好耐都無寫日記 tim.. 一來公事繁忙, 二來經常覺得生活不快, 無心寫野, 罪過....
但今日真係有d 激得慶起, 沿自有條友叫 忘國奴 的在日遊版極盡抵毀一班版友之事. 雖然心知肚明條友攪事居多, 越係回應佢就越係得戚... 但都始終忍唔住都要寫一寫回應 (費事在谷中回應, 否則一定又一場罵戰) (閱讀全文)
賣國 ? 走狗 ?
2003.02.09 :: 星期日
走捷徑
2003.01.18 :: 星期六
在日遊谷度蒲得耐, 發現好多香港人真係好喜歡飯來張口, 只會發問, 不會自己找去答案. 早幾年 newsgroup 無咁盛行時, 我去旅行咪都係自己找書, 自己上網, 周圍問人: 自己找出來, 印象總會深刻些. 好似而家咁, 一有人問起箱根就個個都問同一條問題; 但有無想過, 自己用 d search engine 如 yahoo, 只花打一篇文章的時間就已可 search 到一版一版睇都睇唔哂的資料呢 ?
可能香港人一早就習慣走捷徑啦....
舊政府, 舊思維
2003.01.10 :: 星期五
美國差不多年年財赤, 但係小布殊話要減稅振興經濟.
香港都係呢兩年先有財赤, 我地月薪 30 萬的高官就振振有詞話要加稅啦.
呢個世界幾奇妙? 點解同一樣野落o係不同人手上會有唔同的效果 ? (閱讀全文)
Lord of the Rings 2
2003.01.06 :: 星期一
尋日睇左優先場, 絕對係一套好電影... 不過....
硬係覺得有種兩頭唔到岸的感覺, 始終係o係中間, 故事又未講完, 又要顧住第一集係威係勢, 所以反而有少少納悶 (並唔係套戲悶 , 而係有點心急想睇哂的感覺). (閱讀全文)
一年之計在於春
2003.01.04 :: 星期六
一年伊始, 除左係新希望之後, 就係大家荷包好快又無咁一截!
唉.. 咪係交稅囉....
雖則, 呢個時勢, 有得交稅即係代表你仲有番咁上下收入, 但一野嘔成個月人工出黎, 我真係寧願月入八千, 住公屋... 甚至攤大手羅綜緩...
雖然係 touchwood, 係人都唔希望咁, 但係我地個政府居然有能力令廣大市民由窮奢極侈的生活一跳就跳到哀鴻遍野的地方, 都不能不對佢地刮目相看. 我想, 如果將呢份能力心思用o係好的地方, 那就真係恭喜都來不及... 如今, 賴又點呢 ? 香港人都係自求多福啦...
新年快樂 ~~
金雞 (少少內容)
2002.12.29 :: 星期日
對吳君如不嬲都又愛又恨, 愛者喜佢喜惡分明, 恨者不滿成日有你講無其他人講, 不過點, 君如姐始終都有 d 料到o既, 金雞就係一個好例子.
可能之前的宣傳有點兒過火, 真係以為係極攪笑 + Forrest Gump 式的玩野, 睇完卻唔係喎, 仲有點兒笑中有淚 tim. 君如由頭帶到尾, 無得好講, 由一個神經o靚妹到紅牌阿姑到有士啤胎的一樓一師奶都唯妙唯肖, 當然其中都有 d 誇張之處, 但都不令人討厭, 值得一讚.
其他串星都非常精彩, 如果遲入場的話就睇唔到陳奕迅的羅命演出, 梁家輝則回復番黑玫瑰那一種攪笑的精彩, 就是黃日華的出場十幾分鐘的老華僑都娘得好開心.
杜汶澤依然非常突出, 繼傻強之後, 一個雞頭d 咁小角色都可以做到咁生猛精彩, 真係有 d 料到. 佢中風之後o個幾下動作, 真係神來之筆, 無得頂.
總括來講, 雖然唔係一套令人發人心省的一套電影, 但套戲勉勵左一眾地位甚低的性工作者之外, 都提醒香港人不要惘自斐薄, 先至係最緊要的主旨.
悶旦....
2002.12.27 :: 星期五
過節係好悶的, 尤其是要番工的日子...
不過總算有d 寒冷的氣氛點綴下, 只可惜有人凍死左...
今朝起身時凍得唔想起身, 又落雨, 回想起來, 氣溫低多兩三度就係雪啦...
落雪總係惹人思潮起伏o既, 微微的雪落在手中, 就似捉不住的小精靈, 一下子就消失得無影無蹤; 下得較大的雪, 包圍住你飄呀飄, 彷彿你就是小嬰孩淋浴在白色的幸福之中; 當雪連風刮起來時, 打得面既凍且痛, 比情人恨心的一巴掌痛得更久更冰冷; 當然, 當你見到地上一大層的積雪時, 你又想抓它一把, 狠狠的向別人投去; 終於, 雪溶時, 雪白的外表亦只留下一大灘污水, 似是告訴你, 風流總是有代價的....
發夢... 做乜想住落雪呢??
Merry Christmas!
2002.12.25 :: 星期三
平安夜的晚餐係千登世鐵板燒, 以一間高級餐廳來講真係算好抵食啦: 有刺身拼盤, 一隻龍蝦, 一隻大帶子, cod fillet, 日本牛 (鹿兒島) 厚燒薄燒, 龍蝦湯 (之前那隻龍蝦的頭整的), 炒飯等等, 兩位都只不過係 $1080, 仲有 9 折 (唔知點解 ? ) 食到捧住個肚走出黎, 但又唔算得上多過頭, 唔錯.
只不過唔係好滿意隔離的兩公婆 + 一個仔, 成晚坐o係度, 兩公婆無停咁 "um" 過, 又話訂左位要等位呀, 又話 d 池魚腥呀, 又話梅酒多冰呀, 跟住轉過頭又叫個仔下一年九月返 LA 開學好早三個月 book 定機票啦, 因為 business 夾埋頭等都係得 9 行呀, 驚無位呀... 咁咁咁... 有錢得好厭悶.... 我 gf 話, 如果我做著佢個仔我真係打死都唔番香港, 我就話, 成張商務機票 "dum" 俾你你有得唔番咩?
Anyway, 算啦, 又唔係我, 雖然o個陣時我老豆老母同佢地都無乜分別, 除左無咁多錢之外....
Merry Christmas!
喪盡天良
2002.12.23 :: 星期一
今朝睇到新聞.... 眼都突....乜到呢個年代, 都仲有d 咁得人驚的事發生?!
願死者早日安息, 佢地父母早點釋懷... 至於行兇者... 唉....
至於下午的大集會, 雖然未至於喪盡天良, 但參與者兇險之處, 意圖摧毀香港的基石, 則昭然若揭... 千古罪人都莫過於此啦...