唔多好盞
2006.04.30 :: 星期日晚上食飯臨急臨忙改地方, 苦思不下要一些清少少的食物, 結果想到了美麗華的客家好棧. 當然是立即打電話訂位, 但對於稻香系的酒樓, 訂位的結果只是這句：「唔好意思, 訂位滿了, 一係八點半, 一係早少少來等位吧.」實在真是很懷疑其真實性, 因為都聽過有故事係去到酒樓居然是無人的.
唯有六點半去到吧！去到, 果真是很多檯都坐滿了, 想不到這樣早就這麼多人食緊晚飯.
坐在門口的位置的卡位, 但唔知是否西人坐的呢？還是設計的是西人呢？檯是高了起碼兩吋, 要坐得很高, 手托得酸痛才夾到食物.
見附近的人叫了梅菜扣肉, 於是叫了一客. 梅菜很爽脆, 很有咬勁, 扣肉就肥瘦適中, 不算得上是太油, 於是立即叫了飯, 用汁撈飯, 都唔錯.
之後就等.. 等... 等.... 飯都食了一大半, 近廿分鐘都未上第二道菜. 之後的蒸饅頭就先來了.
之後才來了鹽焗 / 水雞. 普通過不普通, 不說也罷.
有提過碗飯已食完大半嗎？有位阿姐見我對手只是停一停, 立即走來搶去我的飯碗.
「喂！未食完咖！」
「哦, 你可以用過第隻碗嘛...」
搶
番自己碗飯時, 其餘的菜又來了, 有個東江釀豆腐湯, 幾舊釀上去的肉, 受小小震盪就跌了下來, 結果, 無一粒是完好的（我連相都無影）.
再來了瑤柱鮮菰釀小甜瓜, ok 啦. 之後再來一個蛋黃炒桂花粉絲, 一條條的大豆芽, 很新鮮, 新鮮到係未炒熟的, 還有一浸浸腥味...
難 得的是, 我家人只是食, 咕嚕了兩句, 又無叫人換又無叫人炒過. 更難得的就是, 月頭我提議去 Fusion, 只是開了樽要錢的 Perrier 而無水喉水供應, 就哦我哦到今日, 又上上次我生日我提議去鏞記, 只是碟燒鵝差了少少, 就彈了幾年彈到我都唔夠膽再講我生日去邊度食飯. 同人唔同命, 奈何.
說時遲那時快, 那位阿姐又要收我地仲食緊o個碟野.
「喂！未食完咖喎！」
「仲以為你地食完啦嘛！」
哈, 你問一問我地唔駛死咖o者？永遠都係d 有大陸口音的女待應最愛自把自為, 卻又是成間稻香都係這類師奶做伙計. 我都仲未同你講我去潮樓的激氣野....
算.. 食完... 埋單四百蚊有找, 唔怪得排哂大隊啦.
之後的一整晚, 口乾得要命, 連吞四五杯水都唔掂. 可能呢, 唔係開 Perrier 的餐廳, 就係咁上下了.
記載於譚生食經.
現有 3 個回應.
«上一篇 |
下一篇»
1. 大力 | 2006.05.03 :: 10:59
食客家野, 都係泉張居吧喇! 嘻嘻!
的人搶飯碗, 後生手仔又乾淨既,
我會連佢隻手仔一齊渣到實;
渣唔落既我就先羅實, 跟住順勢張個碗整埋落地,
最好就落地開花! 個的死搶爛搶, 驚死收唔切
個的真係好死討厭!
2. maggielaw | 2006.05.06 :: 10:04
而家好多時出去食飯都係咁
要好服務既就要去貴d既店
真係~~ 唉
另…我有十多日假
如果去日本 (包北海道)
邊走法至平至正~ (我唔好玩機動遊戲，至愛吃)
thx
3. oran | 2006.08.28 :: 10:03
不如下次
由得佢收左碗飯
然後淡淡定叫個經理黎
投訴佢
一碗新鮮熱辣既白飯即到