Ichiban 爐端燒
2006.08.28 :: 星期一
香港的食肆開完又關, 關完又開, 對於我呢D 懶人來講, 找到一間好食的店子已經難, 找到一間好食的店子過了一排又收了檔又要再找, 更難. 本來想在銅鑼灣找間居酒屋飲飲酒減壓, 想來想去, 一係不見了, 一係太港化, 一係不開張, 之後才猛然記得, 其實在利園後面有一間隱店從來無去過, 就去了.
店子好家庭式, 都坐了很多日本人, 直覺覺得沒有來錯.
不過入來 serve 我們的女士黑口黑面, 而且我同佢講 Aji 佢係唔知我講乜 (唔好玩啦... ), 要我講池魚先知. 覺得有少少不快.
我對 Aji 的鍾愛簡直係到痴情的地步, 所以問我好唔好食都係假. 不過這裡都不錯, 起碼不是有些店子般有鱗或者切到有筋的, 白白浪費了一條好魚.
主打的串燒真是不錯, 不少店舖都拼命地在燒的時候大灑鹽花, 味道濃就是濃了, 不過吃後口乾得過份, 都要買酒水佐之 (當然都是陰謀之一). 這裡卻味道比較淡口, 咸得不太過份, 還食到肉的鮮味. 叫了的雞皮燒得不太脆, 易入口; 雞腎就一般, 反而雞肉及丸子都非常味美, 尤其是雞肉很滑, 推介呢.
之後叫那位女士拎件食淨骨的 Aji 入去炸, 佢黑口黑面地說要看廚房忙不忙. 真麻煩. 早知找好好笑臉的老闆來啦.
之後再加個茶漬就剛剛好. 驚喜的是三文魚茶漬不是用乾的魚, 而是一大片煎好的三文魚弄碎, 不錯不錯.
總的來說, 除了服務的嬸嬸 (我真係唔知係咪老闆娘?) 黑口黑面之外, 食品都對板, 氣氛都好日本, 算是一間不錯的老店子. (更多照片)
地址: 銅鑼灣蘭芳道21號地下
電話: 2890-7580