又係要番工的日子~~
尋日去左石澳燒野食, 好凍, 不過好正.. 我 d friend 連鹽焗蟹都諗得出, 雖然我唔食蟹, 但都好正~ 呵呵~
新年快樂 ~~
金雞 (少少內容)
2002.12.29 :: 星期日
對吳君如不嬲都又愛又恨, 愛者喜佢喜惡分明, 恨者不滿成日有你講無其他人講, 不過點, 君如姐始終都有 d 料到o既, 金雞就係一個好例子.
可能之前的宣傳有點兒過火, 真係以為係極攪笑 + Forrest Gump 式的玩野, 睇完卻唔係喎, 仲有點兒笑中有淚 tim. 君如由頭帶到尾, 無得好講, 由一個神經o靚妹到紅牌阿姑到有士啤胎的一樓一師奶都唯妙唯肖, 當然其中都有 d 誇張之處, 但都不令人討厭, 值得一讚.
其他串星都非常精彩, 如果遲入場的話就睇唔到陳奕迅的羅命演出, 梁家輝則回復番黑玫瑰那一種攪笑的精彩, 就是黃日華的出場十幾分鐘的老華僑都娘得好開心.
杜汶澤依然非常突出, 繼傻強之後, 一個雞頭d 咁小角色都可以做到咁生猛精彩, 真係有 d 料到. 佢中風之後o個幾下動作, 真係神來之筆, 無得頂.
總括來講, 雖然唔係一套令人發人心省的一套電影, 但套戲勉勵左一眾地位甚低的性工作者之外, 都提醒香港人不要惘自斐薄, 先至係最緊要的主旨.
悶旦....
2002.12.27 :: 星期五
過節係好悶的, 尤其是要番工的日子...
不過總算有d 寒冷的氣氛點綴下, 只可惜有人凍死左...
今朝起身時凍得唔想起身, 又落雨, 回想起來, 氣溫低多兩三度就係雪啦...
落雪總係惹人思潮起伏o既, 微微的雪落在手中, 就似捉不住的小精靈, 一下子就消失得無影無蹤; 下得較大的雪, 包圍住你飄呀飄, 彷彿你就是小嬰孩淋浴在白色的幸福之中; 當雪連風刮起來時, 打得面既凍且痛, 比情人恨心的一巴掌痛得更久更冰冷; 當然, 當你見到地上一大層的積雪時, 你又想抓它一把, 狠狠的向別人投去; 終於, 雪溶時, 雪白的外表亦只留下一大灘污水, 似是告訴你, 風流總是有代價的....
發夢... 做乜想住落雪呢??
關心. at 17
2002.12.25 :: 星期三
兩張 CD 一拎起手, 都輕磅得過份: 沒有 VCD, 沒有一大疊的 coupon, 沒有一大本的寫真集, 沒有乜乜物物化妝品的試用裝, 換來的係 20 多首聽得心花怒放愛不釋手的歌曲.
(閱讀全文)Merry Christmas!
2002.12.25 :: 星期三
平安夜的晚餐係千登世鐵板燒, 以一間高級餐廳來講真係算好抵食啦: 有刺身拼盤, 一隻龍蝦, 一隻大帶子, cod fillet, 日本牛 (鹿兒島) 厚燒薄燒, 龍蝦湯 (之前那隻龍蝦的頭整的), 炒飯等等, 兩位都只不過係 $1080, 仲有 9 折 (唔知點解 ? ) 食到捧住個肚走出黎, 但又唔算得上多過頭, 唔錯.
只不過唔係好滿意隔離的兩公婆 + 一個仔, 成晚坐o係度, 兩公婆無停咁 "um" 過, 又話訂左位要等位呀, 又話 d 池魚腥呀, 又話梅酒多冰呀, 跟住轉過頭又叫個仔下一年九月返 LA 開學好早三個月 book 定機票啦, 因為 business 夾埋頭等都係得 9 行呀, 驚無位呀... 咁咁咁... 有錢得好厭悶.... 我 gf 話, 如果我做著佢個仔我真係打死都唔番香港, 我就話, 成張商務機票 "dum" 俾你你有得唔番咩?
