譚生的手作仔

之前行經銅鑼灣這間小店, 門口有幅很大很日本的掛畫, 餐牌得兩版, 全都係定食, 仲要十樣有一半係吞拿魚, 心想貴精不貴多又是日本舖都應該是正野, 不過食了飯, 因此作罷.

今日突然想起那間已結業的韓式小店子, 又是賣定食的, 很懷念, 又想起這間日本店子, 因此就去試試.

哇... 門口已經很多人排隊 , 之前完全無人呢 , 又是飲食男女作怪... 唉. 不過食定食的都不會等得太久吧, 原來十多分鐘就可以坐下了.

老實講 , 餐牌真是正宗日本人風格 , 沒有多餘古怪食品 , 一是主打的吞拿魚 , 有碎蔥吞拿, 炙吞拿片, 炙吞拿扒及中拖羅刺身定 ; 另一些就是雞扒飯等 for 那些不欣賞生魚的客人. 炙, 即是用火燒燒, 使表面熟了部份. 我們當然叫一些平時少吃的啦.

太多人, 都等了十分鐘左右食物才出現. 女友的炙吞拿片定 ($68), 味道不錯, 點醬油就似食刺身一樣 , 不過由於炙熱了的關係, 吞拿多了很香的魚味. 不過俾多 $20 的炙吞拿扒更掂 , 扒的肥油炙得剛好, 滴滿在飯粒上, 外層炙得香口, 裡面則是酥軟的魚肉, 香氣四溢, 吃後口內還充滿著魚香, 噢 ! 真是樂得爬多兩啖飯呢 .

不過飯就比較差了少少, 門口雖說貼了是新潟的 koshihikari, 但煮起來還是 "pat" 了一點, 家中在 UNY 買的還好吃得多, 不過算吧 , 亦無需太苛求, 數十元一個定食都不可能要求高價米王吧 .

店子很日本式兩公婆格局 , 不過主理的是兩位年輕人, 在廚房的是日本人 , 在樓面的似是香港留日的留學生 , 日文都算地道 , 而且亦吸引了不少日本上來幫襯. 希望可以做得長久少少吧 , 因為這樣的平民的店子實在買少見少了.

定食のどらや
駱克道 451 號地下 (紐約戲院灣仔方向行過少少)

現有 1 個回應

1944 年 6 月 6 日, 盟軍登陸諾曼第, 死傷無數, 就是歷史上慘烈的 D-Day.

2005 年 6 月 6 日, 雖然是太平盛世, 不少蘋果用家會覺得像打了一場仗一般沮喪.

對, 就是 蘋果 在 WWDC 2005 宣佈放棄 PowerPC 而轉投 Intel.

昔日 Steve Jobs 取笑的對象今日卻走在一起, 世事的吊詭可見一斑. 就似 Xbox360 居然會用上 PowerMac G5 來做 demo 一樣來得不可思議.

如果你問我傷心嗎, 我太見慣這些事了. 由 OS/2 到 Palm 到 CLIE, 莫不令我傷心痛哭. 總的來說, 要走的始終要走, 不論到我說話; 況且, 我覺得 Steve Jobs 並非無端端發了傻要跳船的, 反而我覺得是一件值得高興的事. 點解 ?

我有回應!

其實要 confess 的是, 我係自 89 年後就從未去過燭光晚會, 有著各種各樣的籍口, 不在香港也好, 要工作也好, 總是不想再面對. 今年, 沒有不去的籍口了.

當時年紀小, 還在會考的我攪了些這樣的事, 對我, 對中國, 有很深遠的影響; 不是我這一輩的人, 不能明白的.

你說天有眼也好, 你說巧合也好, 講得最慷慨激昂時就是最大雨的時刻, 唯有狼狽散會.

半小時後, 半滴雨也沒有.

返到家中, 聽到曾-soon-to-be-特首話十六年要公正客觀理性對待祖國, 我聽到的潛台詞, 就係, 你班友咪阻住我, 阿爺放水俾我做特首, 咁我梗係要擦啦.

痛.心.疾.首.

我有回應!

記得今日係六.四呀, 一齊去維園吧!

我有回應!

朋友send 來一個 網頁, 以及一個很別緻的歌名: 他約我去迪士尼.

