特級牛肉飯
病從口入
定食のどらや
2005.06.08 :: 星期三
之前行經銅鑼灣這間小店, 門口有幅很大很日本的掛畫, 餐牌得兩版, 全都係定食, 仲要十樣有一半係吞拿魚, 心想貴精不貴多又是日本舖都應該是正野, 不過食了飯, 因此作罷.
今日突然想起那間已結業的韓式小店子, 又是賣定食的, 很懷念, 又想起這間日本店子, 因此就去試試.
哇... 門口已經很多人排隊 , 之前完全無人呢 , 又是飲食男女作怪... 唉. 不過食定食的都不會等得太久吧, 原來十多分鐘就可以坐下了.
老實講 , 餐牌真是正宗日本人風格 , 沒有多餘古怪食品 , 一是主打的吞拿魚 , 有碎蔥吞拿, 炙吞拿片, 炙吞拿扒及中拖羅刺身定 ; 另一些就是雞扒飯等 for 那些不欣賞生魚的客人. 炙, 即是用火燒燒, 使表面熟了部份. 我們當然叫一些平時少吃的啦.
太多人, 都等了十分鐘左右食物才出現. 女友的炙吞拿片定 ($68), 味道不錯, 點醬油就似食刺身一樣 , 不過由於炙熱了的關係, 吞拿多了很香的魚味. 不過俾多 $20 的炙吞拿扒更掂 , 扒的肥油炙得剛好, 滴滿在飯粒上, 外層炙得香口, 裡面則是酥軟的魚肉, 香氣四溢, 吃後口內還充滿著魚香, 噢 ! 真是樂得爬多兩啖飯呢 .
不過飯就比較差了少少, 門口雖說貼了是新潟的 koshihikari, 但煮起來還是 "pat" 了一點, 家中在 UNY 買的還好吃得多, 不過算吧 , 亦無需太苛求, 數十元一個定食都不可能要求高價米王吧 .
店子很日本式兩公婆格局 , 不過主理的是兩位年輕人, 在廚房的是日本人 , 在樓面的似是香港留日的留學生 , 日文都算地道 , 而且亦吸引了不少日本上來幫襯. 希望可以做得長久少少吧 , 因為這樣的平民的店子實在買少見少了.
定食のどらや
駱克道 451 號地下 (紐約戲院灣仔方向行過少少)
是日午飯
Pumpernickel
2005.03.21 :: 星期一
睇完花展之後去天后搵野食. 在泳池對面條街仔有間 cafe, 樣子幾 relaxing, 又有個幾特別的名字, 仲要見到細細舖位都放左個鋼琴o係度, 心諗你唔係咁串嘛, 唔放多兩個位都要放部無人會彈的琴o係度? 印象特別深刻, 不過為存公道, 都在附近走一圈先吧. 天后無端端開了非常多食肆, 中日歐俱有, 各適其式, 實在好應細心研究. 不過行了很久也找不到心中所想的地方, 還是走回頭去呢間個名好特別的 Pumpernickle.
Pumpernickel: n. A dark, sourish bread made from whole, coarsely ground rye.
唔...我對麵包都係... 麻麻o者. 其實唔係O既, 仲有正宗 full course 晚餐, 寫在黑板上. 今晚有白汁菠菜意粉, 煎雞扒 ($88), 同埋茄汁海鮮意粉 ($82). 對前者興趣不大, 因此叫了後二, 另加套餐 $25. 價錢一般, 不算是平, 當然還要看質素才決定吧.
跟套餐的話有個湯同麵包, 湯係蘑菰湯, 一看就覺對頭, 是自家打碎了蘑菰而成的. 蘑菰很香, 湯很滑, 略淡, 比以前在中環 Tony's 吃到的唯一一次要淡, 而我亦喜歡有點點蘑菰碎可咬咬的. 可惜 Tony's 已不復存在, 而這裡卻應該會繼續存在, 當然要好好拍掌!
麵包也很香, 很明顯是自己焗制的. 雖然我對麵包有無名厭惡感, 但亦覺得非常精彩. 如果在一個懶洋洋的下午坐在這裡飲杯啡, 食個包, 都幾寫意.
