂壇頒獎禮

好不容易儲了兩年40000的分, 不看拉闊, 就是為了入場看我覺得是眾頒獎禮最好睇, 最實至名歸的頒獎禮.

大體上我都滿意賽果, 只是...

仆街劉德華成日怨商台唔俾獎你, 俾獎你你又唔出現, 你當自己好巴屎閉？食屎啦你. 我鬧足咁多年你收皮都仲唔收皮仲要霸住個獎, 俾 hocc 好過啦.
不滿為何 hocc 無歌唱! 只係唱左幾句勞斯萊斯, 真係唔夠喉. 佢拎銀獎時的說話真係非常感人.
今年新人真係好勁, Soler 彈出已是令人括目相看, 仲有衛蘭, 側田, 分分鐘比好多所謂一線歌手更好賣
Wyman 話, 好樂意見到班新人有競爭之餘亦是很朋友, 造樣才有進步; 我都留意到好多時新人們都你多謝我, 我多謝你. 那些自覺得不可一世的前輩真係要好好反醒.
容祖兒一句 "你地唔係噓我下話?" 就覺得佢唱咁多年歌都係唔識大體. 呢間唱片公司真係無得救. 喂, 唔噓得咖？睇睇你唱歌o個陣係全場唯一一個廁所位（真的, Twins 都無咁多人去廁所）, 可想而知你個女歌手金獎有幾實至名歸.
我真係發覺入得場睇叱吒的人都係o個類人：喜愛有實力, 有自己風格, 最好是唱作人, 因此最熱烈掌聲呼聲的, 唔一定不是紅歌星, 林一峰, at17, 就是這樣.

除夕

今日是一個很熱的除夕... 熱得還要上午收工後立即去跑馬地看朋友的婚禮, 著住昨日出門口時還覺得冷的大褸, 成身臭汗, 不病就奇. 接著去了灣仔的稻香飲茶, 今時今日還有這些不知所謂的服務, 門口叫 number 後見有人彈出來就求其帶人去位坐, 咁都有的. 天口又熱, 火都滾埋.

反到家中沖涼, 原來成件底衫出水的.

都係祝大家新一年事事順利, 一團和氣, 我訓覺了... (等今晚去倒數)

悶到暈的亞洲遊戲展

SONY 又無新機睇, PS3 就只得個殼, 同埋剪得零零碎碎在網上早見過的 movie, show girls 簡直不堪入目,又整埋個無謂的公主島又唔俾男人入去（成個場女人又周圍都入得喎...), 搵笨的 $ 25.

相集在這裡.

Merry Christmas!

Wish you all have a Merry Christmas and a fruitful new year!

太古城 food court

閉關了半年的太古城 food court 終於重新開幕, 每間店舖細左, 但多了選擇. 個場光猛了很多, 又感覺好似大了一點, 感範很潮, 似乎好似 PP 或 Times Square 那種高檔感.

有泰式, 有海南雞飯, 有日本拉麵, 有台灣野...

廚房是開放式的, 而且在 food court 中間有一大排店舖, 感覺好特別.

不過似乎價錢都唔平, 唉, 無左我最喜愛的吉野家同好好粥麵, 點算？

o岩o岩落去食左海南雞飯同 Mini Wok.

行左個圈就賣哂海南雞, 因此叫了燒雞. 雞好嫩滑, 油飯好味, 湯同醬油都似樣, 很不錯. ($38)

mini wok 係炒小菜的, 選擇不太多但都好精美, 叫了一個涼瓜炒魷魚, ＄26 係鑊仔裡面o既野, +$ 8 就有一碗都幾大下的老火湯. 炒的都算幾夠鑊氣, 都幾好味, 個湯好多料, 好甜, 好抵飲.

不過有成十幾間舖頭, 我諗都要好一段時間先至試得均了.