一看 cmidi.com, 就知有料到, 那裡的音樂人絕對是臥虎藏龍之輩, 特別是之前苦榮的 original score 同流行曲 midi arrangement 實在一絕.

講番首歌, 旋律容易上口, 歌詞正中不少少女的情懷, 加上迪士尼效應, 實在不難火速上位. 就似之前我的驕傲一樣 , 不過這次就真是純由網友帶起了.

當然, 更深層的意義就是好的音樂無需要巨頭唱片公司帶動, 任何人都可以在網上發佈自己的音樂, 使我們的樂壇也不需充斥著一大堆只管叫人買碟而又做不出好音樂的所謂音樂人.

因此我更欣賞自作自唱新人王菀之, 等我再聽多幾次 CD 再談.

我有回應!

鳥取站便當 - 蟹飯一客, 盛惠 $70, 好好味, 個盒又好趣緻 tim.

仲有富良野鹵肉便當, 旭川同釧路的蟹便當, 行過 UNY 記得睇睇.

我有回應!

尋日行經旺角見到工人剛剛做起 poster. 6 月 23 日上畫.

應該都會是暑假好戲吧~

我有回應!

今日行過 UNY, 見有姐姐仔 promote 那隻全日本制造香港代理的無洗米

無意間問左佢一句 , 乜千葉縣出產米咖 ?

佢答 , 係呀, 你o係成田機場坐車出黎都見到 d 稻田啦

..... 哦 (我無話佢唔o岩 ... 不過我覺得不可思義o者 ...)

話時話新潟隻 koshihikari 真係好好食 , 100 蚊 2 kg 一包米對大家庭來講當然係天方夜譚 , 但我呢d 唔點溴米氣的人來講真係差唔多了

我有回應!

唔係特別大, 而係特別貴 ...

究竟有無人買咖?

我有回應!

等學友的 Live Performance DVD 好久, 終於等到了. 不負眾望, DVD 的品質非常好, 一隻碟都有齊 Karaoke 及 DTS / DD soundtrack, 雖然我不太喜歡將整個演唱會分開兩隻 DVD,但總叫不錯. 香港演唱會 DVD 的 DTS soundtrack 一向質素不俗, 此碟都不例外, 非常透澈, 層次分明. 不過更喜出望外的是畫面, 如果說上次憶蓮倫永亮的管弦樂 Live 的畫質不俗的話, 這碟就更進一步, 近鏡並無 out focus, 燈光無過紅過光毛病, 畫面都自然得恰到好處, 就似欣賞美日的演唱會影碟一樣清晰, 實在值得一讚. 要知道影演唱會的器材要求都比較高, 更何況會展又大又黑, 有此水準確係難能可貴.

當然 , 如果無學友精彩的演出 , 這一大堆硬件都不值一晒. 學友差不多全部唱別人的歌曲, 一半國語一半廣東話, 無華麗舞台或是一大堆穿插的嘉賓, 就是一首歌接一首歌也全無悶場, 吸引得你聽完一首接一首, 不少更是比原唱者更有味道, 好似悶得淡出鳥來的小城大事, 就唱得比千嬅吸引十倍.

學友的技巧是無可致疑, 舊歌也是百聽不厭, 這隻 DVD 實在是抵到爛.

在電視見到另一個巢皮佬的廣告, 係久違了的玉置浩二的新碟. 我聽玉置浩二的歌, 十居其九都是安全地帶時期, 香港歌星改遍的歌 (都有學友的份兒!), 對玉置浩二, 我可說是陌生的. 當然, 對我來講 , 聽歌只係聽感覺, 我很少會咀嚼歌詞的, 因為好歌你一聽就會感動你, 不會騙你的. 試聽時覺得很好, 因此亦無妨買了一隻回家聽聽. (我是買港版的, 在日本旅遊時無留意原來日版有附 DVD, 真是氣頂)

老實講 , 對玉置是沒有甚麼可以挑剔的, 完美成熟男人的聲音, 每首歌都是淡淡的悠情, 就是一個經歷不少甘苦的男人無意中跟你閒聊, 百般滋味只是淡然一笑之間. 總之, 又是一首接一首的聽, 你只會覺得很舒服, 很 relaxing.

在此推介這兩隻巢皮佬的音樂, 因為我相信, 成熟的人的歌曲, 係更耐聽的.

我有回應!