屋企飯。。。囍點
2008.11.06 :: 星期四上次講的雅敍一堂，係好食，但始終比較貴，不可以經常去。但在街坊的介紹下，發現另一間隱身小店，既便宜，又好食，而且食品都好有特色呢。
呢間真係好隱身的，除非你住在呢頭，否則你係唔會識得黎；就算係住呢頭，無人講你聽，你都未必會行入去（好似我咁）。唔好以為係一間 "hole in the wall"，或者係d廠廈的食肆，店子身處的大廈是一幢新住宅來的，只不過入口位置很騎呢，你未必會發現。
講了咁多，都只係想講，d咁騎呢位的食店，居然晚晚都高朋滿座，差不多一定都要等位的。
好大程度上，係一碗湯，一碗便宜得令人發笑但又絕對足料的老火湯。下面的一碗湯，係沙蔘玉竹椰子煲琵琶骨（希望我無寫錯
），＄12一碗，＄55一煲，無味精（當然）。飲得出用料豐富，味道充足，不喜歡湯料阻定的朋友就會好喜，因為成煲湯一件湯料都無（對我來講就唔係咁好了）。
不過除了湯之外，其實有好多好特別的食品的。有個小食芥末木耳。用芥辣來提味，加上花生碎，木耳變得非常刺激香口，感覺好特別。
另外一個特色小食係蒜香河蝦。應該係用牛油來爆香的，好好味。
不過我最喜的都是這個煲，係炸菜蠔仔豆腐煲，可能你覺得這個組合好似好怪，但原來非常好味，撈飯一流。
唯一不滿的，是這個炒飯。胡椒加薑米的炒飯，雖然飯炒得好乾，但嫌太辣了，搶了炒飯的味道。（其實係抵死的，應該估到係好辣）反而佢有不少的蒸河粉米粉菜式，係用蒸籠蒸出來的，非常幼滑，如果有機會要試試，因為出面都唔多覺有得食。
最後的一個糖水，又係＄12，一端上來就聞到好香的杏仁味，杏仁磨（如果係磨的話）得很幼滑，就算食飽了都想試一點。
咁多味，埋單不用 ＄200，唔駛加一，算係咁啦。
店子名字叫囍點，在鰂魚涌的仁孚工業大廈後面的一條小街叫船塢里 16 號，太古地鐵站A2出口過馬路行一陣就係。