燒烤<慶>中秋
2004.09.28 :: 星期二好似好耐都無試過o係沙灘曬月光, 今晚阿妹同班舊同學約左去石澳燒, 咁我地無乜野做都 join埋啦.
七點幾去到筲箕灣, 街上已經係成班o靚仔o靚妹. o係地鐵站隔離等紅色小巴, 十分鐘左右已經有車, 講搵錢呢 d 小巴真係最耍家. 十二蚊都無計, 唔通真係搖巴士咩...
石澳已經好多人, o係沙灘最盡o個度搵到佢地 book 左o既廖太o既檔口. 原來前後座都有分別, 坐近沙灘的就 300 蚊 4 個鐘, 入 d 就 200, 今晚咁熱, 好彩坐出黎o者, 都仲有 d 風.
燒o既野食唔係咁多, 最攪鬼就係整埋成個煲o係度, 原來個煲用黎煲麵, 再加埋雜菜, 真係豪華得緊要.
有人買左個有上下夾的燒烤架, 可以夾住幾塊肉, 但係拎住件咁o既野燒野食, 好支力... :P
沙灘度好多人放火, 有人繞住棵樹挖個圈裡面放住蠟燭, 好似幫自己兩口子劃地頭, 好不溫馨.
走的時候發生了好老土的事. 阿妹朋友架車無啦啦俾人勾左. 佢地幾個人泊車時都完全見唔到任何指示遲 d 會將位置劃為巴士站, 又無蓋住泊車牌, 又無雪糕筒放o係度唔俾人泊車 (事實上有好多人泊架車o個度). 班差人只係一直識 A 字膊, 問呢個又話唔關佢地事, 問o個個又話唔知搵邊度. 佢地話已經 call 咪 call 左好耐都無應到, 先至拖走架車. 嘩, o個個咁o既廣播, 我地企o係 10 米唔到範圍都聽唔到佢講乜, 究竟佢地有無做過就好懷疑啦.
好啦, 搵到個交通部, 要拎番架車又要牌薄又要 Insurance 證明, 呢幾日又放假, 想拎番架車又要攪成個禮拜, 更唔駛講拖左架車 d brake 又壞哂o個一筆啦. 真係抄牌都無咁嬲, 而且大佬, 佢又無犯交通規則, 你而家老笠左架車仲要攪咁多野先至可以拎番架車, 係咪真係擾民到極呢 ? 老實講, 是否一定要將架車由老遠拖番去北角呢 ? 還是可以將幾架車拖埋一邊就可以呢 ?
之後仲有個差人行埋黎插科打諢, 懶親民咁, 真係打得少.