林海峰 x 糯米糰
2002.12.20 :: 星期五
既然講明係 "談歌" 咁當然唔係只係講 CD 咖啦. 前晚去左拉闊壓軸的 林海峰 x 糯米糰. 之前發覺o係銅鑼灣特區居然可以買 Tee 就送兩張飛 , 心諗 , 唔係呀嘛 , 拉闊從來只有四圍撲飛咖咋啵 , 邊有得咁咖 , d 人用左幾萬份換咪浪費哂 ?! 心裡有點擔心, 究竟係咪無人睇到要周圍派飛呢 ?? 唔通香港人容不得落呢個對香港人來講係近乎陌生的糯米糰?
係, 場面真係比以前差左d , 真係有好多吉位, 但都有好個好現象, 就係多左好多細路. 要知道唔係求期有張 Manhattan ID card 就可以睇咖嘛, 仲要碌萬幾二萬蚊先得一張飛, 有幾多細路可以丫? 有多d 細路就個場就唔駛好似有一尊尊佛咁坐係度啦.
o係任何層面來講, 我都覺得林海峰係 stand up comedy 的上佳表表者, 可惜產量不多, 最多都係每年一月一日用 15 分鐘來串人, 而且一般重播時都俾電視台剪到無剩. 因此 , 前晚前半段的大半小時林海峰個人表演就更彌足珍貴: 串人退出同埋反回樂壇 , 串人穿 T-back, 串人演唱會空有華麗外表, 再串埋佢生命中 5 個最重要的女人之一, 真係聽時笑到流馬尿, 打後再抹一把汗. 真係唔知道最後呢段會唔會出碟呢 ? 呵~
之後蘇永康, 盧巧音及楊千嬅走出來唱幾首歌 , 都不及之後出場的糯米糰好玩.
唔知係咪真係怕個個坐o係度會訓著呢 , 阿 Jan 居然夠膽叫全場人走去台前開 P, 咁真係全場人走哂出去台前咁滯, 實在太開心啦 ! 係咁樣 , 糯米糰玩左幾首自己的作品 , 包括巴黎草莓 , 同埋同阿 Jan 一齊 Jam 阿 Jan 新碟的歌 (糯米糰有份製作), 再加幾首 cross-over, 又唱又跳 , 勁歌熱舞, 勁好玩 ! 睇番糯米糰的資料, 幾位成員都差不多係三張野的人物, 但都玩得非常癲, funky 得黎都幾有力度, 玩野得黎都未算得惹人討厭 , 同阿 Jan 的歌路都有少少相近, Jam 起來都有 d 火花 , 睇得非常開心.
主觀希望 , 商台唔好因為呢次拉闊反應冷淡而放棄o係 d 主流的音樂會上介紹 d 非主流音樂啦.
記載於譚生談歌.
現有 1 個回應.
«上一篇 |
下一篇»
1. aajk | 2004.09.02 :: 22:32
哈, 咁遲先睇倒你篇文~ 我都有去呀, 真係好正呀~ 我仲要坐響佢爸爸媽咪同兩個外甥女隔離, 嘩嘩, 勁正!!!
今次拉闊, 個氣氛真係好好, 又跳又叫, 個個都好投入, 諗起都開心~