意粉係好大堆頭的, 蝦, 帶子, 雜菜, 應有盡有, 加入的一點點 cajun 味, 更有畫龍點睛的效果. 對比起早兩天在 Stage Cafe 吃到的所謂意粉, 牛肉幾粒, 加一堆茄汁意粉就成事, 都要收我接近50元, 這個可謂誠意十足了.
雞扒非常入味, 雖然應該係炸, 但炸得皮香肉嫩才是難得. 雞的味道很濃郁, 雖然外面好似炸得比較黑了少少, 但亦無損其美味.
平日餐牌上除了包點咖啡外, 還有 omelete, 星期日吃個 brunch 睇落都唔錯.
要講缺點, 可能只是這小舖是間煙竇, 10 個入來的顧客有 8 個會吸煙的. 我自己問題不大, 坐開少少就oK 了, 而且店內抽氣充足, 煙味也不是個大問題. 反而多些輕煙更有文化感, 牆上的照片就是一大寫照.
噢, 鋼琴呢? 吾... 無謂獻醜吧, 哈哈哈哈.
拎起張咭片看, 才知道原來銅鑼灣 Fashionwalk 同金鐘的遠東金融中心都有分店. 銅鑼灣店是很有型的暗黑cafe, 不過似乎又沒有天后那裡般很有文化的感覺了.
Habitu Pier
2005.02.04 :: 星期五
好特別的一個名字.
睇番 menu, Habitu 只是一個自創的名字, 不過主廚是意大利人, 話想開一間比較 casual 及 cozy 的地方, 所以亦算是一間正宗的意大利餐廳. 舊年在利園二期開張, 它的 Open terrace 我非常喜歡 , 在四處都是大廈的銅鑼灣區有如此的天地實在難得 , 食物亦非常不俗 , 因此成為我所喜愛的地方.
自海運大廈的連卡佛搬了位後 , 地下的一層不久前亦開了幾間餐廳 , Habitu Pier 就是最新的一間. 顧名思義, 餐廳就在碼頭旁; 在天星碼頭望去 , 白色光管圍成的一個大 arch 非常醒目. 如果天不冷的話 , 向海的那幾道門會開啟 , 對著維港嘆下午茶或晚餐, 真是一大樂事.
餐廳內裡裝修是簡約的, 感覺令人舒服 . 近海大廳的幾張梳化都令人覺得很 casual 很舒服 , 但坐得久或者進食時有點不自在 , 都是用來飲酒談天比較好.
以分量來說 , Habitu 是比較少的, 價錢中上, 你不會覺得非常貴, 但也不是很抵食那種 (我在聖誕去了銅鑼灣那間吃 Brunch, 假日及星期六日都有 , 價錢忘記了, 不過由 12 時食 / 坐到 4 時, 非常寫意).
頭盤的吞拿魚及牛仔卷未算出色 , 不過幾特別. 薄餅是意大利真正的 "薄" 餅 , 對吃慣美式大大件的就有點難度了, 不過都算是新鮮美味. 不過最驚喜的都是那個小龍蝦 risotto, 你可以在 order 時要米硬身或是軟身, 硬身的是意大利正宗食法, 當然要品嚐一下. 飯本身軟硬適中 , 龍蝦的香味包著每粒飯 , 就咁吃都非常好吃 , 那隻小龍蝦又非常新鮮 , 肉質鮮艷 , 非常難得 . 那個我已記不起名字的 pasta (只記得是手打 pasta) 也是相當得手, 只不過是肉碎加上長條的麵條 , 香味濃郁 , 雖然麵比較硬身 , 但已經非常精彩.
甜品的賣相不俗 , 不過我已忘了名字 (不是我叫的) , 大家自己發掘一下吧 .
店子現在還未有酒牌 , 因此你可以帶你的陳年佳釀去 , 開瓶費全免 , 以後就未必可以了. 如果你情人節前後還未有地方慶祝 , 不妨看看這裡有沒有位子 ?