Anyway, 算啦, 又唔係我, 雖然o個陣時我老豆老母同佢地都無乜分別, 除左無咁多錢之外....
Merry Christmas!
喪盡天良
2002.12.23 :: 星期一
今朝睇到新聞.... 眼都突....乜到呢個年代, 都仲有d 咁得人驚的事發生?!
願死者早日安息, 佢地父母早點釋懷... 至於行兇者... 唉....
至於下午的大集會, 雖然未至於喪盡天良, 但參與者兇險之處, 意圖摧毀香港的基石, 則昭然若揭... 千古罪人都莫過於此啦...
重新開始
2002.12.20 :: 星期五
真係慚愧, 成十日無寫日記tim... 都因公事私事都煩忙, 番到屋企都唔係好想上網....
呢十日真係做左好多野, 遊行啦, 睇左幾套戲啦, 仲要去埋曼谷做野番埋香港啦, 仲要攪埋困擾好耐的牙周病, 我自己都覺得無得頂.
遊行
呢幾日報紙新聞專欄講得太多啦 , 無乜野好講 , 我只係想講: 而家呢個版本的廿三條, 其實都一定俾立法會通過咖啦; 去遊行, 其實都係想話俾我地 d "專" 貴的司長特首聽 , 我唔 Q 順你地 d 所作所為 !!! 係咁, 講完. 我相信, 好多人都係咁諗.
戲
無間道真係好野黎咖 , 你睇完成套戲 , 覺得好鬼死好睇 , 跟住會想入番場再睇多次究竟邊度犯駁咖 !!!
Harry Potter 呢, 就係你未睇完套戲你就好想佢快 d 完... 點知完來殺左咁多野都仲未完場, 仲要睇住個牛龜咁大的人做個十二歲o靚仔做成套戲, 你會悶到想死....
曼谷
塞車............. 有幾多條鐵路都係咁, 睇怕都係死症一件...
牙周病
洗多 d 牙啦各位, 唔係因為牙痛先至睇牙醫咖 , 你平時刷牙都無可能刷得乾淨. 唔好以為起身刷牙流牙血係好正常一回事, 正如我醫生講 , 任何器官流血都係有病的, 既然咬骨吞肉呢d 咁劇烈的動都頂得住的話 , 刷一刷牙都會流血是否有點不正常呢 ?
林海峰 x 糯米糰
外判
2002.12.10 :: 星期二
Just as expected, 今日等人來收舊 printer 結果係被人放飛機的... 好彩 shift 係我編, 今日放假或明日放假都唔係乜野特別問題, 要人等足一日而半個電話都無回我甚麼原因不能來, 打電話又唔聽, 留 message 又無回頭 , 呢 d 係甚麼撈什子 service?? 雖然我係叫做 "羅著數" o者, 但係我都要真金白銀拎錢出來買機咖嘛...
打番俾 hp, 話同佢地反映番, 唉, 呢個世界有幾多外判出去的係好咖 ? 從來都無. 我地公司外判左好耐的 hardware maintenance 都要收番自己做, 無他o既, 佢地一個o靚做錯野, 我地無啦啦就要揹鑊上身, 揹多幾次自己仲有幾多老本 ?! 當然, 錢都係一個大問題... 人地收我地咁貴, 仲邊有理由俾錢人賺 ? 可憐我好快讀緊 master 之際要花 d 時間讀個電工牌囉...
算啦 , 都唔係第一次俾人放飛機 , 當自己笨囉...
寒冰
2002.12.10 :: 星期二
是日天氣寒冷, 心思結冰, 無乜特別好寫...
原來今日好多地方都落大雪, 中國, 東京...交通癱瘓... 落雪有乜咁好呢? 剷又麻煩, 溶又麻煩, 溶左之後結冰仲麻煩... 我寧願不要見到雪啦...
舊年呢個時間我o係東京喎, 雖然好凍好大風, 都無雪落...
掛住碗築地拉麵 tim...