奇遇 - 羊加醬
2004.01.03 :: 星期六店子門口都幾黑 , 正在打量究竟係甚麼料子.
門口貼住蔡瀾在壹周刊的專欄 , 原來係一間食羊的店子, 還是郭少芸打理的, 心中打量 , 明星開的食肆 , 得唔得咖 ? 唔掂的例子太多啦 , 心中還半信半疑...
睇菜單 , 價錢還算可以 , 一客 main course 都大概一百元左右 , 小食 40 幾元都有 . 本來諗住去 California Pizza Kitchen 的新店 , 既然呢度價錢都 ok, 都就試下啦.
一開門 , 就聽到一把好熟悉o既聲音迎接我地 ...
眼前的唔係梅小惠係邊個 ?! 帶住點難以置信的眼光 , 佢帶左我地入去坐低 .... 佢又真係幾靚女喎 , 上鏡肥左 d tim...
佢確實真係o係度幫手咖喎 , 當然唔會係日日o係度啦 , 不過你好彩的話 , 你真係會撞到佢o係度 . 我都見到郭少芸 , 不過戴住口罩 , 有點cool 的 , 所以都無乜講過野.
定一定神先 . 想定要叫食物了 , 要一客羊肉串燒 (3 串 , $38 ) , 反骨雞翼 ($48 ) , 同埋燒羊脾 ( 3 件 , $98 ). 主菜其實有燒羊架 (3 件 $98, 4 件就貴少少), 不過羊脾少食 d , 試試無妨. 比較特別的是 , 你可以從餐牌中選擇十多種的醬汁 , 介紹話 d 醬汁係由羊肉汁煮成 , 特別濃郁 , 之所以店名 "羊加醬" , 就是如此 . Side dish 亦可有 5 種的選擇 , 都算有心思 . 我就選了薄荷汁加薯蓉 , 此乃在加拿大常吃到的組合.
羊肉串燒都幾夠味道 , 好香口 , 只不過嫌份量少左 d.
雖然主打係羊 , 反骨雞翼卻係相當精彩 , 將雞翼起骨反面 , 再炸 , 入口鬆脆 , 但雞肉的肉汁依然在內 , 不太熱氣 , 用來送酒一流.
主菜殺到 , 係一大碟 "羊扒" , sirloin 樣的羊扒 . 烤得好到家 , 肉味濃郁 , 實有風範 . 羊肉香軟可口 , 加上醒胃的薄荷醬汁 , 連咬兩大件 , 汁都撈埋 . 只嫌羊味不夠酥 , 既然入得來食羊的 , 整得酥多少少唔會有問題o既 .
連咬兩件羊扒 , 連薯蓉汁都食埋 , 仲肚餓 ... 點好 ? 急忙叫小惠拎個menu 睇睇 . 睇到隔離叫的 lamb stew ($108) 都幾好樣 , 又叫一個試試 .
Lamb stew 面頭舖了一塊酥皮 , 其實將 d 酥皮一督落 d 汁度就溶哂 , 叫做係焗住佢卦. Sauce 比較濃一點 , 加左 d 紅酒整 , 有點特別味道 , 女友就覺得有點兒怪 , 我o係加拿大就食過咁味o既 stew , 所以都唔特別抗拒 . 見有咁多汁 , 叫多碗白飯撈撈佢先. 如果 d 飯係大大粒的鬼佬飯就真係正啦 , 不過都無謂強求啦 . 呢件 d 羊肉就比較炆得過火少少, 有 d 咬勁 , 不過酥味十足. 講喜歡都係個 "羊扒" 好 d. 不過一大碗加一碗飯都好滿足啦 .
食咁耐 , 小惠就幫我地添足咁耐的水. 成日就笑笑口咁, 一 d 架子都無 , 望到佢就真係開心 . 可惜無機會同佢影張相丫 .
呢餐都食得非常開心 , 羊固然味美 , 碟反骨雞更係驚喜 . 下次再來的時候 , 可以試下食個海南雞飯 , 又或者墨汁意粉 , 睇下個廚的功力如何.
羊加醬
銅鑼灣蘭芳道 3 號地下
3422 8192