清溪川韓國家庭式豪邁料理
2003.12.28 :: 星期日韓國人生性豪邁 , 由佢地大件大件食物份量同埋辣到出煙的料理就可知一二 , 今日去呢間舖子 , 原來仲發覺仲有 d 野 ...
舖頭叫清溪川 , 好一個名字 (應該係地方名) , 就o係有小韓國之稱的金巴利街 (加連威老道中間 , 教會 / New Zealand 雪糕旁的一條橫街行入去 ). 短短的一條後巷 , 已經見到有起碼有 3 間韓國料理 , 3 間韓國雜貨店 , 就如去左外國的唐人街一樣 (點解無一條日本街呢 ? ...). 本來想去一間更加家庭式的 , 不過 7 點去到就已經關門大吉 (星期日?!) , 另一間又已去過 , 咁就試試呢間啦 .
舖頭一望見哂 , 7 張臺 , 有燒烤爐 , 無乜特別裝修 , 但都坐滿人 . 雖然無人等位 , 我地都等左10 分鐘左右有人走 , 班姐姐就施施然然執完張臺俾我地 .
餐牌都係好普通的韓國野 , 有燒烤 , 有石頭飯o個 d , 有麵 , 等等 , 最特別係有唔係間間香港的韓國店都有的辣湯窩 , 大大的一盤 , 真係食得好豪邁 , 不過我兩人跟本食唔到咁多 , 湯窩只好留番下次 , 真懷念上次o係澳洲一班人去食個牛肚窩 , 凍凍地一班人圍住個爐食辣野 , 同打邊爐確有異曲同工之妙 ....
正當腦海懷緬著那盤牛肚窩之際 , 阿姐突然殺一句入黎 , " 食乜呀 ? 仲未諗呀 ?"
呀~~ 番黎啦番黎啦~~
咁就叫左牛肋骨煲 ($130), 辣海鮮湯 ($90), 由於未食過炒年糕 , 所以都叫左 ($70).
先來十小碟韓國小食 , 其實就真係呢 d 野都食得飽人 . 金漬一如 expected , 既香又辣 , 紅當當的 , 惹人討好 ; 其他都非常可口 ....
十小碟 
金漬
不過呢幾碟都未坐暖 , 一大窩的牛肋骨煲就出現o係我面前 .... 個牛肋骨煲真係大 ... 大到呢 ... 面頭o個舊牛係要拎番佢出黎 , 咁就係出面見到的 size 啦 . 用手執起舊牛 , 好似野人咁大啖咬落去 , 嘩 , 林到呢 , 真係無牙咬都食得落 . 個煲裡面的汁 , 唔係 , 係湯至o岩 , 飲起來好清甜 , 原來煲裡面仲舖左好多好多的白蘿蔔 . 白蘿蔔將牛肉肉汁收納哂 , 咬起來滿口牛味, 又不失清爽的口感 , 真係一絕 ! 立即叫阿姐送黎白飯一大碗 , 用 d 湯汁撈飯 , 絕頂正也 .
牛肋骨煲 
好正
跟住來的辣海鮮湯 , 辣得來其實唔夠泰國的冬蔭咁辣咁刺激 , 但有少少甜甜地都幾特別 . 湯料好豐富 , 有好多隻蜆 , 蝦 , 小八爪魚等等 (食到一半先記得影相 !!) , 內裡再加一片片的白蘿蔔, 青紅椒托底 , 唔怪得辣得咁甜啦 . 連乾三碗 , 食到額頭都出哂汗 , 連忙叫阿姐黎枝 "彭羚" 啤酒 (Cass 是也 , 韓國啤 ) , 嘩 , 一熱一冷 , 真係過癮 !
辣海鮮湯及炒年糕
至於碟炒年糕嘛 ... 我就嫌太難咬啦 , d 菜就勁甜 , 比較唔o岩口味 , 所以 , 略過啦.
口頭一望 , 只見背後的韓國人叫左一窩餐牌無的物體 , 係一窩清湯 , 上面滾住魚旦魚片咁樣o既野 . 我地眼望望阿姐 , 佢對我話 ... " 你地唔識講就唔識叫咖啦 ~ "... 嘩... 串到 ?! 佢又衰到又唔講係乜喎 , 恨得我牙癢癢的 ....
可惜o既係 , 得兩條友真係食唔到幾多野 , 都無叫燒烤 , 又無叫呢度好出名的魚窩 , 下次一定要搵多 d 人一齊 , 大家圍住個爐一起干杯 , o個種 feel 真係會好正 ~~