大排檔
2005.01.23 :: 星期日
今日要帶隻貓睇醫生, 因此去了醫務所附近的的聖母聖衣堂去 Mass 及找早餐.
行了上去灣仔進教圍, 居然發現了一檔大排檔, 看見有位伯伯叫了一碟炒麵, 樣子非常味美, 於是頭也不回地叫了一碟.
吾! 炒得好好好味呢! 油麵脹卜卜的, 炒得一點也不油, 肉片又醃得非常香, 雖然是簡單的一碟, 卻是我多年都未能再嘗的古老滋味! 奶茶非常香滑, 濃得來非常容易入口呢. 還有簡簡單單的多士, 香味四溢, 好感動呢.
現在大排檔確是見一間少一間, 從前非常味美的大排檔不是結束了, 或是上了舖頭. 老實講, 上了舖頭的大排檔都難以保持水準, 或不知是否風味的原因, 始終都不是原來的味兒. 我知道, 以清潔衛生的大前提, 大排檔是應該取締的. 不過, 好一些風味的東西都消失了, 換來是要坐在石屎牆下而非享受陽光天空之下 (為何香港要找一個有天空的食肆都這樣困難 ?).
去吧, 找一找這個大排檔吧, 辛苦少少, 值得的.
太古城王家沙
2005.01.16 :: 星期日
王家沙在香港都開了幾間分店, 點解要特地提係太古城呢?
一來是剛剛開的, 二來之前去過旺角那一間, 雖然感覺無 openrice o個度講得咁負面, 但委實普通得緊要, 要排隊的話我就不會餐風宿露去等, 反而這一間就值得一提.
(閱讀全文)日本食品節
2004.11.19 :: 星期五
UNY, 吉之島同 Sogo 呢個 weekend 都有日本食節, 大家快d 去睇睇啦.
UNY 呢個星期有便當大會, 有好多車站便當發賣, 愛車站風味的不要錯過 ! 上星期的即劏吞拿魚都好正呢, 買了一盒中Toro, 食後仲有好香的魚味呢. 吉之島有新鮮味噌試食, 同埋有一隻紙包裝的熊本縣 Koshihikari 新米, 2 kg 賣 $108, 想試食日本米又唔想花太多錢的話不妨買一包試試. Sogo 亦有感謝周年祭, 都好多野賣呢.
鯉魚門 ? 南丫島 ?
2004.10.10 :: 星期日
早兩日去左一個聚餐會, 在鯉魚門大佛口, $350 位, 係我老豆叫的. 基本上同我o係街市買的分別不大, 蝦都是細細隻, 甩皮甩骨, 扇貝如五毫子般大, 基本上只係麻麻. 最怕係由村口行去村尾, 好似打仗咁, 過完一關又一關的 "幾多位?" , 煩得要死, 俾我都唔會去多次鯉魚門, 就算點方便都好.
今日受唔住天氣太好, 走一轉去南丫島索罟灣, 去搵好耐無去過的泰苑.
去索罟灣唔難, 在中環四號碼頭坐港九小輪半小時就到, 如果你想行半日的話, 不妨下午到榕樹灣行過去, 都係兩小時左右路程. 在索罟灣, 天虹海鮮酒家係最大地主, 但可能太大了, 我試過一次坐低兩個字, 都無人理我, 就連我走左過左隔離都無人 realize 我走左, 神奇嗎 ?
泰苑的 Karen 姐是好客的, 來這裡其實都只因她做生意實在老實, 唔會肆意強迫你加多分量, 只會叫你夠吃就算, 對我這些叫少少試多多的來說就好了, 再送多枝啤酒, 埋單那筆數真是絕對合理, 而且貨真價實. 下面咁多野, 三個人吃, $586, 我覺得以遊客區來說絕對合理, 起碼唔會好似以上的地區食得把火. 食海鮮, 怎樣算都最緊要新鮮就可以, 吃服務質素才是長遠之道, 難怪除了天虹之外, 最旺場的就是這裡.
地址: 南丫島索罟灣第一街15號地下
電話: 2982-8386