星期日一天遊
2005.03.06 :: 星期日今日天朗氣清 , 訓到好晏至起身, 日頭無乜特別好做, 先去了銅鑼灣的小肥羊飲茶.
去過旺角的小肥羊, 普通得很, 而且服務很差, 不會再去. 反而銅鑼灣廣場的不錯 , 起碼服務還算好 , 而且周末茶市每位 $50 任叫任食 , 好抵食.
並非任叫任食就代表將貨就價, 反而點心比附近的酒家都要出色. 我尤其喜歡春卷, 很長很長的一條, 炸得很脆, 羊香四溢, 大人細路都喜愛; 飽點都做得出色, 反而餃類就普通了一點. 最抵就是炒粉麵都有五種可選 , 一個叫炸醬撈油麵就不錯 , 那個唔記叫乜粉的, 都幾好味. 午市不多人, 可能好多人在 openrice 度大彈特彈吧 , 但我又不覺得太差吧. (晚飯火鍋都幾貴, 不過個湯好得, 麻得來味道好特別, 有上癮的感覺).
之後下午去了尖沙咀海港城聽 Phoebus, 而家多了很多小朋友出場, 難道一叮效應令小朋友都大膽了? 那位 Karen 小妹妹的歌藝真出眾, 假以時日肯定又係一個祖兒.
之後去了吃下午茶, 德發牛丸旁的大排檔食咖央多飲奶茶.
在星光行睇 Mac 野, 行商務. 商務正在大減價, 不過今日已經是最後一日. 行過一排書, 見到一大幢 Mook 同 Here Plus 北海道o係度, 有折, 可惜我唔駛買. 好多人o係度睇緊旅遊書, 我心諗, 如果個個都識走入商務, 就咁行下, 都已經買到好多旅遊書啦, 駛鬼問咁多初心者問題 ? 唔知係咪真係時下年青人懶, 還是總是埋首在電腦前面, 還是買書要錢所以就不買呢 ? 雖然我已經懶睇書, 但旅遊書卻不可不讀, 一本在手, 天下無憂呀.
晚上想不到吃甚麼, 去哪裡都是等位, 神經, 都是走回德發吃麵. 我今日不吃牛丸, 吃牛肚, 都係咁好味. 德發後面那檔又是賣粉麵的, 成日都厚著面皮話自己都有牛丸, 好心啦, 人地太出名了, 落得見到經過佢都係無人坐o係度. 我覺得你一係就自己搵 d 特別 d o既出品啦 , 執人口水味唔掂o既.
之後就去聽 concert, 另文有講.